(Vovworld) - ນັບແຕ່ 14 ປີມານີ້, ໂດຍໄດ້ເປັນທຳນຽມແລ້ວ, ເມື່ອຮອດ ວັນເພັງເດືອນຈຽງ ໄລ່ຕາມຈັນທະປະຕິທິນ, ຢູ່ ນະຄອນຫລວງ ຮ່າໂນ້ຍ ແລະ ບັນດາແຂວງ, ນະຄອນໃນທົ່ວປະເທດ ໄດ້ດຳເນີນເຫດການວັນກາບກອນຫວຽດນາມ. ນີ້ແມ່ນໂອກາດເພື່ອໃຫ້ບັນດາ ນັກກະວີ, ນັກປະພັນວັນນະຄະດີ ກໍຄື ຜູ້ນິຍົມກາບກອນ ຫວຽດນາມ ໄດ້ພົບປະກັນ, ແລກປ່ຽນ ແລະ ແບ່ງປັນນຳກັນບັນດາບົດກະວີທີ່ຕົນເອງປະດິດແຕ່ງໃນຕະຫລອດປີຜ່ານມາ. ພ້ອມກັນນັ້ນ ແຕ່ລະສະຖານທີ່ຈັດຕັ້ງວັນກາບກອນຫວຽດນາມ ຢູ່ ແຕ່ລະທ້ອງຖິ່ນນັ້ນ ກໍແມ່ນເຫດການວັດທະນະທຳທີ່ເປັນເອກະລັກສະເພາະ, ແມ່ນບອ່ນພົບເຫັນບັນດາຜູ້ມີຄວາມເກັ່ງກ້າສາມາດໃນການປະດິດແຕ່ງບົດກະວີ ແລະ ປະກອບສ່ວນນຳກາບກອນໃກ້ຊິດຕິດແທດກັບຜູ້ນິຍົມກາບກອນກວ່າ.
ວັນກາບກອນຫວຽດນາມ
ພາບ:hanoimoi
|
ຍາມຕົ້ນລະດູບານໃໝ່, ບັນດາຜູ້ນິຍົມກາບກອນຫວຽດນາມ ໄດ້ພົບປະກັນທີ່ເຫດການວັນກາບກອນຫວຽດນາມ. ປີນີ້ ວັນກາບກອນຫວຽດນາມຄັ້ງທີ 14 ຈັດຂຶ້ນ ກົງກັບວັນເພັງເດືອນຈຽງ ດ້ວຍຫົວຂໍ້ວ່າ: “ປະເທດຊາດ - ລະດູບານໃຫມ່” ແລະ ຢູ່ທ້ອງຖິ່ນຕ່າງໆໃນທົ່ວປະເທດຫວຽດນາມກໍໄດ້ດຳເນີນເຫດການດັ່ງກ່າວ ໃນພາບດຽວ. ໃນບໍລິເວນ ວັນມ້ຽວກ໋ວກຕືຢ້າມທີ່ຮ່າໂນ້ຍ ຊຶ່ງແມ່ນມະຫາວິທະຍາໄລແຫ່ງທຳອິດຂອງຫວຽດນາມນັ້ນ, ວັນກາບກອນຫວຽດນາມຖືກໄຂຂຶ້ນຢ່າງເປັນທາງການພາຍຫລັງສຽງກອງດັງຂຶ້ນ. ນີ້ແມ່ນວັນບຸນກາບກອນ ເພື່ອເຊີດຊູບັນດາຄຸນຄ່າດ້ານວັດທະນະທຳມະນຸດ ໂດຍຜູ້ນິຍົມກາບກອນໃນທົ່ວປະເທດໄດ້ລໍຄອຍ ແລະ ກໍແມ່ນສະຖານທີ່ແນະນຳບັນດາບົດກະວີຂອງຍຸກປະຈຸບັນໃນຊີວິດໃຫມ່, ປະກອບສ່ວນສ້າງຄວາມໃນໃຈ, ບຸກຄະລິກກະພາບຂອງຊາວຫວຽດນາມ. ນັກກະວີ ຫືວຖິງ, ປະທານ ສະມາຄົມນັກປະພັນວັນນະຄະດີ ຫວຽດນາມ ໄດ້ຢືນຢັນວ່າ:
“ໃນ 13 ປີຜ່ານມາ, ວັນກາບກອນຫວຽດນາມ ກາຍເປັນງານບຸນວັດທະນະທຳໃຫມ່ ດ້ວຍບັນດາຄຸນຄ່າວັດທະນະທຳມະນຸດທີ່ເລິກເຊິ່ງ, ຕອບສະຫນອງຄວາມມຸ້ງມາດປາດຖະຫນາຂອງຜູ້ນິຍົມວັນນະຄະດີໃນທົ່ວປະເທດ. ວັນກາບກອນຫວຽດນາມ ແມ່ນຫນຶ່ງໃນບັນດາວັນກາບກອນທີ່ເປັນເອກະລັກສະເພາະຂອງ 26 festival ກາບກອນທີ່ມີຊື່ສຽງໃນໂລກ.”
