ໃນງານມະໂມລານລະຄອນຕຸກກະຕາສາກົນຄັ້ງທີ 4 ຊຶ່ງຫາກໍຈັດຂຶ້ນຢູ່ຮ່າໂນ້ຍເມື່ອບໍ່ດົນມານີ້, ຄະນະສີລະປະກອນຫວຽດນາມໄດ້ແນະນຳບັນດາລາຍການລະຄອນລະຄອນຕຸກກະຕາເທິງບົກ ແລະ ບົນໜ້ານ້ຳ ທີີ່ມີລັກສະນະຫົວຄິດປະດິດສ້າງຊຶ່ງໄດ້ຮັບການຕີລາຄາສູງຈາກສະພາກວດສອບ. ນີ້ກໍແມ່ນໂອກາດເພື່ອໃຫ້ບັນດານັກສິລະປະກອນຫວຽດນາມຢັ້ງຢືນສິລະປະລະຄອນຕຸກກະຕາຫວຽດນາມກັບບັນດາເພື່ອນມິດສາກົນໃນສະພາວະທີ່ຫວຽດນາມພວມເຊື່ອມໂຍງເຂົ້າກັບພື້ນຖານວັດທະນະທຳໂລກ.
ລາຍການສະແດງລະຄອນຕຸກກະຕານ້ຳຂອງຫວຽດນາມ |
ໃນລາຍການສະແດງລະຄອນຕຸກກະຕານ້ຳ “ ບິນຂຶ້ນຈາກໜ້ານ້ຳ ” ຂອງນັກສິລະປະກອນດີເດັ່ນ ຈູເລື້ອງ ສັງກັດໂຮງລະຄອນຕຸກກະຕາ ທັງລອງ ທີ່ງານມະໂມລານລະຄອນຟ້ອນຕຸກກະຕາສາກົນຄັ້ງທີ 4, ປະເພດສິລະປະລະຄອນຕຸກກະຕານ້ຳພື້ນເມືອງຂອງຫວຽດນາມໄດ້ຖືກບັນດານັກສິລະປະກອນເຮັດໃໝ່. ບົນເວທີສະແດງລະຄອນຕຸກກະຕານ້ຳທີ່ລຶ້ງເຄີຍນັ້ນ ບໍ່ພຽງແຕ່ປະກົດເຫຼືອແຕ່ທ້າວເຕ້ວ, ຜູ້ລ້ຽງເປັດເທົ່ານັ້ນ, ຫາກໃນປະຈຸບັນໄດ້ມີລະຄອນ “ການຊົນກະທິງ” ທີ່ເຂັ້ມຂົ້ນໄປດ້ວຍສີສັນຂອງປະເທດແອັສປາຍອີກດ້ວຍ. ເລື່ອງບັນດານັກສິລະປະກອນວາດພາບເຖິງບັນດາຈຸດວັດທະນະທຳທີ່ເປັນເອກະລັກສະເພາະຂອງໂລກບົນເວທີສະແດງຢູ່ຫວຽດນາມ ແມ່ນໄດ້ຮັບຖືວ່າ ແມ່ນທິດກ້າວເດີນທີ່ມີຫົວຄິດປະດິດສ້າງເພື່ອປ່ຽນໃໝ່ເວທີສະແດງ ລະຄອນຕຸກກະຕານ້ຳພື້ນເມືອງ, ທັງສະແດງໃຫ້ເຫັນສິລະປະພື້ນເມືອງຂອງຫວຽດນາມ, ທັງຕອບສະໜອງຈິດໃຈເຊື່ອມໂຍງດ້ານວັດທະນະທຳອີກດ້ວຍ. ນັກສິລະປະກອນ Sarah Rowland Barker ສັງກັດຄະນະສິລະປະລະຄອນຕຸກກະຕາແຫ່ງລາຊະອານາຈັກອັງກິດໃຫ້ຮູ້ວ່າ :
“ສິລະປະລະຄອນຕຸກກະຕານ້ຳຂອງຫວຽດນາມແມ່ນຍອດຢ້ຽມ, ຄັກຫຼາຍ. ພິເສດແມ່ນດົນຕີ, ດົນຕີແມ່ນມ່ວນຫຼາຍ. ສຳລັບລາຍການສະແດງລະຄອນຕຸກກະຕາເທິງບົກແມ່ນເປັນໜ້າຈັບໃຈແທ້ ”
