9 ເດືອນທີ່ຜ່ານມາ, ລະດັບການເຕີບໂຕ GDP ຂອງຫວຽດນາມບັນລຸ 6,5%. ນີ້ແມ່ນລະດັບເຕີບໂຕສູງກວ່າໝູ່ເມື່ອທຽບໃສ່ 2-3 ປີມານີ້ ແລະ ເປັນສັນຍານທີ່ຕັ້ງໜ້າຂອງພື້ນຖານເສດຖະກິດ. ສິ່ງນີ້ໄດ້ສະແດງໃຫ້ເຫັນວ່າ ພື້ນຖານເສດຖະກິດຫວຽດນາມ ຍັງສາມາດຮັກສາກຳລັງໜູນແກ່ການເຕີບໂຕ, ສ້າງທ່ວງ ທ່າໃຫ້ແກ່ການສຳເລັດຄາດໝາຍເຕີບໂຕ 6,5% ທັງປີນີ້.
(ພາບປະກອບ)
|
ການຟື້ນຟູລະດັບການເຕີບໂຕເສດຖະກິດ ເກືອບຄືວ່າໄດ້ມີຂຶ້ນຢ່າງສະໝ່ຳສະເໝີໃນທຸກໆຂົງເຂດ. ກຸ່ມຂະແໜງກະສີກຳເພີ່ມຂຶ້ນ 1,77%. ກຸ່ມຂະແໜງອຸດສາຫະກຳ-ກໍ່ສ້າງເຕີບໂຕສູງກວ່າຫຼາຍເມື່ອທຽບໃສ່ໄລຍະດຽວກັນຂອງ 3 ປີກ່ອນ, ນີ້ແມ່ນກຳລັງໜູນ ແລະ ນຳໜ້າໃນການເຕີບໂຕຂອງທັງພື້ນຖານເສດຖະກິດ. ການເຕີບໂຕຂອງກຸ່ມຂະແໜງບໍລິການ ເຖິງວ່າຕ່ຳກ່ວາລະດັບເພີ່ມ GDP ຂອງທັງພື້ນຖານເສດຖະກິດກໍຕາມ, ແຕ່ຍັງຄົງບັນລຸໝາກຜົນທີ່ໜ້າຊື່ນຊົມ.
ການຜະລິດຟື້ນຕົວຢ່າງເຫັນໄດ້ຊັດ.
ກຳລັງໜູນແກ່ການເຕີບໂຕໃນ 9 ເດືອນທີ່ຜ່ານມາ , ຕົ້ນຕໍ່ແມ່ນເນື່ອງຈາກການຟື້ນຟູ ແລະ ເຕີບໂຕສູງຂອງການຜະລິດອຸດສາຫະກຳ, ເປັນຕົ້ນແມ່ນອຸດສາຫະກຳປຸງແຕ່ງ, ການຜະລິດ. ພ້ອມກັນນັ້ນ, ແມ່ນການເພີ່ມຂຶ້ນຢ່າງວ່ອງໄວຂອງການຜະລິດ ແລະ ສົ່ງອອກຂອງຂົງເຂດວິສາຫະກິດທີ່ມີເງິນລົງທຶນຂອງຕ່າງປະເທດ. ການໃຊ້ສອຍຢູ່ພາຍໃນປະເທດ, ກຳລັງຊື້ ແລະ ຍອດຄວາມຕ້ອງການກໍໄດ້ຮັບການປົວແປງຫຼາຍພໍສົມຄວນ ຍ້ອນຄວາມເຊື່ອໝັ້ນຕໍ່ຄວາມເປັນປົກກະຕິຂອງເສດຖະກິດມະຫາພາກ, ການຟື້ນຟູການເຕີບໂຕເສດຖະກິດ ແລະ ເງິນເຟີ້ຢູ່ໃນລະດັບຕ່ຳ.
ນະໂຍບາຍເງິນຕາໄດ້ຮັບການບໍລິຫານຕາມລະດັບເງິນເຟີ້ພື້ນຖານ ແລະ ເງິນເຟີ້ພື້ນຖານແມ່ນຢູ່ໃນລະດັບແຕ່ 2-3% ຄືປະຈຸບັນ ກໍແມ່ນລະດັບສົມດຸ່ນ, ຊ່ວຍສ້າງເສດຖະກິດມະຫາພາກເປັນປົກກະຕິ ແລະ ການເຕີບໂຕເສດຖະກິດແບບຍືນຍົງ.
