(vovworld)- ໂດຍໄດ້ຮັບຄຳເຊີນຂອງລັດຖະບານ ອາເມລິກາ, ວັນທີ 6/7, ທ່ານ ຫງວຽນຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ເລີ່ມຕົ້ນການຢ້ຽມຢາມ ສະຫະລັດອາເມລິກາ ຢ່າງເປັນທາງການ ແຕ່ວັນທີ 6-10/7/2015. ການຢ້ຽມຢາມແມ່ນເຫດການໄດ້ຮັບຄວາມສົນໃຈເປັນພິເສດຈາກຫາງສຽງພາຍໃນປະເທດ ແລະ ສາກົນ ເພາະການຢ້ຽມຢາມແມ່ນມີຄວາມໝາຍສຳຄັນພິເສດ. ບົດຂຽນຂອງນັກຂ່າວ ຫວູຢີ ທີ່ມີຫົວຂໍ້ວ່າ: ຂີດໝາຍປະຫວັດສາດໃຫມ່ໃນການພົວພັນ ລະຫວ່າງ ຫວຽດນາມ ແລະ ອາເມລິກາ
ນີ້ເປັນຄັ້ງທຳອິດໃນປະຫວັດສາດ, ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ໄປຢ້ຽມຢາມ ອາເມລິກາ ຢ່າງເປັນທາງການ. ການຢ້ຽມຢາມແມ່ນກົງກັບໂອກາດສອງປະເທດສະເຫລີມສະຫລອງ 20 ປີແຫ່ງວັນສ້າງການພົວພັນທາງການທູດ ນັບແຕ່ວັນທີ 11/7/1995.
ການຜັນແປໃນອະດີດຕະການ, ເພີ່ມພູນຄູນສ້າງເພື່ອອະນາຄົດ
ຫວນຄືນອະດີດຕະການ, ບໍ່ແມ່ນຮອດປີ 1995 ຫາກໄລຍະກ່ອນນີ້, ເຖິງວ່າ ຫວຽດນາມ ແລະ ອາເມລິກາ ຕັ້ງຫ່າງໄກກັນເຖິງເຄິ່ງຫນ່ວຍພິພົບກໍຕາມ, ແຕ່ໄດ້ມີການພົວພັນນຳກັນ ແລະ ໄດ້ຜ່ານຜ່າການຜັນແປຫລາຍຢ່າງ, ໃນນັ້ນ ມີໄລຍະຫນຶ່ງທີ່ຫງ່ວມເຫງົາ ແລະ ໄດ້ກໍ່ຜົນຮ້າຍຢ້ອນຫລັງໃຫ້ທັງສອງຊາດ. ມາຮອດປະຈຸບັນ, 40 ປີພາຍຫລັງສົງຄາມ ແລະ 20 ປີແຫ່ງວັນສ້າງການພົວພັນລະຫວ່າງສອງປະເທດເປັນປົກກະຕິ, ການພົວພັນລະຫວ່າງຫວຽດນາມ ແລະ ອາເມລິກາ ພັດທະນາຢ່າງຕັ້ງຫນ້າໃນຫລາຍຂົງເຂດ, ບົນພື້ນຖານເຄົາລົບເຊິ່ງກັນ ແລະກັນ, ສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ. ປີ 2000, ສອງປະເທດໄດ້ເຊັນສັນຍາການຄ້າ. ເດືອນ 7/2013, ໃນການຢ້ຽມຢາມ ອາເມລິກາ ຢ່າງເປັນທາງການຂອງທ່ານປະທານປະເທດ ເຈືອງເຕີນຊາງ, ສອງຝ່າຍໄດ້ສ້າງຂອບເຂດການພົວພັນຄູ່ຮ່ວມມືຮອບດ້ານ, ຊຸກຍູ້ການພົວພັນຮ່ວມມືໃນທຸກຂົງເຂດລະຫວ່າງຫວຽດນາມ ແລະ ອາເມລິກາ.
ການພົວພັນດ້ານການຄ້າ ຫວຽດນາມ ແລະ ອາເມລິກາ ໄດ້ມີການເຕີບໂຕຢ່າງລຽນຕິດ, ກາຍເປັນຈຸດສຸມໃນການພົວພັນລະຫວ່າງສອງປະເທດ, ເປັນຕົ້ນພາຍຫລັງສັນຍາການຄ້າສອງຝ່າຍມີຜົນສັກສິດເມື່ອປີ 2001 ມາຮອດປະຈຸບັນ. ສະແດງອອກຢ່າງຈະແຈ້ງທີ່ສຸດ ແມ່ນວົງເງິນການຄ້າສອງສົ້ນປີ 1995 ບັນລຸພຽງ 451 ລ້ານ USD, ຮອດປີ 2014 ແມ່ນຂຶ້ນເຖິງ ປະມານ 36 ຕື້ USD, ໃນນັ້ນ ຫວຽດນາມ ສົ່ງອອກກວ່າ 30 ຕື້ USD. ແຕ່ປີ 2015, ອາເມລິກາ ກາຍເປັນຕະຫລາດສົ່ງອອກໃຫຍ່ສຸດຂອງຫວຽດນາມ. ປະຈຸບັນ ຍອດເງິນລົງທຶນໂດຍກົງຂອງ ອາເມລິກາ ບັນລຸເກືອບ 11 ຕື້ USD ຢືນອັນດັບ 7 ໃນຈຳນວນບັນດາປະເທດ ແລະ ເຂດແຄ້ວນລົງທຶນຢູ່ຫວຽດນາມ. ຫວຽດນາມ ຍັງຄົງແມ່ນຕະຫລາດທີ່ເຕັມໄປດ້ວຍຄວາມສາມາດບົ່ມຊ້ອນພວມລໍຄອຍກະແສການລົງທຶນໃຫມ່ຈາກ ອາເມລິກາ.
