ວັນທີ 25/6, ການນຳ 27 ທ່ານຂອງສະຫະພາບເອີລົບ EU ໄດ້ເລີ່ມໂຮມປະຊຸມຢູ່ບຣຸກແຊນ ປະເທດແບນຊິກ ເພື່ອປຶກສາຫາລືບັນດາບັນຫາທີ່ເຄັ່ງຮ້ອນ ທີ່ກໍ່ການແບ່ງແຍກໃນກຸ່ມນີ້ນັບແຕ່ຫຼາຍເດືອນທີ່ຜ່ານມາ. ເລື່ອງວິກິດການໜີ້ສາທາລະນະຢູ່ເກຼັກ, ຄວາມຕ້ອງການປະຕິຮູບລະບອບລະບຽບການຂອງອັງກິດ, ຄວາມຂັດແຍ້ງກັບປະເທດລັດເຊຍຫຼືບັນຫາເຂົ້າເມືອງຢ່າງຜິດກົດໝາຍ ກໍແມ່ນບັນດາບັນຫາທີ່ພວມເຮັດໃຫ້ EU ສັບສົນຫຼາຍຂຶ້ນ.
ທ່ານນາຍົກລັດຖະມົນຕີອັງກິດ Cameron ແລະ ຄູ່ຕຳແໜ່ງຂອງເຢຍລະມັນ |
ເກຼັກແມ່ນຫົວເລື່ອງທີ່ເຄັ່ງຮ້ອນທີ່ສຸດຖືກນຳມາປຶກສາຫາລືກ່ອນທີ່ດຳເນີນກອງປະຊຸມ ແລະ ກໍແມ່ນຫົວເລື່ອງຈຸດສຸມໃນກອງປະຊຸມຂອງບັນດາປະມຸກລັດໃນເອີລົບ. ພາຍຫຼັງທີ່ກອງປະຊຸມສຸດຍອດພາກພື້ນໃຊ້ສະກຸນເງິນເອີໂຣລວມ ສິ້ນສຸດລົງຢ່າງຮີບດ່ວນເມື່ອວັນທີ 22/6 ທີ່ຜ່ານມາ. ທ່ານປະທານ EU Jean – Claude Juncker ໄດ້ສະແດງຄວາມວິຕົກກັງວົນຕໍ່ຄວາມຄືບໜ້າໃນບັນດາການເຈລະຈາລະຫວ່າງເກັຼກກັບກຸ່ມເຈົ້າໜີ້ ຊຶ່ງລວມມີ : EU, ທະນາຄານ ECB ແລະ ກອງທຶນເງິນຕາສາກົນ IMF . ທ່ານປະທານ EU Jean – Claude Juncker ໄດ້ຮຽກຮ້ອງບັນດາຝ່າຍຄວນຍາດແຍ່ງກາລະໂອກາດດຳເນີນການເຈລະຈາໂດຍໄວ. ມາຮອດຈຸດເວລານີ້, ບ້ວງເງິນຊ່ວຍກູ້ລວມມູນຄ່າ 7,2 ຕື້ ເອີໂຣ ( ປະມານ 8 ຕື້ USD )ຍັງບໍ່ທັນໄດ້ຮັບການແກ້ໄຂ. EU ໄດ້ຮຽກຮ້ອງເກຼັກຄວນເພີ່ມເຕີມບັນດາການປະຕິຮູບໃໝ່ຕື່ມອີກຕາມຄວາມຮຽກຮ້ອງຂອງບັນດາເຈົ້າໜີ້ເພື່ອຫຼີກລ້ຽງໄພລົ້ມລະລາຍ.
ເກຼັກເຄັ່ງຮ້ອນຂື້ນໃນແຕ່ລະຊົ່ວໂມງ
ປະຈຸບັນ, ບັນດາປະເທດ EU, ພິເສດແມ່ນເຢັຍລະມັນຊຶ່ງແມ່ນປະເທດຊັ້ນນຳດ້ານເສດຖະກິດຂອງພາກພື້ນ, ພວມຮັກສາກຳລັງດັນຢ່າງໃຫຍ່ຫຼວງຕໍ່ລັດຖະບານເກຼັກ. ກຸ່ມເຈົ້າໜີ້ຂອງ ເກຼັກຖືວ່າ ລັດຖະບານປະຈຸບັນຂອງ ເກຼັກບໍ່ມີນະໂຍບາຍຈະແຈ້ງ ແລະ ຂາດທ່າທີສ້າງສາໃນບັນດາການເຈລະຈາ. ດັ່ງນັ້ນ, ເຂົາເຈົ້າເດັດດຽວບໍ່ຜ່ອນສັ້ນຜ່ອນຍາວ ແລະ ໃຫ້ຮູ້ວ່າ : ຢາກຮັກສາ ເກຼັກ ເປັນສະມາຊິກໃນ ພາກພື້ນໃຊ້ສະກຸນເງິນເອີໂຣລວມໄວ້ຄືເກົ່າ, ແຕ່ບໍ່ຕ້ອງການນຳໃຊ້ດ້ວຍທຸກວິທີທາງ. ສິ່ງດັ່ງກ່າວກໍມີຄວາມໝາຍເຊັ່ນດຽວກັນກັບເລື່ອງ ເກຼັກ ອາດຈະຖືກປັດເຂ່ຍອອກຈາກ ພາກພື້ນໃຊ້ສະກຸນເງິນເອີໂຣລວມ ຖ້າຫາກລັດຖະບານ ເກຼັກ ບໍ່ຍອມດຳເນີນບັນດາການປະຕິຮູບຢ່າງຂ້ຽວຂາດຕາມຄວາມຮຽກຮ້ອງຂອງ ກຸ່ມເຈົ້າໜີ້.
