(vovworld)-ກ່ອນນີ້ 70 ປີເຕັມ, ຄືວັນທີ 22/12/1944. ກອງທະຫານຫວຽດນາມປົດປ່ອຍຊາດ, ກອງທະຫານຫລັກແຫລ່ງທຳອິດ ແລະ ກໍແມ່ນຕົ້ນກຳເນີດຂອງກອງທັບປະຊາຊົນຫວຽດນາມໄດ້ຮັບການສ້າງຕັ້ງຂຶ້ນ. ກອງທະຫານປະຫວັດສາດນີ້ໄດ້ສືບທອດ ແລະ ເສີມຂະຫຍາຍນ້ຳໃຈຮັກຊາດ ແລະ ສິລະປະຍຸດການທະຫານຂອງຊາດຫວຽດນາມ ສ້າງບັນດາໄຊຊະນະອັນຍິ່ງໃຫຍ່ໃນພາລະກິດຕໍ່ສູ້ປົດປ່ອຍຊາດ, ປົກປັກຮັກສາປະເທດຫວຽດນາມສັງຄົມນິຍົມ. ໃນໄລຍະປະຈຸບັນ, ກອງທັບປະຊາຊົນຫວຽດນາມ ໄດ້ ແລະ ພວມເສີມຂະຫຍາຍກຳລັງແຮງສັງລວມ ເພື່ອປົກປັກຮັກສາຜືນແຜນດິນອັນຄົບຖ້ວນຂອງປະເທດຊາດ, ປະກອບສ່ວນຮັກສາສັນຕິພາບໂລກ.
ພາບປະກອບ:bacgiang.gov.vn
|
ຜ່ານ 70 ປີແຫ່ງການສູ້ຮົບ, ກໍ່ສ້າງ ແລະ ເຕີບໃຫຍ່, ປະເຊີນຫນ້າກັບສິ່ງທ້າທາຍ, ຄວາມຍຸ້ງຍາກນາໆປະການ, ເປັນຕົ້ນ ຕໍ່ຫນ້າບັນດາບາດລ້ຽວຂອງການປະຕິວັດ, ກອງທັບປະຊາຊົນຫວຽດນາມ ຍາມໃດກໍສະແດງຄຸນນະທາດຂອງກຳລັງປະຕິວັດຢ່າງຈະແຈ້ງ, ຈາກປະຊາຊົນ ແລະ ຕໍ່ສູ້ເພື່ອປະຊາຊົນ, ແມ່ນກຳລັງການເມືອງພິເສດ, ກຳລັງສູ້ຮົບທີ່ຈົ່ງຮັກພັກດີ, ໄວ້ເນື້ອເຊື່ອໃຈຂອງພັກ, ລັດ ແລະ ປະຊາຊົນຫວຽດນາມ. ກອງທັບປະຊາຊົນຫວຽດນາມ ໄດ້ສຳເລັດຫນ້າທີ່ການຕ່າງປະເທດປ້ອງກັນຊາດຢ່າງດີເດັ່ນ, ເພີ່ມທະວີການເຊື່ອມໂຍງເຂົ້າກັບສາກົນ, ເຂົ້າຮ່ວມກຳລັງຮັກສາສັນຕິພາບຂອງສປຊ ເທື່ອລະກ້າວ ເພື່ອຈຸດໝາຍມະນຸດສະທຳ.
ສ້າງກອງທັບໃຫ້ເຂັ້ມແຂງຮອບດ້ານເພື່ອປົກປັກຮັກສາເອກະລາດອະທິປະໄຕໃຫ້ໝັ້ນຄົງ
ຫວນຄືນ 70 ປີແຫ່ງການກໍ່ສ້າງ, ຕໍ່ສູ້ ແລະ ເຕີບໃຫຍ່, ກອງທັບປະຊາຊົນຫວຽດນາມ ຍາມໃດກໍຢືດໝັ້ນຈຸດໝາຍ, ອຸດົມຄະຕິການສູ້ຮົບເພື່ອເອກະລາດແຫ່ງຊາດ ແລະ ສັງຄົມນິຍົມ. ກໍ່ສ້າງກອງທັບປະຕິວັດ, ເປັນກອງທັບຫລວງ, ຍອດຢ້ຽມ, ທັນສະໄຫມເທື່ອລະກ້າວ ແມ່ນວິໄສທັດຍຸດທະສາດຂອງພັກກອມມູນິດ ຫວຽດນາມ ດ້ວຍວຽກງານປ້ອງກັນຊາດ, ໃນການປົກປັກຮັກສາເອກະລາດ, ອະທິປະໄຕຜືນແຜນດິນອັນຄົບຖ້ວນ ແລະ ຮັກສາສັນຕິພາບ, ສະຖຽນລະພາບເພື່ອສ້າງສາ, ພັດທະນາປະເທດຫວຽດນາມ ປະຈຸບັນ. ຕາມ ພົນເອກ ຟຸ່ງກວາງແທງ, ລັດຖະມົນຕີວ່າການກະຊວງປ້ອງກັນປະເທດ ຫວຽດນາມແລ້ວ, ການກໍ່ສ້າງກອງທັບປະຕິວັດ, ເປັນກອງທັບຫລວງ, ຍອດຢ້ຽມ, ທັນສະໄຫມເທື່ອລະກ້າວ ນັ້ນແມ່ນສືບຕໍ່ປັບປຸງການປ້ອງກັນຊາດ, ປັບປຸງກຳລັງຫລັກແຫລ່ງໃນການປົກປັກຮັກສາປະເທດຊາດໃຫ້ໝັ້ນຄົງເຂັ້ມແຂງ ເພື່ອເປັນເຈົ້າການໃນການຕໍ່ສູ້ ແລະ ຍາດເອົາໄຊຊະນະ, ປົກປັກຮັກສາປະເທດຊາດໃຫ້ໝັ້ນຄົງໃນທຸກກໍລະນີ.
