(vovworld)- ວັນທີ 31/12/2015, ປະຊາຄົມອາຊຽນໄດ້ຮັບການສ້າງຕັ້ງຂຶ້ນຢ່າງເປັນທາງການ, ເປັນຂີດໝາຍສຳຄັນໃນວິວັດການສ້າງຕັ້ງ ແລະ ພັດທະນາ ຂອງ ອາຊຽນ ໃນເກືອບ 5 ທົດສະວັດຜ່ານມາ. ການເຕີບໂຕຂອງ ອາຊຽນ ນຳມາເຊິ່ງຜົນປະໂຫຍດອັນໃຫຍ່ຫລວງໃຫ້ທັງພາກພື້ນ, ໃນນັ້ນ ມີແຕ່ລະປະເທດສະມາຊິກ. ສຳລັບຫວຽດນາມ, ການເຊື່ອມໂຍງເຂົ້າກັບ ອາຊຽນ ດ້ວຍຖານະແມ່ນສະມາຊິກຂອງ ອາຊຽນ ຕະຫລອດຮອດສະມາຊິກຂອງປະຊາຄົມ ອາຊຽນ, ເຖິງວ່າ ຫວຽດນາມ ໄດ້ມີການກະກຽມແລ້ວ, ແຕ່ພວມວາງອອກສິ່ງທ້າທາຍຫລາຍຢ່າງ, ຕ້ອງມີຄວາມມານະພະຍາຍາມຢ່າງຍາວນານ. ບົດຂຽນຂອງນັກຂ່າວ ແອງຮ່ວຽນ
 |
ການສ້າງຕັ້ງປະຊາຄົມ ອາຊຽນ ນຳມາເຊິ່ງສະພາບແວດລ້ອມສະດວກຫລາຍກວ່າ, ຮັບໃຊ້ໃຫ້ພາລະກິດສ້າງສາ, ພັດທະນາ ແລະ ປົກປັກຮັກສາປະເທດຊາດຂອງຫວຽດນາມ. ສະເພາະໃນຂົງເຂດເສດຖະກິດ, ເປັນທີ່ຈະແຈ້ງແລ້ວວ່າ ປະຊາຄົມ ອາຊຽນ ໄດ້ສ້າງໃຫ້ຫວຽດນາມ ກາລະໂອກາດສຳພັດກັບຕະຫລາດທີ່ກວ້າງໃຫຍ່ກວ່າ. ບໍ່ພຽງແຕ່ແມ່ນຕະຫລາດ ທີ່ມີພົນລະເມືອງ 625 ລ້ານຄົນເທົ່ານັ້ນ ຫາກຍັງເປີດກວ້າງອອກສູ່ ຕ່າງປະເທດອີກດ້ວຍ.
ກາລະໂອກາດ ແລະ ສິ່ງທ້າທາຍ
ໄດ້ມີການໄຈ້ແຍກ, ຕີລາຄາຫລາຍຢ່າງກ່ຽວກັບບັນດາກາລະໂອກາດຂອງຫວຽດນາມ ເມື່ອເຂົ້າຮ່ວມປະຊາຄົມ ອາຊຽນ. ກາລະໂອກາດທຳອິດ ນັ້ນແມ່ນກາລະໂອກາດກ່ຽວກັບຕະຫລາດ, ກ່ຽວກັບແຮງງານ, ກ່ຽວກັບການດຶງດູດເງິນລົງທຶນພາຍໃນກຸ່ມອາຊຽນ ແລະ ນອກອາຊຽນ ແລະ ສຸດທ້າຍແມ່ນກາລະໂອກາດ ຖື ອາຊຽນ ເປັນກຳລັງຫນູນເພື່ອສຳພັດກັບຕະຫລາດ, ສຳພັດກັບແຫລ່ງເງິນລົງທຶນຈາກບັນດາຄູ່ຮ່ວມມືຢູ່ ນອກ ອາຊຽນຄື: ອາເມລິກາ, ອີຢູ, ຍີ່ປຸ່ນ… ກ່ອນອື່ນໝົດ, ຜົນປະໂຫຍດໃຫຍ່ສຸດເມື່ອເຂົ້າຮ່ວມປະຊາຄົມ ອາຊຽນ ແມ່ນນຳມາໃຫ້ຫວຽດນາມ ສະຖຽນລະພາບດ້ານເສດຖະກິດມະຫາພາກ. ທ່ານ ຫວູດັງຢູງ, ເອກອັກຄະລັດຖະທູດ, ຫົວຫນ້າຄະນະຜູ້ຕາງຫນ້າຫວຽດນາມ ປະຈຳ ອາຊຽນ ຖືວ່າ:
“ໃນອາຊຽນ ມີກົນໄກຮັບປະກັນໃຫ້ບັນດາປະເທດສະມາຊິກ ຮັກສາສະຖຽນລະພາບເສດຖະກິດມະຫາພາກ ຕໍ່ຫນ້າການຜັນແປຂອງສະພາບເສດຖະກິດໂລກ. ນອກນັ້ນ ພວກເຮົາ ມີເງື່ອນໄຂສ້າງໂຄງປະກອບພື້ນຖານເສດຖະກິດຂອງຕົນຄືນໃຫມ່. ຜົນປະໂຫຍດຫນຶ່ງອີກ ນັ້ນແມ່ນຜ່ານປະຊາຄົມເສດຖະກິດ ອາຊຽນ ພວກເຮົາຕ້ອງດັດປັບ, ປັບປຸງລະບອບນະໂຍບາຍການຕະຫລາດໃຫ້ສົມບູນແບບ, ສະດວກກວ່າ ແລະ ເໝາະສົມກັບທຳນຽມສາກົນ.”
ຜົນປະໂຫຍດຊື່ງປະຊາຄົມ ອາຊຽນ ນຳມາໃຫ້ຫວຽດນາມ ແມ່ນຈະແຈ້ງທີ່ສຸດ, ພິເສດ ໃນຂົງເຂດເສດຖະກິດ. ເຖິງວ່າ ມາຮອດປະຈຸບັນ, ລະດັບເຊື່ອມໂຍງໃນອາຊຽນ ໂດຍບັນດານັກໄຈ້ແຍກເສດຖະກິດຊີ້ໃຫ້ເຫັນ ພຽງແຕ່ຈາກລັດຖະບານ, ອົງການທີ່ມີຄວາມຮັບຜິດຊອບ ສ່ວນວິສາຫະກິດເອງບໍ່ທັນເຂົ້າຮ່ວມຢ່າງຈະແຈ້ງ. ຮອງສາດສະດາຈານ, ດຣ ຈີ້ງທິທູເຮືອງ, ຮອງຫົວຫນ້າພະແນກເສດຖະກິດ ແລະ ດຳເນີນທຸລະກິດສາກົນ, ມະຫາວິທະຍາໄລການຄ້າຕ່າງປະເທດ ຖືວ່າ:
“ກາລະໂອກາດນຳມາເຊິ່ງຕະຫລາດໃຫ້ບັນດາວິສາຫະກິດຫວຽດນາມແມ່ນຈະແຈ້ງແລ້ວ. ຕະຫລາດອາຊຽນ ແມ່ນຕະຫລາດໃຫຍ່ທີ 3 ໃນໂລກ. ແລະ ຕະຫລາດນີ້ແມ່ນຄຽງຂ້າງຫວຽດນາມ. ສະນັ້ນ ບັນດາວິສາຫະກິດ ກຳໄດ້ກາລະໂອກາດທີ່ດີນີ້ເພື່ອພັດທະນາການດຳເນີນທຸລະກິດ.”
ມີທັດສະນະເຊັ່ນດຽວກັນ, ທ່ານ ເລກົງຟູ້ງ, ອະດີດ ລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ຢືນຢັນວ່າ: ຄຽງຄູ່ກັບບັນດານະໂຍບາຍ, ບັນດາການເຄື່ອນໄຫວຂອງລັດຖະບານ, ວິສາຫະກິດເອງ ຄວນເປັນເຈົ້າການໃນວິວັດການນີ້. ຫນຶ່ງໃນບັນດາບາດກ້າວເປັນເຈົ້າການ ນັ້ນແມ່ນຄວາມຮັບຮູ້ຢ່າງຄົບຖ້ວນບັນດາຜົນປະໂຫຍດ ແລະ ກາລະໂອກາດ ຊື່ງປະຊາຄົມ ອາຊຽນ ນຳມາໃຫ້. ທ່ານເລກົງຟູ້ງ ເນັ້ນຫນັກວ່າ:
“ເພື່ອແກ້ໄຂບັນຫານີ້ ຂ້າພະເຈົ້າຖືວ່າ ພວກເຮົາຄວນຍູ້ແຮງການໂຄສະນາເຜີຍແຜ່ກ່ຽວກັບຄວາມໝາຍຂອງຜົນປະໂຫຍດໃນການຮ່ວມມືດ້ານເສດຖະກິດ ອາຊຽນ. ທີສອງ ຕ້ອງປ່ຽນແປງໂຄງປະກອບ, ພັດທະນາການສອນວິຊາຊີບໃຫ້ເປັນລະບົບ ຈຶ່ງມີກາລະໂອກາດເຊື່ອມໂຍງເຂົ້າກັບບັນດາພື້ນຖານເສດຖະກິດໃນພາກພື້ນ.”
