(vovworld)- ກ່ອນນີ້ 20 ປີ, ອູແນສໂກໄດ້ຮັບຮອງວ່າອ່າວຮ້າລອງ ແມ່ນມໍລະດົກທຳມະຊາດໂລກ. ນີ້ແມ່ນມໍລະດົກໂລກແຫ່ງທີ່ 2 ຢູ່ຫວຽດນາມ ໄດ້ຮັບການຮັບຮອງ, ຖັດຈາກມໍລະດົກກຸ້ງເກົ່າ ເຫ້ວ ເມື່ອປີ 1993. ເຖິງວ່າ, ເປັນຄັ້ງທຳອິດທີ່ໄດ້ປະຕິບັດຂັ້ນຕອນການອະນຸລັກຮັກສາມໍລະດົກຕາມບັນດາຂໍ້ກຳນົດ ແລະ ການແນະນຳຂອງອູແນສໂກກໍ່ຕາມ, ແຕ່ດ້ວຍເຈດຈຳນົງ ແລະ ຄວາມມານະພະຍາຍາມຂອງຕົນ, ແຂວງກວາງນິງຂອງຫວຽດນາມ ໄດ້ປະຕິບັດສຳເລັດວຽກງານນີ້ເປັນຢ່າງ ດີ.
(ພາບ: .tinmoi.vn )
ໃນໄລຍະ 20 ປີນັບແຕ່ອ່າວຮ້າລອງ ໄດ້ຮັບຮອງວ່າແມ່ນມໍລະດົກທຳມະຊາດໂລກນັ້ນ, ບັນດາຍຸດທະສາດ, ໂຄງການ, ແຜນການອະນຸລັກຮັກສາ, ເສີມຂະຫຍາຍຄຸນຄ່າມໍລະດົກໄດ້ ແລະ ພວມຖືກຜັນຂະຫຍາຍຢ່າງຕັ້ງໜ້າ. ບັນດາຄຸນຄ່າພິເສດທີ່ເປັນເອກະລັກສະເພາະຂອງອ່າວຮ້າລອງ ພວມໄດ້ຮັບການເສີມຂະຫຍາຍ ແລະ ອະນຸລັກຮັກສາເປັນຢ່າງດີ, ບັນດາຄວາມສາມາດບົ່ມຊ້ອນ, ທ່າແຮງຂອງອ່າວຮ້າລອງໄດ້ຮັບການເສີມຂະຫຍາຍນຳມາເຊິ່ງບັນດາການປ່ຽນແປງອັນຕັ້ງໜ້າໃນການພັດທະນາບັນດາຂະແໜງການທ່ອງທ່ຽວ, ຊຸກຍູ້ການເຕີບໂຕເສດຖະກິດຂອງທ້ອງຖິ່ນ. ແຕ່ເຖິງຢ່າງໃດກໍ່ຕາມ, ປະຈຸບັນ, ວຽກງານອະນຸລັກຮັກສາ ແລະ ເສີມຂະຫຍາຍຄຸນຄ່າມໍລະດົກອ່າວຮ້າລອງ ກໍ່ພວມຕ້ອງປະເຊີນໜ້າກັບຄວາມຫຍຸ້ງຍາກ, ສິ່ງທ້າທາຍບໍ່ແມ່ນໜ້ອຍ. ຕາມທ່ານນາງຫວູ້ທິທູຖູຍ ຮອງປະທານຄະນະກຳມະການປະຊາຊົນແຂວງກວາງນິງແລ້ວ, ຄຽງຂ້າງບັນດາຄຸນຄ່າທຳມະຊາດຂອງມໍລະດົກໄດ້ຮັບການອະນຸລັກຮັກສານັ້ນ, ບັນດາສະຖານທີ່ທ່ອງທ່ຽວຢູ່ອ່າວຮ້າລອງ ກໍ່ມີໂສມໜ້າໃໝ່, ມີຜະລິດຕະພັນທ່ອງທ່ຽວທີ່ເປັນເອກະລັກສະເພາະຫຼາຍຢ່າງໄດ້ຮັບການສ້າງຂຶ້ນ, ດຶງດູດໃຈແຂກທ່ອງທ່ຽວ:
“ໃນຊຸມປີຕໍ່ໄປ, ກວາງນິງ ຈະສືບຕໍ່ຍູ້ແຮງການຮ່ວມມືກັບສາກົນເພື່ອແນໃສ່ຍາດແຍ່ງການສະໜັບສະໜູນຂອງປະຊາຊົນ ແລະ ບັນດາອົງການຈັດຕັ້ງເພື່ອຮັກສາ ແລະ ເສີມຂະຫຍາຍຄຸນຄ່າມໍລະດົກອ່າວຮ້າລອງ; ເພີ່ມທະວີແຫຼ່ງກຳລັງລົງທຶນໃຫ້ແກ່ວຽກງານອະນຸລັກຮັກສາ, ຮັບປະກັນສະພາບແວດລ້ອມຊີວະພາບ; ຍູ້ແຮງວຽກງານໂຄສະນາເພື່ອໃຫ້ອ່າວຮ້າລອງ ກາຍເປັນຈຸດນັດພົບຂອງແຂກທ່ອງທ່ຽວ, ເປັນສູນທ່ອງທ່ຽວອັນດັບໜຶ່ງຂອງຫວຽດນາມ ແລະ ສາກົນ“.
