ເຫດບຸກໂຈມຕີດ້ວຍລົດຂົນສົ່ງເກີດຂຶ້ນກົງກັບວັນຊາດຝລັ່ງ ໄດ້ເຮັດໃຫ້ 100 ກວ່າຄົນຖືກຮັບບາດເຈັບ ແລະ ເສຍຊີວິດ, ໃນນັ້ນ ຕາມຕົວເລກສະຖິຕິເບື້ອງຕົ້ນ, ຢ່າງໜ້ອຍສຸດກໍ່ມີ 80 ຄົນເສຍຊີວິດ. ໃນລົດຂົນສົ່ງທີ່ໄດ້ກໍ່ໃຫ້ເກີດເຫດດັ່ງກ່າວ, ກຳລັງທີ່ກ່ຽວຂ້ອງໄດ້ຊອກເຫັນໜັງສືສ່ວນຕົວຂອງພົນລະເມືອງຝລັ່ງ ເຊື້ອຊາດ Tunisia.
ເຫດບຸກໂຈມຕີເກີດຂຶ້ນພາຍຫຼັງທີ່ຝລັ່ງ ຖະແຫຼງຈະບໍ່ຕໍ່ກຳນົດເວລາສະພາວະສຸກເສີນພາຍຫຼັງວັນທີ 26/07 ພຽງ 2 – 3 ຊົ່ວໂມງ, ເຊິ່ງໄດ້ຮັບການປະກາດນັບແຕ່ພາຍຫຼັງເຫດບຸກໂຈມຕີກໍ່ການຮ້າຍເມື່ອເດືອນ 11/2015.
ບໍ່ມີມາດຕະການແກ້ໄຂໃໝ່ຫຼາຍຢ່າງໃນການຮັບປະກັນຄວາມສະຫງົບປອດໄພ
ພາຍຫຼັງເກີດເຫດການ, ນະຄອນ Nice, ທາງພາກໃຕ້ ຝຣັ່ງ ຖືກຈັດວາງໃນສະພາບເຕືອນໄພສູງສຸດໃນລະບົບກ່າວເຕືອນຄວາມສະຫງົບປອດໄພຂອງປະເທດນີ້. ບັນດາພົນທະຫານສຳຮອງໄດ້ຮັບການຜັນຂະຫຍາຍ. ໃນຂະນະນັ້ນ, ກ່າວຄຳເຫັນທາງໂທລະພາບແຫ່ງຊາດ ພາຍຫຼັງກອງປະຊຸມດ່ວນຂອງລັດຖະບານ, ທ່ານປະທານາທິບໍດີ Francois Hollade ຢືນຢັນວ່າ ເຫດການບຸກໂຈມຕີທີ່ຮ້າຍແຮງໃນຄ່ຳຄືນວັນທີ 14/07 ຢູ່ Nice, ພາກໃຕ້ຝລັ່ງ ແມ່ນການກະທຳກໍ່ການຮ້າຍຢ່າງຈະແຈ້ງ. ຜູ້ນຳປະເທດຝລັ່ງໄດ້ກ່າວເຕືອນ “ທົ່ວປະເທດຝລັ່ງ ພວມຖືກຈັດວາງໃນສະພາບຄວາມນາບຂູ່ຈາກລັດທິກໍ່ການຮ້າຍ ອິດສະລາມ” ແລະ ຖະແຫຼງວ່າຈະສືບຕໍ່ຮັກສາພົນທະຫານ 10.000 ຄົນເຂົ້າຮ່ວມລາຍການຕ້ານການກໍ່ການຮ້າຍຂອງກອງທັບ, ແທນທີ່ຈະຫຼຸດລົງເຫຼືອພຽງ 7.000 ຄົນຄືໄດ້ແຈ້ງກ່ອນນັ້ນ. ທ່ານ Francois Hollade ກໍຢືນຢັນວ່າ, ຈະຕໍ່ກຳນົດເວລາປະກາດສະພາບສຸກເສີນໃນທົ່ວປະເທດຝລັ່ງ ຕື່ມອີກ 3 ເດືອນ, ຍ້ອນສະພາບການມີການປ່ຽນແປງ. ໃນສະພາບກຳລັງລັດອິດສະລາມ (IS) ອ້າງຊື່ເອງ ບໍ່ທັນກ່າວຮັບຜິດຊອບຕໍ່ເຫດການບຸກໂຈມຕີຢູ່ Nice, ແຕ່ທ່ານປະທານາທິບໍດີ Francois Hollade ຍັງຊີ້ແຈ້ງວ່າ, ປະເທດຝລັ່ງ ຈະເພີ່ມທະວີເຂົ້າຮ່ວມການເຄື່ອນໄຫວຕ້ານ IS ຢູ່ອີຣັກ ແລະ ຊີຣີ.
