(vovworld) - ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸ໋ຈ້ອງ ໄດ້ມີບົດກ່າວປາໄສສຳຄັນໃນວາລະໄຂກອງປະຊຸມຄັ້ງທີ 13, ຄະນະບໍລິຫານງານສູນກາງພັກຊຸດທີ 11, ເຊິ່ງຖືກໄຂຂຶ້ນໃນວັນທີ 14/12/2015 ຢູ່ຮ່າໂນ້ຍ, ໃນນັ້ນຊີແຈ້ງບັນດາບັນຫາເຊິ່ງກອງປະຊຸມສູນກາງຄັ້ງນີ້ສຸມໃສ່ປຶກສາຫາລື. ທ່ານເລຂາທິການໃຫຍ່ເນັ້ນໜັກວ່າ ສູນກາງຕ້ອງຍົກສູງຈິດໃຈຮັບຜິດຊອບ, ປະຕິບັດສຳເລັດເນື້ອໃນລາຍການກອງປະຊຸມໃຫ້ເປັນຢ່າງດີ. ເນື່ອງໃນໂອກາດນີ້, ບັນນາທິການວິທະຍຸກະຈາຍສຽງຫວຽດນາມ ໄດ້ຄັດສະເໜີບາງເນື້ອໃນຊີ້ນຳໃນບົດກ່າວປາໄສຂອງທ່ານເລຂາທິການໃຫຍ່ ຫງວຽນຟຸ໋ຈ້ອງ.
ຕາມໂຄງການດຳເນີນງານ, ກອງປະຊຸມສູນກາງຄັ້ງນີ້ໄດ້ປຶກສາຫາລືກ່ຽວກັບວຽກງານຮັບເອົາຄຳເຫັນປະກອບຂອງກອງປະຊຸມໃຫຍ່ອົງຄະນະພັກທຸກຂັ້ນ, ຂອງສະມາຊິກສະພາແຫ່ງຊາດ, ແນວໂຮມປະເທດຊາດ, ບັນດອົງການຈັດຕັ້ງມະຫາຊົນ, ຂອງພະນັກງານ, ສະມາຊິກພັກ ແລະ ປະຊາຊົນ ໃສ່ບັນດາຮ່າງເອກະສານເພື່ອຍື່ນສະເໜີຕໍ່ກອງປະຊຸມໃຫຍ່ຄັ້ງທີ 12 ຂອງພັກ. ສູນກາງກໍປຶກສາຫາລືບົດລາຍງານສະຫຼຸບການປະຕິບັດມະຕິສູນກາງຄັ້ງທີ 4 ຊຸດທີ 11 ກ່ຽວກັບການກໍ່ສ້າງພັກ; ບຸກຄະລາກອນຄະນະບໍລິການງານສູນກາງ, ກົມການເມືອງ, ຄະນະເລຂາທິການ ແລະ ບຸກຄະລາກອນຄະນະກຳມະການກວດກາສູນກາງຊຸດທີ 12; ຮ່າງກົດລະບຽບການເຮັດວຽກ, ກົດລະບຽບການເລືອກຕັ້ງທີ່ກອງປະຊຸມໃຫຍ່ຄັ້ງທີ 12 ຂອງພັກ ແລະ ບາງບັນຫາສຳຄັນອື່ນໆອີກ.
ປັບປຸງບັນດາເອກະສານຍື່ນສະເໜີຕໍ່ກອງປະຊຸມໃຫຍ່ຄັ້ງທີ 12 ຂອງພັກໃຫ້ສົມບູບແບບ
ທ່ານເລຂາທິການໃຫຍ່ຊີ້ແຈ້ງວ່າ, ໄລຮອດວັນທີ 06/11/2015, ໄດ້ມີ 68 ອົງຄະນະພັກຂຶ້ນກັບສູນກາງ ສົ່ງບົດລາຍການລວບລວມຄຳເຫັນປຶກສາຫາລືຢູ່ກອງປະຊຸມໃຫຍ່ອົງຄະນະພັກທຸກຂັ້ນທີ່ປະກອບຄຳເຫັນໃສ່ບັນດາຮ່າງເອກະສານຍື່ນສະເໜີຕໍ່ກອງປະຊຸມໃຫຍ່ຄັ້ງທີ 12. ແນວໂຮມປະເທດຊາດຫວຽດນາມ, ບັນດາອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ, ທຸກຂັ້ນ, ທຸກຂະແໜງການ ກໍສົ່ງບົດປະກອບຄຳເຫັນລວບລວມເຖິງສູນກາງ ນັບພັນບົດ ຂອງພະນັກງານ, ສະມາຊິກພັກ, ປະຊາຊົນ ແລະ ຊາວຫວຽດນາມ ອາໄສຢູ່ຕ່າງປະເທດ ເປັນຈຳນວນຫຼວງຫຼາຍ. ໃນກອງປະຊຸມຄັ້ງທີ 10 ສະພາແຫ່ງຊາດຊຸດທີ 13, ກໍໄດ້ປຶກສາຫາລືປະກອບຄຳເຫັນໃສ່ບັນດາຮ່າງເອກະສານຍື່ນສະເໜີຕໍ່ກອງປະຊຸມໃຫຍ່. ທ່ານເລຂາທິການໃຫຍ່ ຫງວຽນຟຸ໋ຈ້ອງ ຢືນຢັນວ່າ.
“ບັນດາອົງການທີ່ກ່ຽວຂ້ອງຂອງສູນກາງໄດ້ລວບລວມ, ໄຈແຍກບັນດາຄຳເຫັນປະກອບ ແລະ ສ້າງບັນດາບົດລາຍງານສັງລວມ, ລວມມີ 1574 ໜ້າ. ຄຳເຫັນສ່ວນຫຼາຍລ້ວນແຕ່ສະແດງໃຫ້ເຫັນຄວາມສຸດຈິດສຸດໃຈ, ກົງໄປກົງມາ, ຄວາມຮັບຜິດຊອບສູງຕໍ່ພັກ, ຕໍ່ປະຊາຊົນ, ປະເທດຊາດ; ຊົມເຊີຍເລື່ອງສູນກາງໄດ້ປະກາດບັນດາຮ່າງເອກະສານເພື່ອຮັບເອົາຄຳເຫັນຂອງປະຊາຊົນໂດຍໄວ; ຖືວ່າ ນີ້ແມ່ນບັ້ນເຄື່ອນໄຫວດ້ານການເມືອງຢ່າງເລິກເຊິ່ງ, ກວ້າງຂວາງ, ສະແດງໃຫ້ເຫັນຈິດໃຈປະຊາທິປະໄຕທີ່ນັບນື້ນັບສູງໃນພັກ, ໃນໝູ່ປະຊາຊົນ ແລະ ສັງຄົມ; ເສີມຂະຫຍາຍພູມປັນຍາຂອງທົ່ວພັກ, ທົ່ວປວງຊົນ, ທົ່ວກອງທັບ ເຂົ້າຮ່ວມວິວັດການວາງແຜນກຳນົດແນວທາງ, ແຜນນະໂຍບາຍ, ນະໂຍບາຍພັດທະນາປະເທດຊາດ, ສ້າງສາ ແລະ ປົກປັກຮັກສາປະເທດຊາດ ໃນສະພາບການໃໝ່”.
ທ່ານເລຂາທິການໃຫຍ່ ຫງວຽນຟູ໋ຈ້ອງສະເໜີບັນດາທ່ານກຳມະການສູນກາງ ປຶກສາຫາລື ແລະ ປະກອບຄວາມເຫັນຢ່າງລະອຽດ ເຂົ້າບົດລາຍງານອະພິປາຍ, ຮັບເອົາຄວາມເຫັນ ແລະ ເນື້ອໃນຄົບຊຸດຂອງບັນດາຮ່າງເອກະສານ ດ້ວຍຈິດໃຈສ້າງສັນ, ນັບຖືບັນດາຄວາມເຫັນປະກອບຂອງທົ່ວພັກ, ບັນດາສະມາຊິກສະພາແຫ່ງຊາດ, ແນວໂຮມປະເທດຊາດຫວຽດນາມ, ບັນດາອົງການຈັດຕັ້ງການເມືອງ - ສັງຄົມ ແລະ ປະຊາຊົນ.
ສະຫຼຸບການປະຕິບັດມະຕິສູນກາງຄັ້ງທີ 4 ຊຸດທີ 11 ກ່ຽວກັບການກໍ່ສ້າງພັກ
ທ່ານເລຂາທິການໃຫຍ່ໃຫ້ຮູ້ວ່າ, ແຜນການຂອງກົມການເມືອງ, ບັນດາຄະນະພັກແຂວງ, ນະຄອນ, ບັນດາອົງຄະນະພັກສັງກັດສູນກາງ ໄດ້ດຳເນີນການສະຫຼຸບການປະຕິບັດມະຕິສູນກາງຄັ້ງທີ 4 “ບາງບັນຫາອັນຮີບດ່ວນ ກ່ຽວກັບການກໍ່ສ້າງພັກໃນປະຈຸບັນ“ ຢ່າງເຂັ້ມງວດ, ແລະ ມີຄວາມຮັບຜິດຊອບ. ບົນພື້ນຖານບົດລາຍງານສະຫຼຸບຂອງບັນດາອົງຄະນະພັກສັງກັດສູນກາງ, ທ່ານເລຂາທິການໃຫຍ່ ສະເໜີບັນດາທ່ານກຳມະການສູນກາງພັກໃຫ້ຄຳເຫັນ ກ່ຽວກັບບັນດາເນື້ອໃນຂອງບົດລາຍງານ, ສຸມໃສ່ຕີລາຄາສະພາບການປະຕິບັດມະຕິ, ຊີ້ແຈ້ງບັນດາວຽກງານທີ່ປະຕິບັດໄດ້, ບັນດາວຽກງານບໍ່ທັນປະຕິບັດໄດ້, ຖອດຖອນບົດຮຽນ. ບັນດາກຳມະການສູນກາງກໍ່ຄວນປະກອບຄຳເຫັນກ່ຽວກັບທິດທາງ, ໜ້າທີ່ ສືບຕໍ່ປະຕິບັດມະຕິສູນກາງຄັ້ງທີ 4, ສະເໜີບັນດາບັນຫາທີ່ຈຳເປັນຕ້ອງປັບປຸງ, ເພີ່ມເຕີມ ເພື່ອແນໃສ່ແກ້ໄຂຄວາມຫຍຸ້ງຍາກ, ຕິດຂັດໃນວິວັດແຫ່ງການປະຕິບັດມະຕິ.
ປັບປຸງບັນດາແຜນການບຸກຄະລາກອນໃຫ້ສົມບູນ
ທ່ານເລຂາທິການໃຫຍ່ ຫງວຽນຟູ໋ຈ້ອງ ໃຫ້ຮູ້ວ່າ, ພາຍຫຼັງກອງປະຊຸມສູນກາງຄັ້ງທີ 12, ອະນຸກະມະການບຸກຄະລາກອນ ແລະ ກົມການເມືອງໄດ້ຮີບເຮັ່ງຊີ້ນຳສະຫຼຸບ ຜົນແຫ່ງການປ່ອນບັດສະເໜີບຸກຄະລາກອນ ຂອງສູນກາງ, ຄົ້ນຄ້ວາ, ສະເໜີບັນດາມາດຖານພິຈາລະນາ ກ່ຽວກັບກໍລະນີ “ພິເສດ“ ແມ່ນກຳມະການສູນກາງຊຸດທີ 11 ແຕ່ງຕັ້ງຄືນໃໝ່ເປັນກຳມະການສູນກາງຊຸດທີ 12; ຄົ້ນຄ້ວາ ແລະ ສະເໜີບັນດາຄວາມຕ້ອງການ, ພື້ນຖານເພື່ອເລືອກເຟັ້ນບຸກຄະລາກອນທີ່ມີມາດຕະຖານ, ເງື່ອນໄຂຢ່າງຄົບຖ້ວນໃນເກນອາຍຸເຂົ້າຮ່ວມກົມການເມືອງ, ຄະນະເລຂາຊຸດທີ 12. ທີ່ກອງປະຊຸມສູນກາງຄັ້ງນີ້, ກົມການເມືອງລາຍງານຕໍ່ສູນກາງ ກ່ຽວກັບໝາກຜົນແຫ່ງການກະກຽມບຸກຄະລາກອນຄະນະບໍລິຫານງານສູນກາງ, ບຸກຄະລາກອນກົມການເມືອງ, ຄະນະເລຂາທິການ ແລະ ບຸກຄະລາກອນກຳມະການກວດກາສູນກາງຊຸດທີ 12. ສູນກາງກໍ່ໄດ້ລົງມະຕິບັນຊີລາຍຊື່ບັນດາກຳມະການສູນກາງຊຸດທີ 11 (ນັບທັງທາງການ ແລະ ສຳຮອງ) ໃນເກນອາຍຸ, ໃນກໍລະນີ “ພິເສດ“ ແຕ່ງຕັ້ງຄືນໃໝ່. ສູນກາງກໍ່ແຕ່ງຕັ້ງບຸກຄະລາກອນການເມືອງ, ຄະນະເລຂາຊຸດທີ 12; ຄະນະກຳມະການກວດກາສູນກາງຊຸດທີ 12 ແລະ 4 ຕຳແໜ່ງເປັນຜູ້ນຳຫຼັກແຫຼ່ງ. ທ່ານເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈ້ງວ່າ.
“ນີ້ແມ່ນວຽກງານສຳຄັນທີ່ສຸດ, ສະເໜີສູນກາງ ສຸມກຳລັງແຮງ, ພູມປັນຍາເຂົ້າໃນການຄົ້ນຄ້ວາບັນດາບົດລາຍງານຂອງກົມການເມືອງ ແລະ ບັນດາເອກະສານກ່ຽວກັບບຸກຄະລາກອນ ທີ່ກ່ຽວຂ້ອງຢ່າງລະອຽດ ເພື່ອປຶກສາຫາລື, ໃຫ້ຄຳເຫັນ, ສ້າງຄວາມເຫັນດີເປັນເອກະພາບສູງກ່ຽວກັບບັນຫານີ້, ເປັນພື້ນຖານເພື່ອໃຫ້ສູນກາງປ່ອນບັດຕົກລົງກ່ຽວກັບບຸກຄະລາກອນ ແລະ ຈົດໃສ່ບັດສະເໜີ ກ່ຽວກັບບຸກຄະລາກອນໃຫ້ຖືກກັບຂັ້ນຕອນ“.
ທ່ານເລຂາທິການໃຫຍ່ ຫງວຽນຟູ໋ຈ້ອງ ກໍ່ຊີ້ແຈ້ງບັນດາເນື້ອໃນຈຳເປັນປຶກສາຫາລືກ່ຽວກັບກົດລະບຽບການເຮັດວຽກ ແລະ ກົດລະບຽບການເລືອກຕັ້ງຂອງກອງປະຊຸມໃຫຍ່ພັກກອມມູນິດຫວຽດນາມທົ່ວປະເທດ ແລະ ບັນດາບົດລາຍງານສຳຫຼວດກວດກາ ການຊີ້ນຳນຳພາຂອງຄະນະບໍລິຫານງານສູນກາງຊຸດທີ 11 ທີ່ກອງປະຊຸມຄັ້ງນີ້.