ຢູ່ນະຄອນ Ufa, ແຫ່ງສະຫະພັນລັດເຊຍ ພວມດຳເນີນກອງປະຊຸມສຸດຍອດກຸ່ມບັນດາພື້ນຖານເສດຖະກິດທີ່ຫາກໍພົ້ນເດັ່ນອັນດັບໜຶ່ງໃນໂລກ (BRICS) ແລະ ວາລະປະຊຸມສະພາປະມຸກລັດບັນດາປະເທດທີ່ຂຶ້ນກັບອົງການຮ່ວມມືຊຽງໄຮ (SCO). ນີ້ແມ່ນ 2 ເຫດການໃຫຍ່ຂອງ 2 ກຸ່ມເສດຖະກິດຊຶ່ງໃນປະຈຸບັນ, ລັດເຊຍພວມສວມບົດບາດເປັນປະທານ. ໃນຂະນະທີ່ຄວາມເຄັ່ງຕຶງລະຫວ່າງລັດເຊຍ ແລະ ຝ່າຍຕາເວັນຕົກຍັງບໍ່ທັນຫຼຸດຜ່ອນລົງ, ກອງປະຊຸມສຸດຍອດຄັ້ງນີ້ແມ່ນໂອກາດເພື່ອໃຫ້ລັດເຊຍຊອກຫາການໜູນຊ່ວຍຂອງບັນດາສະມາຊິກ ແນໃສ່ແກ້ໄຂບັນຫາຢູແກຼນ, ພ້ອມທັງຊຸກຍູ້ບົດບາດນຳພາໃນກຸ່ມ ຊຶ່ງພວມຮັບການຕີລາຄາວ່າ ສາມາດກາຍເປັນກຳລັງສ້າງຄວາມດຸ່ນດຽງໃນໂລກ.
ຜູ້ຕາງໜ້າຂັ້ນສູງບັນດາປະເທດສະມາຊິກ BRICS |
ການນຳກວ່າ 20 ທ່ານຂອງບັນດາປະເທດສະມາຊິກ BRICS, ອົງການຮ່ວມມືຊຽງໄຮ ແລະ ປະມຸກລັດຈາກປະຊາຄົມບັນດາປະເທດເອກະລາດ SNG ໄດ້ເຂົ້າຮ່ວມກອງປະຊຸມ. ບັນດາການພົບປະ 2 ຝ່າຍ ແລະ ຫຼາຍຝ່າຍໃນຂອບເຂດກອງປະຊຸມ ໄດ້ເລັ່ງໃສ່ການເພີ່ມທະວີການຮ່ວມມືດ້ານເສດຖະກິດ, ການເມືອງ, ສ້າງກົນໄກພັດທະນາຮອບດ້ານ, ດ້ວຍໜຶ່ງໃນບັນດາບຸລິມະສິດ ແມ່ນສ້າງແຫຼ່ງສະສົມເງິນຕາຕ່າງປະເທດ, ແນໃສ່ຫຼີກລ້ຽງຄວາມເສຍຫາຍໃຫ້ແກ່ ບັນດາປະເທດສະມາຊິກຕໍ່ໜ້າຜົນກະທົບຈາກພາຍນອກ.
ກຸ່ມບັນດາພື້ນຖານເສດຖະກິດທີ່ຫາກໍພົ້ນເດັ່ນ BRICS ຊຶ່ງລວມມີ ບຣາຊິວ , ລັດເຊຍ, ອິນເດຍ, ຈີນ ແລະ ອາຟະລິກາໃຕ້, ໄດ້ຮັບການສ້າງຕັ້ງເມື່ອປີ 2006 ຕາມຂໍ້ລິເລີ່ມຂອງລັດເຊຍ ແລະ ໄດ້ກາຍເປັນກຸ່ມທີ່ມີຜົນສະທ້ອນຢ່າງໃຫຍ່ຫຼວງຕໍ່ນະໂຍບາຍ ແລະ ເສດຖະກິດໂລກ.
BRICS ໃນປະຈຸບັນ.