ແຕ່ກ່ອນທີ່ກອງປະຊຸມສຸດຍອດ EU ຖືກຈັດຂຶ້ນພຽງ 2-3 ຊົ່ວໂມງເທົ່ານັ້ນ, ບັນດາປະເທດ EU ໄດ້ສົ່ງສັນຍານໃຫ້ເຫັນວ່າ ອາດຈະຜ່ອນສັ້ນຜ່ອນຍາວຫຼາຍກວ່າກັບ ເກຼັກ ຖ້າຫາກປະເທດນີ້ຍົກອອກບາງວິທີແກ້ໄຂໃໝ່ທີ່ອາດຈະຮັບຮູ້ໄດ້. ການຜ່ອນສັ້ນຜ່ອນຍາວນີ້ ອາດຈະແມ່ນຂໍ້ຕົກລົງກັນເພື່ອຕໍ່ກຳນົດເວລາຊຳລະໜີ້ສິນໃຫ້ແກ່ ເກຼັກ ໃນໄລຍະອັນສັ້ນໆ. ແຕ່ເຖິງຢ່າງໃດກໍຕາມ, ສິ່ງນີ້ກໍພຽງແຕ່ຊ່ວຍ ເກຼັກ ຫຼີກລ້ຽງຈາກເລື່ອງຖືກອອກຈາກ ພາກພື້ນໃຊ້ສະກຸນເງິນເອີໂຣລວມເທົ່ານັ້ນ, ຫາກບໍ່ອາດຊ່ວຍປະເທດແກ້ໄຂບ້ວງໜີ້ສາທາລະນະທີ່ຂຶ້ນເຖິງ 177 % GDP .
ເຮັດໃຫ້ສະຫະພັນເງິນຕາເລິກເຊິ່ງຂຶ້ນຕື່ມ
ວິກິດການໜີ້ສາທາລະນະຢູ່ເກຼັກ ກໍຄືຢູ່ຫຼາຍປະເທດພາຄີກ່ອນໜ້ານັ້ນໄດ້ປົກປິດອະນາຄົດທີ່ສະຫວ່າງສະໄຫວ ແລະ ຈະເລີນຮຸ່ງເຮືອງຂອງ EU ໃນຊຸມທົດສະວັດທີ່ຈະມາເຖິງ. ບັນດາການນຳ EU ເຊື່ອວ່າ ສະຖຽນລະພາບຂອງພາກພື້ນໃຊ້ສະກຸນເງິນເອີໂຣລວມ ແມ່ນຂຶ້ນກັບວິວັດການເຊື່ອມໂຍງຢ່າງເລິກເຊິ່ງກວ່າ, ກໍຄືວາງເປົ້າໝາຍລະອຽດຍາວນານກວ່າ. ຍ້ອນເຫດນີ້ເອງ, ຢູ່ທີ່ ກອງປະຊຸມສຸດຍອດ EU ຄັ້ງນີ້, ບັນດາການນຳປະເທດພາຄີໄດ້ເລັ່ງໃສ່ປຶກສາຫາລືກ່ຽວກັບແຜນການຊຶ່ງຮັບຖືວ່າແມ່ນລະອຽດພໍສົມຄວນກ່ຽວກັບການເຊື່ອມໂຍງຂອງພາກພື້ນໃຊ້ສະກຸນເງິນເອີໂຣລວມໂດຍທ່ານປະທານ EU Jean – Claude Juncker ແລະ ປະທານທະນາຄານສູນກາງເອີລົບ Draghi ນຳສະເໜີ. ໃນນັ້ນ, ເລັ່ງໃສ່ແຜນການພັດທະນາສະຫະພັນທະນາຄານຢ່າງຄົບຖ້ວນດ້ວຍບັນດາຂໍ້ກຳນົດໃໝ່, ຈຳໜ່າຍພັດທະບັດລວມກໍຄືປຶກສາຫາລືກ່ຽວກັບການປ່ຽນແປງສົນທິສັນຍາຮ່ວມເອີລົບ.
