(vovworld)- ຂັບຊວານ ທັງແມ່ນຜະລິດຕະພັນ, ທັງແມ່ນປະກົດການວັດທະນະທຳພື້ນເມືອງທີ່ເປັນເອກະລັກສະເພາະຂອງແຂວງ ຟູທໍ ຊື່ງໄດ້ຮັບການຮັບຮອງຈາກ UNESCO ວ່າ ແມ່ນມໍລະດົກວັດທະນະທຳບໍ່ມີຮູບຮ່າງຂອງມວນມະນຸດເມື່ອວັນທີ 24/11/2011. ການອະນຸລັກຮັກສາ ແລະ ເສີມຂະຫຍາຍຄຸນຄ່າມໍລະດົກວັດທະນະທຳຂັບຊວານ ຟູທໍ້ ໃນໄລຍະເຊື່ອມໂຍງເຂົ້າກັບສາກົນ ແມ່ນວຽກງານທີ່ມີຄວາມໝາຍ, ປະກອບສ່ວນສ້າງພື້ນຖານວັດທະນະທຳຫວຽດນາມເຂັ້ມຂົ້ນໄປດ້ວຍສີສັນຊາດ.
ລາຍການຂັບຊວານ ໂດຍແມ່ຍິງ ຟູທໍ້ ສແດງ
ພາບ:phutho.gov.vn
|
ພິທີໄຫວ້ບູຊາເຈົ້າຊີວິດ ຮຸ່ງ - ງານບຸນວິຫານຮຸ່່ງ ປີ 2015 ກົງກັບເວລາທີ່ຂັບຊວານຟູທໍ້ ໄດ້ຮັບການຮັບຮອງຈາກ UNESCO ວ່າແມ່ນມໍລະດົກວັດທະນະທຳບໍ່ມີຮູບຮ່າງເປັນເວລາ 4 ປີ. ໃນໂອກາດນີ້, ແຂວງ ຟູທໍ້ ຈັດຕັ້ງການເຄື່ອນໄຫວຫລາຍຢ່າງເພື່ອແນະນຳ ແລະ ໂຄສະນາບັນດາທຳນອງຂັບຊວານ ຟູທໍ້ ເພື່ອໃຫ້ປະຊາຊົນໃນທົ່ວປະເທດເຂົ້າໃຈກ່ຽວກັບວັດທະນະທຳຢູ່ເຂດດິນແດນເຈົ້າຊີວິດຮຸ່ງ. ຢູ່ເຂດປູຊະນີຍະສະຖານວິຫານ ຮຸ່ງ, ແຂວງ ຟູທໍ້ ຈະຈັດຕັ້ງງານມະໂຫລານ “ເພງພື້ນເມືອງ ແລະ ຂັບຊວານ ຟູທໍ້” ໂດຍບັນດາກອງຂັບຊວານ ແລະ ສະໂມສອນຂັບຊວານ ສະແດງ”. ຢູ່ ນະຄອນ ຫວຽດຈີ່, ມີລາຍການຂັບຊວານຂອງພວກຫລານອະນຸຊົນ, ເຍົາວະຊົນ ສິ່ງດັ່ງກ່າວສະແດງໃຫ້ເຫັນວ່າ ຂັບຊວານ ພວມໄດ້ໄດ້ຮັບການສືບທອດ ແລະ ແຜ່ຂະຫຍາຍບໍ່ພຽງແຕ່ສຳລັບຜູ້ໃຫຍ່ເທົ່ານັ້ນ ຫາກນັບທັງຄົນລຸ້ນຫນຸ່ມອີກດ້ວຍ. ນີ້ແມ່ນຫນຶ່ງໃນບັນດາການເຄື່ອນໄຫວ ຊື່ງແຂວງ ຟູທໍ້ ພວມປະຕິບັດ ເພື່ອອະນຸລັກຮັກສາ ແລະ ເສີມຂະຫຍາຍຄຸນຄ່າຂັບຊວານ ຊື່ງແມ່ນມໍລະດົກວັດທະນະທຳບໍ່ມີຮູບຮ່າງ. ທ່ານ ຮ່າເກຊານ, ຮອງປະທານຄະນະກຳມະການປະຊາຊົນ ແຂວງ ຟູທໍ້ ໃຫ້ຮູ້ວ່າ:
“ແຂວງ ຟູທໍ້ ໄດ້ສຸມໃສ່ບຳລຸງສ້າງນັກສິລະປະ 62 ຄົນ, ຊຸດຮຽນວົງຄະນາຍາດ 101 ຊຸດ, ນັ້ນແມ່ນບໍ່ທັນເວົ້າເຖິງບັນດາຊຸດບຳລຸງສ້າງໃນຂະແຫນງສຶກສາ, ໃນໝູ່ຊາວຫນຸ່ມເຍົາວະຊົນ. ນີ້ແມ່ນບັນດາປັດໄຈທີ່ມີຄວາມໝາຍ, ໜ້າເຄົາລົບ. ພວກຂ້າພະເຈົ້າເຊື່ອໝັ້ນວ່າ, ນີ້ຈະເປັນການປະກອບສ່ວນສຳຄັນເພື່ອເຮັດໃຫ້ຂັບຊວານຫລຸດພົ້ນອອກຈາກສະພາບຕ້ອງອະນຸລັກຮັກສາຢ່າງຮີບດ່ວນ.”