ປະຈຸບັນ, BRICS ກວມເອົາ 26% ຍອດເນື້ອທີ່ທົ່ວໂລກ, 42% ຈຳນວນປະຊາກອນໂລກ ແລະ 27% ຍອດຈີດີພີທົ່ວໂລກ. ນີ້ແມ່ນຕະຫຼາດຈຳໜ່າຍທີ່ພວມເຕີບໂຕຢ່າງແຂງແຮງທີ່ສຸດໃນໂລກ, ແຕ່ລະປີປະມານ 500 ຕື້ USD. ໃນຂະນະນັ້ນ, ອົງການຮ່ວມມືຊຽງໄຮດ້ວຍ 6 ປະເທດສະມາຊິກຖາວອນ ແລະ 5 ປະເທດສັງເກດການ, ໄດ້ຮັບຖືວ່າ ແມ່ນກຸ່ມໃໝ່ທີ່ມີການເຕີບໂຕຢ່າງແຂງແຮງຢູ່ຝ່າຍຕາເວັນອອກ. ທະນາຄານໂລກຄາດຄະເນວ່າ ເຖິງປີ 2025, ບັນຊີລາຍຊື່ບັນດາພື້ນຖານເສດຖະກິດໃຫຍ່ກວ່າໝູ່ໃນໂລກ ຈະມີການປ່ຽນແປງຫຼາຍພໍສົມຄວນ. ຍອດຈີດີພີ ທົ່ວໂລກບັນລຸປະມານ 100.000 ຕື້ USD, ໃນນັ້ນ, ສະເພາະ 10 ປະເທດແຖວໜ້າຂອງໂລກໄດ້ກວມເຖິງ 60% ຕົວເລັກດັ່ງກ່າວ ແລະ ມີເຖິງ 3/5 ຈຳນວນບັນດາປະເທດ BRICS ແມ່ນນອນໃນບັນຊີລາຍຊື່ 10 ປະເທດເຫຼົ່ານັ້ນ. ຕາມການຕີລາຄາຂອງ ສ.ປ.ຊ ແລ້ວ, ບັນດາປະເທດສະມາຊິກ BRICS ແລະ SCO ໃນຮອບ 30 ປີທີ່ຈະມາເຖິງ ຈະມີຄວາມສາມາດເປັນສິ່ງທ້າທາຍກຸ່ມ G7 ໃນເວທີເສດຖະກິດ ແລະ ການເມືອງທົ່ວໂລກ. ແຕ່ສິ່ງທີ່ເປັນໜ້າສົນໃຈ, ນັ້ນແມ່ນທັງອາເມລິກາ ແລະ ຝ່າຍຕາເວັນຕົກ ເບິ່ງຄືວ່າ ຍັງບໍ່ທັນເອົາໃຈໃສ່ຕໍ່ການພັດທະນານັບທັງດ້ານການເມືອງ ແລະ ເສດຖະກິດຂອງ BRICS ແລະ SCO.
ໃນຂະນະນັ້ນ, ຕາມທັດສະນະຂອງ ບັນດາປະເທດ BRICS, ແນວທາງຂອງອາເມລິກາ ແລະ ບັນດາປະເທດພັນທະມິດ ຢາກສວມບົດບາດນຳພາໃນບັນດາວຽກງານສາກົນນັ້ນ ແມ່ນເສັ້ນທາງທີ່ຜິດພາດ ແລະ ເປັນອັນຕະລາຍ. ສ່ວນການຮ່ວມມືແບບຕ່າງຝ່າຍຕ່າງມີຜົນປະໂຫຍດ ແລະ ການສົນທະນາທີ່ມີລັກສະນະສ້າງສັນ ກໍແມ່ນຮູບແບບທີ່ມີປະສິດທິຜົນໃນການພົວພັນສາກົນ ແລະ BRICS ພວມຊຸກຍູ້ວິທີສຳພັດຕາມທິດນີ້, ແນໃສ່ປະສານສົມທົບລະຫວ່າງຜົນປະໂຫຍດຂອງບັນດາປະເທດສະມາຊິກຢ່າງກົມກ່ຽວເພື່ອ ເປີດກ້ວາງບົດບາດສົ່ງຜົນສະທ້ອນຂອງກຸ່ມ. ໃນຕົວຈິງ, ມູນຄ່າແລກປ່ຽນການຄ້າໃນກຸ່ມ BRICS ພວມພັດທະນາຢ່າງວ່ອງໄວ. ຕາມການປະເມີນແລ້ວ, ຍອດປະລິມານເສດຖະກິດປີ 2014 ຂອງ 5 ພື້ນຖານເສດຖະກິດ BRICS ແມ່ນເກືອບເທົ່າກັບລະດັບ ຈີດີພີ ຂອງອາເມລິກາ, ໃນຂະນະທີ່ໃນປີ 2007, ເສດຖະກິດອາເມລິກາມີຂອບຂະໜາດໃຫຍ່ທົບ 2 ເທົ່າເມື່ອທຽບໃສ່ BRICS ແລະ ກຸ່ມ BRICS ໄດ້ເປີດກ້ວາງຂອບເຂດການຮ່ວມມື, ນັບທັງໃນບັນດາຂົງເຂດໃໝ່ຄື ວິທະຍາສາດ, ເຕັກໂນໂລຢີ, ການປ່ຽນແປງຂອງດິນຟ້າອາກາດ…
ບົດບາດຊັກຈູງຂອງລັດເຊຍ.
