(vovworld)- ນັບແຕ່ກ່ວາ 1 ປີມານີ້, ໃນວັນເສົາຂອງທຸກໆອາທິດ, ຜູ້ນິຍົມດົນຕີພື້ນເມືອງ ແລະ ແຂກທ່ອງທ່ຽວມາຢ້ຽມຢາມນະຄອນເກີນເທີ ໄດ້ມີໂອກາດຮັບຊົມບັນດາລາຍການສະແດງສິລະປະທີ່ໜ້າປະທັບໃຈຢູ່ເວທີສະແດງທີ່ເຂດທ່າເຮືອນິງກຽວ. ປະຈຸບັນ, ເວທີສະແດງດົນຕີພື້ນເມືອງທ່າເຮືອນິງກຽວໄດ້ມີຄວາມດູດດື່ມໃຈຜູ້ຮັບຊົມທີ່ສຸດ, ປະກອບສ່ວນຮັກສາຄວາມນິຍົມສິລະປະຂອງຊາດໃນໄວໜຸ່ມ ແລະ ໂຄສະນາຈຸດວັດທະນະທຳທີ່ເປັນເອກະລັກສະເພາະຂອງເຂດຕາເວັນຕົກພາກໃຕ້ຫວຽດນາມ ມາຍັງເພື່ອນມິດທັງຢູ່ໃກ້ ແລະ ຢູ່ໄກ.
(ພາບປະກອບ: http://laodong.com.vn/)
ລາຍການສະແດງສິລະປະປະເພນີຢູ່ທ່າເຮືອນິງກຽວ ໂດຍພະແນກວັດທະນະທຳ, ກິລາ ແລະ ທ່ອງທ່ຽວນະຄອນເກີນເທີ ຈັດຕັ້ງຂຶ້ນໃນເວລາ 19 ໂມງໃນວັນເສົາຂອງທຸກໆອາທິດ, ໄລຍະເວລາສະແດງແຕ່ລະລາຍການແມ່ນແຕ່ 30-50 ນາທີ ໂດຍບັນດາຫົວໜ່ວຍສິລະປະອາຊີບ, ບັນດາສະໂມສອນ, ສູນວັດທະນະທຳ, ຫໍວັດທະນະທຳເຍົາວະຊົນຜັດປ່ຽນກັນຮັບຜິດຊອບ. ບັນດາຫົວໜ່ວຍຍັງເຊື້ອເຊີນບັນດານັກສິລະປະທີ່ມີຊື່ສຽງເຂົ້າຮ່ວມສະແດງອີກດ້ວຍ. ທ່ານໂຮ່ວັນຮ່ວາງ, ຮອງຫົວໜ້າພະແນກວັດທະນະທຳ, ກິລາ ແລະ ທ່ອງທ່ຽວນະຄອນເກີນເທີ ໃຫ້ຮູ້ວ່າ: ເວທີສະແດງນີ້ນັບມື້ນັບບັນລຸປະສິດທິຜົນໃນການເພີ່ມທະວີການໂຄສະນາພາບພົດຂອງເກີນເທີ ຜ່ານການເຄື່ອນໄຫວສິລະປະວັນນະຄະດີ:
“ຜ່ານການເຄື່ອນໄຫວມາເປັນເວລາກ່ວາ 1 ປີ, ພວກຂ້າພະເຈົ້າເຫັນວ່າມັນໄດ້ສ້າງເປັນຜົນງານທີ່ດີທີ່ສຸດ. ບັນດານັກສິລະປິນໄດ້ປະຕິບັດລາຍການທີ່ເຕັມໄປດ້ວຍລັກສະນະຊົນຊາດຄື: ມີເພງພື້ນເມືອງ, ດົນຕີພື້ນເມືອງ, ຂັບກາຍເລືອງ, ເດີນກາຕາຍຕື້…ເຖິງວ່າບໍ່ມີຕັ່ງນັ່ງກໍ່ຕາມແຕ່ຜູ້ມາຊົມກໍ່ຫຼາຍທີ່ສຸດ ແລະ ມີແຂກຕ່າງປະເທດຫຼາຍຄົນທັງຊົມ, ທັງຖ່າຍຮູບ, ຖ່າຍວີເດໂອອີກດ້ວຍ“.