ໃນຂະນະນັ້ນ ຍັງຊີ້ໃຫ້ເຫັນບັນດາຈຸດອ່ອນຂອງຫວຽດນາມ ຄວນແກ້ໄຂເມື່ອເຊື່ອມໂຍງເຂົ້າກັບ ອາຊຽນ, ທ່ານ ດັ້ງຫວູຢູ໋ງ, ຫົວຫນ້າຄະນະຜູ້ຕາງຫນ້າຫວຽດນາມ ປະຈຳ ອາຊຽນ ເນັ້ນຫນັກເຖິງຄວາມຮຽກຮ້ອງຕ້ອງການຄຸນນະພາບແຮງງານ, ພິເສດ ແມ່ນລະດັບດ້ານພາສາຕ່າງປະເທດຂອງຄົນງານຫວຽດນາມ.
“ຂ້າພະເຈົ້າຢາກເນັ້ນຫນັກເຖິງການບຳລຸງສ້າງພາສາອັງກິດ. ຄົນງານ ຟີລີບປີນ ເຂົາເຈົ້າສາມາດໄປເຮັດວຽກໃນທົ່ວໂລກ ແລະ ຫລາຍປະເທດຢາກຮັບຄົນງານ ຟີລີບປີນ ແທນໃຫ້ຄົນງານປະເທດອື່ນ, ໃນນັ້ນ ມີຫວຽດນາມ, ເພາະຄົນງານ ຟີລີບປີນ ເຂົາເຈົ້າ ຮູ້ພາສາອັງກິດ. ສະນັ້ນ ພວກເຮົາຢາກແກ້ງແຍ້ງໃນພາກພື້ນ ກ່ອນອື່ນ ຕ້ອງຮູ້ພາສາອັງກິດ.”
ຫັນຄວາມຮັບຮູ້ເປັນການກະທຳ
ປະຊາຄົມ ອາຊຽນ ຈະນຳມາເຊິ່ງຫລາຍກາລະໂອກາດພັດທະນາໃຫ້ແກ່ຫວຽດນາມ ແລະ ບັນດາປະເທດສະມາຊິກ ນັບທັງດ້ານການເມືອງ ຄວາມໝັ້ນຄົງ, ເສດຖະກິດ ແລະ ວັດທະນະທຳສັງຄົມ, ແຕ່ຄຽງຄູ່ກັນນັ້ນ ແມ່ນບັນດາສິ່ງທ້າທາຍບໍ່ແມ່ນຫນ້ອຍ. ມີຄວາມຮັບຮູ້ຢ່າງຖືກຕ້ອງກັບປະຊາຄົມ ອາຊຽນ ຍິ່ງມີບັນດາບາດກ້າວກະທຳເໝາະສົມ ເພື່ອຍາດແຍ່ງກາລະໂອກາດ ແລະ ແກ້ໄຂສິ່ງທ້າທາຍໄດ້. ພ້ອມກັບປະຊາຄົມ, ຢູ່ຂັ້ນລະດັບຊາດ, ຫວຽດນາມ ພວມຍູ້ແຮງການໂຄສະນາ, ຍົກສູງແຫລ່ງກຳລັງຂອງພື້ນຖານເສດຖະກິດ, ຂອງປະຊາຄົມວິສາຫະກິດກໍຄືພະນັກງານ, ປະຊາຊົນແຕ່ລະຄົນເມື່ອເຂົ້າຮ່ວມ ອາຊຽນ, ຮັດແຄບຊ່ອງຫວ່າງການພັດທະນາກັບພາກພື້ນເທື່ອລະກ້າວ. ຄຽງຄູ່ກັນນັ້ນ ຫວຽດນາມ ມານະພະຍາຍາມພ້ອມກັບບັນດາປະເທດ ປະກອບສ່ວນສ້າງວິໄສທັດພັດທະນາຂອງ ອາຊຽນ ຫລັງປີ 2015 ເພື່ອຊ່ວຍຮ່ວມສຳພັນ ອາຊຽນ ເລິກເຊິ່ງກວ້າງຂວາງກວ່າອີກ.