ທ່ານເລຂາທິການໃຫຍ່ຫງວຽນຟູຈ້ອງຕ້ອນຮັບທ່ານລັດຖະມົນຕີ
ການຕ່າງປະເທດ ອາເມລິກາ John Kerry ເມື່ອປີ 2013
ພາບ:vtc.vn
|
ໃນຂົງເຂດການສຶກສາ, ຫວຽດນາມ ແມ່ນປະເທດອາຊີຕາເວັນອອກສ່ຽງໃຕ້ ມີຈຳນວນນັກຮຽນ, ນັກສຶກສາທີ່ພວມຮໍ່າຮຽນຢູ່ອາເມລິກາ ຫຼາຍກວ່າໝູ່ດ້ວຍ 17.000 ຄົນ. ໂຄງການສ້າງຕັ້ງມະຫາວິທະຍາໄລຮູບແບບອາເມລິກາ ຢູ່ຫວຽດນາມ (ມະຫາວິທະຍາໄລ Fulbright) ພວມໄດ້ຮັບການຜັນຂະຫຍາຍຢ່າງຕັ້ງໜ້າ. ອາເມລິກາ ສືບຕໍ່ສະຫງວນທຶນສຶກສາໃຫ້ນັກຄົ້ນຄວ້າຫວຽດນາມ ຜ່ານບັນດາລາຍການທຶນສຶກສາຄື: Fulbright ແລະ ກອງທຶນສຶກສາຫວຽດນາມ (VEF). ຫວຽດນາມ ແມ່ນປະເທດບຸລິມະສິດໃນໂຄງການໜູນຊ່ວຍຢ່າງຮີບດ່ວນກ່ຽວກັບການປ້ອງກັນ, ຕ້ານ HIV/AIDS ຂອງອາເມລິກາ. 2 ຝ່າຍພວມຜັນຂະຫຍາຍໂຄງການໜູນຊ່ວຍຮັບມືກັບການປ່ຽນແປງຂອງດິນຟ້າອາກາດຢູ່ເຂດປ່າ ແລະ ເຂດທົ່ງພຽງໄລຍະ 2013 – 2017, ດ້ວຍຈຳນວນທຶນໃຫ້ຄຳໝັ້ນສັນຍາໃນເບືອງຕົ້ນແມ່ນ 17 ລ້ານ USD. ຫວຽດນາມ ສືບຕໍ່ໜູນຊ່ວຍກອງທັບອາເມລິກາ ໃນບັນດາຄວາມມານະພະຍາຍາມຊອກຫາທະຫານອາເມລິກາ ທີ່ຫາຍສາບສູນໃນປາງສົງຄາມ. ອາເມລິກາ ໄດ້ສະແດງຄວາມຮັບຜິດຊອບຂອງຕົນໃນການຊ່ວຍເຫຼືອຫວຽດນາມ ແກ້ໄຂຜົນຮ້າຍຢ້ອນຫຼັງຈາກທາດພິດສີສົ້ມ, ລະເບີດບໍ່ທັນແຕກພາຍຫຼັງສົງຄາມ… ຢ່າງຈະແຈ້ງ.
ໃນຂົງເຂດການປ້ອງກັນຊາດ, ປ້ອງກັນຄວາມສະຫງົບ, ຫວຽດນາມ ແລະ ອາເມລິກາ ໄດ້ເພີ່ມທະວີບັນດາການເຈລະຈາ, ໂຄງການຮ່ວມມື, ຮັກສາການຕ້ອນຮັບບັນດາກໍ່າປັ່ນຂອງອາເມລິກາ ມາຢ້ຽມຢາມທ່າກໍ່າປັ່ນຂອງຫວຽດນາມ, ຮ່ວມມືໃນຂົງເຂດຊອກຫາ, ກູ້ໄພກູ້ຊີບ… ປີ 2014, ອາເມລິກາ ໄດ້ຖະແຫຼງຍົກເລິກຄຳສັ່ງຂວ້ຳບາດດ້ານອາວຸດສ່ວນໜຶ່ງສຳລັບຫວຽດນາມ. ເດືອນ 06/2015, ລັດຖະມົນຕີວ່າການກະຊວງປ້ອງກັນປະເທດ 2 ປະເທດ ໄດ້ລົງນາມໃນຖະແຫຼງການວິໄສທັດລວມກ່ຽວກັບການຮ່ວມມືດ້ານປ້ອງກັນປະເທດ 2 ຝ່າຍ.
