ກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 49 (AMM – 49) ແລະ ບັນດາກອງປະຊຸມທີ່ກ່ຽວຂ້ອງໄດ້ຖືກໄຂຂຶ້ນເປັນເວລາ 4 ວັນຄືແຕ່ວັນທີ 23-26/7. ດ້ວຍໂຄງການດຳເນີນງານໃນວົງກ້ວາງ, AMM – 49 ໄດ້ເລັ່ງໃສ່ປຶກສາຫາລືບັນຫາຮ່ວມມືພາຍໃນກຸ່ມ, ກໍ່ສ້າງປະຊາຄົມ ກໍຄືການພົວພັນກັບຕ່າງປະເທດຂອງອາຊຽນ, ເພີ່ມທະວີບົດບາດເປັນໃຈກາງຂອງອາຊຽນ, ເປັນຕົ້ນແມ່ນຊຸກຍູ້ຜັນຂະຫຍາຍປະຕິບັດວິໄສທັດ 2025 ຂອງປະຊາຄົມ ໃນສະພາວະທີ່ສະຖານະການໂລກ ແລະ ພາກພື້ນສືບຕໍ່ມີການຜັນແປໃໝ່, ສັບສົນ ແລະ ຍາກທີ່ຈະຄາດຄະເນໄວ້ລວງໜ້າ.
ກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 48 (AMM – 48) ຖືກຈັດຂຶ້ນຢູ່ມາເລເຊຍເມື່ອເດືອນ 8/2015 |
AMM – 49 ແລະ ບັນດາກອງປະຊຸມທີ່ກ່ຽວຂ້ອງແມ່ນການເຄື່ອນໄຫວສຳຄັນທີ່ສຸດໃນປີຂອງອາຊຽນ, ລະຫວ່າງອາຊຽນ ແລະ ບັນດາຄູ່ຮ່ວມມືທີ່ຫຼັກແຫຼ່ງ ຊຶ່ງມີການເຂົ້າຮ່ວມຂອງລັດຖະມົນຕີການຕ່າງປະເທດ 27 ປະເທດ, ໃນນັ້ນມີ 10 ປະເທດ ອາຊຽນ ແລະ 17 ຄູ່ຮ່ວມມື. ກອງປະຊຸມ AMM – 49 ແລະ ບັນດາກອງປະຊຸມທີ່ກ່ຽວຂ້ອງ ໄດ້ຖືກຈັດຂຶ້ນໃນສະພາບການສາກົນ ແລະ ພາກພື້ນສືບຕໍ່ມີການຜັນແປຢ່າງສັບສົນ, ການແກ່ງແຍ້ງລະຫວ່າງບັນດາປະເທດໃຫຍ່ນັບມື້ນັບເພີ່ມທະວີຂຶ້ນ ແລະ ບັນດາສິ່ງທ້າທາຍຕໍ່ຄວາມສະຫງົບທີ່ເຄີຍມີມາ ແລະ ບໍ່ເຄີຍມີມາກ່ອນ ໄດ້ກາບເປັນບັນຫາທີ່ຮ້າຍແຮງກວ່າເກົ່າ, ພິເສດແມ່ນສະພາບການຢູ່ທະເລຕາເວັນອອກ ແລະ ການເຄື່ອນໄຫວກໍ່ການຮ້າຍ. ໃນຂະນະນັ້ນ, ອາຊຽນຍັງພວມຢູ່ໃນວິວັດທະນາການສ້າງຕັ້ງປະຊາຄົມ, ຍູ້ແຮງການພົວພັນກັບຕ່າງປະເທດ ແລະ ເສີມຂະຫຍາຍບົດບາດເປັນໃຈກາງໃນພາກພື້ນ. ໃນບັນຫາທະເລຕາເວັນອອກ, ອາຊຽນສາມາດຮັກສາບັນດາຫຼັກໝັ້ນ ແລະ ສຽງເວົ້າລວມຢ່າງມີຫຼັກການ.
