(vovworld) – ກອງປະຊຸມສຳມະນາສາກົນ ຫວຽດນາມ ວິທະຍາ ຄັ້ງທີ 5 ໄດ້ດຳເນີນໃນລະຫວ່າງວັນທີ 15 – 16/12/2016 ຢູ່ ຮ່າໂນ້ຍ, ດ້ວຍຫົວຂໍ້ວ່າ “ພັດທະນາແບບຍືນຍົງໃນສະພາບການໂລກາພິວັດ”. ນັບແຕ່ຄັ້ງທຳອິດທີ່ໄດ້ຮັບການຈັດຕັ້ງເມື່ອປີ 1998 ມາຮອດປະຈຸບັນ, ກອງປະຊຸມສຳມະນາສາກົນ ຫວຽດນາມ ວິທະຍາ ໄດ້ຄ່ອຍໆ ນຳ ຫວຽດນາມ ກາຍເປັນສະຖານທີ່ຄົ້ນຄ້ວາ ຫວຽດນາມ ວິທະຍາຂອງທົ່ວໂລກ. ບົດຂຽນຂອງ ທູຮວາ, ນັກຂ່າວ VOV.
ຊຸດປື້ມຄົ້ນຄ້ວາກ່ຽວກັບ ຫວຽດນາມ ຂອງນັກຄົ້ນຄ້ວາຊາວ ລັດເຊຍ
|
ກອງປະຊຸມສະມະນາສາກົນ ຫວຽດນາມ ວິທະຍາ ແມ່ນການດຳເນີນຊີວິດດ້ານວິທະຍາສາດ, ແມ່ນເວທີປາໄສດ້ານວິຊາວິທະຍາປຶກສາຫາລື ແລະ ນຳສະເໜີມາດຕະການປະກອບສ່ວນແກ້ໄຂບັນດາບັນຫາຍຸກປະຈຸບັນຂອງ ຫວຽດນາມ. ກອງປະຊຸມສຳມະນາກໍ່ມຸ່ງໄປເຖິງການຍູ້ແຮງການພັດທະນາເຄືອຂ່າຍ ຫວຽດນາມ ວິທະຍາ ທົ່ວໂລກ, ເຕົ້າໂຮມຖັນແຖວນັກຊ່ຽວຊານຄົ້ນຄ້ວາກ່ຽວກັບ ຫວຽດນາມ ຂຶ້ນກັບຫຼາຍຂົງເຂດວິຊາສະເພາະທີ່ແຕກຕ່າງກັນ, ມຸ່ງໄປເຖິງການສ້າງຕັ້ງອົງການສາກົນກ່ຽວກັບ ຫວຽດນາມ ວິທະຍາເຊິ່ງໃນນັ້ນ ຫວຽດນາມ ສວມບົດບາດໃຈກາງ.
ໄລຍະທາງເພື່ອສ້າງຮູບປະທຳໃຫ້ເຄື່ອງໝາຍກອງປະຊຸມສຳມະນາ
ປີ 1998, ກອງປະຊຸມສຳມະນາສາກົນ ຫວຽດນາມ ວິທະຍາ ເປັນຄັ້ງທຳອິດໄດ້ຮັບການຈັດຕັ້ງ, ເຊິ່ງໄດ້ດຶງດູດນັກວິທະຍາສາດກ່ວາ 300 ຄົນທີ່ມາຈາກ 27 ປະເທດຢູ່ບັນດາທະວີບເຂົ້າຮ່ວມ. ສະເພາະໃນວາລະໄຂກອງປະຊຸມສຳມະນາ, ມີກ່ວາ 1.000 ຄົນເຂົ້າຮ່ວມ. ດ້ວຍຫົວຂໍ້ວ່າ “ຄົ້ນຄ້ວາ ຫວຽດນາມ ແລະ ພັດທະນາການຮ່ວມມືສາກົນ”, ກອງປະຊຸມສຳມະນາມີ 15 ອະນຸກຳມະການ, ບົດລາຍງານ 395 ບົດ, ໃນນັ້ນມີບົດລາຍງານຂອງບັນດານັກວິທະຍາສາດສາກົນ 163 ບົດ. ກອງປະຊຸມສຳມະນາ ຫວຽດນາມ ວິທະຍາ ຄັ້ງທີ 2 ໄດ້ຮັບການຈັດຕັ້ງໃນປີ 2004, ມີຫົວຂໍ້ວ່າ “ຫວຽດນາມ ບົນເສັ້ນທາງແຫ່ງການພັດທະນາ ແລະ ເຊື່ອມໂຍງ: ມູນເຊື້ອ ແລະ ທັນສະໄໝ”, ດ້ວຍ 10 ອະນຸກຳມະການ, 316 ບົດລາຍງານ ໃນນັ້ນມີບົດລາຍງານສາກົນ 104 ບົດ. ກອງປະຊຸມສຳມະນາ ຫວຽດນາມ ວິທະຍາຄັ້ງທີ 3 ໄດ້ຮັບການຈັດຕັ້ງໃນປີ 2008, ດ້ວຍຫົວຂໍ້ວ່າ “ຫວຽດນາມ ເຊື່ອມໂຍງ ແລະ ພັດທະນາ”, ດ້ວຍ 18 ອະນຸກຳມະການ, 531 ບົດລາຍງານ ໃນນັ້ນມີບົດລາຍງານສາກົນ 160 ບົດ. ຄັ້ງທີ 4, ກອງປະຊຸມສຳມະນາ ຫວຽດນາມ ວິທະຍາແມ່ນຈັດຕັ້ງໃນປີ 2012, ດ້ວຍຫົວຂໍ້ “ຫວຽດນາມ ບົນເສັ້ນທາງການເຊື່ອມໂຍງ ແລະ ພັດທະນາແບບຍືນຍົງ”, ໄດ້ເຕົ້າໂຮມນັກວິທະຍາສາດເກືອບ 1.000 ຄົນ ມາຈາກ 36 ປະເທດ ແລະ ເຂດແຄ້ວນ, ດ້ວຍ 15 ອະນຸກຳມະການ. ກອງປະຊຸມສຳມະນາ ຫວຽດນາມ ວິທະຍາ ຄັ້ງທີ 5, ດ້ວຍຫົວຂໍ້ “ພັດທະນາແບບຍືນຍົງໃນສະພາບການໂລກາພິວັດ”. ມີບົດລາຍງານ ຂອງບັນດານັກວິທະຍາສາດຂອງ 5 ທະວີບໄດ້ຝາກເຖິງກອງປະຊຸມສຳມະນາປະມານ 700 ບົດ.
ເຂົ້າຮ່ວມການແກ້ໄຂບັນດາບັນຫາຍຸກສະໄໝປະຈຸບັນ
ກອງປະຊຸມສຳມະນາ ຫວຽດນາມ ວິທະຍາ ຄັ້ງທີ 5 ໄດ້ຈັດຕັ້ງເປັນ 6 ອະນຸກຳມະການວິຊາສະເພາະ, ເຊິ່ງລວມມີ: ອະນຸກຳມະການທີ 1 - ການທູດ, ການຮ່ວມມື ແລະ ເຊື່ອມໂຍງສາກົນ, ອະນຸກຳມະການທີ 2 - ແຫຼ່ງກຳລັງວັດທະນະທຳ, ອະນຸກຳມະການທີ 3 - ການສຶກສາ ແລະ ພັດທະນາແຫຼ່ງຊັບພະຍາກອນມະນູດ, ອະນຸກຳມະການທີ 4 - ຖ່າຍທອດພູມປັນຍາ ແລະ ເຕັກໂນໂລຢີ, ອະນຸກຳມະການທີ 5 - ເສດຖະກິດ ແລະ ການທຳມາຫາກິນ, ອະນຸກຳມະການທີ 6 - ການປ່ຽນແປງຂອງດິນຟ້າອາກາດ. ກ່ຽວກັບວິທີການຈັດຕັ້ງບັນດາອະນຸກຳມະການວິຊາສະເພາະນີ້, ທ່ານ ຫງວຽນຫືວດຶກ, ຮອງຜູ້ອຳນວຍການມະຫາວິທະຍາໄລແຫ່ງຊາດ ຮ່າໂນ້ຍ, ຫົວໜ້າຄະນະຈັດຕັ້ງກອງປະຊຸມສຳມະນາ, ໃຫ້ຮູ້ວ່າ:
“ກ່ອນນັ້ນ, ພວກເຮົາເຄີຍສຸມໃສ່ເຂົ້າບັນດາບັນຫາຂອງວິທະຍາສາດສັງຄົມ ແລະ ມະນຸດສາດ, ມາຮອດປະຈຸບັນ, ບັນດາບັນຫານັ້ນໄດ້ຮັບການເປີດກ້ວາງເຖິງບັນດາຂົງເຂດວິທະຍາສາດ ແລະ ເຕັກໂນໂລຢີ, ການສຶກສາບຳລຸງສ້າງ, ຖ່າຍທອດເຕັກໂນໂລຢີ, ຄວາມຮູ້, ພິເສດແມ່ນບັນຫາການປ່ຽນແປງຂອງດິນຟ້າອາກາດ. ຕາມວິທີສຳພັດນີ້, ພວກເຮົາເຂົ້າໃຈໄດ້ວ່າ, ນອກຈາກເປົ້າໝາຍມູນເຊື້ອແມ່ນເຕົ້າໂຮມ, ສ້າງບັນດາເວທີປາໄສໃຫ້ບັນດານັກຄົ້ນຄ້ວາ ຫວຽດນາມ ວິທະຍາ ແລກປ່ຽນວິຊາວິທະຍາ ແລະ ພັດທະນາບັນດາບັນຫາກ່ຽວກັບ ພາສາ, ເຊື່ອມຕໍ່ເຄືອຂ່າຍຄົ້ນຄ້ວາ ຫວຽດນາມ ໃນທົ່ວໂລກ, ກອງປະຊຸມສຳມະນາຄັ້ງນີ້ກໍ່ສຸມໃສ່ແກ້ໄຂບັນດາບັນຫາຍຸກປະຈຸບັນຂອງ ຫວຽດນາມ”
ຕາມວິທີການຈັດຕັ້ງເນື້ອໃນນີ້, ກອງປະຊຸມສຳມະນາ ຫວຽດນາມ ວິທະຍາ ຄັ້ງທີ 5 ໄດ້ເຕື້ອງເຖິງບັນດາບັນຫາສະຖານະການຂອງປະເທດຊາດ. ນັ້ນແມ່ນການສັງເກດຕີລາຄາຂອງ ຫວຽດນາມ ໃນວິວັດການເຊື່ອມໂຍງ ແລະ ໄລຍະທາງທີ່ ຫວຽດນາມ ຈະກ້າວເດີນຕໄປ, ບັນດາບັນຫາໄດ້ວາງອອກເມື່ອວັດທະນະທຳບໍ່ພຽງແຕ່ແມ່ນຂົງເຂດຂອງຊີວິດທາງດ້ານຈິດໃຈເທົ່ານັ້ນ ຫາກຍັງແມ່ນແຫລ່ງກຳລັງໃຫ້ແກ່ການພັດທະນາແບບຍືນຍົງ; ວິວັດການເຊື່ອມໂຍງກ່ຽວກັບດ້ານເສດຖະກິດຂອງຫວຽດນາມ; ການສຶກສາ- ແມ່ນປັດໄຈຕັດສິນຊີ້ຂາດຜົນສຳເລັດຂອງວິວັດການປ່ຽນໃຫມ່ ແລະ ສຸດທ້າຍແມ່ນການພັດທະນາແບບຍືນຍົງຂອງຫວຽດນາມບໍ່ອາດຕັດແຍກອອກຈາກປັດໄຈສິ່ງແວດລ້ອມ ແລະ ການປ່ຽນແປງຂອງດິນຟ້າອາກາດ.
