ການຢ້ຽມຢາມທາງລັດຖະກິດຫວຽດນາມຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ, ປະທານປະເທດຈີນ ສີຈິນຜິງ ແຕ່ວັນທີ 5 ຫາວັນທີ 6/11/2015 ແມ່ນການຢ້ຽມຢາມຫວຽດນາມຄັ້ງທຳອິດຂອງການນຳສູງສຸດຂອງພັກ ແລະ ລັດຈີນໃນຮອບເວລາ 9 ປີທີ່ຜ່ານມາ. ເຫດການນີ້ແມ່ນມີຄວາມໝາຍສຳຄັນໃນການພົວພັນຫວຽດນາມ-ຈີນ.
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ແລະທ່ານເລຂາທິການໃຫຍ່, ປະທານປະເທດຈີນ ສີຈິນຜິງ |
ການຢ້ຽມຢາມຫວຽດນາມຂອງທ່ານເລຂາທິການໃຫຍ່, ປະທານປະເທດຈີນ ສີຈິນຜິງໄດ້ດຳເນີນໃນສະພາບການທີ່ຫວຽດນາມ-ຈີນພວມຮັກສາທ່າອຽງພັດທະນາຢ່າງຕັ້ງໜ້າ. ປີ 2015 ກໍແມ່ນປີສະເຫຼີມສະຫຼອງ 65 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ-ຈີນ.
ພື້ນຖານການພົວພັນທາງດ້ານການເມືອງອັນດີງາມ
ກ່ຽວກັບການພົວພັນທາງດ້ານການເມືອງ, ຫວຽດນາມ ແລະ ຈີນໄດ້ລົງນາມໃນສັນຍາ ແລະ ເອກະສານຮ່ວມມືຫຼາຍສະບັບ ຊຶ່ງເປັນພື້ນຖານດ້ານນິຕິກຳໃຫ້ແກ່ການພົວພັນຮ່ວມມືຍາວນານລະຫວ່າງ 2 ປະເທດ. ການແລກປ່ຽນຄະນະຜູ້ແທນຂັ້ນສູນກາງ ແລະ ທ້ອງຖິ່ນນັບມື້ນັບເພີ່ມຂຶ້ນດ້ວຍຈຳນວນກວ່າ 200 ຄະນະຜູ້ແທນ, ປະກອບສ່ວນເພີ່ມທະວີຄວາມເຂົ້າອົກເຂົ້າໃຈ ແລະ ເປີດກ້ວາງ ການຮ່ວມມືລະຫວ່າງ 2 ປະເທດ. ໄລສະເພາະປີ 2015, ການນຳ 2 ປະເທດໄດ້ມີການພົບປະກັນເປັນປະຈຳ, ພິເສດແມ່ນທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ມີການຢ້ຽມຢາມຈີນເມື່ອເດືອນ 4/2015, ທ່ານປະທານປະເທດຫວຽດນາມ ເຈືອງເຕີ້ນຊາງ ເຂົ້າຮ່ວມການເຄື່ອນໄຫວສະເຫຼີມສະຫຼອງ 70 ປີແຫ່ງວັນໄຊຊະນະຟາດຊິດຂອງປະຊາຊົນໂລກຊຶ່ງຈັດຂຶ້ນຢູ່ປັກກິງ ແລະ ໄດ້ມີການພົບປະກັບທ່ານເລຂາທິການໃຫຍ່, ປະທານປະເທດຈີນ ສີຈິນຜິງເມື່ອເດືອນ 9/2015, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ໄດ້ມີການພົບປະກັບກຳມະການໃຫຍ່ຄະນະປະຈຳສະພາຜູ້ແທນປະຊາຊົນແຫ່ງຊາດຈີນ ຈາງຕີຈຽງ ຢູ່ນິວຢອກເມື່ອທ້າຍເດືອນ 8/2015, ກຳມະການປະຈຳກົມການເມືອງ, ຮອງນາຍົກລັດຖະມົນຕີແຫ່ງລັດຖະບານຈີນ ຈາງກາວລີ ໄດ້ມາຢ້ຽມຢາມຫວຽດນາມເມື່ອເດືອນ 7/2015. ຜ່ານບັນດາການຢ້ຽມຢາມ ແລະ ພົບປະຂັ້ນສູງຄັ້ງຕ່າງໆນັ້ນ, ການນຳ 2 ປະເທດໄດ້ບັນລຸຄວາມຮັບຮູ້ລວມທີ່ສຳຄັນກ່ຽວກັບບັນດາທິດທາງ, ມາດຕະການຊຸກຍູ້ການພົວພັນລະຫວ່າງ 2 ປະເທດໃຫ້ພັດທະນາເປັນປົກກະຕິ, ປອດໃສ ແລະ ໝັ້ນຄົງໃນໄລຍະທີ່ຈະມາເຖິງ. ໄປຄຽງຄູ່ກັນນັ້ນ, ການຮ່ວມມືລະຫວ່າງ 2 ພັກໄດ້ຮັບການຍູ້ແຮງ, ການພົວພັນລະຫວ່າງບັນດາຂະແໜງການ, ທ້ອງຖິ່ນຕ່າງໆ, ການພົວພັນແລກປ່ຽນປະຊາຊົນ ແລະ ລຸ່ນໜຸ່ມ 2 ປະເທດໄດ້ຮັບການເພີ່ມທະວີ.
