(vovworld)- ປີ 2014 ໄດ້ເກີດການຜັນແປເຄັ່ງຕຶງຫລາຍຢ່າງບົນທະເລຕາເວັນອອກ, ເປັນຕົ້ນພາຍຫລັງເຫດການຈີນ ຕັ້ງຮ້ານເຈາະນ້ຳມັນ ໄຮ່ຢາງ 981 ຢ່າງຜິດກົດໝາຍຢູ່ເຂດເສດຖະກິດຈຳເພາະ ແລະ ໄຫລ່ທະວີບຂອງຫວຽດນາມ ແຕ່ວັນທີ 2/5-15/7/2014. ເຫດການນີ້ໄດ້ວາງອອກສິ່ງທ້າທາຍຫລາຍຢ່າງໃຫ້ແກ່ວຽກງານການຕ່າງປະເທດຫວຽດນາມ. ແຕ່ດ້ວຍການຢືດໝັ້ນແນວທາງການຕ່າງປະເທດສັນຕິພາບ, ແກ້ໄຂຄວາມຂັດແຍ້ງຢ່າງສົມເຫດສົມຜົນດ້ວຍວິທີການທູດນັ້ນ, ຫວຽດນາມ ສາມາດປົກປັກຮັກສາອະທິປະໄຕຜືນແຜ່ນດິນຢ່າງໝັ້ນຄົງ ພ້ອມທັງຮັກສາການພັດທະນາການພົວພັນກັບຈີນ, ສ້າງເງື່ອນໄຂໃຫ້ແກ່ກິດຈະການພັດທະນາປະເທດຊາດ.
ທ່ານຟ້າມບີງມີງ, ຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດຫວຽດນາມ
ພາບ:chinhphu.vn
|
ອາດຈະຢືນຢັນວ່າ ໃນ ປີ 2014, ບັນຫາທີ່ປະຊາຊົນຫວຽດນາມສົນໃຈທີ່ສຸດ ແລະ ກໍແມ່ນຂີດໝາຍຂອງຂະແຫນງການທູດຫວຽດນາມ ນັ້ນແມ່ນການແກ້ໄຂບັນດາບັນຫາຮ້ອນເຮັ່ງບົນທະເລຕາເວັນອອກ. ຍ້ອນໄດ້ເປັນເຈົ້າການ, ມີຍຸດໂທບາຍຕໍ່ສູ້ສັງລວມ ດ້ວຍຫລາຍຮູບການ, ສັນຕິພາບກໍຄື ອະທິປະໄຕຂອງປະເທດຊາດໄດ້ຮັບການຮັກສາຢ່າງໝັ້ນຄົງ.
ສາມັກຄີ,ທຸ່ນທ່ຽງ,ຢືດໝັ້ນໃນການແກ້ໄຂບັນຫາ
ໃນຊຸມມື້ທີ່ ຈີນຕັ້ງຮ້ານເຈາະນ້ຳມັນ ໄຮ່ຢາງ 981 ຢ່າງຜິດກົດໝາຍຢູ່ເຂດເສດຖະກິດຈຳເພາະ ແລະ ໄຫລ່ທະວີບຂອງຫວຽດນາມ, ທົ່ວປະເທດ ໄດ້ສະແດງໃຫ້ເຫັນຄວາມສາມັກຄີ, ເຫັນດີ, ຮ່ວມແຮງຮ່ວມໃຈ, ເປັນຈິດຫນຶ່ງໃຈດຽວ, ຢືດໝັ້ນແນວທາງການຕ່າງປະເທດສັນຕິພາບ ເພື່ອປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນ. ນະໂຍບາຍການຕ່າງປະເທດຂອງຫວຽດນາມ ສະແດງໃຫ້ເຫັນຈິດໃຈ…, ຮັກຫອມສັນຕິພາບ, ແກ້ໄຂບັນດາຄວາມຂັດແຍ້ງດ້ວຍກົດໝາຍສາກົນ. ທ່ານຟ້າມບີງມີງ, ຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດຫວຽດນາມ ຢືນຢັນວ່າ:
“ແຜນນະໂຍບາຍການຕ່າງປະເທດຂອງພວກເຮົາ ແມ່ນພັດທະນາການພົວພັນກັບບັນດາປະເທດ ເພື່ອສ້າງສະພາບແວດລ້ອມສັນຕິພາບ, ສະຖຽນລະພາບ, ຮັບໃຊ້ການພັດທະນາປະເທດຊາດ ແລະ ປົກປັກຮັກສາອະທິປະໄຕຂອງປະເທດຊາດຢ່າງໝັ້ນຄົງ. ນີ້ແມ່ນ 2 ຈຸດໝາຍບໍ່ຂັດແຍ້ງກັນ ແລະ ຍາມໃດກໍຫນູນຊ່ວຍເຊິ່ງກັນ ແລະ ກັນ. ເພາະສະນັ້ນ, ໃນປີ 2014 ເມື່ອສະພາບການ ບົນທະເລຕາເວັນອອກສັບສົນ, ພວກເຮົາ ໄດ້ຜັນຂະຫຍາຍ ບັນດາການເຄື່ອນໄຫວການຕ່າງປະເທດ ຢ່າງຕັ້ງຫນ້າ ເພື່ອແກ້ໄຂບັນຫາໂດຍສັນຕິວິທີ. ພວກເຮົາປຶກສາຫາລື, ແລກປ່ຽນຄຳເຫັນ, ຕໍ່ສູ້ຜ່ານບັນດາການພົບປະໂດຍກົງກັບຈີນ ແລະ ໄດ້ດຳເນີນການພົບປະແລກປ່ຽນຄຳເຫັນກັບຈີນກ່ຽວກັບບັນຫາທະເລຕາເວັນອອກ ກວ່າ 40 ຄັ້ງ.”
