ເປັນຄັ້ງທຳອິດ ທີ່ຮູບຖ່າຍກວ່າ 50 ແຜ່ນກ່ຽວກັບສົງຄາມປົດປ່ອຍຊາດຂອງປະຊາຊົນຫວຽດນາມໄດ້ຖືກສຳນັກຂ່າວສານ AP ນຳມາວາງສະແດງທີ່ງານວາງສະແດງ “ ຫວຽດນາມຜ່ານຮູບຖ່າຍກ່ຽວກັບສົງຄາມ” ຊຶ່ງພວມຈັດຂຶ້ນຢູ່ຮ່າໂນ້ຍ, ອັນໄດ້ດຶງດູດແຂກມາຊົມເບິ່ງເປັນຈຳນວນຫຼວງຫຼາຍ ຍ້ອນຮູບພາບທີ່ມີຈິງກ່ຽວກັບສົງຄາມທີ່ຮ້າຍກາດໂດຍບັນດາມືກ້ອງຂອງສຳນັກຂ່າວສານ AP ໄດ້ຖ່າຍເອົາ.
ງານວາງສະແດງ “ ຫວຽດນາມຜ່ານຮູບຖ່າຍກ່ຽວກັບສົງຄາມ” ຖືກຈັດຂຶ້ນຢູ່ຮ່າໂນ້ຍ |
ຄວາມປະທັບໃຈ ແລະ ຄວາມຫຼອກຫຼອນ, ຄວາມເອກອ້າງທະນົງໃຈປະສານກັບຄວາມເຈັບປວດ, ນັ້ນແມ່ນຄວາມຮູ້ສຶກຂອງຫຼາຍຄົນເມື່ອໄດ້ມາຊົມບັນດາຮູບຖ່າຍທີ່ນຳມາວາງສະແດງທີ່ງານວາງສະແດງ “ ຫວຽດນາມຜ່ານຮູບຖ່າຍກ່ຽວກັບສົງຄາມ”. ຮູບຖ່າຍ 50 ກວ່າແຜ່ນ, ແຕ່ລະແຜ່ນກໍແມ່ນຮູບພາບໜຶ່ງທີ່ພັນລະນາເຖິງໄລຍະເວລາ, ໂສກນາດຕະກຳທີ່ມີຕໍ່ປະເທດຊາດ ແລະ ຊາວຫວຽດນາມຢ່າງຈິງຈັງ ແລະ ເຕັມໄປດ້ວຍຄວາມປະທັບໃຈ. ຈາກບັນດາຮູບຖ່າຍກ່ຽວກັບການເດີນຂະບວນປະທ້ວງຢູ່ California, ຮູບຖ່າຍກ່ຽວກັບປະທານາທິບໍດີອາເມລິກາ Johnson ກ່ອນທີ່ໂຮມປະຊຸມປະກາດຂໍ້ຕົກລົງຫຼຸດຜ່ອນການຖິ້ມລະເບີດຢູ່ພາກເໜືອຫວຽດນາມ, ຮູບຖ່າຍກ່ຽວກັບພົນທະຫານອາເມລິກາຄົນໜຶ່ງພ້ອມກັບແຖວຕົວໜັງສື “ War is hell ” (ໝາຍເຖິງສົງຄາມແມ່ນນາລົກ) ຖືກຂຽນໃສ່ໝວກເຫຼັກ ຕະຫຼອດຮອດຮູບຖ່າຍກ່ຽວກັບແມ່ຕູ້ຄົນໜຶ່ງພວມຟ້າວຟັ່ງພາຫຼານນ້ອຍ 2 ຄົນໄປຊອກຫາບ່ອນຫຼົບລີ້ລະເບີດ. ຮູບຖ່າຍທັງໝົດເຫຼົ່ານັ້ນ ໄດ້ສ້າງຄວາມປະທັບໃຈຢ່າງເລິກເຊິ່ງໃຫ້ຜູ້ມາຊົມ. ທ້າວ ກາວຊວນເຍິດ ຢູ່ເມືອງ ເກົາໄຢ໋, ຮ່າໂນ້ຍ ເວົ້າວ່າ :
“ ຂ້າພະເຈົ້າຮູ້ສຶກໄດ້ເຖິງຄວາມຮ້າຍກາດ ແລະ ອະທຳຂອງສົງຄາມ. ອະດີດຕະການທີ່ເຈັບປວດນັ້ນ, ໄດ້ຕັກເຕືອນພວກຂ້າພະເຈົ້າ ຈົ່ງມີຊີວິດຄືແນວໃດ ໃຫ້ສົມກັບບັນດາຄວາມສູນເສຍ, ຄວາມເຈັບແສບ, ລຳບາກກາກກຳທີ່ຄົນລຸ່ນກ່ອນຕ້ອງແບກຫາບ ເພື່ອໃຫ້ພວກເຮົາມີຊີວິດໃນທ່າມກາງສັນຕິພາບຄືວັນນີ້. ເມື່ອ AP ປະກາດຮູບຖ່າຍເຫຼົ່ານີ້, ຂ້າພະເຈົ້າມີຄວາມເຄົາລົບຕໍ່ວິທີການປະພຶດນີ້ທີ່ສຸດ. ຂ້າພະເຈົ້າຫວັງວ່າ ນີ້ແມ່ນວິທີເພື່ອນຳການພົວພັນລະຫວ່າງ 2 ປະເທດກ້າວໄປສູ່ສິ່ງທີ່ຈົບງາມກວ່າເພື່ອໃຫ້ພວກເຮົາປິດອະດີດໄວ້, ມຸ່ງໄປສູ່ອະນາຄົດ ”