ຈຸດປະສົງຂອງວັນກາບກອນຫວຽດນາມ ບໍ່ພຽງແຕ່ເປັນການເຊີດຊູບັນດາຄຸນຄ່າກາບກອນໃນອະດີດຕະການເທົ່ານັ້ນ ຫາກສິ່ງສຳຄັນແມ່ນການແນະນຳກາບກອນຂອງຍຸກປະຈຸບັນຫວຽດນາມ ໃນຊີວິດປ່ຽນແປງໃຫມ່, ສ້າງສາ ແລະ ປົກປັກຮັກສາປະເທດຊາດ, ປະກອບສ່ວນສ້າງຈິດວິນຍານ ແລະ ບຸກຄະລິກກະພາບຂອງຊາວຫວຽດນາມ. ນັກກະວີ ຫງວຽນກວາງທ່ຽວຖືວ່າ:
“ວັນກາບກອນຫວຽດນາມ ແມ່ນໂອກາດເພື່ອໃຫ້ບັນດານັກກະວີ, ຜູ້ນິຍົມກາບກອນພົບປະກັນ, ແບ່ງປັນບົດກະວີນຳກັນ ກໍຄືຮັກສາຄວາມງາມຂອງວັດທະນະທຳທີ່ເປັນມູນເຊື້ອ. ວັນກາບກອນຖືກຈັດຂຶ້ນຢູ່ ວັນມ້ຽວກ໋ວກຕືຢ້າມ ແມ່ນສະຖານທີ່ດຳເນີນເຫດການວັດທະນະທຳໃຫຍ່ ທັງເຮັດໃຫ້ຜູ້ນິຍົມບົດກະວີມີມີຄວາມຮູ້ສຶກ ທັງນຳມາເຊິ່ງແນວຄິດອັນເລິກເຊິ່ງຂອງພື້ນຖານປັດຊະຍາຫວຽດນາມ.”
ພວກຫລານນ້ອຍເຂົ້າຮ່ວມວັນກາບກອນ
|
ຜ່ານການຈັດຕັ້ງໃນແຕ່ລະປີນັ້ນ, ວັນກາບກອນ ຫວຽດນາມ ພັດມີຈຸດໃຫມ່ຫລາຍຢ່າງ ພິເສດແມ່ນສະມາຄົມວັນນະຄະດີສິລະປະ ຫວຽດນາມ ໄດ້ເຊື້ອເຊີນບັນດານັກກະວີ, ນັກປະພັນວັນນະຄະດີສາກົນ ມາພົວພັນແລກປ່ຽນພອ້ມກັບນັກກະວີ, ນັກປະພັນວັນນະຄະດີ ແລະ ຜູ້ນິຍົມກາບກອນຫວຽດນາມ.
ວັນກາບກອນຫວຽດນາມ ປີນີ້, ເປັນຄັ້ງທຳອິດບັນດານັກກະວີມາຈາກ ຄະນະຜູ້ຕາງຫນ້າ ສະຫະພາບເອີລົບ ເຂົ້າຮ່ວມເຫດການ ດ້ວຍບັນດາການເຄື່ອນໄຫວເພື່ອແນະນຳກາບກອນຍຸກປະຈຸບັນຂອງ ເອີລົບ ມາໃຫ້ຜູ້ນິຍົມກາບກອນຫວຽດນາມ. ນີ້ ກໍແມ່ນໂອກາດເພື່ອໂຄສະນາກາບກອນຍຸກປະຈຸບັນຂອງຫວຽດນາມກັບເພື່ອນມິດສາກົນ ຢ່າງກວ້າງຂວາງ ແລະ ຈະແຈ້ງກວ່າ ແລະ ປາດຖະຫນາຢາກນຳວັນກາບກອນ ຫວຽດນາມ ກາຍເປັນເຫດການທີ່ມີລັກສະນະສາກົນ. ນັກກະວີ ຝລັ່ງ Andre Velter, ຜູ້ຕາງຫນ້າໃຫ້ບັນດານັກກະວີມາຈາກ ຄະນະຜູ້ຕາງຫນ້າ ສະຫະພາບ ເອີລົບ ເຂົ້າຮ່ວມເຫດການວັນກາບກອນ ຫວຽດນາມ ຄັ້ງທີ 14 ໄດ້ແບ່ງປັນວ່າ:
“ເມື່ອເຂົ້າຮ່ວມວັນກາບກອນຫວຽດນາມ, ຂ້າພະເຈົ້າໄດ້ມີໂອກາດພົບປະ, ແລກປ່ຽນກັບບັນດານັກກະວີ ຫວຽດນາມ. ນີ້ແມ່ນການພົບປະສົນທະນາລະຫວ່າງບັນດານັກກະວີນຳກັນ ສະນັ້ນ ນີ້ແມ່ນສິ່ງທີ່ສ້າງຄວາມປະທັບໃຈທີ່ສຸດ. ຂ້າພະເຈົ້າເຫັນວ່າ ນີ້ແມ່ນການເຄື່ອນໄຫວດຶງດູດຜູ້ເຂົ້າຮ່ວມເປັນຈຳນວນຫລວງຫລາຍ, ບໍ່ພຽງແຕ່ມີກາບກອນເທົ່ານັ້ນ ຫາກຍັງມີບັນດາລາຍການສະແດງສິລະປະ, ການຟ້ອນ, ດົນຕີອີກດ້ວຍ.”