“ຕໍ່ຫນ້າຄຳຮຽກຮ້ອງຕ້ອງການໃຫມ່ກ່ຽວກັບການປົກປັກຮັກສາເອກະລາດອະທິປະໄຕ, ຜືນແຜນດິນອັນຄົບຖ້ວນກໍຄືປົກປັກຮັກສາລະບອບການເມືອງຂອງປະເທດຊາດ, ພວກເຮົາຄວນມີກຳລັງແຮງສັງລວມ. ພວກເຮົາຕ້ອງກໍ່ສ້າງເຫຼົ່າທັບຈຳນວນຫນຶ່ງ, ກຳລັງທັນສະໄຫມເພື່ອມີກຳລັງແຮງຢ່າງພຽງພໍປົກປັກຮັກສາອະທິປະໄຕເຂດນ່ານຟ້າ, ເຂດທະເລ, ຜືນແຜນດິນອັນຄົບຖ້ວນຂອງປະເທດຊາດ.”
ປະຈຸບັນ, ສະພາບການໂລກ ແລະ ພາກພື້ນສືບຕໍ່ຜັນໄປຢ່າງສັບສົນ, ຊ້ອນແຝງຫລາຍປັດໄຈກໍ່ໃຫ້ເກີດສະພາບຂາດສະຖຽນລະພາບຍາກທີ່ຄາດຄະເນໄດ້. ພາກພື້ນ ອາຊີ ປາຊີຟີກ, ໃນນັ້ນ ອາຊີຕາເວັນອອກສ່ຽງໃຕ້ ຍັງມີສະຖຽນລະພາບ ແລະ ພັດທະນາ, ແຕ່ຕ້ອງປະເຊີນຫນ້າກັບຄວາມຫຍຸ້ງຍາກສິ່ງທ້າທາຍນາໆປະການ; ຄວາມຂັດແຍ້ງເຂດນ້ຳແດນດິນ, ອະທິປະໄຕເຂດທະເລໝູ່ເກາະ ສືບຕໍ່ເພີ່ມຂຶ້ນ. ສິ່ງດັ່ງກ່າວໄດ້ວາງອອກບັນດາບັນຫາໃຫມ່, ຮຽກຮ້ອງກອງທັບປະຊາຊົນຫວຽດນາມ ສົມທົບຢ່າງແຫນ້ນແຟ້ນລະຫວ່າງບັນດາຫນ້າທີ່ພັດທະນາເສດຖະກິດ, ສັງຄົມ ກັບການປັບປຸງ, ເພີ່ມທະວີການປ້ອງກັນຊາດ, ປ້ອງກັນຄວາມສະຫງົບ ແລະ ການຕ່າງປະເທດ, ສຸມໃສ່ກໍ່ສ້າງ, ປັບປຸງພື້ນຖານປອ້ງກັນຊາດໃນທົ່ວປວງຊົນໃຫ້ເຂັ້ມແຂງ, ສ້າງທ່າສະຫນາມການປ້ອງກັນຊາດໃນທົ່ວປວງຊົນ ຕິດພັນກັບທ່າສະຫນາມປ້ອງກັນຄວາມສະຫງົບຈາກປະຊາຊົນໃຫ້ໝັ້ນຄົງເຂັ້ມແຂງ ເພື່ອປົກປັກຮັກສາອະທິປະໄຕ, ຄວາມສະຫງົບປອດໄພຂອງປະເທດຊາດ.