ລະດົມກຳລັງແຮງສັງລວມບົນແນວຮົບການຕ່າງປະເທດ
ເພື່ອຢືນຢັນຢືດໝັ້ນຫລັກໝັ້ນຂອງຫວຽດນາມ, ຮຽກຮ້ອງແກ້ໄຂຄວາມຂັດແຍ້ງໂດຍສັນຕິ, ຫວຽດນາມ ໄດ້ລະດົມກຳລັງການຕ່າງປະເທດຢ່າງຫລວງຫລາຍ. ການນຳພັກ ແລະ ລັດ ໄດ້ຍາດແຍ່ງທຸກກາລະໂອກາດເພື່ອຮຽກຮ້ອງຫາງສຽງພາຍໃນປະເທດ ແລະເພື່ອນມິດສາກົນ ສະຫນັບສະຫນູນຫລັກໝັ້ນເປັນທຳຂອງຫວຽດນາມ. ປະຊາຄົມຊາວຫວຽດນາມອາໄສຢູ່ຕ່າງປະເທດ ກວ່າ 4 ລ້ານຄົນ ລ້ວນແຕ່ເປັນຈິດຫນຶ່ງໃຈດຽວອ່ວາຍຫນ້າເມືອຫາປະເທດຊາດ, ເຂົ້າຮ່ວມການແຫ່ຂະບວນຄັດຄ້ານເລື່ອງຈີນຕັ້ງຮ້ານເຈາະນ້ຳມັນຢ່າງຜິດກົດໝາຍ.
ຍ້ອນເຫດນັ້ນ, ຫລັກໝັ້ນເປັນທຳຂອງຫວຽດນາມ ໃນການແກ້ໄຂຄວາມຂັດແຍ້ງໂດຍສັນຕິວິທີ, ເຄົາລົບກົດໝາຍສາກົນ ໄດ້ຮັບການຮັບຮູ້ ແລະ ສະຫນັບສະຫນູນຈາກປະຊາຄົມໂລກ. ບັນດາສຽງເວົ້າຄັດຄ້ານການກະທຳຂອງຈີນ ຢ່າງແຮງທີ່ສຸດ, ສາມັກຄີທີ່ສຸດ ໄດ້ກ້ອງກັງວານຈາກ ວໍຊີງຕັນ, ອີຢູ, ສປຊ, ອາຊີຕາເວັນອອກ ແລະ ອາຊີຕາເວັນອອກສ່ຽງໃຕ້. ພິເສດ ອາຊີຕາເວັນອອກສ່ຽງໃຕ້ ໄດ້ສະແດງໃຫ້ເຫັນກຸ່ມຫນຶ່ງທີ່ເປັນເອກະພາບຕໍ່ຫນ້າກຳລັງດັນແບ່ງແຍກຂອງຈີນ, ຖືທະເລຕາເວັນອອກ ແມ່ນຫົວເລື່ອງທີ່ຂາດບໍ່ໄດ້ໃນບັນດາກອງປະຊຸມຂອງ ອາຊຽນ. ເປັນຄັ້ງທຳອິດໃນກວ່າ 20 ປີ ຜ່ານມາ, ບັນດາລັດຖະມົນຕີການຕ່າງປະເທດ ອາຊຽນ ໄດ້ອອກຖະແຫລງການສະເພາະກ່ຽວກັບທະເລຕາເວັນອອກ.