ຜູ້ກຳກັບການສະແດງຮູບເງົາ ດັ້ງເຍິດມິນ, ຜູ້ປະສົບຜົນສຳເລັດດ້ວຍຮູບເງົາຫຼາຍເລື່ອງກ່ຽວກັບສົງຄາມຫວຽດນາມໄດ້ເປີດເຜີຍວ່າ : ດ້ວຍກ້ອງຖ່າຍຮູບຂອງບັນດາມືກ້ອງ AP ນັ້ນ, ສົງຄາມຢູ່ຫວຽດນາມໄດ້ປະກົດຂຶ້ນເກືອບຄົບທຸກຢ່າງດ້ວຍຄວາມຮ້າຍກາດ ແລະ ທຸກທໍລະມານຢ່າງແສນສາຫັດ. ຮູບຖ່າຍເຫຼົ່ານີ້ ແມ່ນຄຳຕັກເຕືອນທຸກໆຄົນ, ພິເສດແມ່ນໄວໜຸ່ມຫວຽດນາມ ຕ້ອງເພີ່ມຄວາມ ເຄົາລົບຄຸນຄ່າຂອງສັນຕິພາບ, ເອກະລາດ ແລະ ອິດສະຫຼະພາບ. ຜູ້ກຳກັບການສະແດງຮູບເງົາ ດັ້ງເຍິດມິນ ກ່າວວ່າ :
“ ຕ້ອງຂອບໃຈບັນດາມືກ້ອງອາເມລິກາ, ຖ້າບໍ່ດັ່ງນັ້ນ, ການຕໍ່ສູ້ປົດປ່ອຍຊາດຂອງພວກເຮົາ ພຽງແຕ່ສັງເກດສະເພາະແຕ່ທາງຝ່າຍພວກເຮົາເທົ່ານັ້ນ. ເຂົ້າເຈົ້າໄດ້ຖ່າຍເອົາຮູບຫຼາຍແຜ່ນທີ່ມີຈິງກ່ຽວກັບຄວາມເຈັບປວດ, ຄວາມຮ້າຍກາດຂອງສົງຄາມ, ກ່ຽວກັບການຄັດຄ້ານການດຳເນີນສົງຄາມ, ຄວາມໃນໃຈຂອງພົນທະຫານອາເມລິກາເມື່ອເຂົ້າຮ່ວມການສູ້ຮົບ, ແຕ່ເຂົາເຈົ້າບໍ່ເຕັມໃຈ ສະໜັບສະໜູນການສູ້ຮົບນີ້. ເຂົາເຈົ້າຕ້ອງຈັບປືນເພື່ອສູ້ຮົບແບບບັງຄັບ. ທີ່ 2 ແມ່ນເຂົາເຈົ້າຕ້ອງກ້າຫານ, ຕ້ອງລືມເນື້ອລືມຕົວອອກໄປສະໜາມຮົບທີ່ດຸເດືອດນັ້ນ, ຈຶ່ງສາມາດຖ່າຍເອົາຮູບເຊັ່ນນັ້ນໄດ້. ຂ້າພະເຈົ້າຢາກໃຫ້ງານວາງສະແດງນີ້ຕ້ອງຖືກຈັດຕັ້ງຢູ່ທຸກແຫ່ງໃນທົ່ວປະເທດເພື່ອໃຫ້ໄວໜຸ່ມໄດ້ຮູ້ໄດ້ເຫັນ ”
ຮູບຖ່າຍກ່ຽວກັບການຖີ້ມລະເບີດ Napal ຂອງອາເມລິກາ |
ຮູບຖ່າຍ 50 ກວ່າແຜ່ນ, ແຕ່ລະແຜ່ນກໍແມ່ນຮູບພາບໜຶ່ງທີ່ພັນລະນາເຖິງໄລຍະເວລາ, ໂສກນາດຕະກຳທີ່ມີຕໍ່ປະເທດຊາດ ແລະ ຊາວຫວຽດນາມຢ່າງເປັນຈິງ. ຮູບຖ່າຍເຫຼົ່ານີ້ ແມ່ນຄຳຕັກເຕືອນພວກເຮົາກ່ຽວກັບຄວາມຮ້າຍກາດຂອງສົງຄາມ ແລະ ຍິ່ງເພີ່ມຄວາມ ເຄົາລົບຄຸນຄ່າຂອງສັນຕິພາບ, ເອກະລາດ ແລະ ອິດສະຫຼະພາບ. ໃນຈຳນວນຮູບຖ່າຍເຫຼົ່ານັ້ນ, ມີຮູບຖ່າຍ “ຫຼານນ້ອຍ Napal ” ຂອງມືກ້ອງ Nick Ut ຊຶ່ງໄດ້ຖ່າຍເອົາຮູບຫຼານ ກິມຟຸກ ຖືກເຈັບສາຫັດຍ້ອນໄຟໄໝ້ເມື່ອແລ່ນໜີຈາກການຖີ້ມລະເບີດ Napal ເມື່ອປີ 1972, ອັນໄດ້ສ້າງຄວາມປະທັບໃຈແກ່ຜູ້ຊົມ. ມືກ້ອງ Nick Ut ໃຫ້ຮູ້ວ່າ :
“ ເມື່ອຂ້າພະເຈົ້າຖ່າຍໄດ້ຮູບນີ້, ຂ້າພະເຈົ້າໄດ້ຮັບຄວາມເຫັນ, ການສະໜັບສະໜູນຈາກປະຊາຊົນໃນໂລກ. ເມື່ອຮູບຖ່າຍນີ້ ໄດ້ລົງພິມໃນໜັງສືພິມນັ້ນ, ທົ່ວໂລກໄດ້ອອກສຽງຄັດຄ້ານອາເມລິກາ. ຮູບຖ່າຍແຜ່ນນີ້ ມີຄວາມໝາຍສຳຄັນທີ່ສຸດ ເພາະເມື່ອຊາວອາເມລິກາໄດ້ຊົມນັ້ນ ກໍເຫັນໄດ້ເຖິງຄວາມປະລາໄຊຂອງຕົນຢູ່ສະໜາມຮົບຫວຽດນາມ ”
ກວ່າ 40 ປີຄືນຫຼັງ, ສຳນັກຂ່າວສານ AP ໄດ້ແຕ່ງຕັ້ງກອງມີກ້ອງທີ່ດີເດັ່ນ ມາຫວຽດນາມເພື່ອໃຫ້ຂ່າວພາບກ່ຽວກັບສົງຄາມຢູ່ຫວຽດນາມ. ກ່ອນນີ້ 2 ປີ, APໄດ້ໃຫ້ຈຳໜ່າຍຊຸດຂ່າວພາບ “ຫວຽດນາມຜ່ານຮູບຖ່າຍກ່ຽວກັບສົງຄາມ” , ໃນເທື່ອນີ້, AP ໄດ້ເລືອກເອົາຮູບຖ່າຍຈຳນວນໜຶ່ງໃນຊຸດຂ່າວພາບນີ້ ເພື່ອນຳມາວາງສະແດງ ແນໃສ່ແນະນຳໃຫ້ມວນຊົນຮັບຊາບກ່ຽວກັບບັນດາຮູບພາບທີ່ມີຈິງ ແລະ ຮອບດ້ານທີ່ສຸດກ່ຽວກັບສົງຄາມອະທຳໂດຍອາເມລິກາໄດ້ດຳເນີນຢູ່ຫວຽດນາມ. ທ່ານ Gary Pruitt ປະທານ ທັງເປັນຜູ້ອຳນວຍການໃຫຍ່ ສຳນັກຂ່າວສານ AP ໃຫ້ຮູ້ວ່າ :
“ ພວກຂ້າພະເຈົ້າຈັດງານວາງສະແດງນີ້ ແມ່ນເພື່ອແບ່ງປັນກັບຊາວຫວຽດນາມບັນດາຮູບພາບກ່ຽວກັບປະຫວັດສາດ, ກ່ຽວກັບສົງຄາມຢູ່ຫວຽດນາມ. ມີນັກຂ່າວຫຼາຍຄົນຂອງ AP ໄດ້ເສຍຊີວິດໃນສົງຄາມ. ເຖິງວ່ານີ້ແມ່ນວຽກງານທີ່ເປັນອັນຕະລາຍກໍຕາມ, ແຕ່ກໍສຳຄັນທີ່ສຸດ, ພວກຂ້າພະເຈົ້າຍາມໃດກໍພະຍາຍາມ ເຮັດແນວໃດເພື່ອສ່ອງແສງກ່ຽວກັບສົງຄາມຢ່າງເປັນຈິງ ແລະ ຊັດເຈນທີ່ສຸດ”
ຮູບຖ່າຍສ່ວນຫຼາຍທີ່ງານວາງສະແດງ “ ຫວຽດນາມຜ່ານຮູບຖ່າຍກ່ຽວກັບສົງຄາມ” ຂອງ ສຳນັກຂ່າວສານ AP ແມ່ນໄດ້ປະກາດກ່ອນນີ້ 40 ກວ່າປີແລ້ວ. ແຕ່ເມື່ອຈັດວາງຢູ່ມໍ່ກັນ, ຮູບຖ່າຍ 50 ກວ່າແຜ່ນ ຍັງຄົງສ້າງຄວາມປະທັບໃຈຢ່າງເລິກເຊິ່ງເພາະລັກສະນະພາວະວິໄສ ແລະ ຄວາມກ້າຫານຂອງບັນດານັກຂ່າວ, ມືກ້ອງທີ່ມາຈາກອາເມລິກາ .