ຄວາມເຄັ່ງຕຶງໃນການພົວພັນຕ່າງປະເທດ ລະຫວ່າງ ອາເມລິກາ ແລະ ເວເນຊູເອລາ ພວມມີສັນຍານປີນຂັ້ນໄດດ້ວຍບັນດາມາດຕະການໂຕ້ຕອບເຊິ່ງກັນ ແລະ ກັນ. ຄວາມເຄັ່ງຕຶງສືບຕໍ່ໄດ້ຮັບການຍູ້ຂຶ້ນລະດັບໜຶ່ງ ເມື່ອຕົ້ນອາທິດນີ້ ເວເນຊູເອລາ ໄດ້ຮຽກຮ້ອງ ອາເມລິກາ ຕ້ອງຫລຸດຜ່ອນກ່ວາ 80% ຈຳນວນພາລະກອນການທູດ ຢູ່ສະຖານທູດ ອາເມລິກາ ປະຈຳນະຄອນຫຼວງ Caracac ໃນຮອບເວລາ15 ວັນ. ການກະທຳໃໝ່ດັ່ງກ່າວ ໄດ້ຖືວ່າຈະເປີດໄລຍະເຄັ່ງຕຶງໃໝ່ໃນການພົວພັນລະຫວ່າງ ອາເມລິກາ ແລະ Venezuela , ຍູ້ຖອຍທຸກຄວາມມານະພະຍາຍາມ ປັບປຸງການພົວພັນລະຫວ່າງ 2 ປະເທດນັບແຕ່ເມື່ອທ່ານປະທານາທິບໍດີ Nicolas Maduro ຂຶ້ນກຳອຳນາດໃນປີ 2013.
(ພາບປະປອບ) |
ຕາມຄຳສັ່ງຈາກອຳນາດການປົກຄອງ Caracas ແລ້ວ, ໃນຮອບເວລາ 15 ວັນ, ສະຖານທູດ ອາເມລິກາ ປະຈຳເວເນຊູເອລາ ຕ້ອງຫລຸດຈຳນວນພະນັກງານຈາກ 100 ຄົນຄືປະຈຸບັນລົງເຫຼືອພຽງ 17 ຄົນ. ເຫດຜົນທີ່ເວເນຊູເອລາ ຍົກອອກແມ່ນເພື່ອໃຫ້ເທົ່າທຽມກັບຈຳນວນພະນັກງານບັນຈຸຂອງສະຖານທູດເວເນຊູເອລາ ປະຈຳ ວໍຊີງຕັນ. ກ່ອນໜ້ານັ້ນ, Caracas ກໍ່ດຳເນີນບັນດາມາດຕະການທີ່ແຂງແຮງອື່ນໆ, ໃນນັ້ນມີການນຳໃຊ້ກົດລະບຽບໃຊ້ວີຊາແບບບັງຄັບສຳລັບພົນລະເມືອງ ອາເມລິກາ ຢາກເຂົ້າເມືອງເວເນຊູເອລາ, ເຊິ່ງລວມມີແຂກທ່ອງທ່ຽວ. ພ້ອມກັນນັ້ນ, ເວເນຊູເອລາຍັງປະຕິເສດສະໜອງການອອກວີຊາໃຫ້ເຈົ້າໜ້າທີ່ ອາເມລິກາ ຈຳນວນໜຶ່ງ, ໃນນັ້ນມີທ່ານອະດີດປະທານາທິບໍດີ George W.Bush ແລະ 2 ສະມາຊິກສະພາສູງ. Caracas ກໍ່ຮຽກຮ້ອງບັນດານັກການທູດ ອາເມລິກາ ຕ້ອງຂໍອະນຸຍາດລັດຖະບານ ເວເນຊູເອລາ ກ່ອນທີ່ຈະພົບປະກັບບັນດາກຸ່ມນັກການເມືອງຝ່ານຄ້ານ. ຕາມແຈ້ງການຈາກອຳນາດການປົກຄອງ Caracas ແລ້ວ, ບັນດາການກະທຳທີ່ແຂງກະດ້າງນີ້, ແມ່ນແນໃສ່ຄັດຄ້ານການແຊກແຊງຂອງ ອາເມລິກາ ເຂົ້າສະພາບການພາຍໃນຂອງເວເນຊູເອລາ. ລັດຖະບານ ອາເມລິກາ ຕຳນິຕິຕຽນບັນດາຄຳກ່າວຫາຂອງເວເນຊູເອລາ ແມ່ນຜິດກັບຄວາມຈິງ ແລະ ບໍ່ມີຫຼັກຖານຢັ້ງຢືນ.