ບັນດາມາດຕະການປ້ອງກັນຄວາມສະຫງົບເຊິ່ງວົງການເຈົ້າໜ້າທີ່ຝລັ່ງ ຫາກໍ່ຍົກອອກມາ ເບິ່ງຄືວ່າບໍ່ມີຈຸດໃໝ່ຫຼາຍ ຍ້ອນວ່າໃນຕະຫຼອດໄລຍະຜ່ານມາ, ການຮັບປະກັນຄວາມສະຫງົບປອດໄພ ຍາມໃດກໍແມ່ນບັນຫາເຊິ່ງຝລັ່ງ ເອົາໃຈໃສ່. ກ່ອນນີ້, ພາຍຫຼັງເກີດບັນດາເຫດບຸກໂຈມຕີກໍ່ການຮ້າຍເມື່ອເດືອນ 11/2015, ທ່ານປະທານາທິບໍດີ Francois Hollade ກໍ່ຖະແຫຼງວ່າ ປະເທດຝລັ່ງ ຈະເດັດດ່ຽວຕໍ່ສູ້ຕ້ານ IS, ຝລັ່ງ ກໍໄດ້ປັບປຸງລັດຖະທຳມະນູນ ເພື່ອສາມາດແກ່ຍາວເວລາຂອງສະພາວະສຸກເສີນແຫ່ງຊາດ ຕື່ມອີກເປັນ 3 ເດືອນ ເມື່ອທຽບໃສ່ຂໍ້ກຳນົດເກົ່າແມ່ນ 12 ວັນ, ອະນຸຍາດໃຫ້ປົດສິດເປັນພົນລະເມືອງຝລັ່ງ ສຳລັບ ຜູ້ມີ 2 ສັນຊາດ ຖ້າຫາກຖືກຕັດສິນລົງໂທດກໍ່ການຮ້າຍ ແລະ ຈະຖືກຫ້າມເຂົ້າຝລັ່ງ ຖ້າມີໄພດຳເນີນການກະທຳກໍ່ການຮ້າຍ. ທ່ານປະທານາທິບໍດີ Francois Hollade ໃຫ້ຄຳໝັ້ນສັນຍາຈະເພີ່ມງົບປະມານໃຫ້ບັນດາກຳລັງປ້ອງກັນຄວາມສະຫງົບ ແລະ ກອງທັບປະເທດນີ້. ການຊອກຈັບບັນດາພາກສ່ວນກໍ່ການຮ້າຍເຊິ່ງກຳລັງປ້ອງກັນຄວາມສະຫງົບຝລັ່ງ ດຳເນີນນັບຮ້ອຍຄັ້ງໃນຕະຫຼອດໄລຍະຜ່ານມາດ້ວຍຈຸດປະສົງກວາດລ້າງ ແລະ ເຮັດໃຫ້ຄວາມຕັ້ງໃຈບຸກໂຈມຕີປະເທດຝລັ່ງ ບໍ່ວ່າຂອງຜູ້ໃດກໍ່ໄຮ້ສັກສິດ. ກ່ຽວກັບນະໂຍບາຍການຕ່າງປະເທດ, ຝລັ່ງ ໄດ້ເພີ່ມທະວີບັນດາການບຸກໂຈມຕີຢູ່ຊີຣີ, ເຊິ່ງແມ່ນແຫ່ງທີ່ບັນດາພາກສ່ວນກໍ່ການຮ້າຍໄດ້ກະກຽມແຜນການດຳເນີນບັນດາການຍິງປືນ ແລະ ວາງລະເບີດສະຫຼະຊີບຢູ່ປາຣີ ແລະ ຊານນະຄອນໃນວັນທີ 13/11. ທ່ານ Hollade ກໍຮຽກຮ້ອງບັນດາປະເທດເອີລົບ ຄວນສົມທົບກັນເຄື່ອນໄຫວ ພ້ອມກັບຝລັ່ງ ເພື່ອຍຸບເລີກບັນດາໄພນາບຂູ່ກໍ່ການຮ້າຍ.