ຈຸດໃຫມ່ຫນຶ່ງອີກໃນວັນກາບກອນຫວຽດນາມ ຄັ້ງທີ 14 ນັ້ນແມ່ນ ບັນຍາກາດຂອງກາບກອນທີ່ເປັນເອກະລັກສະເພາະໃຫ້ແກ່ພວກນ້ອງອະນຸຊົນ. ນະທີ່ນີ້ ຜູ້ຊົມໄດ້ຮັບຟັງບັນດານັກກະວີເດັກນ້ອຍ ສະເຫນີບັນດາບົດກະວີໂດຍພວກນ້ອງປະດິດແຕ່ງ. ນອກນັ້ນ ພວກນ້ອງຍັງອ່ານບັນດາບົດກະວີຂອງນັກກະວີ ເຈີນດັງຄວາ ແລະ ນັກກະວີ ຊວນກີ່ງ ທີ່ຈັບອົກຈັບໃຈທີ່ສຸດ. ທ່ານນາງ ຫວູທິກີງລຽນ, ຮອງຜູ້ອຳນວຍການສຳນັກພິມຈຳຫນ່າຍ ກີມດົງ ຖືວ່າ:
“ກາບກອນ ແມ່ນວິທີສຳຜັດຢ່າງງ່າຍດາຍເພື່ອໃຫ້ພວກນ້ອງ ຮັບເອົາພາສາ ກໍຄືສຳນຽງ. ເພາະສະນັ້ນ ການຈັດລາຍການກາບກອນໃຫ້ພວກນ້ອງເຍົາວະຊົນແມ່ນມີຄວາມໝາຍສຳລັບບັນດາຜູ້ອ່ານກາບກອນເວົ້າລວມ ແລະ ພວກນ້ອງນ້ອຍເວົ້າສະເພາະ. ພວກຂ້າພະເຈົ້າປາດຖະຫນາວ່າ ດ້ວຍຈຸດທີ່ໃຫມ່ອ່ຽມນີ້ ຈະຊ່ວຍໃຫ້ພວກນ້ອງມີວິທີສຳຜັດກັບກາບກອນກວ່າ, ເໝາະສົມກັບຄວາມນິຍົມຂອງເພື່ອນຜູ້ອ່ານປະຈຸບັນ.”
ວັນກາບກອນຫວຽດນາມ ໄດ້ກາຍເປັນການເຄື່ອນ ໄຫວດຳເນີນຊີວິດວັດທະນະທຳປະຈຳປີ, ດ້ວຍບັນດາຄຸນຄ່າມະນຸດສະທຳຢ່າງເລິກເຊິ່ງ, ຕອບສະຫນອງຄວາມມຸ້ງມາດປາດຖະຫນາຂອງຜູ້ນິຍົມວັນນະຄະດີໃນທົ່ວປະເທດ. ນີ້ແມ່ນຈຸດນັດພົບດ້ານວັດທະນະທຳທີ່ເປັນເອກະລັກສະເພາະ ຊື່ງຢູ່ທີ່ນີ້ ບັນດາຜູ້ທີ່ນິຍົມກາບກອນ ນັບທັງຜູ້ເຖົ້າຜູ້ແກ່ ຕະຫລອດຮອດເດັກນ້ອຍ ໄດ້ມີໂອກາດພົບປະກັນ, ພ້ອມກັນປະກອບສ່ວນເຮັດໃຫ້ຊີວິດທາງດ້ານວັດທະນະທຳ, ຈິດໃຈ ກໍຄືນຳກາບກອນຫວຽດນາມ ໃຫ້ນັບມື້ນັບພັດທະນາ.