(vovworld)-ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຫວຽດນາມ ຊຸດທີ 13 ດຳເນີນໄປຢູ່ ຮ່າໂນ້ຍ ແມ່ນກອງປະຊຸມຄັ້ງເກືອບສຸດທ້າຍຂອງອາຍຸການສະພາແຫ່ງຊາດຊຸດທີ 13. ເພື່ອປະກອບສ່ວນສ້າງລາຍການສ້າງກົດໝາຍ, ລັດຖະບັນຍັດຂອງອາຍູ້ການສະພາແຫ່ງຊາດຊຸດທີ 13 ໃຫ້ສຳເລັດ, ວຽກງານກໍ່ສ້າງພັກ ໄດ້ຮັບຖືວ່າແມ່ນຫນ້າທີ່ຈຸດສຸມໃນກອງປະຊຸມສະໄຫມສາມັນເທື່ອນີ້.
ອາດຈະເຫັນໄດ້ວ່າ ໃນກອງປະຊຸມສະໄຫມສາມັນແຕ່ລະເທື່ອຂອງສະພາແຫ່ງຊາດຊຸດທີ 13, ກອງປະຊຸມເທື່ອໃດກໍມີຮ່າງກົດໝາຍ, ລັດຖະບັນຍັດຫລາຍສະບັບຖືກຍົກອອກມາປືກສາຫາລືກໍຄືໄດ້ຮັບການຮັບຮອງເອົາ, ໃນນັ້ນມີ ກອງປະຊຸມສະໄຫມສາມັນ ຮັບຮອງເອົາຮ່າງກົດໝາຍເຖິງ 18 ສະບັບ. ຄາດວ່າ ທີີ່ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຊຸດທີ 13, ສະພາແຫ່ງຊາດຈະຮັບຮອງເອົາຮ່າງກົດໝາຍ 11 ສະບັບ, ມະຕິ 1 ສະບັບ ພ້ອມທັງປະກອບຄຳເຫັນໃສ່ຮ່າງກົດໝາຍອື່ນ 15 ສະບັບ.
ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຊຸດທີ 13
ພາບ:nld.com.vn
|
ກົດໝາຍ ຫັນບັນດາເນື້ອໃນຂອງລັດຖະທຳມະນູນໃຫມ່ປີ 2013 ໃຫ້ເປັນລະອຽດ
ບັນດາຮ່າງກົດໝາຍສ່ວນຫລາຍໄດ້ຮັບເອົາຄຳເຫັນປະກອບຫລືຄາດວ່າໄດ້ຮັບການຮັບຮອງເອົາທີ່ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຊຸດທີ 13 ລ້ວນແຕ່ສະແດງໃຫ້ເຫັນເນື້ອໃນຈິດໃຈຂອງລັດຖະທຳມະນູນປີ 2013. ໂດຍລະອຽດຄື: ກົດໝາຍວ່າດ້ວຍລັດຖະບານ(ສະບັບປັບປຸງ), ກົດໝາຍວ່າດ້ວຍອຳນາດການປົກຄອງ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ, ສະມາຊິກສະພາປະຊາຊົນ… ລ້ວນແຕ່ແມ່ນບັນດາກົດໝາຍເພື່ອປະຕິບັດລັດຖະທຳມະນູນສະບັບໃຫມ່ກ່ຽວກັບຮູບແບບບໍລິຫານແຫ່ງຊາດ ຊື່ງໃນນັ້ນ ບັນດາອົງການລັດຄວບຄຸມ, ຫນູນຊ່ວຍເຊິ່ງກັນ ແລະກັນ. ປະມວນກົດໝາຍແພ່ງ, ປະມວນກົດໝາຍອາຍາ(ສະບັບປັບປຸງ) ຫລື ປະມວນກົດໝາຍດຳເນີນຄະດີແພ່ງ, ປະມວນກົດໝາຍດຳເນີນຄະດີອາຍາ ລ້ວນແຕ່ຫັນເປັນລະອຽດບັນດາເນື້ອໃນຈິດໃຈປົກປ້ອງສິດທິມະນຸດຊື່ງໄດ້ລະບຸໄວ້ໃນລັດຖະທຳມະນູນປີ 2013 . ກົດໝາຍວ່າດ້ວຍການລົງປະຊາມະຕິ ເປັນຄັ້ງທຳອິດຖືກຍົກອອກມາເພື່ອຮັບເອົາຄຳເຫັນປະກອບ ແມ່ນສະແດງໃຫ້ເຫັນວ່າ ປະຊາຊົນສາມາດປະຕິບັດໂດຍກົງສິດອຳນາດແຫ່ງລັດຢ່າງຖືກຕ້ອງຕາມການກຳນົດຂອງລັດຖະທຳມະນູນປີ2013. ທ່ານຮອງປະທານສະພາແຫ່ງຊາດ ຫວຽດນາມ ອວງຈູລືວ ໃຫ້ຮູ້ວ່າ:
“ຜູ້ມີສິດເລືອກຕັ້ງສົນໃຈເຖິງ ກົດໝາຍວ່າດ້ວຍລັດຖະບານ, ກົດໝາຍວ່າດ້ວຍອຳນາດການປົກຄອງ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ, ສະມາຊິກສະພາປະຊາຊົນ. ນີ້ແມ່ນບັນດາກົດໝາຍກ່ຽວຂ້ອງເຖິງບັນຫາປັບປຸງລັດແຫ່ງອຳນາດນິຕິບັນຍັດ, ເສີມຂະຫຍາຍສິດເປັນເຈົ້າຂອງປະຊາຊົນ. ສ່ວນສະມາຊິກສະພາແຫ່ງຊາດ ແມ່ນສົນໃຈທີ່ສຸດເຖິງປະມວນກົດໝາຍແພ່ງ, ປະມວນກົດໝາຍດຳເນີນຄະດີແພ່ງ, ປະມວນກົດໝາຍດຳເນີນຄະດີອາຍາ ທີ່ສຸດ. ນີ້ແມ່ນບັນດາກົດໝາຍກ່ຽວຂ້ອງເຖິງການເຄື່ອນໄຫວຕຸລາການສິດພົນລະເມືອງຂອງປະຊາຊົນ.”
ສ້າງກົດໝາຍເພື່ອໃຫ້ລະບົບກົດໝາຍແຫ່ງລັດສົມບູນແບບ
ເພື່ອໃຫ້ມີລະບົບກົດໝາຍຄົບຖ້ວນ, ເປັນເອກະພາບ ແລະ ໂປ່ງໃສ, ຄວນມີວິວັດການສ້າງກົດໝາຍ ດ້ວຍຂັ້ນຕອນ, ລະບຽບການຢ່າງແຫນ້ນແຟ້ນ ແລະ ມີຄວາມຮັບຜິດຊອບ. ນີ້ກໍແມ່ນພື້ນຖານເພື່ອສ້າງລັດແຫ່ງອຳນາດນິຕິບັນຍັດແບບຍືນຍົງ, ຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ. ຕາມ ດຣ ຫງວຽນສີຢູງ, ຮອງຫົວຫນ້າຫອ້ງວ່າການສະພາແຫ່ງຊາດ ແລ້ວ, ວຽກງານສ້າງກົດໝາຍທີ່ກອງປະຊຸມເທື່ອນີ້ ແມ່ນໄດ້ຮັບຄວາມເອົາໃຈໃສ່ເປັນພິເສດຈາກສະພາແຫ່ງຊາດ.
“ໃນວິວັດການ, ຄະນະປະຈຳສະພາແຫ່ງຊາດ ຍາມໃດກໍພິຈາລະນາບັນດາຮ່າງກົດໝາຍສາກອ່ນ. ຖ້າຫາກຮ່າງກົດໝາຍໃດໄດ້ຮັບການກະກຽມຢ່າງລະອຽດ, ປັບປຸງເປັນຢ່າງດີ ກົດໝາຍນັ້ນຈຶ່ງຖືກຍື່ນສະເຫນີຕໍ່ສະພາແຫ່ງຊາດ. ໃນກອງປະຊຸມເທື່ອນີ້, ມີຮ່າງກົດໝາຍຫລາຍສະບັບ ສະພາແຫ່ງຊາດຈະພິຈາລະນາເຖິງ 2 ຄັ້ງ ແລະປະກອບຄຳເຫັນເພື່ອປັບປຸງ ຫລັງຈາກນັ້ນພິຈາລະນາອີກຄັ້ງຫນຶ່ງ.”
