(vovworld)-ກ່ອນນີ້ 61 ປີ, ວັນທີ 20/7/1954 ຢູ່ ເຊີແນວ ປະເທດສະວິດ, ສັນຍາ ເຊີແນວ ກ່ຽວກັບສັນຕິພາບໃຫ້ແກ່ຫວຽດນາມ ໄດ້ຮັບການລົງນາມ. ເປັນຄັ້ງທຳອິດໃນປະຫວັດສາດ, ຝລັ່ງ ແລະ ບັນດາປະເທດໃຫຍ່ ໄດ້ຍອມຮັບພື້ນຖານເອກະລາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຫວຽດນາມ, ລາວ ແລະ ກຳປູເຈຍ. ນີ້ແມ່ນໄຊຊະນະຂອງການຕໍ່ສູ້ດ້ານການທູດທີ່ໝັ້ນແກ່ນ, ເຕັມໄປດ້ວຍຄຸນນະທາດ ແລະ ຄວາມເຊື່ອໝັ້ນເອງຂອງຄະນະຜູ້ແທນສາທາລະນະລັດ ປະຊາທິປະໄຕຫວຽດນາມເພື່ອປົກປັກຮັກສາຫລັກໝັ້ນເປັນທຳ ແລະ ຜົນປະໂຫຍດຂອງຊາດ. ນັກຂ່າວ ລ້າຍຮວາ ແລະ ມີງເຈີມ ມີບົດຂຽນດ້ວຍຫົວຂໍ້ວ່າ: ການເຈລະຈາທີ່ກອງປະຊຸມເຊີແນວ,ໄຊຊະນະດ້ານການທູດມີຄຸນຄ່າຫລາຍຢ່າງ
ກອງປະຊຸມເຊີແນວໄຂຂຶ້ນໃນວັນທີ 26/4/1954
ຟີມເອກະສານ
|
ພາຍຫລັງ ໄຊຊະນະນດ້ຽນບຽນຝູ, ວັນທີ 8/5/1954, ກອງປະຊຸມເຊີແນວ ໄດ້ຮັບການຈັດຕັ້ງຂຶ້ນ ຕາມຂໍ້ຕົກລົງຂອງກອງປະຊຸມ 4 ປະເທດມະຫາອຳນາດຄື: ໂຊວຽດ, ອາເມລິກາ, ອັງກິດ, ຝລັ່ງ ເພື່ອແກ້ໄຂບັນຫາ ເກົາຫລີ ແລະ ສົງຄາມຢູ່ ອິນດູຈີນ. ທ່ານ ເຈີນວຽດເຟືອງ, ເລຂານຸການ ຂອງທ່ານຮອງນາຍົກລັດຖະມົນຕີ ຟ້າມວັນດົງ, ຫົວຫນ້າຄະນະຜູ້ແທນລັດຖະບານ ສາທາລະນະລັດປະຊາທິປະໄຕ ຫວຽດນາມ ທີ່ກອງປະຊຸມເຊີແນວ ຖືວ່າ: ຈຸດເລີ່ມຕົ້ນຂອງ ກອງປະຊຸມເຊີແນວ ກ່ຽວກັບອິນດູຈີນ ແມ່ນກອງປະຊຸມຂອງບັນດາປະເທດໃຫຍ່ ດ້ວຍຜົນປະໂຫຍດແຕກຕ່າງກັນ.