ຍາມໃດກໍຢູ່ໃນສະພາບສູ້ຢັນກັນ .
ໃນອະດີດຕະການ, ເວເນຊູເອລາ ແລະ ອາເມລິກາຍາມໃດກໍຢູ່ໃນສະພາບສູ້ຢັນກັນ, ການພົວພັນລະຫວ່າງ 2 ປະເທດຍິ່ງຂີ້ຮ້າຍໄປ, ນັບຕັ້ງແຕ່ເມື່ອອະດີດປະທານາທິບໍດີເວເນຊູເອລາ Hugo Chavez ຂຶ້ນກຳອຳນາດເມື່ອປີ 1999. ບັນດາການຂັດແຍ້ງກັນດ້ານການເມືອງລະຫວ່າງເວເນຊູເອລາ ແລະ ອາເມລິກາໄດ້ເກີດຂຶ້ນຢ່າງຕໍ່ເນື່ອງ, ຊຳ້ບໍ່ໜຳ 2 ປະເທດໄດ້ເນລະເທດບັນດານັກການທູດຂອງກັນອອກຈາກປະເທດຂອງຕົນ. ຝ່າຍອາເມລິກາ ເຄີຍກ່າວຫາປະທານາທິບໍດີເວເນຊູເອລາ Hugo Chavez ວ່າ ແມ່ນ ຜະເດັດການ. ໃນຂະນະນັ້ນ, ເວເນຊູເອລາກໍໄດ້ກ່າວຫາ ອຳນາດການປົກຄອງອາເມລິກາວ່າ ມີກົນອຸບາຍມ້າງເພທຳລາຍ ຫວັງໂຄນລົ້ມອຳນາດການປົກຄອງ ກາຣາກາດ, ທຳລາຍໝາກຜົນການປະຕິວັດ ໂບລີວາ. ບໍ່ພຽງແຕ່ເຊັ່ນນັ້ນ, ບັນດາການນຳ ເວເນຊູເອລາ ຍັງກ່າວຫາວ່າ , ນອກຈາກການສວຍໃຊ້ກຳລັງຝ່າຍຄ້ານ, ວໍຊິງຕັນຍັງນຳໃຊ້ວິທີການໃໝ່, ນັ້ນແມ່ນບັ້ນໂຄສະນາກ່າວຫາ ເວເນຊູເອລາ ແມ່ນລັດຄ້າຂາຍຢາເສບຕິດເຖື່ອນ ແລະ ລະເມີດສິດທິມະນຸດ, ແນໃສ່ສ້າງຂໍ້ອ້າງອີງໃຫ້ແກ່ການແຊກແຊງຈາກພາຍນອກເຂົ້າ ເວເນຊູເອລາ. ພາຍຫຼັງທ່ານ Obama ຂຶ້ນກຳອຳນາດປະທານາທິບໍດີ ອາເມລິກາ, ເຖິງວ່າ 2 ປະເທດໄດ້ມີຄວາມມານະພະຍາຍາມຫຼາຍຢ່າງເພື່ອປົວແປງການພົວພັນກໍຕາມ, ແຕ່ຍ້ອນຄວາມບໍ່ລົງລອຍກັນທີ່ກ່ຽວຂ້ອງເຖິງດ້ານການເມືອງຂອງກາຣາກາດນັ້ນ, ການພົວພັນ 2 ຝ່າຍໄດ້ປະສົບກັບຄວາມຫຍຸ້ງຍາກມາຫຼາຍຄັ້ງ. ໃນຄັ້ງມໍ່ໆມານີ້ ແມ່ນເມື່ອວັນທີ 2/2, ລັດຖະບານອາເມລິກາໄດ້ຮັບຮອງເອົາກົດໝາຍລົບລ້າງວີຊາເຂົ້າເມືອງ ແລະ ປິດລ້ອມຊັບສົມບັດທີ່ມີຕໍ່ເຈົ້າໜ້າທີ່ ເວເນຊູເອລາ ທີ່ຖືກກ່າວຫາລະເມີດສິດທິມະນຸດ. ພ້ອກັນນັ້ນ, ເມື່ອຕົ້ນປີນີ້, ສະພາແຫ່ງຊາດອາເມລິກາ ກໍໄດ້ຮັບຮອງເອົາກົດໝາຍວ່າດ້ວຍການປົກປ້ອງສິດທິມະນຸດ ແລະ ສັງຄົມພົນລະເຮືອນ ເວເນຊູເອລາ ຊຶ່ງຕາມອຳນາດການປົກຄອງກາຣາກາດແລ້ວ, ນີ້ແມ່ນບັ້ນເຄື່ອນໄຫວໃສ່ຮ້າຍປ້າຍສີແນໃສ່ບັນດາການນຳຂັ້ນສູງຂອງ ເວເນຊູເອລາ. ເພື່ອຕອບໂຕ້ຄືນ, ເວເນຊູເອລາ ໄດ້ຈັບຕົວຊາວອາເມລິກາ 4 ຄົນໂດຍຊົ່ວຄາວດ້ວຍເຫດຜົນລະແວງສົງໄສບັນດາບຸກຄົນນີ້ເຄື່ອນໄຫວສອດແນມ.
