(vovworld) - ກອງປະຊຸມໃຫຍ່ຊຸດທີ VIII ແນວໂຮມປະເທດຊາດຫວຽດນາມ ຈະດຳເນີນໃນລະຫວ່າງວັນທີ 25 – 27/9, ຢູ່ຮ່າໂນ້ຍ. ດ້ວຍຫົວຂໍ້ວ່າ “ສາມັກຄີ, ປະຊາທິປະໄຕ, ປ່ຽນໃໝ່ພັດທະນາ“, ກອງປະຊຸມໃຫຍ່ແມ່ນໂອກາດເພື່ອປ່ຽນໃໝ່ການເຄື່ອນໄຫວຕ່າງໆຂອງແນວໂຮມ ເພື່ອແນໃສ່ລະດົມກຳລັງແຮງແຫ່ງມະຫາສາມັກຄີທົ່ວປວງຊົນທັງຊາດ.
ແນວໂຮມປະເທດຊາດຫວຽດນາມແມ່ນພາກສ່ວນໜຶ່ງໃນລະບົບການເມືອງຂອງຫວຽດນາມປະຈຸບັນນີ້. ແນວໂຮມປະເທດຊາດຫວຽດນາມ ເຕົ້າໂຮມ, ເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນທັງຊາດ, ປະຕິບັດປະຊາທິປະໄຕ, ເພີ່ມທະວີຄວາມເຫັນດີເຫັນພ້ອມໃນສັງຄົມ; ຕິດຕາມກວດກາ, ໄຈ້ແຍກຕີລາຄາສັງຄົມ; ເຂົ້າຮ່ວມການກໍ່ສ້າງພັກ. ລັດ, ເຄື່ອນໄຫວການຕ່າງປະເທດປະຊາຊົນ ປະກອບສ່ວນສ້າງສາ ແລະ ປົກປັກຮັກສາປະເທດຊາດ.
ໃນສະຖານະການປະຈຸບັນ, ການເຕົ້າໂຮມກໍ່ສ້າງກຸ່ມກ້ອນມະຫາສາມັກຄີທົ່ວປວງຊົນ ແລະ ເພີ່ມທະວີການຕິດຕາມກວດກາ, ໄຈ້ແຍກຕີລາຄາສັງຄົມແມ່ນໜຶ່ງໃນບັນດາໜ້າທີ່ຕົ້ນຕໍທີ່ວາງອອກໃຫ້ແນວໂຮມປະເທດຊາດຫວຽດນາມ.
ເຕົ້າໂຮມກຸ່ມກ້ອນມະຫາສາມັກຄີທົ່ວປວງຊົນ
ມະຫາສາມັກຄີແມ່ນມູນເຊື້ອອັນລ້ຳຄ່າຂອງຊາດ, ສ້າງເປັນກຳລັງແຮງເພື່ອໃຫ້ພາລະກິດປະຕິວັດຫວຽດນາມໄດ້ຮັບຜົນສຳເລັດ. ເພື່ອເພີ່ມທະວີ ແລະ ເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນທັງຊາດ, ພັກກອມມູນິດຫວຽດນາມ ແລະ ປະທານໂຮ່ຈີມິນ ໄດ້ກໍ່ຕັ້ງ ແລະ ນຳພາແນວໂຮມເອກະພາບແຫ່ງຊາດຫວຽດນາມ, ໝາຍເຖິງແນວໂຮມປະເທດຊາດຫວຽດນາມໃນເມື່ອກ່ອນ. ສູນກາງພັກ ໄດ້ປະກາດໃຊ້ຫຼາຍມະຕິ, ແຜນນະໂຍບາຍ, ນະໂຍບາຍ ເພື່ອແນໃສ່ເບິ່ງແຍງ ແລະ ເສີມຂະຫຍາຍບັນດາຊົນຊັ້ນ, ບັນດາກຳລັງໃນສັງຄົມ. ລັດກໍ່ໄດ້ປະກາດໃຊ້ຫຼາຍນະໂຍບາຍ, ກົດໝາຍເພື່ອປຸກລຸກ ແລະ ເສີມຂະຫຍາຍຫົວຄິດປະດິດສ້າງຂອງປະຊາຊົນທຸກຊັ້ນວັນນະ, ເບິ່ງແຍງ, ປັບປຸງກຸ່ມກ້ອນມະຫາສາມັກຄີທົ່ວປວງຊົນທັງຊາດ. ໃນສະພາບການນັ້ນ, ແນວໂຮມປະເທດຊາດຫວຽດນາມທຸກຂັ້ນໄດ້ເພີ່ມທະວີການຂົນຂວາຍປະຊາຊົນຍູ້ແຮງຂະບວນການແຂ່ງຂັນຮັກຊາດ, ປະກອບສ່ວນພັດທະນາເສດຖະກິດ, ລົບລ້າງຄວາມອຶດຫີວ, ລຸດຜ່ອນຄວາມທຸກຍາກ. ບັນດາອົງການສະມາຊິກຂອງແນວໂຮມເພີ່ມທະວີການເຕົ້າໂຮມ, ດຶງດູດສະມາຊິກໃໝ່ເຂົ້າຮ່ວມຕື່ມອີກ, ເຕົ້າໂຮມປະຊາຊົນທຸກຊັ້ນວັນນະເປັນຈຳນວນຫຼວງຫຼາຍເຂົ້າຮ່ວມບັນດາອົງການເໝາະສົມ.
ໂດຍເສີມຂະຫຍາຍບົດບາດໃຈກາງແມ່ນສາມັກຄີທົ່ວປວງຊົນທັງຊາດໃນໄລຍະປະຈຸບັນ, ແນວໂຮມໄດ້ຫັນບັນດາຮູບການເຕົ້າໂຮມເປັນຫຼາຍຮູບຫຼາຍແບບ, ຂົນຂວາຍປະຊາຊົນທຸກຊັ້ນວັນນະດ້ວຍການຂົນຂວາຍຕ່າງໆທີ່ມີລັກສະນະທົ່ວປວງຊົນ. ຄຽງຂ້າງນັ້ນ, ແນວໂຮມຍາມໃດກໍ່ຮັບຟັງ ແລະ ເຕົ້າໂຮມບັນດາຄຳເຫັນປະກອບ, ແນວຄິດຈິດໃຈ, ຄວາມຫວັງທີ່ຊອບທຳຂອງປະຊາຊົນ ເພື່ອສ່ອງແສງເຖິງພັກ ແລະ ລັດ, ປະກອບສ່ວນກໍ່ສ້າງ, ປັບປຸງແຜນນະໂຍບາຍ, ນະໂຍບາຍ, ກົດໝາຍ. ໃນສະພາບການໃໝ່, ເພື່ອກໍ່ສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ຄວນເສີມຂະຫຍາຍແບບວິທີເຕົ້າໂຮມຂອງແນວໂຮມ, ພິເສດແມ່ນຄວນພັດທະນາຮູບແບບຮ່ວມສຳພັນພາຍໃນປະເທດ ແລະ ຕ່າງປະເທດ. ລະຫວ່າງບັນດາສາສະໜາ, ຊົນເຜົ່າ, ບັນດາທ້ອງຖີ່ນເພື່ອສ້າງຄວາມສາມັກຄີຢ່າງໝັ້ນຄົງກວ່າ. ທ່ານ ເຈິ່ນເຮົ້າ, ອະດີດບັນນາທິການໃຫຍ່ວາລະສານແນວໂຮມ, ຖືວ່າ:
“ຂ້າພະເຈົ້າສະເໜີຄວນປະກາດລາຍການມະຫາສາມັກຄີທົ່ວປວງຊົນທັງຊາດ ເພື່ອປະເທດຫວຽດນາມສັນຕິພາບ, ເອກະພາບ, ປະຊາທິປະໄຕ ແລະ ຮັ່ງມີເຂັ້ມແຂງ. ນີ້ແມ່ນຄວາມຮຽກຮ້ອງຕ້ອງການເຊິ່ງຂ້າພະເຈົ້າຖືວ່າປະຊາຊົນ 90 ກວ່າລ້ານຄົນພວມລໍຖ້າ ແລະ ມຸ່ງໄປເຖິງກອງປະຊຸມໃຫຍ່ເພື່ອຮັບຟັງຄຳເວົ້າ, ຄຳຮຽກຮ້ອງຂອງກອງປະຊຸມໃຫຍ່. ຂ້າພະເຈົ້າຖືວ່າຕ້ອງມີຖະແຫຼງການປະກາດກ່ຽວກັບຄວາມສາມັກຄີທົ່ວປວງຊົນທັງຊາດໃນສະພາບການໃໝ່“.
ເພີ່ມທະວີການຕິດຕາມກວດກາ, ໄຈ້ແຍກຕີລາຄາສັງຄົມ
ບົດບາດຂອງແນວໂຮມປະເທດຊາດຫວຽດນາມ, ບໍ່ພຽງແຕ່ປຸກລະດົມນຳ້ໃຈຮັກຊາດ, ອອກແຮງງານຢ່າງສຸດຈິດສຸດໃຈຂອງທົ່ວປວງຊົນເທົ່ານັ້ນ, ຫາກຍັງຕ້ອງຮັບປະກັນບົດບາດຕິດຕາມກວດກາ ແລະ ໄຈ້ແຍກຕີລາຄາສັງຄົມສຳລັບການຊີ້ນຳນຳພາຂອງພັກ ແລະ ການຄຸ້ມຄອງຂອງລັດອີກດ້ວຍ. ການ ຕິດຕາມກວດກາ ແລະ ໄຈ້ແຍກຕີລາຄາສັງຄົມບໍ່ພຽງແຕ່ແມ່ນການປະກອບຄວາມເຫັນຕໍ່ພັກ ແລະ ລັດເທົ່ານັ້ນ, ຫາກຍັງແມ່ນການໃຫ້ຄຳປຶກສາຕໍ່ບັນດາແຜນນະໂຍບາຍ, ນະໂຍບາຍ ເພື່ອໃຫ້ການຊີ້ນຳນຳພາ, ການບໍລິຫານໄດ້ດີກວ່າອີກດ້ວຍ. ສຳລັບແນວໂຮມແລ້ວ, ເວລານີ້ຕ້ອງເສີມຂະຫຍາຍທ່າແຮງນີ້ເພື່ອນຳເອົາຄຳເຫັນປະກອບຂອງປະຊາຊົນເຖິງອຳນາດການປົກຄອງທຸກຂັ້ນ.
ກ່ຽວກັບການໄຈ້ແຍກຕີລາຄາ, ໄລຍະຜ່ານມາ, ສະເພາະເລື່ອງປະກອບສ່ວນກໍ່ສ້າງລັດຖະມຳມະນູນປີ 2013, ໃນຈຳນວນ 22 ລ້ານເທື່ອຄົນປະກອບຄຳເຫັນນັ້ນ, ມີສະມາຊິກຂອງແນວໂຮມກວ່າ 8 ລ້ານເທື່ອຄົນ.
ກ່ຽວກັບການຕິດຕາມກວດກາ, ປະຈຸບັນ, ແນວໂຮມພວມຜັນຂະຫຍາຍ 5 ເນື້ອໃນຕິດຕາມກວດກາລະດັບຊາດ ແລະ ທ້ອງຖີ່ນ. ຄຽງຂ້າງຂັ້ນ, ແນວໂຮມກໍ່ໄດ້ລົງນາມໃນລາຍການສົມທົບກັນກັບຫຼາຍກະຊວງ, ຂະແໜງການເພື່ອຕິດຕາມກວດກາຕາມແຕ່ລະຂົງເຂດເພື່ອໃຫ້ແນວໂຮມເສີມຂະຫຍາຍການເຄື່ອນໄຫວ ຕິດຕາມກວດກາ ແລະ ໄຈ້ແຍກຕີລາຄາສັງຄົມເປັນຢ່າງດີ. ທ່ານ ຫງວຽນຊອງຟີ, ຮອງປະທານສະມາຄົມນັກຮົບເກົ່າຫວຽດນາມ, ເຊິ່ງແມ່ນອົງການທີ່ເປັນສະມາຊິກຂອງແນວໂຮມປະເທດຊາດຫວຽດນາມ, ຖືວ່າ:
“ປັດໃຈມະນຸດ - ພະນັກງານແນວໂຮມຕ້ອງມີລະດັບຄວາມຮູ້, ມີຄວາມສາມາດ ຈຶ່ງມີເງື່ອນໄຂຢ່າງພຽງພໍ ເພື່ອອະທິບາຍ ແລະ ແນະນຳໃຫ້ປະຊາຊົນ. ຢາກຕິດຕາມກວດກາໄດ້ ແມ່ນຕ້ອງມີລາຍການ, ເນື້ອໃນຕິດຕາມກວດກາ ແລະ ຜູ້ທີ່ມີຄວາມສາມາດຕິດຕາມກວດກາຢ່າງພຽງພໍ“.
ແນວໂຮມປະເທດຊາດ ແມ່ນອົງການການເມືອງ - ສັງຄົມມີບົດບາດປົກປ້ອງສິດ ແລະ ຜົນປະໂຫຍດອັນຊອບທຳຂອງປະຊາຊົນ. ການເພີ່ມທະວີຄວາມສາມາດສາມັກຄີທົ່ວປວງຊົນ, ເພີ່ມທະວີການຕິດຕາມກວດກາ, ໄຈ້ແຍກສັງຄົມໃນຕໍ່ໜ້າ ຈະປະກອບສ່ວນປັບປຸງ, ຢືນຢັນບົດບາດຂອງແນວໂຮມ, ປະກອບສ່ວນຢ່າງຕັ້ງໜ້າເຂົ້າໃນການພັດທະນາຂອງປະເທດຊາດ.