ກຳລັງດັນຫລາຍຢ່າງໃນການເຈລະຈາ
ຍ້ອນບໍ່ເປັນເຈົ້າການ ສະນັ້ນ ລັດຖະບານ ສາທາລະນະລັດປະຊາທິປະໄຕ ຫວຽດນາມ ຕ້ອງເຂົ້າຮ່ວມກອງປະຊຸມສາກົນ ລວມມີ: 8 ປະເທດ, 9 ຝ່າຍ ຊື່ງແຕ່ລະຝ່າຍລ້ວນແຕ່ມີການຄິດໄລ່ຊັ່ງຊາເພື່ອບັນລຸຜົນປະໂຫຍດສະເພາະຂອງຕົນ. ຫວຽດນາມ ໄດ້ປະສົບກັບກຳລັງດັນ ແລະ ຄວາມຫຍຸ້ງຍາກຫລາຍຢ່າງໃນການເຈລະຈາມາເປັນເວລາ 75 ວັນ. ທ່ານ ເຈີນວຽດເຟືອງ ໃຫ້ຮູ້ວ່າ:
“ຫົວຫນ້າຄະນະຜູ້ແທນຫວຽດນາມ ແມ່ນທ່ານຮອງນາຍົກລັດຖະມົນຕີ ຟ້າມວັນດົງ ຕ້ອງມານະພະຍາຍາມຈົນສຸດຄວາມສາມາດຂອງຕົນເພື່ອບັນລຸໄດ້ໄຊຊະນະ. ໃນວາລະປະຊຸມຄັ້ງສຸດທ້າຍ, ຫົວຫນ້າຄະນະຜູ້ແທນເຂົ້າຮ່ວມກອງປະຊຸມທັງໝົດ ລ້ວນແຕ່ກ່າວຄຳເຫັນ ແລະ ມີຄວາມພຶ່ງພໍໃຈຕໍ່ໝາກຜົນທີ່ບັນລຸໄດ້. ສ່ວນທ່ານຮອງນາຍົກລັດຖະມົນຕີ ຟ້າມວັນດົງ ບໍ່ພໍໃຈ ເມື່ອຄະນະຜູ້ແທນຫວຽດນາມ ໄດ້ເຮັດຈົນສຸດຄວາມສາມາດຂອງຕົນ ແຕ່ພຽງບັນລຸໄດ້ເຄິ່ງຫນຶ່ງຂອງຄາດໝາຍທີ່ວາງອອກ ແລະ ການຕໍ່ສູ້ຂອງພວກເຮົາຍັງຍາວນານ ແລະລຳບາກກາກກຳ.”
ນັກການທູດ ຮ່າວັນເລົາ, ໃນຄາວນັ້ນ ໄດ້ຮັບຫນ້າທີ່ພ້ອມກັບທ່ານລັດຖະມົນຕີຊ່ວຍວ່າການກະຊວງປ້ອງກັນປະເທດ ຫວຽດນາມ ຕ້າກວາງບື໋ວ ກະກຽມຄົ້ນຄ້ວາບັນດາວິທີການຕໍ່ສູ້ກ່ຽວກັບການທະຫານເພື່ອການຢຸດຕິສົງຄາມຢູ່ຫວຽດນາມ. ເມື່ອເວົ້າເຖິງຊຸມມື້ຮ່ວມກັບຄະນະເຈລະຈາທີ່ ກອງປະຊຸມເຊີແນວ, ທ່ານ ຮ່າວັນເລົາໃຫ້ຮູ້ວ່າ: ບັນຍາກາດທີ່ໂຕະເຈລະຈາຢູ່ ເຊີແນວ ແມ່ນເຄັ່ງຕຶງທີ່ສຸດ, ຄະນະຜູ້ແທນຫວຽດນາມ ຕ້ອງຍາດແຍ່ງທຸກວິທີການເພື່ອຕໍ່ສູ້ກັບສັດຕູ. ດ້ວຍໄຊຊະນະຢູ່ ສະຫນາມຮົບ ດ້ຽນບຽນຝູ ແລະ ຄວາມສະຫລາດຄ່ອງແຄ້ວ, ຮັກສາຫລັກການ “ເອກະລາດ, ເອກະພາບ ແລະ ຜືນແຜ່ນດິນອັນຄົບຖ້ວນ”ຂອງຫວຽດນາມ ທີ່ໂຕະເຈລະຈາຂອງ ກອງປະຊຸມເຊີແນວ, ຫວຽດນາມ ໄດ້ເຮັດໃຫ້ຝ່າຍກົງກັນຂ້າມຕ້ອງຍອມລົງນາມໃນສັນຍາ. ທ່ານ ຮ່າວັນເລົາ, ອະດີດລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ໃຫ້ຮູ້ວ່າ:
“ວິນາທີສຳຄັນ ແລະ ເປັນຫນ້າຈົດຈຳທີ່ສຸດໃນວິວັດທະນາການເຈລະຈາ ແມ່ນເວລາສຸດທ້າຍຂອງວັນທີ 19/7 ເມື່ອປຶກສາຫາລືບັນດາບັນຫາຂອງກອງປະຊຸມ, ເປັນຕົ້ນແມ່ນບັນຫາເສັ້ນຂະຫນານ. ຈຸດໝາຍຂອງພວກເຮົາ ເມື່ອເຂົ້າຮ່ວມສັນຍາ ເຊີແນວ ແມ່ນເພື່ອຢຸດຕິສົງຄາມ, ສ້າງສັນຕິພາບຄືນໃຫມ່, ຮຽກຮ້ອງບັນດາປະເທດເຄົາລົບອະທິປະໄຕ, ຜືນແຜ່ນດິນອັນຄົບຖ້ວນຂອງຫວຽດນາມ. ເມື່ອສັນຍາໄດ້ຮັບການລົງນາມ ພວກເຮົາຍາດໄດ້ສິດຂອງຊາດເຮົາ.”
ໄຊຊະນະດ້ານການທູດມີຄວາມໝາຍຫລາຍຢ່າງ
ພາຍຫລັງເຈລະຈາມາເປັນເວລາ 75 ວັນ ດ້ວຍວາລະປະຊຸມ 31 ຄັ້ງ ພ້ອມກັບການພົບປະສອງຝ່າຍ ແລະ ຫລາຍຝ່າຍຢູ່ນອກກອງປະຊຸມຫລາຍຄັ້ງ, ເວລາ 24 ໂມງ ຂອງວັນທີ 20/7/1954, ສັນຊາ ເຊີແນວ ກ່ຽວກັບສັນຕິພາບໃຫ້ແກ່ຫວຽດນາມໄດ້ຮັບການລົງນາມ. ຝລັ່ງ ແລະ ບັນດາປະເທດເຂົ້າຮ່ວມກອງປະຊຸມ ໄດ້ຮັບຮູ້ບັນດາສິດຂອງຊາດຫວຽດນາມ ໂດຍພື້ນຖານ ແມ່ນ ເອກະລາດ, ເອກະພາບ ແລະ ຜືນແຜ່ນດິນອັນຄົບຖ້ວນ. ເຖິງຢ່າງໃດກໍຕາມ, ຫວຽດນາມ ຖືກແບ່ງແຍກເປັນ 2 ພາກຊົ່ວຄາວ. ທ່ານອະດີດນາຍົກລັດຖະມົນຕີ ຫູຄວານ, ຜູ້ມີເວລາກວ່າ 40 ປີລຽນຕິດເຮັດວຽກງານການທູດ ໄດ້ຖືວ່າ: ການຕໍ່ສູ້ດ້ານການທູດທີ່ ກອງປະຊຸມເຊີແນວ ແມ່ນການຕໍ່ສູ້ເດັດດ່ຽວ, ຢືດໝັ້ນຫລັກໝັ້ນ ແຕ່ພ້ອມທັງມີຄວາມສະຫລາດຄ່ອງແຄ້ວ, ໄຫວພິບອີງຕາມການສົມທຽບກຳລັງ. ໃນເງື່ອນໄຂສະພາບການສາກົນ ແລະ ສົມທຽບກຳລັງໃນຄາວນັ້ນ, ລັດຖະບານ ສາທາລະນະລັດ ປະຊາທິປະໄຕ ຫວຽດນາມ ໄດ້ຕົກລົງເລືອກເຟັ້ນຢຸດຕິການສູ້ຮົບ, ຍອມຮັບມາດຕະການທາງການທູດ ແລະ ປະເທດຊາດຖືກແບ່ງແຍກດ້ວຍເສັ້ນຂະຫນານ 17 ເພື່ອມີສັນຕິພາບ ສ້າງເງື່ອນໄຂໃຫ້ການບຸກໂຈມຕີຄັ້ງໃຫຍ່ປົດປ່ອຍປະເທດຊາດຢ່າງສົມບູນຫລັງຈາກນັ້ນ 21 ປີ. ທ່ານອະດີດຮອງນາຍົກລັດຖະມົນຕີ ຫວູຄວານ ຖືວ່າ:
“ພວກເຮົາຕໍ່ສູ້ຢູ່ໃນລະດັບສູງສຸດ, ໃນເບື້ອງຕົ້ນພວກເຮົາບໍ່ຍອມຮັບເສັ້ນຂະຫນານ 17 ຫາກກ່ອນນັ້ນ ທ່ານຮອງນາຍົກລັດຖະມົນຕີ ຟ້າມວັນດົງ ໄດ້ຍົກອອກວິທີການແມ່ນ ເສັ້ນຂະຫນານ 13,14 ແລະ 16. ພວກເຮົາໄດ້ຕໍ່ສູ້ໃນແຕ່ລະບາດກ້າວເພື່ອປະຕິບັດເຂດເຕົ້າໂຮມແນໃສ່ນຳມາເຊິ່ງຜົນປະໂຫຍດໃຫ້ການປະຕິວັດ. ແຕ່ຍ້ອນການສົມທຽບກຳລັງ ແລະ ສະພາບການພົວພັນລະຫວ່າງບັນດາປະເທດໃຫຍ່ ສຸດທ້າຍ ແມ່ນຕົກລົງ ເອົາເສັ້ນຂະຫນານ 17 ເປັນຊົ່ວຄາວ.”
ຕໍ່ຈາກໄຊຊະນະດ້ຽນບຽນຝູ, ສັນຍາ ເຊີແນວ ກ່ຽວກັບສັນຕິພາບໃຫ້ແກ່ຫວຽດນາມ ແມ່ນໄຊຊະນະການທູດທີ່ສຳຄັນຂອງກອງທັບ ແລະ ປະຊາຊົນ ຫວຽດນາມ, ສ້າງປະຖົມປັດໄຈ ແລະ ພື້ນຖານດ້ານກົດໝາຍເພ່ືອໃຫ້ຫວຽດນາມ ສືບຕໍ່ຕໍ່ສູ້ນຳການຕໍ່ສູ້ອັນຍືດເຍື້ອຍາວນານເພື່ອປົດປ່ອຍຊາດ ໄດ້ຮັບໄຊຊະນະຢ່າງສົມບູນ. ໄຊຊະນະຂອງ 75 ວັນເຈລະຈາທີ່ກອງປະຊຸມເຊີແນວຂອງລັດຖະບານ ສາທາລະນະລັດປະຊາທິປະໄຕ ຫວຽດນາມ ແມ່ນໄຊຊະນະຂອງການຕໍ່ສູ້ດ້ານການທູດທີ່ໝັ້ນແກ່ນ, ເຕັມໄປດ້ວຍຄຸນນະທາດ ແລະ ຄວາມເຊື່ອໝັ້ນເອງ. ໄຊຊະນະນີ້ມາຮອດປະຈຸບັນ ຍັງຄົງຮັກສາຄຸນຄ່າດັ້ງເດີມ ເພາະມັນສະແດງໃຫ້ເຫັນມູນເຊື້ອສັນຕິພາບ, ມິດຕະພາບຂອງຊາດຫວຽດນາມ ແລະ ແນວຄິດການພົວພັນຕ່າງປະເທດຂອງປະທານໂຮ່ຈິມີນ: ສັນຕິພາບ ຕ້ອງຕິດພັນກັບເອກະລາ, ເສລິພາບ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດ.