ພາຍຫຼັງເຄື່ອນໄຫວປິດລັບມາເປັນໄລຍະຍາວ, ວັນທີ 27 ພະຈິກ, ກຳລັງ HTS ຢູ່ພາກເໜືອ ຊີຣີ ໄດ້ປຸກລະດົມບັ້ນບຸກໂຈມຕີຄັ້ງຕ່າງໆເຂົ້າໃນເຂດດິນແດນໂດຍອຳນາດການປົກຄອງຂອງທ່ານປະທານາທິບໍດີ Bashar Al-Assad ຄຸ້ມຄອງ. ຕໍ່ໜ້າການຕໍ່ຕ້ານຢ່າງອ່ອນແອຂອງກອງທັບ ຊີຣີ, ພຽງໃນເວລາ 10 ວັນ, ກຳລັງ HTS ໄດ້ຢຶດຄອງບັນດານະຄອນທີ່ສຳຄັນຂອງ ຊີຣີ ແລະ ວັນທີ 08 ທັນວາ ໄດ້ບຸກໂຈມຕີເຂົ້ານະຄອນຫຼວງ Damascus, ໂຄ່ນລົ້ມອຳນາດການປົກຄອງປັດຈຸບັນ.

       ພັງທະລາຍແບບກະທັນຫັນ

        ການພັງທະລາຍຢ່າງໄວວາຂອງອຳນາດການປົກຄອງປະທານາທິບໍດີ Bashar Al – Assad ເຮັດໃຫ້ບັນດາຝ່າຍຕົກສະເງີ້, ລວມທັງບັນດາສຳພັນທະມິດສຳຄັນຂອງ ຊີຣີ. ພາຍໃນ 10 ວັນທີ່ກຳລັງ HTS ບຸກໂຈມຕີ, ກຳລັງທະຫານ ຊີຣີ ເບິ່ງຄືວ່າ ບໍ່ສາມາດຕໍ່ຕ້ານໄດ້ແຕ່ຢ່າງໃດ, ເວັ້ນເສຍແຕ່ການປະທະກັນຢ່າງເຄັ່ງຕຶງຢູ່ອ້ອມເຂດ Aleppo, ນະຄອນໃຫຍ່ອັນດັບ 2 ຂອງ ຊີຣີ. ພາຍຫຼັງນະຄອນ Aleppo ຖືກປິດລ້ອມໃນວັນທີ 30 ພະຈິກ, ອຳນາດການປົກຄອງຂອງທ່ານປະທານາທິບໍດີ Bachar Al-Assad ກໍຖືກສູນເສຍບັນດານະຄອນໃຫຍ່ສຳຄັນອື່ນຄື Hama, Homs ໃນຊຸມວັນຕໍ່ໄປ ແລະ ຮອດວັນທີ 08 ທັນວາ, ກຳລັງ HTS ກໍ່ສືບຕໍ່ບຸກໂຈມຕີເຂົ້ານະຄອນຫຼວງ Damascus ແຕ່ມີຜູ້ເສຍຊີວິດ ແລະ ບາດເຈັບຢ່າງໜ້ອຍ.

        ຕາມວົງການນັກສັງເກດການ, ການຕໍ່ຕ້ານຢ່າງອ່ອນແອ ແລະ ຖືກພັງທະລາຍຢ່າງວ່ອງໄວຂອງອຳນາດການປົກຄອງຂອງທ່ານປະທານາທິບໍດີ Bashar al – Assad ມີຫຼາຍສາຍເຫດ. ທຳອິດ, ບັນດາບັ້ນບຸກໂຈມຕີຂອງ HTS ໄດ້ດຳເນີນໃນຈຸດເວລາທີ່ດຸ່ນສິດອຳນາດຢູ່ຕາເວັນອອກກາງມີການປ່ຽນແປງຫຼາຍຢ່າງ. ເຮັກໂບລາ, ກຳລັງຢູ່ ລີບັງ ຕໍ່ສູ້ພ້ອມກັບລັດຖະບານ al-Assad ໄດ້ຖືກຜົນເສຍຫາຍຫຼາຍໃນບັ້ນຕໍ່ສູ້ກັບ ອິດສະຣາແອັນ ຈາກຫຼາຍເດືອນຜ່ານມາ ສ່ວນ ອີຣານ ກໍພວມຢູ່ໃນໄລຍະທີ່ຈະເກີດການປະທະກັນຮອບດ້ານກັບ ອິດສະຣາແອັນ ໄດ້ງ່າຍ, ສະນັ້ນ ບັງຄັບຕ້ອງມີການເຄື່ອນໄຫວຢ່າງຮອບດ້ານ. ໃນຂະນະນັ້ນ, ລັດເຊຍ, ທີ່ເປັນພັນທະມິດຫຼັກແຫຼ່ງຂອງ ຊີຣີ, ກໍ່ພັດພວມສຸມແຫຼ່ງກຳລັງໃຫ້ແກ່ການປະທະກັນກັບ ຢູແກຼນ, ສະນັ້ນພຽງແຕ່ຊ່ວຍເຫຼືອກອງທັບ ຊີຣີ ດ້ວຍແຫຼ່ງກຳລັງກອງທັບອາກາດຈຳນວນໜ້ອຍ ເຊິ່ງ ລັດເຊຍ ພວມປະຈຳຢູ່ຖານທີ່ໝັ້ນ Hmeimim. ດັ່ງນັ້ນ, ອຳນາດການປົກຄອງຂອງທ່ານ Bashar al – Assad ຂາດການຊ່ວຍເຫຼືອສຳຄັນທີ່ສຸດກ່ຽວກັບການທະຫານ ແລະ ຄວາມໝັ້ນຄົງ. ບໍ່ພຽງແຕ່ເທົ່ານັ້ນ, ສະພາບການຊຸດໂຊມຂອງພື້ນຖານເສດຖະກິດ ແລະ ກອງທັບ ຊີຣີ ພາຍຫຼັງຖືກຜົນກະທົບຈາກສົງຄາມດຸເດືອດພາຍໃນປະເທດ ເຮັດໃຫ້ປະຊາຊົນຫຼາຍຄົນຂອງປະເທດນີ້ເສຍຊີວິດ. ການຊຸດໂຊມນີ້ ເຮັດໃຫ້ບັນດາກຳລັງຫຼັກແຫຼ່ງຂອງ ຊີຣີ ຖືກສູນເສຍກຳລັງແຮງ ແລະ ບໍ່ມີກຳລັງຕໍ່ສູ້ທີ່ຈຳເປັນ.