ກ່ອນຄຳ່ຄືນສະແດງທີ 33 ຢູ່ເວທີສະແດງປະເພນີທີ່ທ່າເຮືອນິງກຽວ, ບັນດານັກສິລະປິນຂອງສະໂມສອນເດີນກາຕາຍຕື້ ຈີເອີມ, ນັກສິລະປິນຂອງຄະນະສິລະປະກອນກາຍເລືອງໄຕໂດ ແຂວງດົງທາບ ໄດ້ກະກຽມເຄື່ອງນຸ່ງສະແດງ, ແຕ່ງຕົວ…ເພື່ອລໍຖ້າການສະແດງຮັບໃຊ້ຜູ້ຊົມ. ການສະແດງຢູ່ເວທີແຫ່ງນີ້ໄດ້ດຶງດູດຜູ້ຊົມເປັນຈຳນວນຫຼາຍ ຊື່ງຢູ່ໃນຫຼາຍເກນອາຍຸ, ຫຼາຍຊັ້ນຄົນແຕກຕ່າງກັນ ແລະ ມີທັງແຂກທ່ອງທ່ຽວເຂົ້າມາຮັບຊົມ, ຖ່າຍຮູບ, ຖ່າຍວີດີໂອ... ອີກດ້ວຍ
ດ້ວຍຈຳນວນເງິນປະມານ 5 ລ້ານດົ່ງເພື່ອໃຊ້ຈ່າຍໃນການສະແດງຄືນ 1, ຄ່າແຮງງານຂອງນັກສິລະປິນແມ່ນໜ້ອຍທີ່ສຸດ, ສຳລັບນັກສະແດງມາແຕ່ໄກ, ພຽງແຕ່ສາມາດຈ່າຍຄ່າລົດເທົ່ານັ້ນແຕ່ບັນດາຜູ້ເຂົ້າຮ່ວມລາຍການສະແດງນີ້ລ້ວນແຕ່ເຂົ້າຮ່ວມດ້ວຍຄວາມສຸດຈິດສຸດໃຈ. ນັກສິລະປິນດີເດັ່ນເຈົາຫາຍອຽນ ໃຫ້ຮູ້ວ່າ:
“ຂ້າພະເຈົ້າເຂົ້າໃຈໄດ້ວ່າ: ຢູ່ແຫ່ງໃດກໍ່ມີຈຸດວັດທະນະທຳພິເສດສະເພາະຂອງແຕ່ລະເຂດແຄ້ວນ. ເມື່ອຂ້າພະເຈົ້າຂັບກາຍເລືອງຕໍ່ໜ້າຜູ້ຊົມແມ່ນສິ່ງທີ່ເປັນເອກະລັກສະເພາະຂອງເຂດທາງທິດຕາເວັນຕົກຂອງພາກໃຕ້. ຂ້າພະເຈົາດີໃຈຍ້ອນໄດ້ສະແດງໃຫ້ແກ່ຜູ້ຊົມເກີນເທີ. ຂ້າພະເຈົ້າເຫັນວ່າ, ນີ້ແມ່ນຮູບແບບການສະແດງທີ່ດີທີ່ສຸດ.
ຕີລາຄາກ່ຽວກັບປະສິດທິຜົນຈາກໂຄງການສຳລັບຂະບວນການເກັບຮັກສາສິລະປະມູນເຊື້ອ ແລະ ການຮ່ວມມືຢ່າງຕັ້ງໜ້າຂອງບັນດານັກສະແດງ, ປ້າຫງວຽນທິໂວ້, ຮອງປະທານສະມາຄົມນັກສິລະປິນສະແດງບົນເວທີລະຄອນນະຄອນເກີນເທີໃຫ້ຮູ້ວ່າ:
“ປະຊາຊົນ ແລະ ແຂກທ່ອງທ່ຽວມີຄວາມພາກພູມໃຈທີ່ສຸດທີ່ໄດ້ຮັບຊົມສິລະປະໃນເວທີສະແດງທີ່ມີລັກສະນະເພິ່ນຈິດ ແລະ ໄດ້ຮູ້ຈັກຈຸດວັດທະນະທຳເຂດແມ່ນ້ຳທາງທິດຕາເວັນຕົກຂອງພາກໃຕ້ຕື່ມອີກ, ພິເສດແມ່ນໄດ້ຮູ້ຈັກກັບຂະບວນການວັດທະນະທຳສິລະປະຂອງເຂດດິນແດນໄຕໂດ. ຂ້າພະເຈົ້າມີຄວາມເອກອ້າງທະນົງໃຈທີ່ສຸດ. ຜ່ານນັ້ນໄດ້ປຸກລຸກຂະບວນການສະແດງສິລະປະປະເພນີ, ກະທົບເຖິງສິລະປະອາຊີບອີກ“.
ຈາກການຮັກສາ ແລະ ເສີມຂະຫຍາຍປະສິດທິຜົນຂອງການສະແດງທີ່ເວທີ ຂະໜາດໜ້ອຍທີ່ທ່າເຮືອນິງກຽວ, ນະຄອນເກີນເທີ ໄດ້ສ້າງເປັນເວທີສະແດງດູດດືມໃຈຜູ້ຊົມ, ເປັນຈຸດນັດພົບປະຈຳໃຫ້ແກ່ບັນດານັກສິລະປິນ, ຜູ້ນິຍົມ ແລະ ແຂກທ່ອງທ່ຽວ. ເວທີສະແດງນີ້ໄດ້ ແລະ ພວມປະກອບສ່ວນລ້ຽງດູ, ສືບທອດນ້ຳໃຈຮັກຫອມສິລະປະທີ່ເປັນປະເພນີໃນວົງຄະນາຍາດ, ພິເສດແມ່ນໃນຈິດໃຈໄວໜຸ່ມເຂດດິນແດນໄຕໂດ./.