(ພາບ: vi.wikipedia.org )
ປະຈຸບັນ, ໃນບໍລິເວນແຂວງກວາງນິງ ມີສະຖານທີ່ພັກເຊົາປະມານ 850 ແຫ່ງ, ດ້ວຍຫ້ອງນອນກ່ວາ 13.000 ຫ້ອງ, ໃນນັ້ນມີໂຮງແຮມແຕ່ 1-5 ດາວ 86 ແຫ່ງ; ມີກຳປັ່ນທ່ອງທ່ຽວປະເພດຕ່າງໆກ່ວາ 500 ລຳ, ວິສາຫະກິດທ່ອງທ່ຽວກ່ວາ 40 ແຫ່ງ, ຮ້ານອາຫານ, ສະຖານທີ່ຂາຍເຄື່ອງນັບຮ້ອຍແຫ່ງ….ໃນວິວັດການຂຸນຄົ້ນຄຸນຄ່າມໍລະດົກອາ່ວຮ້າລອງ ໄດ້ເກີດບັນດາການກະທົບທີ່ຫຍໍ້ທໍ້ຕໍ່ມໍລະດົກ, ຍ້ອນເຫດນັ້ນ, ການເສີມຂະຫຍາຍຄຸນຄ່າມໍລະດົກວັດທະນະທຳ ແລະ ທຳມະຊາດໂລກຕ້ອງໄດ້ຮັບການຄວບຄຸມ, ຕ້ອງສ້າງ ແລະ ຈັດຕັ້ງການປະຕິບັດແຜນການຄຸ້ມຄອງການທ່ອງທ່ຽວແບບຍືນຍົງ.
ໃນຫຼາຍປີຜ່ານມາ, ອົງການຮ່ວມມື ແລະ ພັດທະນາຍີ່ປຸ່ນ (ໄຈກາ) ໄດ້ພ້ອມກັບແຂວງກວາງນິງ ອະນຸລັກຮັກສາເຂດທຳມະຊາດອ່າວຮ້າລອງ. ຫຼາຍໂຄງການໄດ້ຮັບການປະຕິບັດ ໄດ້ປະກອບສ່ວນຍົກສູງສະຕິ, ປ່ຽນແປງການກະທຳປົກປັກຮັກສາສິ່ງແວດລ້ອມຂອງຊາວປະມົງ ແລະ ແຂກທ່ອງທ່ຽວຢູ່ອ່າວຮ້າລອງ. ທ່ານ Koji OTSUKA ສາດສະດາຈານມະຫາວິທະຍາໄລ OSAKA ຜູ້ຕາງໜ້າຂອງອົງການໄຈກາ ເນັ້ນໜັກວ່າ: ປັດໄຈສຳຄັນເພື່ອອະນຸລັກຮັກສາມໍລະດົດທຳມະຊາດໄດ້ເໝືອນເດີມ ນັ້ນແມ່ນສະຕິຄວາມຮັບຮູ້ຂອງຜູ້ທີ່ເປັນເຈົ້າຂອງ ມໍລະດົກນັ້ນ:
“ສຳລັບການປົກປັກຮັກສາອ່າວ OSAKA ຂອງຍີ່ປຸ່ນ, ພວກຂ້າພະເຈົ້າກໍ່ປະສົບກັບກັບຫຼາຍບັນຫາ. ຈາກນັ້ນສາມາດຖອດຖອນບົດຮຽນສຳຄັນທີ່ສຸດນັ້ນແມ່ນ, ຕ້ອງສຶກສາອົບຮົມໃຫ້ແກ່ລຸ້ນໜຸ່ມປະຈຸບັນ ເພື່ອຍົກສູງສະຕິໃນການປົກປັກຮັກສາສິ່ງແວດລ້ອມ. ເຮັດແນວໃດເພື່ອຖ່າຍຖອດສະຕິດັ່ງກ່າວໃຫ້ແກ່ລຸ້ນຫຼັງ. ຫວຽດນາມຕ້ອງເລີ່ມປະຕິບັດວຽກງານດັ່ງກ່າວໂດຍໄວ ເພື່ອປົກປັກຮັກສາອ່າວຮ້າລອງ ໃນອະນາຄົດ“.