ນັບຕັ້ງແຕ່ເມື່ອກາຍເປັນປະທານກຸ່ມ BRICS ໃນວັນທີ 1/1/2015, ລັດເຊຍໄດ້ເນັ້ນໜັກເປັນພິເສດເຖິງບັນດາບຸລິມະສິດໃນອາຍຸການຂອງຕົນ. ປະທານາທິບໍດີລັດເຊຍ Putin ຖະແຫຼງວ່າ ມົດສກູ ຈະນຳບັນດາແນວຄວາມຄິດໃໝ່ເພື່ອເຮັດໃຫ້ການເຄື່ອນໄຫວພຶດຕິກຳຂອງກຸ່ມເພີ່ມຄວາມອຸດົມສົມບູນ. ໜຶ່ງໃນບັນດາທິດທາງທີ່ສຳຄັນທີ່ສຸດ ຈະແມ່ນການສ້າງຄວາມເປັນລະບຽບຮຽບຮ້ອຍຂອງໂລກໃຫ້ກົມກ່ຽວຢູ່ໃນທຸກໆຂັ້ນ, ຈາກລະບົບການເງິນ ແລະ ເສດຖະກິດທົ່ວໂລກຕະຫຼອດຮອດບັນຫາຄວາມສະຫງົບ. ເພາະສະນັ້ນ, ທີ່ກອງປະຊຸມຄັ້ງນີ້, ຫົວເລື່ອງເສດຖະກິດ, ຊຸກຍູ້ການແລກປ່ຽນດ້ານການຄ້າ ແມ່ນເນື້ອໃນບຸລິມະສິດ, ໃນນັ້ນຈຸດສຸມແມ່ນຊຸກຍູ້ທະນາຄານພັດທະນາແຫ່ງ ໃໝ່ ດ້ວຍຈຳນວນທຶນ 100 ຕື້ USD ພ້ອມກັບການນຳກອງທຶນສະສົມເງິນຕາຕ່າງປະເທດລວມຂອງກຸ່ມເຂົ້າສູ່ການເຄື່ອນໄຫວ. ທະນາຄານແຫ່ງນີ້ຈະອຸປະຖຳໃຫ້ແກ່ບັນດາໂຄງການກໍ່ສ້າງພື້ນຖານໂຄງລ່າງ ແລະ ຮັບປະກັນການພັດທະນາແບບຍືນຍົງຂອງກຸ່ມກໍຄືບັນດາປະເທດພວມພັດທະນາອື່ນໆ ແລະ ກາຍເປັນໜຶ່ງໃນບັນດາອົງການໃຫ້ກູ້ຢືມທີ່ສຳຄັນຂອງໂລກ.
ປະຈຸບັນ, ການພົວພັນລະຫວ່າງລັດເຊຍກັບຝ່າຍຕາເວັນຕົກພວມມີຄວາມເຄັ່ງຕຶງ, ຕຳແໜ່ງປະທານຂອງລັດເຊຍໃນກຸ່ມ BRICS ພວມສ້າງກາລະໂອກາດເພື່ອໃຫ້ລັດເຊຍສະແດງບົດບາດເປັນຜູ້ຊັກຈູງຂອງກຸ່ມ. ພ້ອມກັບອິນເດຍ, ຈີນພວມຟື້ນຕົວຢ່າງແຂງແຮງ ແລະ ມີຄວາມມັກໃຫຍ່ໃຝ່ສູງຫຼາຍຢ່າງ, BRICS ແນ່ນອນວ່າຈະມີຜົນສະທ້ອນໃຫຍ່ກວ່າເກົ່າໃນໂລກຫຼາຍຂົ້ວໃໝ່. BRICS ພວມໄດ້ຮັບຄວາມສົນໃຈຄືດັ່ງເຈົ້າພາບເອກະລາດ ແລະ ສາມາດສ້າງຄວາມດຸ່ນດຽງໃນເວທີເສດຖະກິດ, ການເມືອງທົ່ວໂລກ.