(vovworld) - ທ່ານປະທານປະເທດ ກູບາ Raul Castro ພວມດຳເນີນການຢ້ຽມຢາມ ສາທາລະນະລັດ ຝລັ່ງຢ່າງເປັນທາງການ. ນີ້ແມ່ນການຢ້ຽມຢາມຄັ້ງປະຫວັດສາດທຳອິດຂອງການນຳ ກູບາ ເຖິງປະເທດ ຝລັ່ງ ນັບແຕ່ປີ 1995. ການຢ້ຽມຢາມ ຝລັ່ງເປັນເວລາ 2 ວັນຂອງທ່ານປະທານ Raul ໄດ້ເປັນຂີດໝາຍແຫ່ງການປັບປຸງການພົວພັນລະຫວ່າງ ກູບາ - ຝລັ່ງ ເວົ້າສະເພາະ , ແລະ ບັນດາປະເທດແຖວໜ້າໃນໂລກເວົ້າລວມ, ພາຍຫຼັງທີ່ປະເທດນີ້ສ້າງຕັ້ງການພົວພັນທາງການທູດກັບອາເມລິກາໃນປີ 2015.
ປະທານາທິບໍດີ ຝລັ່ງ Francois Hollande ແລະປະທານປະເທດ ກູບາ Raul Castro
(ພາບ: AFP.)
ການຢ້ຽມຢາມ ຝລັ່ງ ຂອງທ່ານປະທານປະເທດ ກູບາ Raul Castro ດຳເນີນພາຍຫຼັງການຢ້ຽມຢາມ ກູບາຂອງປະທານາທິບໍດີ ຝລັ່ງ Francois Hollande ເມື່ອເດືອນ 5/2015. ນີ້ກໍ່ແມ່ນການຢ້ຽມຢາມ ຝລັ່ງເປັນຄັ້ງທຳອິດຂອງການນຳ ກູບາ, ນັບແຕ່ການຢ້ຽມຢາມຂອງທ່ານປະທານປະເທດ Fidel Castro ກ່ອນນີ້ 21 ປີ, ການຢ້ຽມຢາມນີ້ຈະໄຂໜ້າປະຫວັດສາດໃໝ່ໃນການພົວພັນລະຫວ່າງ ກູບາ ກັບຝ່າຍຕາເວັນຕົກເວົ້າລວມ, ແລະກັບ ຝລັ່ງເວົ້າສະເພາະໃນຫຼາຍຂົງເຂດ.
ຊຸກຍູ້ການຮ່ວມມືທາງດ້ານເສດຖະກິດສອງຝ່າຍ
ໃນ 2 ວັນຢູ່ຢ້ຽມຢາມ ຝລັ່ງ, ທ່ານປະທານ Raul Castro ມີການເຈລະຈາກັບ ປະທານາທິບໍດີ ຝລັ່ງ Francois Hollande, ພົບປະກັບບັນດາການນຳຂັ້ນສູງອື່ນໆຂອງ ຝລັ່ງ. ສອງຝ່າຍປຶກສາຫາລືກ່ຽວກັບການເປີດກວ້າງ ແລະ ຫັນການພົວພັນເປັນຫຼາຍຮູບຫຼາຍແບບໃນຫຼາຍຂົງເຂດ, ຈາກຂົງເຂດການເມືອງ, ເສດຖະກິດ, ການຄ້າ, ການເງິນ, ການລົງທຶນຕະຫຼອດຮອດວັດທະນະທຳ ແລະ ການຮ່ວມມື. ສິ່ງເປັນໜ້າສົນໃຈນັ້ນແມ່ນ, ຄຽງຂ້າງການລົງນາມໃນສັນຍາເສດຖະກິດ 10 ກວ່າສະບັບແລ້ວ, ສອງຝ່າຍຍັງລົງນາມໃນ “ແຜນເສດຖະກິດ“ ສະບັບໜຶ່ງ ເພື່ອປັບປຸງການພົວພັນ ກໍ່ຄືບັນດາຂໍ້ຕົກລົງກ່ຽວກັບການຮ່ວມມືໃນຂົງເຂດຄົມມະນາຄົມ, ການທ່ອງທ່ຽວ ແລະ ການຄ້າ.
ປະຈຸບັນ, ດ້ານການຄ້າລະຫວ່າງສອງປະເທດຍັງຄົງຈຳກັດຢູ່, ຕາມປະທານາທິບໍດີ ຝລັ່ງ Francois Hollande ແລ້ວ, ສິ່ງສຳຄັນບໍ່ແມ່ນວ່າບັນດາສັນຍາທີ່ໄດ້ລົງນາມກັບ ກູບາເທົ່ານັ້ນ, ຫາກນີ້ຈະສ້າງເງື່ອນໄຂໃຫ້ບັນດາວິສາຫະກິດ ຝລັ່ງສຳຜັດກັບຕະຫຼາດ ອາເມລິກາລາຕີນອັນກວ້າງໃຫຍ່ນີ້.
ທູດພິເສດຂອງປະທານາທິບໍດີ ຝລັ່ງຮັບຜິດຊອບກ່ຽວກັບ ກູບາ, ທ່ານ Jean-Pierre Bel, ເນັ້ນໜັກວ່າ, ການພົວພັນລະຫວ່າງສອງປະເທດພວມຢູ່ໃນໄລຍະດີທີ່ສຸດນັບແຕ່ກ່ອນມາຮອດປະຈຸບັນ. ດ້ວຍເລື່ອງສອງຝ່າຍເພີ່ມທະວີຄວາມໄວ້ເນື້ອເຊື່ອໃຈ ແລະ ເຄົາລົບເຊິ່ງກັນ ແລະ ກັນ. ທ່ານກໍ່ຢືນຢັນວ່າ ຝລັ່ງຍາມໃດກໍ່ຄັດຄ້ານຄຳສັ່ງຄວ້ຳບາດຕ້ານ ກູບາໃນສະຫະພາບ ເອີລົບ. ຄວາມຈິງແລ້ວ, ການມີໜ້າຂອງ ຝລັ່ງຢູ່ ກູບາໃນໄລຍະຜ່ານມາ ໄດ້ຮັບການຕີລາຄາວ່າບໍ່ຫຼາຍປານໃດ, ແຕ່ພັດມີຄວາມໝາຍສຳຄັນທີ່ສຸດສຳລັບປະເທດນີ້. ຝລັ່ງແມ່ນໜຶ່ງໃນບັນດາຄູ່ຮ່ວມມືດ້ານເສດຖະກິດອັນດັບໜຶ່ງຂອງ ກູບາ, ດ້ວຍມູນຄ່າດ້ານການຄ້າສອງຝ່າຍແມ່ນປະມານ 195 ລ້ານ USD. ແຕ່ວ່າລະດັບນີ້ບໍ່ທັນສົມກັບຄວາມຫວັງຂອງທັງສອງຝ່າຍ. ຫວ່າງແລ້ວນີ້ ຝລັ່ງກໍ່ຊຸກຍູ້ຂໍ້ຕົກລົງລົບໜີ້ 8.5 ຕື້ USD ໃຫ້ ກູບາ, ເປີດຊ່ອງທາງໃຫ້ ກູບາສຳຜັດກັບບັນດາຕະຫຼາດການເງິນສາກົນ. ຝລັ່ງກໍ່ມີບົດບາດນຳໜ້າໃນການເພີ່ມທະວີການພົວພັນລະຫວ່າງ ກູບາ - ຝລັ່ງ ເວົ້າລວມ
ໄຂໄລຍະໃໝ່ໃນການພົວພັນຝລັ່ງ - ກູບາ
ໂດຍເຂົ້າໃຈແຈ້ງບັນດາຜົນປະໂຫຍດທາງດ້ານເສດຖະກິດ ແລະ ການຄ້ານີ້, ດັ່ງນັ້ນພາຍຫຼັງການພົວພັນ ອາເມລິກາ - ກູບາ ໄດ້ຮັບການປັບປຸງ, ຝລັ່ງໄດ້ນຳໜ້າໃນບັນດາປະເທດສະຫະພາບເອີລົບຊຸກຍູ້ການພົວພັນກັບ ກູບາ. ຝລັ່ງໄດ້ສະໜັບສະໜູນ ພັນທະມິດ ອາເມລິກາ ໃນການຫຍັບມໍ່ໃກ້ກັນກັບ ກູບາ. ຝລັ່ງກໍ່ມີການແກ່ງແຍ່ງກັບ ອາເມລິກາ ໃນການພົວພັນທາງດ້ານເສດຖະກິດ, ການຄ້າກັບ ກູບາ. ປະທານາທິບໍດີ ຝລັ່ງແມ່ນຜູ້ນຳຝ່າຍຕາເວັນຕົກ ຜູ້ທຳອິດມາຢ້ຽມຢາມ ກູບາ ໃນຫຼາຍທົດສະວັດຜ່ານມາ. ການຮ່ວມເດີນທາງກັບປະທານາທິບໍດີ ຝລັ່ງໄປຢ້ຽມຢາມ ກູບາ ຂອງການນຳວິສາຫະກິດ ຝລັ່ງ 30 ທ່ານໃນຄັ້ງນີ້ ໄດ້ເປັນການພິສູດໃຫ້ເຫັນເລື່ອງ ຝລັ່ງ ຢາກຊຸກຍູ້ການພົວພັນກັບປະເທດ ກູບາ ແລະ ເພີ່ມທະວີການມີໜ້າຂອງບັນດາວິສາຫະກິດ ຝລັ່ງຢູ່ປະເທດນີ້.
ຕາມບັນດານັກໄຈ້ແຍກແລ້ວ, ການຢ້ຽມຢາມ ຝລັ່ງຂອງປະທານ ກູບາ ໃນຄັ້ງນີ້, ກ່ອນອື່ນໝົດເປັນການຢືນຢັນໃຫ້ເຫັນໄລຍະໃໝ່ໃນການເພີ່ມທະວີການພົວພັນຮ່ວມມືລະຫວ່າງສອງປະເທດ ພາຍຫຼັງການຢ້ຽມຢາມ ກູບາຂອງປະທານາທິບໍດີ Francois Hollande ເມື່ອເດືອນ 5/2015, ແຕ່ສິ່ງສຳຄັນກວ່ານັ້ນແມ່ນ ເພື່ອແນໃສ່ປັບປຸງທີ່ຕັ້ງຂອງ ກູບາໃນເວທີສາກົນ. ໃນຂະນະນັ້ນ, ຝລັ່ງກໍ່ຫວັງວ່າຈະບັນລຸໄດ້ຜົນປະໂຫຍດຫຼາຍຢ່າງໃນການຊຸກຍູ້ການພົວພັນກັບ ກູບາ. ໃນຂະນະນັ້ນ, ກູບາກໍ່ຕ້ອງການຊຸກຍູ້ບັນດາກາລະໂອກາດຮ່ວມມືທາງດ້ານເສດຖະກິດ, ການຄ້າ, ການລົງທຶນ ເພື່ອພັດທະນາປະເທດຊາດ ແລະ ປັບປຸງລະດັບຄອງຊີບຂອງປະຊາຊົນ. ກູບາກໍ່ມີຄວາມຕ້ອງການຫຼາຍກ່ຽວກັບພື້ນຖານໂຄງລ່າງ ແລະ ບໍລິການພະລາທິການ,…
ໂດຍສ້າງຕັ້ງການພົວພັນທາງການທູດນຳກັນເມື່ອປີ 1902, ຝລັ່ງ ແລະ ກູບາມີການພົວພັນທາງດ້ານປະຫວັດສາດ ແລະ ວັດທະນະທຳຢ່າງແໜ້ນແຟ້ນ. ຝລັ່ງກໍ່ແມ່ນຄູ່ຮ່ວມມືດ້ານການຄ້າສຳຄັນຂອງປະເທດ ກູບາ, ຢືນອັນດັບ 11 ຢູ່ໃນໂລກ ແລະ ອັນດັບທີ 5 ຢູ່ ເອີລົບ. ການຢ້ຽມຢາມ ຝລັ່ງຄັ້ງນີ້ຂອງປະທານ ກູບາ ບໍ່ພຽງແຕ່ເປັນຂີດໝາຍໃຫ້ແກ່ການປັບປຸງການພົວພັນລະຫວ່າງ ກູບາ ກັບບັນດາປະເທດແຖວໜ້າໃນໂລກເທົ່ານັ້ນ, ຫາກຍັງເປີດກາລະໂອກາດໃຫ້ ກູບາໃນການປະຕິບັດແນວທາງພັດທະນາເສດຖະກິດໃໝ່ອີກດ້ວຍ.