ທ່າອ່ຽງດຳເນີນທຸລະກິດຂອງວິສາຫະກິດ ກໍໄດ້ສ່ອງແສງໃຫ້ເຫັນບັນດາສັນຍານທີ່ຕັ້ງໜ້າ. ໃນ 9 ເດືອນຕົ້ນປີ, ມີວິສາຫະກິດ 68.000 ແຫ່ງໄດ້ຈົດທະບຽນສ້າງຕັ້ງໃໝ່. ຈຳນວນທຶນຈົດທະບຽນ ພ້ອມກັບຈຳນວນວິສາຫະກິດກັບຄືນສູ່ການເຄື່ອນໄຫວຄືນໃໝ່ ກໍເພີ່ມຂຶ້ນເມື່ອທຽບໃສ່ໄລຍະດຽວກັນຂອງປີກາຍ. ສິ່ງນີ້ໄດ້ພິສູດໃຫ້ເຫັນວ່າ ແຫຼ່ງທຶນສິນເຊື່ອເພີ່ມຂຶ້ນ ໄດ້ສ້າງກຳລັງໜູນຢ່າງແທ້ຈິງໃຫ້ແກ່ການຜະລິດຂອງກຸ່ມວິສາຫະກິດ. ທ່ານ ຫງວຽນຕູ້ແອງ ຫົວໜ້າຄະນະຄົ້ນຄ້ວາເສດຖະກິດມະຫາພາກ, ສະຖາບັນຄົ້ນຄ້ວາຄຸ້ມຄອງເສດຖະກິດສູນກາງ CIEM ຖືວ່າ :
“ 9 ເດືອນທີ່ຜ່ານມາ, ອຸດສາຫະກຳພັດທະນາຢ່າງກ້າວກະໂດດຂັ້ນ, ພິເສດແມ່ນອຸດສາຫະກຳຜະລິດ. ນິ້ແມ່ນທ່າອຽງອັນຖືກຕ້ອງ, ເປັນກຳລັງໜູນແກ່ການເຕີບໂຕເສດຖະກິດ, ອາດຈະເຫັນຢູ່ໃນຂອດການສະໜອງ ແລະ ຄວາມຕ້ອງການ ລ້ວນແຕ່ມີປັດໄຈອັນຕັ້ງໜ້າ. ກ່ຽວກັບຍອດການສະໜອງນັ້ນ, ແມ່ນມີການຟື້ນຟູຢ່າງແຂງແຮງທາງດ້ານການລົງທຶນ. ກ່ຽວກັບຍອດຄວາມຕ້ອງການ, 9 ເດືອນຕົ້ນປີ, ວົງເງິນການຂາຍຍ່ອຍ, ການບໍລິການ ແລະ ສິນຄ້າເພີ່ມຂຶ້ນ 9,1% ຊຶ່ງແມ່ນຕົວເລກສູງສຸດໃນຮອບ 5 ປີມານີ້. ທາງດ້ານເນື້ອແທ້, ແມ່ນມີການຟື້ນຟູລະຫວ່າງການສະໜອງ ແລະ ຄວາມຕ້ອງການ ແມ່ນຍ້ອນມີຜົນກະທົບຈາກການສ້າງໂຄງປະກອບເສດຖະກິດຄືນໃໝ່. ການສ້າງໂຄງປະກອບເສດຖະກິດຄືນໃໝ່ນີ້ ນຳມາເຊິ່ງຄວາມເປັນປົກກະຕິດ້ານເສດຖະກິດມະຫາພາກ. ນັບແຕ່ປີ 2011 ມານີ້, ເກືອບຄືວ່າ ພວກເຮົາສາມາດຮັກສາການເຕີບໂຕເສດຖະກິດມະຫາພາກເປັນຢ່າງດີ. ຍ້ອນການສ້າງເສດຖະກິດມະຫາພາກເປັນປົກກະຕິນັ້ນ, ໄດ້ສ້າງພື້ນຖານແກ່ຄວາມເຊື່ອໝັ້ນຕໍ່ຕະຫຼາດຊຶ່ງແມ່ນຄວາມເຊື່ອໝັ້ນຂອງນັກລົງທຶນ ແລະ ຄວາມເຊື່ອໝັ້ນຂອງຜູ້ບໍລິໂພກ, ອຸປະໂພກ ”
ສ້າງທ່ວງທ່າໃຫ້ໃຫ້ GDP ເພີ່ມ 6,5% ທັງປີ
ໃນຊຸມເດືອນທ້າຍປີ, ເສດຖະກິດຫວຽດນາມຄາດຄະເນວ່າ ຍັງຄົງສືບຕໍ່ຢູ່ໃນທ່າຟື້ນຕົວ, ການເຕີບໂຕເສດຖະກິດສາມາດບັນລຸ 6,5% ທັງປີ. ຕາມກົດເກນການຕະຫຼາດແລ້ວ, ລະດັບການເຕີບໂຕໃນໄຕມາດທີ 4 ຈະສູງສຸດໃນປີເພາະມູນຄ່າການສົ່ງອອກເພີ່ມຂຶ້ນ ແລະ ຄວາມຕ້ອງການໃຊ້ຈ່າຍຢູ່ພາຍປະເທດໃນທ້າຍປີເພີ່ມຂຶ້ນຫຼາຍ.