ສະຖານທີ່ໃຈກາງໃຫ້ແກ່ບັນດາການຄົ້ນຄ້ວາກ່ຽວກັບຫວຽດນາມ
ຢູ່ໃນໂລກ, ໄດ້ມີບົດໜັງສືພິມກ່ຽວກັບວິທະຍາສາດຄົ້ນຄວາມກ່ຽວກັບຫວຽດນາມ ກວ່າ 40.000 ບົດທີ່ໄດ້ລົງພິມໃນຫນັງສືພິມ, ໃນນັ້ນ 50% ແມ່ນຂອງບັນດາຜູ້ຂຽນຊາວຕ່າງປະເທດ. ເປັນອັນວ່າ ຫວຽດນາມ ແມ່ນເປົ້າໝາຍຄົ້ນຄ້ວາຂອງບັນດາວິທະຍາສາດໃນໂລກ. ສຳລັບກອງປະຊຸມສຳມະນາສາກົນ ຫວຽດນາມ ວິທະຍາ, ບັນດາຜູ້ຈັດຕັ້ງກອງປະຊຸມສຳມະນາໄດ້ວາງຈຸດໝາຍ ແມ່ນເພີ່ມທະວີການເຊື່ອມຕໍ່, ສ້າງເຄືອຂ່າຍບັນດານັກຄົ້ນຄ້ວາຫວຽດນາມໃນທົ່ວໂລກ ເພື່ອຮັບໃຊ້ໃຫ້ການພັດທະນາຂອງຫວຽດນາມ. ສາດສະດາຈານ ປອ ຫວູມີງຢາງ, ຜູ້ຊ່ຽວຊານຂອງມະຫາວິທະຍາແຫ່ງຊາດ ຮ່າໂນ້ຍ ແບ່ງປັນວ່າ:
“ນີ້ແມ່ນກາລະໂອກາດເພື່ອໃຫ້ພວກເຮົາຮັບຊາບກ່ຽວກັບໄດ້ບັນດາບົດຄົ້ນຄ້ວາຫລ້າສຸດກ່ຽວກັບຫວຽດນາມໃນທຸກດ້ານ. 4 ປີເທື່ອຫນຶ່ງ, ບັນດານັກວິທະຍາສາດນຳມາໃຫ້ກອງປະຊຸມສຳມະນາບັນດາໝາກຜົນແຫ່ງການຄົ້ນຄ້ວາໃຫມ່, ສິ່ງທີ່ເຂົາເຈົ້າຖືວ່າແມ່ນດີສຸດເພື່ອນຳສະເໜີ ແລະ ກໍແມ່ນສິ່ງທີ່ຫວຽດນາມໄດ້ຮັບຜົນປະໂຫຍດ. ພວກເຮົາທັງເກັບກຳໄດ້ຄວາມຮູ້ດ້ານວິທະຍາສາດ, ທັງຍົກສູງຄວາມຮັບຮູ້, ທັງຖອດຖອນບົດຮຽນກ່ຽວກັບວິທີການຄົ້ນຄ້ວາກໍຄືພັດທະນາສາຍພົວພັນກັບບັນດານັກຄົ້ນຄ້ວາ ຫວຽດນາມ ວິທະຍາໃນທົ່ວໂລກ.”
ຕາມທຳນຽມແລ້ວ, ໝາກຜົນຂອງກອງປະຊຸມສຳມະນາສາກົນຫວຽດນາມວິທະຍາ ໄດ້ຮັບການຮວບຮ່ວມເປັນບັນດາບົດລາຍງານໃຫ້ຄຳປຶກສານະໂຍບາຍໃຫ້ແກ່ລັດຖະບານ ແລະ ບັນດາກະຊວງ, ຂະແຫນງການ, ປະກອບສ່ວນຢ່າງແທດຈິງເຂົ້າໃນການວາງບັນດານະໂຍບາຍພັດທະນາແຫ່ງຊາດ. ຜ່ານການແລກປ່ຽນ ແລະ ເຊື່ອມຕໍ່ຢູ່ກອງປະຊຸມສຳມະນາ, ຄະນະຈັດຕັ້ງ ຍັງນຳສະເຫນີບັນດາມາດຕະການເພື່ອສ້າງຕັ້ງ, ສ້າງ ແລະ ພັດທະນາສູນຂໍ້ມູນເອກະສານຄົ້ນຄ້ວາກ່ຽວກັບຫວຽດນາມ ແລະ ສະເຫນີ ສ້າງຊຸດປື້ມປະຫວັດສາດ ຫວຽດນາມ.