ບັ້ນເລືອກຕັ້ງປະທານາທິບໍດີຄົນທີ 45 ຂອງອາເມລິກາໄດ້ເລີ່ມຕົ້ນຢ່າງເປັນທາງການດ້ວຍເຫດການທີ່ລັດ Lowa ໄດ້ດຳເນີນການເລືອກຕັ້ງຂັ້ນຕົ້ນຄັ້ງທຳອິດ. ຄວາມປະຫຼາດໃຈໄດ້ເກີດຂຶ້ນ. ຜົນຂອງການປ່ອນບັດຢູ່ລັດນີ້ໄດ້ສະແດງໃຫ້ເຫັນວ່າ ການເລືອກຕັ້ງຈະເຄັ່ງຕຶງຂຶ້ນ ແລະ ເສັ້ນທາງແຫ່ງການແຂ່ງຂັນເຂົ້າທຳນຽບຂາວ ຍັງຈະລະອິດລະອ້ຽວຢູ່.
ທ່ານນາງ Hillary Clinton ໄດ້ຍາດເອົາໄຊຊະນະຢ່າງວຸດວິດຕໍ່ສະມາຊິກສະພາສູງ Bernie Sanders |
ຜູ້ມີສິດເລືອກຕັ້ງສັງກັດພັກສາທາລະນະ ແລະ ພັກປະຊາທິປະໄຕຢູ່ລັດ Lowa ເມື່ອບໍ່ດົນມານີ້ ໄດ້ເລີ່ມປ່ອນບັດເພື່ອເລືອກເອົາຜູ້ສະໝັກເລືອກຕັ້ງເປັນປະທານາທິບໍດີອາເມລິກາ ຊຶ່ງເປັນຕົວແທນໃຫ້ແກ່ 2 ພັກໃນການແຂ່ງຂັນເຂົ້າທຳນຽບຂາວປີ 2016. ໄຊຊະນະຢູ່ທີ່ລັດນີ້ ຈະສ້າງປະຖົມປັດໄຈໃຫ້ແກ່ບັນດາຜູ້ສະໝັກເລືອກຕັ້ງເພື່ອສືບຕໍ່ການແຂ່ງຂັນຢູ່ລັດ New Hampshire ໃນວັນທີ 9/2 ທີ່ຈະມາເຖິງ.
ມີຄວາມປະຫຼາດໃຈສຳລັບທັງ 2 ພັກສາທາລະນະ ແລະພັກປະຊາທິປະໄຕ
ຕາມຜົນຂອງການນັບບັດທີ່ປະກາດເມື່ອວັນທີ 2/2 ແລ້ວ, ອະດີດລັດຖະມົນຕີການຕ່າງປະເທດອາເມລິກາ ທ່ານນາງ Hillary Clinton ໄດ້ຍາດເອົາໄຊຊະນະຢ່າງວຸດວິດຕໍ່ສະມາຊິກສະພາສູງ Bernie Sanders ໃນການເລືອກຕັ້ງຂັ້ນຕົ້ນເພື່ອສາມາດກາຍເປັນຜູ້ຕາງໜ້າໃຫ້ແກ່ພັກປະຊາທິປະໄຕທີ່ເຂົ້າຮ່ວມການເລືອກຕັ້ງປະທານາທິບໍດີອາເມລິກາເມື່ອເດືອນ 11/2016. ດ້ວຍ 100% ຈຳນວນບັດໄດ້ນັບ, ທ່ານນາງ Hillary Clinton ຍາດໄດ້ 49,8% ຈຳນວນບັດສະໜັບສະໜູນ ໃນຂະນະທີ່ ສະມາຊິກສະພາສູງ Bernie Sanders ຍາດໄດ້ 49,6%. ຜູ້ມີສິດເລືອກຕັ້ງພັກປະຊາທິປະໄຕໄດ້ເຮັດໃຫ້ຫາງສຽງມີຄວາມປະຫຼາດໃຈເມື່ອອັດຕາຜູ້ສະໜັບສະໜູນຜູ້ສະໝັກເລືອກຕັ້ງທີ່ມີອາຍຸ 72 ປີ ທ່ານ Bernie