ບັນດານັກສິລະປະກອນຫວຽດນາມໄດ້ນຳບັນດາລາຍການລະຄອນຕຸກກະຕາມາສະແດງຢູ່ທີ່ ງານມະໂມລານລະຄອນຟ້ອນຕຸກກະຕາສາກົນຄັ້ງນີ້ ແມ່ນໄດ້ຮັບການຕີລາຄາສູງຈາກສະພາກວດສອບ ແລະ ບັນດາເພື່ອນມິດສາກົນຍ້ອນມີຄຸນນະພາບສູງທາງດ້ານສິລະປະ. ແຕ່ລະລາຍການລ້ວນແຕ່ມີໂຄງປະກອບລະຄອນ ແລະ ໂຄງຮ່າງຢ່າງຮັດກຸມ, ປະສານສົມທົບລະຫວ່າງບັນດາປະເພດສິລະປະທີ່ແຕກຕ່າງກັນ, ອັນໄດ້ເຮັດໃຫ້ ສິລະປະລະຄອນຕຸກກະຕາເພີ່ມຄວາມອຸດົມສົມບູນ. ແຕ່ລະລາຍການສະແດງລະຄອນຕຸກກະຕາກໍມີລັກສະນະເພິນຈິດ, ເຂັ້ມຂົ້ນໄປດ້ວຍວັນນະຄະດີສິລະປະ ແຕ່ຍັງຄົງມີສີສັນພິເສດສະເພາະຂອງ ລະຄອນຕຸກກະຕາຫວຽດນາມ. ທ່ານ Chua Soo Pong ຊາວສິງກະໂປ ຊຶ່ງເປັນສະມາຊິກໃນສະພາກວດສອບງານມະໂມລານລະຄອນຕຸກກະຕາສາກົນຫຼາຍຄັ້ງເປີດເຜີຍວ່າ :
“ ຂ້າພະເຈົ້າຖືວ່າ ຫວຽດນາມພວມປະຕິບັດວຽກງານອະນຸລັກເປັນຢ່າງດີ, ບໍ່ພຽງແຕ່ສຳລັບປະເພດສິລະປະລະຄອນຕຸກກະຕານ້ຳເທົ່ານັ້ນ, ຫາກຍັງສຳລັບຫຼາຍປະເພດສິລະປະລະຄອນຕຸກກະຕານ້ຳອື່ນອີກດ້ວຍ. ດ້ວຍການຈັດຕັ້ງເຫດການນີ້, ພວກເຮົາໄດ້ດຶງດູດຄວາມສົນໃຈຈາກຜູ້ຊົມໃນໂລກຢ່າງຫຼວງຫຼາຍ, ທັງນີ້ກໍຊ່ວຍເຂົາເຈົ້າຊອກຮູ້ກ່ຽວກັບວັດທະນະທຳຫວຽດນາມ, ກ່ຽວກັບລະຄອນຕຸກກະຕານ້ຳ ຂອງຫວຽດນາມ. ຂ້າພະເຈົ້າເຫັນໄດ້ຄວາມຄາດຫວັງຢາກປ່ຽນໃໝ່, ປະດິດຄິດແຕ່ງບັນດາບົດລະຄອນໃໝ່ຂອງບັນດານັກສິລະປະກອນ. ແລະ ໃນງານມະໂມລານລະຄອນຕຸກກະຕາສາກົນຄັ້ງນີ້ ກໍແມ່ນໂອກາດເພື່ອໂຄສະນາ, ແນະນຳໃຫ້ເພື່ອນມິດສາກົນກ່ຽວກັບສາຍສຳພັນ, ນ້ຳໃຈມິດຕະພາບລະຫວ່າງພື້ນຖານສິລະປະລະຄອນຕຸກກະຕາເວົ້າລວມ ແລະ ລະຄອນຕຸກກະຕານ້ຳຂອງຫວຽດນາມເວົ້າສະເພາະ ”