ແຂກທ່ອງທ່ຽວພາຍໃນ ແລະ ຕ່າງປະເທດຈຳນວນໜຶ່ງເມື່ອມາທ່ອງທ່ຽວອ່າວຮ້າລອງ ລ້ວນແຕ່ໃຫ້ຂໍ້ສັງເກດວ່າ, ປະຈຸບັນ, ບັນດາຮູບແບບການບໍລິການ, ທ່ອງທ່ຽວຢູ່ເຂດທັດສະນີຍະພາບແຫ່ງນີ້ຍັງໜ້ອຍ ແລະ ຂາດລັກສະນະອາຊີບ. ພິເສດ, ເກືອບຄືວ່າບໍ່ທັນມີ ບັນດາຜະລິດຕະພັນທ່ອງທ່ຽວທີ່ເປັນເອກະລັກສະເພາະຂອງຮ້າລອງ. ບັນດາຮາກຖານດຳເນີນທຸລະກິດພຽງແຕ່ໄດ້ແນະນຳບັນດາຜະລິດຕະພັນລວມຂອງທ້ອງຖິ່ນຕ່າງໆຢູ່ກວາງນິງ ແລະ ຫວຽດນາມ ເທົ່ານັ້ນ. ທ່ານຫງວຽນວັນຕວນ, ຫົວໜ້າກົມໃຫ່ຍທ່ອງທ່ຽວຫວຽດນາມ ເວົ້າວ່າ:
“ຫວຽດນາມ ຈະຖືກເສຍຫາຍກ່ອນໝູ່ຖ້າຫາກວ່າສິ່ງແວດລ້ອມຂອງອ່າວຮ້າລອງບໍ່ໄດ້ຮັບປະກັນ. ຄຽງຄູ່ກັນນັ້ນແມ່ນບັນຫາພັດທະນາຜະລິດຕະພັນ, ສິ່ງດັ່ງກ່າວບໍ່ມີຜູ້ໃດເຮັດແທນໃຫ້ວິສາຫະກິດໄດ້. ຫວຽດນາມ ຕ້ອງເພີ່ມທະວີການໂຄສະນາ ສົ່ງເສີມການທ່ອງທ່ຽວ, ຕ້ອງສ້າງຄວາມໄວ້ເນື້ອເຊື່ອໃຈ, ປະກອບສ່ວນເຂົ້າໃນວຽກງານຄຸ້ມຄອງສະຖານທີ່ທ່ອງທ່ຽວ “.
ຄຸນຄ່າຂອງມໍລະດົກອ່າວຮ້າລອງ ໄດ້ລື່ນກາຍລະດັບຂອງຊາດ, ເປັນຄຸນຄ່າຂອງມວນມະນຸດ, ທົ່ວໂລກ. ຍ້ອນເຫດນັ້ນ, ເພື່ອໃຫ້ອ່າວຮ້າລອງ ທັງເສີມຂະຫຍາຍບັນດາຄຸນຄ່າ ທັງຮັກສາຄຸນຄ່າເດີມຕາມສົນທິສັນຍາຂອງອູແນສໂກໄວ້ໄດ້, ແມ່ນຕ້ອງມີຄວາມພະຍາຍາມ ແລະ ຄວາມຕັດສິນໃຈສູງຂອງທຸກຂະແໜງການ, ຄະນະ, ຫົວໜ່ວຍ, ອົງການຈັດຕັ້ງທ້ອງຖິ່ນຂອງຫວຽດນາມ ກ່ວາອີກ, ຫາກບໍ່ພຽງແຕ່ຂອງສະເພາະແຂວງກວາງນິງເທົ່ານັ້ນ./.