ຢາກບັນລຸລະດັບການເຕີບໂຕນີ້, ຕ້ອງການມີວິທີການແກ້ໄຂຢ່າງຄົບຊຸດ, ໃນນັ້ນມີການບໍລິຫານອັດຕາດອກເບ້ຍ, ອັດຕາແລກປ່ຽນເງິນຕາໃຫ້ເໝາະສົມກັບສະພາບການເສດຖະກິດຢູ່ພາຍໃນ ແລະ ສາກົນ. ລັດຖະບານຍູ້ແຮງການສ້າງໂຄງປະກອບລັດວິສາຫະກິດຄືນໃໝ່, ຈຸດສຸມແມ່ນຫັນລັດວິສາຫະກິດເປັນຫຸ້ນສ່ວນ; ປ່ຽນໃໝ່ເຕັກໂນໂລຢີ, ຍົກສູງສະມັດຕະພາບການອອກແຮງງານ, ບັນດາຂະແໜງການຜະລິດທີມີວົງເງິນສົ່ງອອກຫຼາຍ…ບັນດາກະຊວງ, ຂະແໜງການຕ່າງໆ ກໍຄືວິສາຫະກິດ ສືບຕໍ່ປົດແປງສະພາບແວດລ້ອມແຫ່ງການລົງທຶນ, ຍົກສູງຄວາມສາມາດແກ່ງແຍ້ງຂອງຫວຽດນາມ ແລະ ສ້າງເງື່ອນໄຂສະດວກໃນຂົງເຂດການຄ້າ. ທ່ານ ຫງວຽນຕູ້ແອງ ຫົວໜ້າຄະນະຄົ້ນຄ້ວາເສດຖະກິດມະຫາພາກ, ສະຖາບັນຄົ້ນຄ້ວາຄຸ້ມຄອງເສດຖະກິດສູນກາງ CIEM ໄຈ້ແຍກວ່າ:
“ ຕົວເລກ 6,5% ແມ່ນເປັນໜ້າຊື່ນຊົມ. ຖ້າຫາກພວກເຮົາຢາກກ້າວຂຶ້ນນັ້ນ, ພວກເຮົາຕ້ອງຮັກສາເສດຖະກິດມະຫາພາກເປັນປົກກະຕິ, ໃຫ້ຕະຫຼາດເຄື່ອນໄຫວຫຼາຍກວ່າໃນການຈັດແບ່ງແຫຼ່ງກຳລັງ, ສ່ວນລັດພຽງແຕ່ສ້າງສະແວດລ້ອມແຫ່ງການແກ່ງແຍ້ງ, ໜູນຊ່ວຍຕະຫຼາດ.”
ການເຕີບໂຕເສດຖະກິດແມ່ນປັດໄຈສຳຄັນອັນດັບໜຶ່ງຂອງ 5 ເປົ້າໝາຍການເຕີບໂຕ, ເງີນເຟີ້, ດຸ່ນຊຳລະ, ໄພວ່າງເງິນ ແລະ ຄວາມອຶດຫິວທຸກຍາກ. ເລື່ອງ 9 ເດືອນທີ່ຜ່ານມາ, GDP ຂອງຫວຽດນາມບັນລຸ 6,5% ສູງກວ່າເມື່ອທຽບໃສ່ 2-3 ປີມໍ່ໆມານີ້, ບໍ່ພຽງແຕ່ສະແດງໃຫ້ເຫັນສັນຍານທີ່ຕັ້ງໜ້າຂອງພື້ນຖານເສດຖະກິດເທົ່ານັ້ນ, ຫາກໄກກວ່ານັ້ນ ແມ່ນຫວຽດນາມພວມກ້າວເດີນຢ່າງຖືກທິດໃນການສ້າງໂຄງປະກອບເສດຖະກິດຄືນໃໝ່.