ທີ່ງານມະໂຫາລານປີນີ້, ບັນດານັກສິລະປະກອນຫວຽດນາມ ໄດ້ແນະນຳບັນດາລາຍການສະແດງລະຄອນຕຸກກະຕາທີ່ດູດດື່ມໂດຍບັນດານັກສະແດງທີ່ມີປະສົບການ, ສະແດງໃຫ້ເຫັນຄວາມເປັນເອກະລັກໃນການປະສານສົມທົບລະຫວ່າງມະນຸດ ກັບຕົວລະຄອນຕຸກກະຕາ. ເມື່ອແນະນຳກ່ຽວກັບ ລະຄອນຕຸກກະຕາຫວຽດນາມກັບເພື່ອນມິດສາກົນ, ບັນດານັກສິລະປະກອນຫວຽດນາມຍາມໃດກໍຕ້ອງຊອກຮູ້, ຄົ້ນຄ້ວາບັນດາວິທີເພື່ອປ່ຽນໃໝ່ການສະແດງລະຄອນຕຸກກະຕາ, ແຕ່ພ້ອມທັງຮັກສາຈຸດພິເສດສະເພາະຂອງ ລະຄອນຕຸກກະຕາຫວຽດນາມ. ນັກສິລະປະກອນ ຫງວຽນຕ້ຽນຢຸງ ເປີດເຜີຍວ່າ :
“ເມື່ອທຳອາຊີບນີ້, ຂ້າພະເຈົ້າມີຄວາມຫວັງພຽງຢ່າງດຽວວ່າ ຈະມີລາຍການສະແດງຄືແນວໃດເພື່ອສະແດງໃຫ້ເຫັນຄວາມສາມາດດ້ານວິຊາຊີບ ກໍຄືປະສິດທິຜົນ ເພື່ອເຮັດແນວໃດຕີລາຄາໄດ້ເຖິງພື້ນຖານສິລະປະການສະແດງລະຄອນຕຸກກະຕາຫວຽດນາມໃນໄລຍະນີ້ ແລະ ທີ 2 ແມ່ນສະແດງໃຫ້ເຫັນສີສັນຂອງຕົນໃນການເຊື່ອມໂຍງເຂົ້າກັບສາກົນ. ສຳລັບຕົວລະຄອນຕຸກກະຕາຊຶ່ງບໍ່ສາມາດສະແດງທ່າທີອອກຜ່ານໃບໜ້າສີຕາໄດ້, ທຸກສິ່ງເຫຼົ່ານັ້ນຖືກສະແດງອອກດ້ວຍກຳລັງຄວາມສາມາດຂອງນັກສິລະປະກອນໂດຍຜ່ານສີມືອັນຄ່ອງແຄ້ວ ແລະ ສຽງເວົ້າຂອງຕົນ. ”
ໃນຂະບວນວິວັດແຫ່ງການເຊື່ອມໂຍງເຂົ້າກັບພື້ນຖານວັດທະນະທຳສາກົນ, ລະຄອນຕຸກກະຕາຫວຽດນາມຍາມໃດກໍສາມາດຢັ້ງຢືນຕົນເອງ ແລະ ມີຈຸດຢືນໃນຈິດໃຈຂອງຜູ້ຊົມທັງຢູ່ພາຍໃນ ແລະ ຕ່າງປະເທດ ໂດຍຜ່ານບັນດາລາຍການສະແດງພ້ອມກັບບັນດາເພື່ອນຮ່ວມອາຊີບສາກົນ. ຜົນສຳເລັດນີ້ ກໍເປັນກຳລັງໜູນເພື່ອໃຫ້ບັນດານັກສິລະປະກອນຫວຽດນາມປ່ຽນໃໝ່ທາງດ້ານຄຸນນະພາບວິຊາສະເພາະສິລະປະໂດຍອີງບົນການສືບທອດສິ່ງທີ່ຍອດຍິ່ງທີ່ມີມາແຕ່ດົນນານ ເພື່ອນຳສິລະປະ ລະຄອນຕຸກກະຕາກາຍເປັນຜະລິດຕະພັນວັດທະນະທຳທີ່ເປັນເອກະລັກສະເພາະຂອງຫວຽດນາມເພື່ອແນະນຳກັບເພື່ອນມິດສາກົນ.