ຮັບໃຊ້ຄວາມຕ້ອງການພັດທະນາເສດຖະກິດສັງຄົມຂອງປະເທດຊາດ
ຮ່າງກົດໝາຍທັງໝົດຊື່ງສະພາແຫ່ງຊາດຍົກອອກມາເພື່ອຮັບເອົາຄຳເຫັນປະກອບຫລື ຄາດວ່າຈະຮັບຮອງເອົາທີ່ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຊຸດທີ 13 ລ້ວນແຕ່ແມ່ນບັນດາຮ່າງກົດໝາຍສຳຄັນ, ສົ່ງຜົນກະທົບຢ່າງແຮງເຖິງສະພາບການເສດຖະກິດສັງຄົມຂອງປະເທດຊາດ. ສະພາແຫ່ງຊາດບຸລິມະສິດ, ສຳຫລວດກວດຄືນ, ປັບປຸງ, ເພີ່ມເຕີມ, ພິຈາລະນາຮັບຮອງເອົາບັນດາຮ່າງກົດໝາຍ ເພື່ອຮັບໃຊ້ການພັດທະນາເສດຖະກິດສັງຄົມໄລຍະ 2015-2020. ທ່ານຮອງປະທານສະພາແຫ່ງຊາດ ອວງຈູລືວ ຊີ້ແຈ້ງວ່າ:
“ສະພາແຫ່ງຊາດ ສຳຫລວດກວດຄືນບັນດາຂໍ້ກຳນົດບໍ່ທັນເໝາະສົມ, ຂາດຕົກບົກຜ່ອງ, ຈຳກັດ ຂອງກົດໝາຍທີ່ໄດ້ນຳໃຊ້ປະຈຸບັນ ເພື່ອຮັບປະກັນກົດໝາຍສະບັບໃຫມ່ໃຫ້ດີກວ່າ, ຮັບປະກັນລັກສະນະຄວາມເປັນໄປ ແລະ ເຂົ້າສູ່ຊີວິດຕົວຈິງ. ບໍ່ຄວນປຽບທຽບກົດໝາຍໃດສຳຄັນກວ່າກົດໝາຍໃດ. ອາດຈະເວົ້າໄດ້ວ່າ ບັນດາກົດໝາຍທີ່ໄດ້ຮັບການຮອງເອົາທີ່ກອງປະຊຸມສະໄຫມສາມັນເທື່ອນີ້ ລ້ວນແຕ່ບັນດາກົດໝາຍໃຫຍ່, ສຳຄັນໃນຊີວິດ, ເສດຖະກິດ, ສັງຄົມຂອງປະເທດຊາດ.”
ໃນຈຳນວນຮ່າງກົດໝາຍ 11 ສະບັບ ຊື່ງສະພາແຫ່ງຊາດຈະພິຈາລະນາ, ຮັບຮອງເອົາທີ່ກອງປະຊຸມສະໄຫມສາມັນເທື່ອນີ້, ເປັນຫນ້າສົນໃຈແມ່ນກົດໝາຍວ່າດ້ວຍຊັບພະຍາກອນ, ສິ່ງແວດລ້ອມທະເລ ແລະໝູ່ເກາະ, ກົດໝາຍວ່າດ້ວຍງົບປະມານແຫ່ງລັດ(ສະບັບປັບປຸງ), ກົດໝາຍວ່າດ້ວຍການກວດສອບແຫ່ງລັດ (ສະບັບປັບປຸງ). ພິເສດ ມີກົດໝາຍປະກາດໃຊ້ເອກະສານນິຕິກຳໄດ້ຮັບຖືວ່າແມ່ນກົດໝາຍພື້ນຖານເພື່ອປະກາດໃຊ້ເອກະສານນິຕິກຳທຸກສະບັບ.
ໃນອາຍຸການຂອງສະພາແຫ່ງຊາດຊຸດທີ 13, ສະພາແຫ່ງຊາດມອບໃຫ້ລັດຖະບານ ຍື່ນ ຮ່າງກົດໝາຍ, ລັດຖະບັນຍັດ, ຮ່າງມະຕິ 138 ສະບັບ. ດ້ວຍເນື້ອໃຈຈິດໃຈວິທະຍາສາດ, ຮັບຟັງ, ຮັບເອົາຄຳເຫັນ, ຮັບເອົາພູມປັນຍາຍອດຍິ່ງ ຂອງປະຊາຊົນຫວຽດນາມຢູ່ ພາຍໃນ ແລະ ຕ່າງປະເທດ, ກອງປະຊຸມສະໄຫມສາມັນຂອງສະພາແຫ່ງຊາດ ແຕ່ລະເທື່ອ ລ້ວນແຕ່ມີເອກະສານ, ກົດໝາຍຫລາຍສະບັບໄດ້ຮັບການປະກາດໃຊ້ ແລະ ປັບປຸງ, ເພີ່ມເຕີມ, ຕອບສະຫນອງການພັດທະນາເສດຖະກິດສັງຄົມຂອງປະເທດຊາດໃນໄລຍະເຊື່ອມໂຍງເຂົ້າກັບສາກົນ ຢ່າງທັນການ.