Sanders ແມ່ນສູງກວ່າຫຼາຍເມືອ່ທຽບໃສ່ໝາກຜົນການຢັ່ງຫາງສຽງກ່ອນທີ່ດຳເນີນການປ່ອນບັດເລືອກຕັ້ງ. ຕະຫຼອດໄລຍະ 6 ເດືອນແຫ່ງການຂົນຂວາຍຫາສຽງເລືອກຕັ້ງທີ່ຜ່ານມາ, ທ່ານນາງ Hillary Clinton ຍາມໃດກໍຍາດໄດ້ສຽງສະໜັບສະໜູນຫຼາຍກວ່າບັນດາຄູ່ແຂ່ງໃນພັກຢ່າງຂາດຂັ້ນ. ກ່ອນທີ່ດຳເນີນການເລືອກຕັ້ງຂັ້ນຕົ້ນ, ເບິ່ງຄືວ່າ ມີບໍ່ເທົ່າໃດຄົນທີ່ໄດ້ຄິດເຖິງກໍລະນີ ຜູ້ສະໝັກເລືອກຕັ້ງທັງ 2 ນີ້ໄດ້ແຂ່ງຂັນກັນຢ່າງຂ້ຽວຂາດດ້ວຍໝາກຜົນຢ່າງວຸດວິດ.
ສຳລັບການແຂ່ງຂັນຂອງບັນດາຜູ້ສະໝັກເລືອກຕັ້ງສັງກັດພັກສາທາລະນະນັ້ນ, ກໍໄດ້ຮັບຖືວ່າມີຄວາມຂ້ຽວຂາດກ່ວາຫຼາຍ ແລະ ມີຄວາມປະຫຼາດໃຈ. ສະມາຊິກສະພາສູງລັດ Texas ທ່ານ Ted Cruz ບັງເອີນໄດ້ຍາດເອົາໄຊຊະນະຕໍ່ມະຫາເສດຖີຄ້າຂາຍອະສັງຫາລິມມະຊັບ ທ່ານ Donald Trump. ຕາມຜົນຂອງການເລືອກຕັ້ງສຸດທ້າຍແລ້ວ, ຜູ້ສະໝັກເລືອກຕັ້ງ ທ່ານ Ted Cruz ຍາດໄດ້ 27,70% ຈຳນວນບັດສະໜັບສະໜູນ, ໃນຂະນະທີ່ມະຫາເສດຖີ ທ່ານ Donald Trump ຍາດໄດ້ພຽງ 24,31% ຈຳນວນບັດສະໜັບສະໜູນເທົ່ານັ້ນ.ຢືນອັນດັບທີ 3 ແມ່ນສະມາຊິກສະພາສູງລັດ Florida ທ່ານ Marco Rubio ດ້ວຍ 23,1% ຈຳນວນບັດສະໜັບສະໜູນ. ເຫດການນີ້ໄດ້ຮັບການຕີລາຄາວ່າ ແມ່ນຄວາມປະຫຼາດໃຈຢ່າງໃຫຍ່ຫຼວງໃນການແຂ່ງຂັນຢູ່ພາຍໃນພັກສາທາລະນະ, ເພາະຕາມການຢັ່ງຫາງສຽງທຸກຄັ້ງກ່ອນທີ່ດຳເນີນ ການເລືອກຕັ້ງຂັ້ນຕົ້ນຢູ່ລັດ Lowa ນັ້ນ, ຜູ້ສະໝັກເລືອກຕັ້ງ ທ່ານ Donald Trump ຍາມໃດກໍໄດ້ຮັບສຽງສະໜັບສະໜູນລື່ນກາຍບັນດາຄູ່ແຂ່ງພາຍໃນພັກນີ້ຢ່າງຂາດຂັ້ນ. ເບິ່ງຄືວ່າ ຜູ້ຕາງໜ້າໃຫ້ແກ່ພັກສາທາລະນະເພື່ອເຂົ້າຮ່ວມການເລືອກຕັ້ງປະທານາທິບໍດີອາເມລິກາເມື່ອເດືອນ 11/2016 ແມ່ນຈະໄດ້ແກ່ທ່ານໜຶ່ງໃນຈຳນວນຜູ້ສະໝັກເລືອກຕັ້ງ 3 ທ່ານດັ່ງກ່າວ.
ການແຂ່ງຂັນເຂົ້າທຳນຽບຂາວຍັງເຄັ່ງຕຶງຢູ່
ລັດ Lowa ແມ່ນແຫ່ງທີ່ດຳເນີນການເລືອກຕັ້ງຂັ້ນຕົ້ນຕາມຮູບການປ່ອນບັດຢູ່ພາຍໃນພັກຄັ້ງທຳອິດ, ສ່ວນຢູ່ລັດ New Hampshire ຈະດຳເນີນການເລືອກຕັ້ງຕາມຮູບການປ່ອນບັດຂອງຫົວໜ້າກຸ່ມຜູ້ມີສິດເລືອກຕັ້ງຄັ້ງທຳອິດ. ຕາມການສະຖີຕິຈາກການເລືອກຕັ້ງປະທານາທິບໍດີອາເມລິກາເມື່ອມໍ່ໆມານີ້ ໄດ້ສະແດງໃຫ້ເຫັນວ່າ ຜູ້ກາຍເປັນປະທານາທິບໍດີເຄີຍແມ່ນຜູ້ສະໝັກເລືອກຕັ້ງນຳໜ້າໃນການແຂ່ງຂັນຢູ່ພາຍໃນພັກທີ່ລັດ Lowa. ແຕ່ປະຫວັດການເລືອກຕັ້ງຢູ່ອາເມລິກາ ກໍໄດ້ມີຫຼາຍກໍລະນີຜິດປົກກະຕິ. ໃນການເລືອກຕັ້ງຂັ້ນຕົ້ນຢູ່ລັດ Lowa ເມື່ອປີ 2008, ຜູ້ສະໝັກເລືອກຕັ້ງ Huckabee ສາມາດຍາດໄດ້ໄຊຊະນະ; ປີ 2012, ຜູ້ສະໝັກເລືອກຕັ້ງ Santorum ຍາດໄດ້ໄຊຊະນະ, ແຕ່ຜູ້ສະໝັກເລືອກຕັ້ງທັງ 2 ນີ້ ສຸດທ້າຍກໍຖືກປະລາໄຊ. ຊ້ຳບໍໜຳ, ທ່ານ Bill Clinton ຍັງຖືກປະລາໄຊ ໃນການປ່ອນບັດ 6 ຄັ້ງທຳອິດຢ່າງລຽນຕິດໃນບັ້ນຫາສຽງເລືອກຕັ້ງເມື່ອປີ 1992, ແຕ່ສຸດທ້າຍຍັງຄົງໄດ້ຮັບໄຊຊະນະໃນການເລືອກຕັ້ງປະທານາທິບໍດີ.
ນັບແຕ່ນີ້ຈົນຮອດເວລາດຳເນີນກອງປະຊຸມຂອງ 2 ພັກເມື່ອເດືອນ 7/2016, ເສັ້ນທາງແຫ່ງການແຂ່ງຂັນເຂົ້າທຳນຽບຂາວ ຍັງຈະລະອິດລະອ້ຽວຢູ່ ແລະ ບໍ່ເວັ້ນເສຍກໍລະນີຜິດປົກກະຕິຈະເກີດຂຶ້ນ.