ເພາະສະນັ້ນ, ບັນດາກອງປະຊຸມຄັ້ງນີ້, ມີໂຄງການດຳເນີນງານແບບວົງກ້ວາງໃນທຸກໆຂົງເຂດຮ່ວມມື. ພ້ອມກັບການປຶກສາຫາລືບັນດາບັນຫາຮ່ວມມືພາຍໃນກຸ່ມ, ສຳຫຼວດກວດຄືນສາຍພົວພັນລະຫວ່າງອາຊຽນ ແລະ ບັນດາປະເທດໃນໄລຍະທີ່ຜ່ານມາ ແລະ ທິດທາງຊຸກຍູ້ການພົວພັນໃນໄລຍະທີ່ຈະມາເຖິງ, ເພີ່ມທະວີບັນດາມາດຕະການສ້າງຄວາມເຊື້ອໝັ້ນ ແລະ ການທູດເພື່ອປ້ອງກັນ, ອາຊຽນສຸມໃສ່ຊຸກຍູ້ການປະຕິບັດວິໄສທັດປະຊາຄົມອາຊຽນ 2025, ແນໃສ່ກະກຽມໃຫ້ແກ່ໄລຍະພັດທະນາຕໍ່ໄປຂອງ ອາຊຽນ.
ວິໄສທັດປະຊາຄົມອາຊຽນແມ່ນໝາກຜົນຂອງຄວາມເຫັນດີເຫັນພ້ອມ
ຖະແຫຼງການກ່ຽວກັບ “ອາຊຽນ 2025: ພ້ອມກັນກ້າວເດີນຢ່າງໝັ້ນຄົງ ” ໄດ້ຮັບການຮັບຮອງເອົາໃນທ້າຍປີ 2015. ຖະແຫຼງການ ອາຊຽນອີກຄັ້ງໜຶ່ງໄດ້ສ້າງອະນາຄົດ ອາຊຽນຜ່ານໂຄງການດຳເນີນງານໃໝ່ໃຫ້ແກ່ໄລຍະ10 ປີຕໍ່ໜ້າ, ລວມ ມີ ວິໄສທັດປະຊາຄົມອາຊຽນ 2025 ແລະ ບັນດາແຜນການສັງລວມຜັນຂະຫຍາຍວິໄສທັດບົນ 3 ເສົາຄ້ຳ : ການເມືອງ-ການປ້ອງກັນຄວາມສະຫງົບ, ເສດຖະກິດ ແລະ ວັດທະນະທຳ-ສັງຄົມ.
ການກຳເນີດຂອງປະຊາຄົມອາຊຽນໃນວັນທີ 31/12/2015 ໄດ້ສະແດງໃຫ້ເຫັນການເຕີບໃຫຍ່ຂະຫຍາຍຕົວຂອງ ອາຊຽນ, ພ້ອມກັນນັ້ນ ກໍຮຽກຮ້ອງໃຫ້ ອາຊຽນຄວນກະກຽມຢ່າງລະອຽດເພື່ອໃຫ້ມີບັນດາບາດກ້າວຂະຫຍາຍຕົວທີ່ແທດຈິງກວ່າໃນອະນາຄົດ, ສົມກັບທີ່ຕັ້ວບົດບາດໃໝ່ຂອງ ອາຊຽນ. ໃນສະພາບການສາກົນ ແລະ ພາກພື້ນໄດ້ຜ່ານການປ່ຽນແປງຫຼາຍຢ່າງ, ອັນໄດ້ເປີດບັນດາກາລະໂອກາດອັນໃຫຍ່ຫຼວງ ແຕ່ກໍມີສິ່ງທ້າທາຍທີ່ຮ້າຍແຮງບໍ່ໜ້ອຍ. ວິໄສທັດປະຊາຄົມອາຊຽນ 2025 ໄດ້ກຳເນີດຂຶ້ນບົນພື້ນຖານຄວາມເຫັນດີເຫັນພ້ອມ, ການສ່ອງແສງຄວາມມຸ່ງມາດປາດຖະໜາ, ຄວາມເອົາໃຈໃສ່ຂອງທຸກໆປະເທດສະມາຊິກ, ອັນໄດ້ສ້າງເງື່ອນໄຂສຳຄັນໃຫ້ແກ່ການພັດທະນາຢ່າງໝັ້ນຄົງຂອງປະຊາຄົມອາຊຽນ. ໃນຖະແຫຼງການວິໄສທັດປະຊາຄົມອາຊຽນ 2025 ນີ້, ອາຊຽນໝັ້ນໝາຍພ້ອມກັນກໍ່ສ້າງ ອາຊຽນໃນປີ 2025 ໃຫ້ກາຍເປັນ “ ປະຊາຄົມສັນຕິພາບ, ສະຖຽນລະພາບ ແລະ ສ້າງຄວາມເຂັ້ມແຂງດ້ວຍຕົນເອງດ້ວຍຄວາມກຳລັງຄວາມສາມາດໄດ້ຮັບການຍົກສູງເພື່ອຮັບມືກັບບັນດາສິ່ງທ້າທາຍຢ່າງມີປະສິດທິຜົນ”, “ພາກພື້ນໜຶ່ງທີ່ເປີດກ້ວາງກັບພາຍນອກໃນປະຊາຄົມບັນດາປະເທດທົ່ວໂລກ, ພ້ອມກັນນັ້ນ ກໍຮັກສາບົດບາດໃຈກາງຂອງຕົນ”, “ ບັນດາພື້ນຖານເສດຖະກິດຮ່ວມສຳພັນຢ່າງໜັກແໜ້ນ, ຫມັ້ນຄົງ ແລະ ຂະຫຍັນຂັ່ນເຄື່ອນ ” ແລະ “ ອາຊຽນໜຶ່ງມີຄວາມສາມາດເພື່ອກຳແໜ້ນກາລະໂອກາດ ແລະ ແກ້ໄຂບັນດາສິ່ງທ້າທາຍໃນທົດສະວັດທີ່ຈະມາເຖິງ ”
ມຸ່ງໄປສູ່ ອາຊຽນ 2025 : ເຊີດຊູຫຼັກການສາມັກຄີພາຍໃນກຸ່ມ
ບົນພື້ນຖານບັນດາການກຳນົດທິດລວມນີ້, ວິໄສທັດປະຊາຄົມອາຊຽນ 2025 ໄດ້ຖືກຫັນເປັນລະອຽດດ້ວຍບັນດາການກຳນົດທິດຕາມຈຸດພິເສດສະເພາະຂອງແຕ່ລະເສົາຄ້ຳ, ໃນນັ້ນ ໄລຍະທຳອິດແມ່ນເລັ່ງໃສ່ການປະຕິບັດຈຸດໝາຍກໍ່ສ້າງປະຊາຄົມການເມືອງ-ການປ້ອງກັນຄວາມສະຫງົບ. ຕາມນັ້ນແລ້ວ, ວິໄສທັດກ່ຽວກັບ ປະຊາຄົມການເມືອງ-ການປ້ອງກັນຄວາມສະຫງົບໃນປີ 2025 ຈະແມ່ນປະຊາຄົມສາມັກຄີ ແລະ ສ້າງຄວາມເຂັ້ມແຂງດ້ວຍຕົນເອງ ອັນໄດ້ນຳຊີວິດທີ່ສະຫງົບສຸກໃຫ້ແກ່ປະຊາຊົນ.
ກ້າວເຂົ້າສູ່ໄລຍະພັດທະນາໃໝ່, ອາຊຽນຮຽກຮ້ອງໃຫ້ຍົກສູງປັດໄຈດ້ານກົດໝາຍ ແລະ ລັກສະນະບັງຄັບດ້ານນິຕິກຳໃນບັນດາການເຄື່ອນໄຫວຂອງປະຊາຄົມເພື່ອໃຫ້ສາຍສຳພັນລະຫວ່າງບັນດາປະເທດສະມາຊິກເພີ່ມຄວາມແໜ້ນແຟ້ນຍິ່ງຂຶ້ນ. ເຖິງວ່າມີຈຸດຄ້າຍຄືກັນຫຼາຍຢ່າງກໍຕາມ, ແຕ່ອາຊຽນກໍຍັງມີຄວາມແຕກຕ່າງກັນທາງດ້ານລະບອບການເມືອງ, ລະດັບການພັດທະນາ. ເພາະສະນັ້ນ, ການຜູກຮັດຢ່າງໜັກແໜ້ນນຳກັນເພື່ອພາລະກຳອັນສູງສົ່ງ, ນັ້ນແມ່ນຮັກສາສັນຕິພາບ, ສະຖຽນລະພາບ, ການຮ່ວມມື ແລະ ວັດທະນາຖາວອນໃນພາກພື້ນ, ມັນຮຽກຮ້ອງໃຫ້ ອາຊຽນສືບຕໍ່ສາມັກຄີກ່ວາອີກ, ເສີມຂະຫຍາຍບົດບາດໃຈກາງໃນພາກພື້ນ, ເປີດກ້ວາງການພົວພັນກັບຕ່າງປະເທດ. AMM – 49 ແລະ ບັນດາກອງປະຊຸມທີ່ກ່ຽວຂ້ອງ ໄດ້ຮັບການຢືນຢັນຈາກບັນດາການນຳ ອາຊຽນວ່າ ຍັງສືບຕໍ່ມຸ່ວງໄປສູ່ບັນດາເປົ້າໝາຍນີ້.