        ສຳລັບປະຊາຊົນ ຊີຣີ, ການຜັນແປດ້ານການເມືອງຢ່າງໄວວາໃນປັດຈຸບັນ ໄດ້ມມີຂຶ້ນໂດຍສັນຕິພາບ. ພາຍຫຼັງທີ່ກຳລັງ HTS ແລະ ບາງກຸ່ມປະກອບອາວຸດພັນທະມິດບຸກເຂົ້າປົກຄອງນະຄອນຫຼວງ Damascus, ຄວາມເປັນລະບຽບຮຽບຮ້ອຍຍັງຮັກສາໄວ້ໄດ້ໂດຍພື້ນຖານ.  

       ຜົນກະທົບທີ່ຍາກຈະຄາດຄະເນລ່ວງໜ້າໄດ້ ຕໍ່ພາກພື້ນ

        ການຜັນແປດ້ານການເມືອງຄັ້ງໃຫຍ່ຢູ່ ຊີຣີ ແນ່ນອນວ່າ ຈະມີຜົນກະທົບຢ່າງໃຫຍ່ຫຼວງຕໍ່ພາກພື້ນຕາເວັນອອກກາງ ແລະ ໂລກ, ຍ້ອນທີ່ຕັ້ງພູມີສາດການເມືອງສຳຄັນຂອງປະເທດນີ້ ກໍຄືບັນດາການຮ່ວມສຳພັນຄວາມໝັ້ນຄົງທີ່ສັບສົນລະຫວ່າງຫຼາຍກຳລັງຢູ່ ຊີຣີ ກັບບັນດາປັດໄຈພາຍນອກ. ກ່ອນອື່ນໝົດ, ເລື່ອງ HTS ຢຶດເອົາສິດອຳນາດຢ່າງວ່ອງໄວ ເຮັດໃຫ້ບັນດາຂໍ້ມູນ ແລະ ຂໍ້ສັງເກດກ່ຽວກັບກຳລັງນີ້ຍັງຈຳກັດຢູ່. ເລື່ອງ HTS ເຜີຍໃຫ້ຮູ້ວ່າ ຢາກແບ່ງປັນສິດອຳນາດກັບບັນດາກຳລັງອື່ນຢູ່ ຊີຣີ, ພ້ອມທັງຮັກສາການຕິດຕໍ່ກັບອຳນາດການປົກຄອງຂອງທ່ານ Bashar al – Assad ໄດ້ຊີ້ໃຫ້ເຫັນບາງສັນຍານທີ່ຕັ້ງໜ້າກ່ຽວກັບກຸ່ມນີ້. ເຖິງຢ່າງໃດກໍຕາມ, ນັກຊ່ຽວຊານ ທ່ານ Ibrahim Al – Assil ເນັ້ນໜັກວ່າ ຍັງລະມັດລະວັງ ແລະ ການຕີລາຄາ HTS ອີງໃສ່ບັນດາການກະທຳຕໍ່ໄປຂອງກຸ່ມນີ້.