ເລື່ອງຫວຽດນາມ ແລະ ອາເມລິກາ ສົມທົບກັນຢ່າງແໜ້ນແຟ້ນພໍສົມຄວນທີ່ບັນດາເວທີປາໄສຫຼາຍຝ່າຍຄື APEC, ເວທີປາໄສພາກພື້ນອາຊຽນ (ARF), ກອງປະຊຸມລັດຖະມົນຕີວ່າການກະຊວງປ້ອງກັນປະເທດ ບັນດາປະເທດອາຊຽນ ເປີດກວ້າງ (ADMM+), ກອງປະຊຸມສຸດຍອດອາຊີຕາເວັນອອກ (EAS) ແລະ ໃນຂອບເຂດຄູ່ຮ່ວມມືຍຸດທະສາດອາເມລິກາ - ອາຊຽນ…
ການຢ້ຽມຢາມຄັ້ງປະຫວັດສາດ
ໃນຊຸມປີຜ່ານມາ, ໂດຍປະຕິບັດແນວທາງການຕ່າງປະເທດເປີດກ້ວາງ, ພັກກອມມູນິດ ຫວຽດນາມ ມີການສຳພັດໃນເບື້ອງຕົ້ນກັບ 2 ພັກການເມືອງໃຫຍ່ຂອງ ອາເມລິກາ ແມ່ນພັກປະຊາທິປະໄຕ ແລະ ພັກສາທາລະນະ; ຮັກສາການພົວພັນກັບພັກກອມມູນິດ ອາເມລິກາ. ການຢ້ຽມຢາມ ອາເມລິກາ ຢ່າງເປັນທາງການຄັ້ງນີ້ຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ແມ່ນເຫດການທີ່ມີຄວາມໝາຍປະຫວັດສາດ, ດຳເນີນໄປໃນຈຸດເວລາສຳຄັນສຳລັບການພົວພັນ ຫວຽດນາມ - ອາເມລິກາ. ການນຳສູງສຸດຂອງ 2 ປະເທດຈະຕີລາຄາກ່ຽວກັບການພົວພັນໃນຕະຫຼອດ 20 ປີຜ່ານມາ ແລະ ກຳນົດທິດພັດທະນາການພົວພັນ 2 ຝ່າຍໃນ 20 ປີຈະມາເຖິງບົນຈິດໃຈພ້ອມກັນມຸ່ງໄປເຖິງອະນາຄົດ, ເຮັດໃຫ້ການພົວພັນຄູ່ຮ່ວມມືຮອບດ້ານ ຫວຽດນາມ - ອາເມລິກາ ເລິກເຊິ່ງຂຶ້ນຕື່ມ. ນີ້ກໍ່ແມ່ນໂອກາດເພື່ອໃຫ້ 2 ປະເທດສືບຕໍ່ເຈລະຈາ, ແລກປ່ຽນຢ່າງກົງໄປກົງມາ, ເປີດອົກເປີດໃຈກ່ຽວກັບບັນດາສິ່ງຍັງຄົງຄ້າງທີ່ແຕກຕ່າງກັນ. 2 ຝ່າຍກໍ່ຈະແລກປ່ຽນ, ແບ່ງປັນທັດສະນະກ່ຽວກັບບາງບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ.
ການຢ້ຽມຢາມ ອາເມລິກາ ຢ່າງເປັນທາງການຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ເພື່ອແນໃສ່ສືບຕໍ່ຜັນຂະຫຍາຍແນວທາງການຕ່າງປະເທດສັນຕິພາບ, ເອກະລາດ, ເປັນເຈົ້າຕົນເອງ, ມິດຕະພາບ, ຮ່ວມມື, ຫັນເປັນຫຼາຍຮູບຫຼາຍແບບ, ຖືເປັນສຳຄັນການພົວພັນກັບບັນດາປະເທດໃຫຍ່, ນຳການພົວພັນຄູ່ຮ່ວມມືກ້າວເຂົ້າສູ່ລວງເລິກ, ຍົກສູງທີ່ຕັ້ງບົດບາດສາກົນຂອງ ຫວຽດນາມ. ການຢ້ຽມຢາມກໍ່ຢັ້ງຢືນທີ່ຕັ້ງ, ບົດບາດນຳພາຂອງພັກກອມມູນິດ ຫວຽດນາມ ໃນໄລຍະປະເທດເຊື່ອມໂຍງເຂົ້າກັບເວທີສາກົນຢ່າງແຮງ.