ເພີ່ມທະວີການເຊື່ອມໂຍງເຂົ້າກັບສາກົນ ແລະຮັກສາສັນຕິພາບຢູ່ພາກພື້ນແລະໂລກ
ຫວຽດນາມເພີ່ມທະວີການຮ່ວມມືສາກົນໃນຂົງເຂດປ້ອງກັນຊາດ ແລະ ສ້າງຄວາມໄວ້ເນື້ອເຊື່ອໃຈກັບຫລາຍປະເທດໃນໂລກຢ່າງບໍ່ຢຸດຢັ້ງ. ກອງທັບປະຊາຊົນຫວຽດນາມ ກໍເພີ່ມທະວີການຮ່ວມມືສາກົນ ເພື່ອຍົກສູງລະດັບຄວາມຮູ້ດ້ານວິທະຍາສາດເຕັກໂນໂລຊີ ແລະ ປະຕິບັດພັນທະສາກົນ. ໃນຊຸມປີຜ່ານມາ, ຫວຽດນາມໄດ້ເຂົ້າຮ່ວມເວທີປາໄສພາກພື້ນ ແລະ ສາກົນກ່ຽວກັບການປ້ອງກັນຊາດເປັນຫລາຍຄັ້ງ. ໃນ 2 ປີມານີ້, ຫວຽດນາມ ໄດ້ສົ່ງນາຍທະຫານເຂົ້າຮ່ວມກຳລັງຮັກສາສັນຕິພາບຂອງ ສປຊ. ຕາມພົນໂທ ຫງວຽນຈີວີ້ງ, ລັດຖະມົນຕີຊ່ວຍວ່າການກະຊວງປ້ອງກັນປະເທດຫວຽດນາມ ແລ້ວ, ນີ້ແມ່ນບາດກ້າວເບື້ອງຕົ້ນແຕ່ໄດ້ສ້າງຂີດໝາຍຢ່າງເລິກເຊິ່ງກ່ຽວກັບເລື່ອງຫວຽດນາມນັບມື້ນັບເຂົ້າຮ່ວມຢ່າງຕັ້ງຫນ້າກວ່າ ໃນການປະກອບສ່ວນເຂົ້າໃນສັນຕິພາບ, ສະຖຽນລະພາບຂອງໂລກ. ພົນໂຕ ຫງວຽນຈີວີ້ງ ຢືນຢັນວ່າ:
“ແຜນນະໂຍບາຍຂອງຫວຽດນາມ ບໍ່ລ່ວງລ້ຳບໍ່ວ່າປະເທດໃດ, ເວັ້ນເສຍແຕ່ການປົກປັກຮັກສາອະທິປະໄຕຜືນແຜນດິນຂອງປະເທດຊາດ. ຫວຽດນາມ ພຽງແຕ່ເຂົ້າຮ່ວມບັນດາການຊ້ອມຮົບມີລັກສະນະມະນຸດສະທຳ. ການເຂົ້າຮ່ວມຂອງຫວຽດນາມລ້ວນແຕ່ໄດ້ຮັບການຕີລາຄາສູງຈາກເພື່ອນມິດສາກົນ.”
ພົນໂທ ຫງວຽນຈີວີ້ງ ໃຫ້ຮູ້ວ່າ: ກ້າວເຂົ້າສູ່ໄລຍະເຊື່ອມໂຍງ, ເພີ່ມທະວີບັນດາການເຄື່ອນໄຫວການຕ່າງປະເທດປ້ອງກັນຊາດ, ຫວຽດນາມ ສືບຕໍ່ຢືດໝັ້ນຈຸດໝາຍເອກະລາດແຫ່ງຊາດຕິດພັນກັບສັງຄົມນິຍົມ. ໃນການພົວພັນກັບສາກົນ, ຫວຽດນາມ ຖືການຮັກສາສະພາບແວດລ້ອມສັນຕິພາບ, ສະຖຽນລະພາບເພື່ອພັດທະນາເສດຖະກິດສັງຄົມ ແມ່ນຜົນປະໂຫຍດສູງສຸດຂອງປະເທດຊາດ. ຫວຽດນາມ ປະຕິບັດນະໂຍບາຍປ້ອງກັນຊາດມີລັກສະນະສັນຕິພາບ ແລະ ປ້ອງກັນຕົວ; ຢຶດໝັ້ນແຜນນະໂຍບາຍບໍ່ນຳໃຊ້ອາວຸດຫລືນາບຂູ່ການນຳໃຊ້ອາວຸດໃນບັນດາການພົວພັນສາກົນ, ແກ້ໄຂບັນດາບັນຫາຍັງຄົງຄ້າງ, ບໍ່ລົງລອຍກັນ ແລະ ຄວາມຂັດແຍ້ງຜືນແຜນດິນໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ. ພັກ ແລະ ລັດ ຫວຽດນາມມ ຢືນຢັນ ສືບຕໍ່ສ້າງກອງທັບປະຊາຊົນຫວຽດນາມປະຕິວັດ, ກອງທັບຫລວງ, ຍອດຢ້ຽມ, ທັນສະໄຫມເທື່ອລະກ້າວໃນທຸກໄລຍະສ້າງສາ ແລະ ປົກປັກຮັກສາປະເທດຊາດ.