ຄວາມເຄັ່ງຕຶ່ງສືບຕໍ່ເກີດຂຶ້ນ
ພາຍຫຼັງທີ່ປະທານາທິບໍດີເວເນຊູເອລາ Hugo Chavez ເຖິງແກ່ມໍລະນະກຳ, ພາລະກິດປະຕິວັດ ໂບລີວາ ຢູ່ ເວເນຊູເອລາ ຖືກປະທານາທິບໍດີ Nucolas Maduro ສືບທອດ. ໄລຍະມໍ່ໆມານີ້, ລາຄານ້ຳມັນດິບຫຼຸດລົງແຮງ ອັນໄດ້ເຮັດໃຫ້ພື້ນຖານເສດຖະກິດ ເວເນຊູເອລາ ປະສັບກັບຄວາມຫຍຸ້ງຍາກຫຼາຍຢ່າງ. ສິ່ງນີ້ ໄກ້ກໍ່ໃຫ້ເກີດກະແສຟ່ອງແຫ່ຂະບວນປະທ້ວງຄັດຄ້ານຢູ່ພາຍໃນປະເທດ. ໃນສະພາບການນັ້ນ, ການພົວພັນລະຫວ່າງ ເວເນຊູເອລາ ແລະ ອາເມລິກາສືບຕໍ່ຕົກເຂົ້າສູ່ສະພາບ ສູ້ຢັນກັນຢ່າງຮຸນແຮງ ເພາະບັນດາອົງການສືບສວນຂອງ ເວເນຊູເອລາໄດ້ຍົກອອກຫຼັກຖານກ່າວຫາອາເມລິກາສະໜອງການເງິນເພື່ອຊ່ວຍໜູນແກ່ການແຫ່ຂະບວນປະທ້ວງຄັດຄ້ານຢູ່ພາຍໃນປະເທດເວເນຊູເອລາ.
ຜົນກະທົບທີ່ບໍ່ດີຕໍ່ເສດຖະກິດພາກພື້ນ.
ບັນດານັກໄຈ້ແຍກມີຄວາມວິຕົກກັງວັນວ່າ ບັນດາມາດຕະການທີ່ນຳໃຊ້ຕໍ່ກັນລະຫວ່າງເວເນຊູເອລາ ແລະ ອາເມລິກາຈະສົ່ງຜົນກະທົບທີ່ບໍ່ດີເຖິງການເຄື່ອນໄຫວສົ່ງເສີມດ້ານການຄ້າ ແລະ ການລົງທຶນ, ໂດຍສະເພາະແມ່ນຂົງເຂດນ້ຳມັນ. ເວເນຊູເອລາໃນປະຈຸບັນຍັງແມ່ນຜູ້ສະໜອງນ້ຳມັນດິບອັນດັບໜຶ່ງຂອງອາເມລິກາດ້ວຍລະດັບ 1 ລ້ານຖັງ/ວັນ. ເປັນທີ່ຈະແຈ້ງແລ້ວວ່າ ຖ້າຫາກການພົວພັນລະຫວ່າງ 2 ປະເທດສືບຕໍ່ຂີ້ຮ້າຍໄປນັ້ນ, ການພົວພັນຄ້າຂາຍໃນຂົງເຂດນີ້ຈະປະສົບກັບຄວາມຫຍຸ້ງຍາກ. ບັນດາການຜັນແປໃນປະຈຸບັນ ໄດ້ເຮັດໃຫ້ຫາງສຽງຍາກທີ່ຈະປາຖະໜາຕໍ່ສັງກາດໃໝ່ຊຶ່ງຈະຖືກເປີດຂຶ້ນໃນສາຍພົວພັນລະຫວ່າງເວເນຊູເອລາ ແລະ ອາເມລິກາ ແລະ ເສັ້ນທາງຫັນການພົວພັນລະຫວ່າງ 2 ປະເທດນີ້ຍັງປະສັບກັບສິ່ງກີດຂວາງຫຼາຍຢ່າງ.