ທີ່ວາລະອັດກອງປະຊຸມຄັ້ງທີ 13 ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 11, ທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມຫງວຽນຟູ້ຈ້ອງ ໄດ້ຢືນຢັນວ່າ ກອງປະຊຸມຄັ້ງທີ 13 ໄດ້ປະກອບສ່ວນເຂົ້າໃນຜົນສຳເລັດຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ.
ທ່ານເລຂາທິການໃຫຍ່ພັກກອມມູນິດຫວຽດນາມຫງວຽນຟູ້ຈ້ອງ |
ທ່ານເລຂາທິການໃຫຍ່ພັກກອມມູນິດຫວຽດນາມຫງວຽນຟູ້ຈ້ອງ ຊີ້ແຈ້ງວ່າ : ກອງປະຊຸມໄດ້ເລັ່ງໃສ່ປຶກສາຫາລື, ປະກອບຄຳເຫັນລະອຽດ ແລະ ເປັນເອກະພາບຢ່າງສູງເພື່ອຮັບຮອງເອົາບັນດາເອກະສານທີ່ຍື່ນສະເໜີຕໍ່ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກ່ຽວກັບການພັດທະນາເສດຖະກິດ-ສັງຄົມ, ການກໍ່ສ້າງພັກ ແລະ ການກະກຽມບຸກຄະລາກອນໃຫ້ແກ່ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມທີ່ຈະມາເຖິງນີ້.
ກະກຽມບັນດາເອກະສານກອງປະຊຸມໃຫຍ່ຂອງພັກຢ່າງລະອຽດ
ທ່ານເລຂາທິການໃຫຍ່ພັກກອມມູນິດຫວຽດນາມຫງວຽນຟູ້ຈ້ອງ ໄດ້ຊີ້ແຈ້ງວ່າ ທີ່ກອງປະຊຸມຄັ້ງນີ້, ການກະກຽມບັນດາເອກະສານທີ່ຍື່ນສະເໜີຕໍ່ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ ໄດ້ສຳເລັດຕາມຄວາມຕ້ອງການ ແລະ ແຜນການທີ່ໄດ້ວາງອອກ. ເນື້ອໃນບັນດາເອກະສານແມ່ນການເຕົ້າໂຮມສິ່ງຍອດຍິ່ງທາງດ້ານພູມປັນຍາ, ເຈດຈຳນົງຂອງທົ່ວພັກ, ທົ່ວປວງຊົນ, ທົ່ວກອງທັບຫວຽດນາມ; ຕີລາຄາຢ່າງກົງໄປກົງມາກ່ຽວກັບໝາກຜົນແຫ່ງການປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກ, ພ້ອມກັນນັ້ນ, ກໍໄຈ້ແຍກ, ຄາດຄະເນສະພາບການໂລກ ແລະ ຂອງປະເທດຊາດໃນຊຸມປີທີ່ຈະມາເຖິງ, ກຳນົດເປົ້າໝາຍ, ທິດທາງໜ້າທີ່ ແລະ ວິທີການແກ້ໄຂ, ສືບຕໍ່ຍູ້ແຮງກິດຈະການປ່ຽນແປງໃໝ່ຢ່າງຮອບດ້ານ ແນໃສ່ກໍ່ສ້າງ ແລະ ພັດທະນາປະເທດຊາດຢ່າງວ່ອງໄວ ແລະ ໝັ້ນຄົງ. ກ່ຽວກັບການພັດທະນາເສດຖະກິດ-ສັງຄົມ, ທ່ານເລຂາທິການໃຫຍ່ພັກກອມມູນິດຫວຽດນາມຫງວຽນຟູ້ຈ້ອງ ໃຫ້ຮູ້ວ່າ :