ການປະຕິຮູບລະບອບລະບຽບການຫຼືປະປ່ອຍໃຫ້ປະເທດອັງກິດອອກຈາກກຸ່ມ
ບັນດາຄຳຮຽກຮ້ອງດ່ວນກ່ຽວກັບການແກ້ໄຂ ວິກິດການໜີ້ສາທາລະນະຢູ່ເກຼັກ, ເພີ່ມທະວີການເຊື່ອມໂຍງຂອງ EU ໃນ ກອງປະຊຸມສຸດຍອດ EU ຄັ້ງນີ້ ກໍບໍ່ນອນນອກເໜືອຈາກເລື່ອງຈະອອກຈາກກຸ່ມຫຼືບໍ່ຂອງອັງກິດ.
ບັນຫານີ້ເຄັ່ງຮ້ອນຂຶ້ນ ຂະນະທີ່ທ່ານນາຍົກລັດຖະມົນຕີອັງກິດ David Cameron ແລະ ພັກນິຍົມຮັກສາເດີມຂອງທ່ານ ຕ້ອງປະເຊີນໜ້າກັບບັນດາສິ່ງທ້າທາຍໃນການເລືອກຕັ້ງລັດຖະສະພາເອີລົບປີ 2014 ແລະ ການເລືອກຕັ້ງຢູ່ອັງກິດໃນປີ 2015. ການເຊື່ອມໂຍງທີ່ນັບມື້ນັບເພີ່ມຂຶ້ນຂອງ ພາກພື້ນໃຊ້ສະກຸນເງິນເອີໂຣລວມ ໄດ້ເປັນໄພນາບຂູ່ຕໍ່ບັນດາຂະແໜງອຸດສາຫະກຳ, ການບໍລິການການເງິນຂອງອັງກິດ. ສິ່ງນີ້ ໄດ້ຮຽກຮ້ອງໃຫ້ຕ້ອງມີບັນດາມາດຕະການແກ້ໄຂທີ່ມີລັກສະນະນິຕິທຳ ແນໃສ່ຮັບປະກັນສິດຂອງບັນດາປະເທດສະມາຊິກ EU ທີ່ບໍ່ນອນໃນພາກພື້ນໃຊ້ສະກຸນເງິນເອີໂຣລວມ. ການສຳຫຼວດຄັ້ງຕ່າງໆເມື່ອມໍ່ໆມານີ້ຢູ່ອັງກິດໄດ້ສະແດງໃຫ້ເຫັນວ່າ : ຊາວອັງກິດສ່ວນຫຼາຍມີຄວາມຫວັງຈະຖອນອອກຈາກ EU ຖ້າຫາກການລົງປະຊາມະຕິຖືກຈັດຂຶ້ນ. ແຕ່ຄວາມຫວັງນີ້ຂອງອັງກິດ ຄາດຄະເນວ່າ ຈະຕອງປະເຊີນໜ້າກັບການຕຳໜິຕິຕຽນຂອງບັນດາປະເທດສະມາຊິກໃນກຸ່ມ.
ກ່ອນທີ່ກອງປະຊຸມສຸດຍອດ EU ຖືກດຳເນີນ, ທ່ານນາຍົກລັດຖະມົນຕີອັງກິດ Cameron ໄດ້ມີການເດີນທາງຢ້ຽມຢາມຫຼາຍປະເທດເອີລົບເພື່ອຮຽກຮ້ອງໃຫ້ດຳເນີນການປຶກສາຫາລືກ່ຽວກັບບັນຫານີ້ໃນໂຄງການດຳເນີນງານ. ເລື່ອງປະເທດໜຶ່ງອອກຈາກ EU ໄດ້ຮັບຖືວ່າ ແມ່ນບັນຫາສະດຸ້ງໄວພໍສົມຄວນ. ແຕ່ເຖິງຢ່າງໃດກໍຕາມ, ບັນດາຄຳຖະແຫຼງຂອງ ທ່ານນາຍົກລັດຖະມົນຕີອັງກິດ Cameron ໄດ້ສະແດງໃຫ້ເຫັນວ່າ EU ຈະບໍ່ສາມາດຫຼີກລ້ຽງຕໍ່ກໍລະນີອັງກິດອອກຈາກກຸ່ມ.
ພ້ອມກັນນັ້ນ, ມີຫຼາຍບັນຫາທີ່ກ່ຽວຂ້ອງຢ່າງສະໜິດແໜ້ນກັບບັນດາປະເທດ EU ຄື: ບັນຫາອົບພະຍົບ, ຄວາມເຄັ່ງຕຶງໃນການພົວພັນກັບລັດເຊຍ..ກໍຈະຖືກນຳມາປຶກສາຫາລືທີ່ ກອງປະຊຸມສຸດຍອດ EU ຄັ້ງນີ້. ໂຄງການເຄື່ອນໄຫວຂອງກອງປະຊຸມແມ່ນເຕັມໄປດ້ວຍເປົ້າໝາຍຫຼາຍຢ່າງ, ແຕ່ໝາກຜົນທີ່ບັນລຸໄດ້ນັ້ນ, ອາດຈະບໍ່ບັນລຸໄດ້ຕາມເປົ້າໝາຍທີ່ໄດ້ວາງອອກ.