        ເມື່ອແບ່ງປັນຂໍ້ສັງເກດທີ່ຕ້ອງມີການຕີລາຄາ HTS ຢ່າງລະມັດລະວັງ, ນັກຊ່ຽວຊານຄົ້ນຄວ້າ ຊີຣີ ຂຶ້ນກັບສະພາ ອັດລັງຕິກ, ທ່ານ Qutaiba Idlbi ຖືວ່າ ການກະທົບຂອງການຜັນປ່ຽນດ້ານການເມືອງ ຢູ່ ຊີຣີ ຕໍ່ພາກພື້ນ ຈະຂຶ້ນກັບຊຸມເດືອນຕໍ່ໄປ, ເມື່ອບັນດາກຳລັງຢູ່ ຊີຣີ ປຶກສາຫາລືກ່ຽວກັບຂັ້ນຕອນຂ້າມຜ່ານນີ້. ກ່ຽວກັບວິທີການສຳຜັດໄລຍະຕໍ່ໄປຂອງອຳນາດການປົກຄອງ ອາເມລິກາ ຕໍ່ກັບ ຊີຣີ, ທ່ານ Qutaiba Idlbi ໃຫ້ຂໍ້ສັງເກດວ່າ:

        “ສຳລັບ ອາເມລິກາ, ບໍ່ມີສິດຜົນປະໂຫຍດຍຸດທະສາດໃດຢູ່ ຊີຣີ ທີ່ສຳຄັນກວ່າການຕ້ານການກໍ່ການຮ້າຍ, ສະກັດກັ້ນຂະບວນຊາວລີ້ໄພ ຫຼື ສະກັດກັ້ນການເຄື່ອນໄຫວຂອງ ອີຣານ ຢູ່ທີ່ນີ້ ແຜ່ລາມໄປຍັງບ່ອນອື່ນ. ນອກຈາກສິ່ງດັ່ງກ່າວແລ້ວ, ອາເມລິກາ ບໍ່ມີຜົນປະໂຫຍດໃດແທ້ໆໃນການຈັດວາງ ລັດ ຊີຣີ ຄືແນວໃດໃນໄລຍະຈະມາເຖິງ”.

        ໃນຂະນະນັ້ນ, ບັນດາຜູ້ແທນປຶກສາຫາກ່ຽວກັບໄລຍະຂ້າມຜ່ານຢູ່ ຊີຣີ ພວມໄດ້ຮັບການຊຸກຍູ້ຈາກຫຼາຍຝ່າຍ. ກ່າວຄຳເຫັນໃນເວທີປາໄສ ໂດຮາ ຢູ່ ກາຕາ ໃນວັນທີ 08 ທັນວາ, ທູດພິເສດຂອງ ສປຊ ຮັບຜິດຊອບ ຊີຣີ, ທ່ານ Geir Pedersen ຖືວ່າ ເຖິງວ່າວິວັດການສ້າງສາປະເທດ ຊີຣີ ໄດ້ຖືກພັງທະລາຍ ແລະ ແບ່ງແຍກຄືນໃໝ່ແມ່ນສິ່ງທີ່ຫຍຸ້ງຍາກ ແລະ ສັບສົນທີ່ສຸດ ແຕ່ນີ້ແມ່ນໂອກາດທີ່ບໍ່ສາມາດປະໄປໄດ້.

        “ບັນດາສິ່ງທ້າທາຍໃນຕໍ່ໜ້າແມ່ນໃຫຍ່ຫຼວງທີ່ສຸດ ແລະ ພວກຂ້າພະເຈົ້າກໍເຫັນວ່າ ມີຄວາມວິຕົກກັງວົນ ແລະ ຢ້ານກົວ. ແຕ່ນີ້ແມ່ນຈຸດເວລາທີ່ຕ້ອງຍາດເອົາໂອກາດນີ້ ເພື່ອສ້າງ ຊີຣີ ໃຫ້ຟື້ນຕົວຄືນໃໝ່ ແລະ ຄວາມໝັ້ນໜຽວຂອງປະຊາຊົນ ຊີຣີ ຈະເປີດເສັ້ນທາງສ້າງປະເທດ ຊີຣີ ສາມັກຄີ ແລະ ສັນຕິພາບ”.

        ໃນຂໍ້ສະເໜີທຳອິດ, ສະຫະພາບແຫ່ງຊາດ ຊີຣີ ຝ່າຍຄ້ານ, ໄດ້ເຕົ້າໂຮມກຳລັງການເມືອງຝ່າຍຄ້ານຂອງ ຊີຣີ ຢູ່ຕ່າງປະເທດ, ວັນທີ 08 ທັນວາ ຮຽກຮ້ອງປະຕິບັດໄລຍະຂ້າມຜ່ານ ພາຍໃນ 18 ເດືອນ ເພື່ອຮຽບຮຽງລັດຖະທຳມະນູນ, ມຸ່ງໄປເຖິງການດຳເນີນບັ້ນຫາສຽງເລືອກຕັ້ງຄັ້ງໃຫຍ່. ເຖິງຢ່າງໃດກໍຕາມ, ກຳລັງ HTS ແລະ ບັນດາພັກຝ່າຍພາຍໃນປະເທດ ຢູ່ ຊີຣີ ຍັງບໍ່ທັນມີຄຳຕອບກັບຕໍ່ຂໍ້ສະເໜີນີ້./.