“ ເອກະສານໄດ້ມີການເພີ່ມເຕີມຫຼາຍເນື້ອໃນກ່ຽວກັບທິດທາງພັດທະນາເສດຖະກິດຕະຫຼາດຕາມກຳນົດທິດສັງຄົມນິຍົມ, ປ່ຽນໃໝ່ຮູບແບບການເຕີບໂຕ, ສ້າງໂຄງປະກອບເສດຖະກິດຄືນໃໝ່, ຍູ້ແຮງການຫັນເປັນອຸດສາຫະກຳ ແລະ ທັນສະໄໝ, ພັດທະນາແຫຼ່ງຊັບພະຍາກອນມະນຸດ, ນຳໃຊ້ຄວາມກ້າວໜ້າໃນຂົງເຂດວິທະຍາສາດ-ເຕັກໂນໂລຢີ, ຍົກສູງປະສິດທິພາບ, ປະສິດທິຜົນການຄຸ້ມຄອງສັງຄົມ; ປະຕິບັດຄວາມກ້າວໜ້າ, ຄວາມຍຸຕິທຳສັງຄົມ; ເພີ່ມທະວີການຄຸ້ມຄອງຊັບພະຍາກອນ, ຮັກສາສິ່ງແວດລ້ອມ, ເປັນເຈົ້າການປ້ອງກັນ ແລະ ຕ້ານໄພທຳມະຊາດ, ຮັບມືກັບການປ່ຽນແປງຂອງດິນຟ້າອາກາດ. ເນັ້ນໜັກແຜນນະໂຍບາຍພັດທະນາພື້ນຖານເສດຖະກິດຜະລິດເປັນສິນຄ້າຫຼາຍພາກສ່ວນ, ປະຕິບັດຕາມກົດເກນຂອງເສດຖະກິດຕະຫຼາດທີ່ມີລັກສະນະທັນສະໄໝ ແລະ ເຊື່ອມໂຍງເຂົ້າກັບສາກົນ; ຕະຫຼາດສວມບົດບາດສຳຄັນໃນການປຸກລະດົມ ແລະ ຈັດແບ່ງບັນດາແຫຼ່ງກຳລັງຢ່າງມີປະສິດທິຜົນ, ເປັນກຳລັງໜູນປົດປ່ອຍກຳລັງການຜະລິດ. ລັດສວມບົດບາດກຳນົດທິດ, ກໍ່ສ້າງ ແລະ ສ້າງລະບອບເສດຖະກິດໃຫ້ສົມບູນແບບ, ສ້າງສະພາບແວດລ້ອມການແກ່ງແຍ້ງຢ່າງສະເໝີພາບ, ກະຈ່າງແຈ້ງ ແລະ ສົດໃສ, ດັດປັບພື້ນຖານເສດຖະກິດ, ຊຸກຍູ້ການຜະລິດດຳເນີນທຸລະກິດ, ປະຕິບັດຄວາມກ້າວໜ້າ ແລະ ຍຸດຕິທຳທາງສັງຄົມ”
ສ້າງລັດແຫ່ງອຳນາດນິຕິບັນຍັດຂອງປະຊາຊົນ, ໂດຍປະຊາຊົຮ ແລະ ເພື່ອປະຊາຊົນ
ກ່ຽວກັບການກໍ່ສ້າງພັກ ແລະ ລະບົບການເມືອງ, ທ່ານເລຂາທິການໃຫຍ່ພັກກອມມູນິດຫວຽດນາມຫງວຽນຟູ້ຈ້ອງໄດ້ຢືນຢັນວ່າ : ເອກະສານເພີ່ມເຕີມ, ກຳນົດແຈ້ງກວ່າກ່ຽວກັບຄວາມຈຳເປັນ ແລະ ການກຳນົດທິດປ່ຽນໃໝ່ກ່ຽວກັບການຈັດຕັ້ງ ແລະ ການເຄື່ອນໄຫວຂອງລະບົບການເມືອງຢ່າງຄົບຊຸດກວ່າສຳລັບການປ່ຽນໃໝ່ດ້ານເສດຖະກິດ ນັບທັງການຈັດຕັ້ງ, ເນື້ອໃນ, ແບບວິທີການເຄື່ອນໄຫວ. ຕາມນັ້ນແລ້ວ, ຄວນສືບຕໍ່ສ້າງ ລັດແຫ່ງອຳນາດນິຕິບັນຍັດ, ປະຕິບັດປະຊາທິປະໄຕ, ຕ້ອງສ້າງໃຫ້ມີການຫັນປ່ຽນຢ່າງຕັ້ງໜ້າ ແລະ ມີປະສິດທິຜົນກວ່າເກົ່າ. ທ່ານເລຂາທິການໃຫຍ່ພັກກອມມູນິດຫວຽດນາມຫງວຽນຟູ້ຈ້ອງ ຊີ້ແຈ້ງວ່າ:
“ ຢັ້ງຢືນຄວາມຈຳເປັນ, ຖືກຕ້ອງຂອງການປະກາດໃຊ້, ເດັດດຽວປະຕິບັດມະຕິສູນກາງພັກເທື່ອທີ 4 ຊຸດທີ 11 ກ່ຽວກັບການກໍ່ສ້າງພັກ, ຍູ້ແຮງການຕໍ່ສູ້ປ້ອງກັນ ແລະ ຕ້ານການສໍ້ລາດບັງຫຼວງ, ຟູມເຟືອຍ; ສະກັດກັ້ນ ແລະ ຍູ້ສະພາບຊຸດໂຊມດ້ານການເມືອງ, ແນວຄິດ, ຄຸນສົມບັດ, ວິຖີຊີວິດ, ການຜັນແປ ແລະ ຫັນປ່ຽນໂດຍຕົນເອງຢູ່ພາຍໃນໃຫ້ຖອຍໄປ; ເພີ່ມທະວີວຽກງານກໍ່ສ້າງພັກໃຫ້ປອດໃສ, ໝັ້ນຄົງເຂັ້ມແຂງທາງດ້ານການເມືອງ, ແນວຄິດ, ຄຸນສົມບັດ, ການຈັດຕັ້ງ, ພະນັກງານ ແລະ ແບບວິທີນຳພາ ”
ທ່ານເລຂາທິການໃຫຍ່ພັກກອມມູນິດຫວຽດນາມຫງວຽນຟູ້ຈ້ອງ ໃຫ້ຮູ້ວ່າ ກອງປະຊຸມສູນກາງພັກຄັ້ງທີ 13 ໄດ້ສຳຫຼວດກວດຄືນການຊີ້ນຳ ນຳພາຂອງ ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 11. ກອງປະຊຸມໄດ້ເຫັນດີເປັນເອກະສັນຮັບຮອງເອົາການສະເໜີບັນຊີລາຍຊື່ບັນດາກຳມະການສູນກາງພັກຊຸດທີ 11 ໃນເກນອາຍຸ ແລະ ບັນດາກຳມະການສູນກາງພັກຊຸດທີ 11 ສຳລັບກໍລະນີພິເສດ ເພື່ອເລືອກຕັ້ງຄືນໃໝ່ໃນຊຸດທີ 12, ສະເໜີບຸກຄະລາກອນທີ່ເຂົ້າຮ່ວມກົມການເມືອງ, ຄະນະເລຂາສູນກາງພັກຊຸດທີ 12 , ສະເໜີບຸກຄະລາກອນຄະນະກຳມະການກວດກາສູນກາງຊຸດທີ 12, ບຸກຄະລາກອນກົມການເມືອງ, ຄະນະເລຂາສູນກາງພັກຊຸດທີ 11 ແລະ ຜູ້ອອກສະໝັກຮັບເລືອກຕັ້ງເຂົ້າໃນ 4 ຕຳແໜ່ງ ການນຳຫຼັກແຫຼ່ງຂອງພັກ ແລະ ລັດ. ທ່ານເລຂາທິການໃຫຍ່ພັກກອມມູນິດຫວຽດນາມຫງວຽນຟູ້ຈ້ອງ ຢືນຢັນວ່າ ກອງປະຊຸມຄັ້ງທີ 13 ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 11 ໄດ້ປະສົບຜົນສຳເລັດຢ່າງຈົບງາມ, ການກະກຽມ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມໄດ້ສຳເລັດໂດຍພື້ນຖານຕາມຄວາມຮຽກຮ້ອງຕ້ອງການ ແລະ ແຜນການທີ່ໄດ້ວາງອອກ .