ຜູ້ຕາງຫນ້າ UNESCO ມອບໃບຢັ້ງຢືນຂັບຊວານ
ແມ່ນມໍລະດົກວັດທະນະທຳບໍ່ມີຮູບຮ່າງຂອງໂລກ
ພາບ:baotintuc.vn
|
ນັກດົນຕີ ດັ້ງຮວ່າງລວານ, ຊື່ງແມ່ນຜູ້ຕິດຕາມ ແລະ ເຂົ້າຮ່ວມວິວັດການຟື້ນຟູ ແລະ ອະນຸລັກຮັກສາ ຂັບຊວານ ໃນເກືອບ 4 ປີ ນັບແຕ່ເມື່ອ UNESCO ຮັບຮອງຂັບຊວານແມ່ນມໍລະດົກວັດທະນະທຳບໍ່ມີຮູບຮ່າງຂອງມວນມະນຸດ, ໃຫ້ຂໍ້ສັງເກດວ່າ:
“ເພື່ອເຮັດໃຫ້ປະຊາຊົນຫລາຍຄົນນິຍົມຮັບຟັງຂັບຊວານ ແຂວງຟູ໋ທໍ້ໄດ້ສ້າງສະໂມສອນຫລາຍແຫ່ງ, ສິດສອນໃຫ້ປະຊາຊົນຂັບຊວານ, ກໍ່ຄືຮັບຟັງຂັບຊວານ. ໄປສະແດງຂັບຊວານຢູ່ຫຼາຍແຫ່ງເພື່ອຮັບໃຊ້ປະຊາຊົນເປັນຈຳນວນຫຼວງຫຼາຍ. ນັ້ນແມ່ນສິ່ງສຳຄັນ ເຊິ່ງແຂວງ ຟູທໍ້ ສາມາດປະຕິບັດໄດ້.”
ນອກຈາກສອນວິທີຂັບຊວານແລ້ວ, ແຂວງ ຟູທໍ້ ຍັງເອົາໃຈໃສ່ເຖິງການດຳເນີນຊີວິດ, ຫລື ມອບນາມມະຍົດໃຫ້ບັນດານັກສິລະປະຂັບຊວານ, ຊື່ງແມ່ນຜູ້ທີ່ໄດ້ປະກອບສ່ວນຮັກສາມໍລະດົກວັດທະນະທຳບໍ່ມີຮູບຮ່າງ ກໍຄືປະຕິສັງຂອນສາລາບ້ານ, ຫໍບູຊາ ເພື່ອໃຫ້ນັກສິລະປະຂັບຊວານມີບ່ອນສະແດງ. ນັກດົນຕີ ດັ້ງຮ່ວາງລວານ ໃຫ້ຮູ້ຕື່ມອີກວ່າ:
“ການອະນຸລັກຮັກສາ ແລະ ເສີມຂະຫຍາຍຂັບຊວານໃນວົງຄະນາຍາດ ໄດ້ຮັບການເສີມຂະຫຍາຍຢ່າງສູດຂີດຈາກຄະນະກຳມະການປະຊາຊົນ, ພະແນກວັດທະນະທຳກິລາ ແລະ ທ່ອງທ່ຽວ ແຂວງ ຟູທໍ້. ກ່ອນອື່ນໝົດແມ່ນປະຕິສັງຂອນຫໍບູຊາ ຫລາຍແລ່ນ, ຊື່ງແມ່ນບ່ອນທີ່ເຈົ້າຊີວິດຮຸ່ງ ສອນຂັບຊວານໃຫ້ແກ່ປະຊາຊົນ ຟູທໍ້. ຫໍບູຊາ ຫລາຍແລ່ນ ກໍແມ່ນໂຮງລະຄອນແຫ່ງຂັບບູຊາທຳອິດຂອງຫວຽດນາມ”
ພາຍຫລັງ 4 ປີ ແຫ່ງການຟື້ນຟູ ຂັບຊວານພວມຄ່ອຍໆພັດທະນາ, ອັນໄດ້ສະແດງໃຫ້ເຫັນຄວາມມານະພະຍາຍາມຂອງອຳນາດການປົກຄອງ ແລະ ປະຊາຊົນແຂວງ ຟູທໍ້ ໃນການອະນຸລັກຮັກສາບັນດາຄຸນຄ່າວັດທະນະທຳທີ່ເປັນມູນເຊື້ອຂອງທ້ອງຖິ່ນ. ຜ່ານຜ່າຄວາມຫຍຸ້ງຍາກໃນເບື້ອງຕົ້ນ, ມາຮອດປະຈຸບັນ ຂັບຊວານ ມີຄວາມສະດວກຫລາຍຢ່າງເພື່ອພັດທະນາ ແລະ ໃກ້ຊິດກັບວົງຄະນາຍາດກວ່າ. ຮອງສາດສະດາຈານ, ດຣ ຫງວຽນບີງດີ້ງ, ຫົວຫນ້າສະຖາບັນດົນຕີແຫ່ງຊາດ ຫວຽດນາມ ໃຫ້ຮູ້ວ່າ:
“ປະຈຸບັນ ພວກເຮົາພວມຟື້ນຟູບັນດາຮູບການຂັບຊວານຕົ້ນຕໍ. ຢູ່ແຂວງ ຟູທໍ້ ຍັງມີເອກະສານຫລາຍຢ່າງກ່ຽວກັບອະລິຍະທຳຄື: ສາລາບ້ານ, ວິຫານທີ່ກ່ຽວຂ້ອງເຖິງມໍລະດົກດັ່ງກ່າວ. ນັກສິລະປະບາງຄົນມີຄວາມເຂົ້າໃຈຢ່າງເລິກເຊິ່ງກ່ຽວກັບຂັບຊວານ. ອຳນາດການປົກຄອງແຂວງ ຟູທໍ້ ກໍຄືບັນດາອົງການກ່ຽວຂ້ອງ ກໍຕັ້ງຫນ້າເຂົ້າຮ່ວມ, ສືບຕໍ່ຮຽບຮຽງຄົ້ນຄ້ວາເອກະສານ, ນຳຂັບຊວານເຂົ້າສິດສອນໃນໂຮງຮຽນ, ຈັດຕັ້ງບັນດາສະໂມສອນ, ສະແດງຂັບຊວານໃນບັນດາລາຍການສິລະປະ, ຊ້ຳບໍ່ໜຳໄປສະແດງຢູ່ຕ່າງປະເທດເພື່ອໂຄສະນາຂັບຊວານອີກ.”
ແຂວງ ຟູທໍ້ ບຸລິມະສິດເລື່ອງໂຄສະນາຂັບຊວານ ເພື່ອໃຫ້ເພື່ອນມິດສາກົນຮູ້ຈັກເຖິງຫລາຍກວ່າ. ໃນໄລຍະ 2016-2020, ການເສີມຂະຫຍາຍຄຸນຄ່າຂອງຂັບຊວານຊື່ງແມ່ນມໍລະດົກວັດທະນະທຳບໍ່ມີຮູບຮ່າງ ແລະ ການເຫລື້ອມໄສໄຫວ້ບູຊາເຈົ້າຊີວິດຮຸ່ງ ຈະຕິດພັນກັບການເຄື່ອນໄຫວພັດທະນາທ່ອງທ່ຽວ, ບໍລິການ, ຜ່ານບັນດາການເຄື່ອນໄຫວສະແດງຂອງກອງຂັບຊວານ, ບັນດາປູຊະນີຍະສະຖານຂັບຊວານ ຕິດພັນກັບການເຫລື້ອມໃສໄຫວ້ບູຊາ ເຈົ້າຊີວິດຮຸ່ງ, ເພີ່ມທະວີການນຳເອົາຂັບຊວານ ເຂົ້າໃນງານພົບປະແລກປ່ຽນສາກົນ ກ່ຽວກັບມໍລະດົກວັດທະນະທຳບໍ່ມີຮູບຮ່າງ. ຄຽງຄູ່ກັນນັ້ນ ແຂວງ ຟູທໍ້ ຍັງຍູ້ແຮງການໂຄສະນາຂັບຊວານຜ່ານບັນດາພາຫະນະສື່ມວນຊົນ, ອັບເດັດຕາມບັນດາການເຄື່ອນໄຫວອະນຸລັກຮັກສາ ແລະ ເສີມຂະຫຍາຍຄຸນຄ່າຂັບຊວານ ໃນປະຕູຖານເອເລັກໂຕນິກຂອງແຂວງ ຟູທໍ້ ດ້ວຍພາສາອັງກິດ ແລະ ພາສາຫວຽດເພື່ອຮັກສາ ແລະ ເສີມຂະຫຍາຍບັນດາຄຸນຄ່າວັດທະນະທຳຫວຽດນາມ.