ການພົວພັນທາງດ້ານເສດຖະກິດການຄ້າພັດທະນາຢ່າງແຂງແຮງ
ແຕ່ປີ 2004 ມາຮອດປະຈຸບັນ, ຈີນໄດ້ກາຍເປັນຄູ່ຄ້າລາຍໃຫຍ່ກວ່າໝູ່ຂອງຫວຽດນາມຢ່າງຕໍ່ເນື່ອງ. ການພົວພັນທາງດ້ານການຄ້າ ຫວຽດນາມ-ຈີນສືບຕໍ່ເຕີບໂຕ, ວົງເງິນການຄ້າ 2 ຝ່າຍໃນໄລຍະ 9 ເດືອນຕົ້ນປີ 2015 ບັນລຸ 49,16 ຕື້ USD, ເພີ່ມຂຶ້ນ 16% ເມື່ອທຽບກັບໄລຍະດຽວກັນຂອງປີກາຍ. 2 ຝ່າຍໄດ້ດຳເນີນກອງປະຊຸມຄັ້ງທີ 9 ຄະນະກຳມາທິການຮ່ວມມືເສດຖະກິດການຄ້າ ຫວຽດນາມ-ຈີນ ຢູ່ປັກກິງແຕ່ວັນທີ 18 ຫາວັນທີ 21/10/2015. ຫວຽດນາມກໍໄດ້ເປີດຫ້ອງການສົ່ງເສີມການຄ້າແຫ່ງທຳອິດຢູ່ຈຸງຊິງ ເມື່ອເດືອນ 5/2015. ທາງດ້ານການລົງທຶນ, ໄລຮອດເດືອນ 9/2015, ຈີນໄດ້ມີ 1.177 ໂຄງການຢູ່ຫວຽດນາມດ້ວຍຍອດຈຳນວນທຶນຈົດທະບຽນກວ່າ 8,4 ຕື້ USD ຢືນອັນດັບທີ 9 ໃນຈຳນວນ 105 ປະເທດ ແລະ ເຂດແຄ້ວນທີ່ເຂົ້າມາລົງທຶນຢູ່ຫວຽດນາມ. 2 ຝ່າຍໄດ້ດຳເນີນກອງປະຊຸມຄັ້ງທີ 1 ກຸ່ມປະຕິບັດງານຮ່ວມມືກ່ຽວກັບພື້ນຖານໂຄງລ່າງໃນເດືອນ 6/2015 ຢູ່ປັກກິງ; ກອງປະຊຸມຄັ້ງທີ 1 ຂັ້ນລັດຖະມົນຕີກຸ່ມປະຕິບັດງານຮ່ວມມືກ່ຽວກັບພື້ນຖານໂຄງລ່າງແຕ່ວັນທີ 12 ຫາວັນທີ 16/10/2015 ຢູ່ປັກກິງ ແລະ ກອງປະຊຸມຄັ້ງທີ 1 ກຸ່ມປະຕິບັດງານຮ່ວມມືກ່ຽວກັບການເງິນເງິນຕາເມື່ອເດືອນ 7/2015 ຢູ່ຮ່າໂນ້ຍ.
ຮ່ວມແຮງຮ່ວມໃຈແກ້ໄຂບັນດາບັນຫາຊາຍແດນ, ຜືນແຜ່ນດິນ
ມາຮອດປະຈຸບັນ, ສະພາບການຊາຍແດນທາງບົກຫວຽດນາມ-ຈີນ ແລະ ອ່າວພາກເໜືອມີສະຖຽນລະພາບໂດຍພື້ນຖານ. 2 ຝ່າຍໄດ້ດຳເນີນການເຈລະຈາຮອບທີ 7 ສັນຍາກ່ຽວກັບການໄປມາຂອງເຮືອ, ກຳປັ່ນຢູ່ບໍລິເວນເຮືອ, ກຳປັ່ນໄປມາຢ່າງເສລີທີ່ປາກແມ່ນ້ຳ ເປລວນ, ການເຈລະຈາຮອບທີ 5 ສັນຍາຮ່ວມມືຂຸດຄົ້ນ ແລະ ປົກປັກຮັກສາຊັບພະຍາກອນທ່ອງທ່ຽວນ້ຳຕົກຕາດບ້ານຢົກໃນເດືອນ 10/2015 ຢູ່ຮ່າໂນ້ຍເພື່ອກວດກາເອກະສານ, ກະກຽມໃຫ້ແກ່ການລົງນາມໃນສັນຍາ 2 ສະບັບນີ້ຢ່າງເປັນທາງການໂດຍໄວ. ກ່ຽວກັບບັນຫາທະເລຕາເວັນອອກ, 2 ຝ່າຍໄດ້ຮັກສາບັນດາກົນໄກເຈລະຈາກ່ຽວກັບບັນຫາບົນທະເລ. ໃນ ການຢ້ຽມຢາມຈີນເມື່ອເດືອນ 4/2015 ຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ້ຈ້ອງ, 2 ຝ່າຍໄດ້ເຫັນດີປະຕິບັດຕາມຄວາມຮັບຮູ້ລວມທີ່ສຳຄັນຊຶ່ງບັນລຸໄດ້ຈາກການນຳຂັ້ນສູງຂອງ 2 ພັກ, 2 ລັດ, ປະຕິບັດ “ຂໍ້ຕົກລົງກ່ຽວກັບບັນດາຫຼັກການພື້ນຖານຊີ້ນຳແກ້ໄຂບັນຫາບົນທະເລລະຫວ່າງ ຫວຽດນາມ-ຈີນຢ່າງເຂັ້ມງວດ”; ນຳໃຊ້ກົນໄກເຈລະຈາຂັ້ນລັດຖະບານກ່ຽວກັບຊາຍແດນ ຜືນແຜ່ນດິນຫວຽດນາມ-ຈີນເປັນຢ່າງດີ; ຍຶດໝັ້ນການແກ້ໄຂໂດຍຜ່ານການເຈລະຈາມິດຕະພາບ, ຊອກຫາມາດຕະການແກ້ໄຂໂດຍພື້ນຖານ ແລະ ຍາວນານຊຶ່ງ 2 ຝ່າຍຕ່າງກໍອາດຮັບຮູ້ໄດ້. 2 ຝ່າຍຕົກລົງກັນ ພ້ອມກັນຈຳກັດຄວາມບໍ່ລົງລອຍກັນບົນທະເລ, ປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ DOC ຢ່າງຄົບຖ້ວນ ແລະ ເຂັ້ມງວດ, ກ້າວໄປເຖິງບັນລຸປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ COC ໂດຍໄວ ບົນພື້ນຖານການເຈລະຈາເປັນເອກະພາບ, ບໍ່ມີການກະທຳກໍ່ຄວາມສັບສົນ, ເຮັດໃຫ້ການຂັດແຍ້ງກັນເພີ່ມຂຶ້ນ; ແກ້ໄຂບັນຫາເກີດໃໝ່ຢ່າງທັນການ ແລະ ເທົາທີ່ຄວນ, ຮັກສາການພົວພັນຫວຽດນາມ-ຈີນ ແລະ ສັນຕິພາບ, ສະຖຽນລະພາບຢູ່ທະເລຕາເວັນອອກ.
ດ້ວຍບັນດາຄວາມໝາຍທີ່ສຳຄັນ, ການຢ້ຽມຢາມທາງລັດຖະກິດຫວຽດນາມຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ, ປະທານປະເທດຈີນ ສີຈິນຜິງ ຈະເປັນຂີດໝາຍໃໝ່ໃນການພົວພັນຫວຽດນາມ-ຈີນ.