ມານະພະຍາຍາມຮັກສາການພົວພັນລະຫວ່າງຫວຽດນາມແລະຈີນພັດທະນາ
ພາຍຫລັງຮ້ານເຈາະນ້ຳມັນ ໄຮ່ຢາງ 981 ຖອນອອກຈາກເຂດທະເລຂອງຫວຽດນາມ, ຫວຽດນາມ ໄດ້ເປັນເຈົ້າການສົ່ງທູດພິເສດຂອງທ່ານເລຂາທິການໃຫຍ່ ໄປຍັງຈີນ. ໝາກຜົນພົ້ນເດັ່ນຂອງການໄປປະຕິບັດງານຄັ້ງນີ້ ນັ້ນແມ່ນ ການນຳສອງຝ່າຍໄດ້ຢືນຢັນ: ຈະຄວບຄຸມບັນດາຄວາມບໍ່ລົງລອຍກັນບົນທະເລເປັນຢ່າງດີ, ບໍ່ມີການກະທຳເຮັດໃຫ້ສະພາບການສັບສົນຂຶ້ນຕື່ມ ແລະ ບໍ່ເປີດກວ້າງຄວາມຄັດແຍ້ງ. ສິ່ງດັ່ງກ່າວແມ່ນເໝາະສົມກັບ ຂໍ້ 5 ຂອງຖະແຫລງການກ່ຽວກັບການປະພຶດຂອງບັນດາຝ່າຍບົນທະເລຕາເວັນອອກ(DOC) ຊື່ງຈີນ ໄດ້ລົງນາມກັບ ອາຊຽນ ເມື່ອປີ 2002. ການໄປປະຕິບັດງານຄັ້ງນີ້ ໄດ້ເປີດຊ່ອງທາງໃຫ້ແກ່ການໄປປະຕິບັດງານຢູ່ຫວຽດນາມຂອງບັນດາເຈົ້າຫນ້າທີ່ຂັ້ນສູງຂອງຈີນ ຫລັງຈາກນັ້ນ 2,3 ເດືອນ ນັ້ນແມ່ນການໄປປະຕິບັດງານຢູ່ຫວຽດນາມຂອງທ່ານ ຢາງເຈ້ຍຊື້, ກຳມະການຄະນະລັດຖະບານຈີນ ແລະ ທ່ານ ອີເຈິ້ງເຊີງ, ກຳມະການປະຈຳກົມການເມືອງສູນກາງພັກກອມມູນິດຈີນ. ທີ່ການພົບປະຄັ້ງຕ່າງໆ, ຝ່າຍຈີນ ໄດ້ຍົກທັດສະນະຖືການພົວພັນກັບຫວຽດນາມ ເປັນສຳຄັນ, ມານະພະຍາຍາມຮັກສາການພົວພັນລະຫວ່າງສອງປະເທດພັດທະນາຢ່າງປອດໃສ, ເປັນປົກກະຕິ. ທ່ານຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດຫວຽດນາມ ຟ້າມບີງມີງ ແບ່ງປັນວ່າ:
“ໃນວິວັດການແກ້ໄຂບັນຫາບົນທະເລ, ພວກເຮົາໄດ້ຕັ້ງຫນ້າ, ເປັນເຈົ້າການ ຮັກສາບັນດາການພົວພັນກັບຈີນ ຜ່ານການແລກປ່ຽນຄະນະຜູ້ແທນຂອງບັນດາກະຊວງ, ຂະແຫນງການ, ທ້ອງຖິ່ນ. ສືບຕໍ່ຮັກສາບັນດາການພົວພັນດ້ານເສດຖະກິດ, ການຄ້າ ກັບຈີນ. ສະນັ້ນ ພວກເຮົາຍັງຄົງ ຮັບປະກັນ ສືບຕໍ່ພັດທະນາການພົວພັນກັບຈີນ ແລະ ຮັບປະກັນອະທິປະໄຕ ແລະ ສິດອະທິປະໄຕຂອງພວກເຮົາຢູ່ທະເລຕາເວັນອອກ.”
ຕົວເລກສະຖິຕິປີ 2014 ໃຫ້ເຫັນວ່າ: ການພົວພັນດ້ານການຄ້າສອງຝ່າຍ ຫວຽດນາມ ແລະ ຈີນ ບັນລຸ 58 ຕື້ USD, ຊື່ງແມ່ນລະດັບສູງສຸດນັບແຕ່ກ່ອນມາຮອດປະຈຸບັນ. ການຂຶ້ນກັບເສດຖະກິດ, ເຮັດໃຫ້ສອງຝ່າຍຕ່າງກໍ່ມີຜົນປະໂຫຍດ ນັ້ນແມ່ນປັດໄຈເພື່ອໃຫ້ສອງຝ່າຍແກ້ໄຂບັນດາຄວາມບໍ່ລົງລອຍກັນບົນທະເລ. ສຳລັບຫວຽດນາມ, ສະພາບການຢູ່ທະເລຕາເວັນອອກປີ 2014 ອີກຄັ້ງຫນຶ່ງ ໄດ້ກາຍເປັນບົດຮຽນ ໃຫ້ແກ່ວຽກງານການຕ່າງປະເທດຫວຽດນາມ. ນັ້ນແມ່ນການເຕົ້າໂຮມກຳລັງແຮງຂອງທັງຊາດກັບກຳລັງແຮງຍຸກສະໄຫມ, ຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ພ້ອມທັງຮັກສາສັນຕິພາບ, ສະຖຽນລະພາບເພື່ອພັດທະນາ.