ສາຍເຫນເລີກເຊິ່ງ
ເປັນຫຍັງແມ່ນຝລັ່ງ, ຫາກບໍ່ແມ່ນປະເທດອື່ນຢູ່ເອີລົບ ແມ່ນເປົ້າໝາຍຂອງບັນດາເຫດບຸກໂຈມຕີດ້ວຍຄວາມຕັ້ງໃຈໃນໄລຍະມໍ່ໆມານີ້. ວົງການນັກໄຈ້ແຍກຖືວ່າ ສາຍເຫດແມ່ນຍ້ອນຝລັ່ງ ຍາມໃດກໍ່ໄດ້ຮັບການຕີລາຄາ “ມີບົດບາດສຳຄັນ” ໃນການແກ້ໄຂບັນດາ “ຈຸດຮ້ອນ” ຢູ່ບັນດາປະເທດອາຟະລິກາ, ເຊິ່ງແມ່ນໜຶ່ງໃນບັນດາເຂດທີ່ມີພົນລະເມືອງຖືສາສະໜາອິດສະລາມ ເປັນຈຳນວນຫຼວງຫຼາຍ, ໂດຍສະເພາະແມ່ນເຂດອາຟະລິຫາເໜືອ, ຕິດກັບຕາເວັນອອກກາງ. ຍັງມີເຫດການໜຶ່ງອີກນັ້ນແມ່ນ, ນັບແຕ່ປີ 2014, ຝລັ່ງ ໄດ້ຕັ້ງໜ້າເຂົ້າຮ່ວມໃນສຳພັນທະມິດສາກົນຕ້ານ IS ແລະ ແມ່ນໜຶ່ງໃນບັນດາປະເທດທຳອິດເຂົ້າຮ່ວມການປະຕິບັດບັນດາບັ້ນຮົບທາງອາກາດເລັ່ງໃສ່ IS.
ດ້ານອື່ນ, ດ້ວຍບົດບາດສຳຄັນຢູ່ເອີລົບ ແລະ ໃນໂລກ, ຜົນສະທ້ອນຈາກຜົນສຳເລັດຂອງບັນດາການບຸກໂຈມຕີຢູ່ຝລັ່ງ ຈະມີຜົນປະໂຫຍດ “ຂະຫຍາຍອິດທິພົນ”. ວິທີບຸກໂຈມຕີໃສ່ບັນດາເປົ້າໝາຍພົນລະເມືອງກໍ່ເຮັດໃຫ້ບັນດາອົງການສືບລາຊະການລັບ ແລະ ອົງການປ້ອງກັນຄວາມສະຫງົບຝລັ່ງ ບໍ່ສາມາດຄິດໄລ່ ແລະ ຄາດຄະເນໝົດໄດ້. ນັ້ນແມ່ນຍັງບໍ່ທັນເວົ້າເຖິງເລື່ອງຢູ່ຝລັ່ງ, ຊາວອິດສະລາມ ທີ່ມີແນວຄວາມຄິດ “ຫົວຮຸນແຮງ” ຫຼາຍພໍສົມຄວນ. ເຂົ້າເຈົ້າສ່ວນຫຼາຍດຳລົງຊີວິດຢູ່ເຂດຊານນະຄອນ. ບັນດາຄວາມຫຍຸ້ງຍາກດ້ານເສດຖະກິດໃນຫຼາຍປີມໍ່ໆມານີ້ໄດ້ເຮັດໃຫ້ໄວໜຸ່ມອິດສະລາມສ່ວນໜຶ່ງ ຍາກທີ່ຈະຮັບມືກັບຊີວິດທຸກຍາກ ຖືກແກ່ດຶງເຂົ້າບັນດາການເຄື່ອນໄຫວຫົວຮຸນແຮງຢ່າງງ່າຍດ່າຍ.
ບັນດາເຫດບຸກໂຈມຕີກໍ່ການຮ້າຍຊີ້ໃຫ້ເຫັນວ່າ, ຄວາມສາມາດຄາດຄະເນຂອງກຳລັງປ້ອງກັນຄວາມສະຫງົບຝລັ່ງ ແມ່ນມີບັນຫາ. ນັ້ນກໍ່ແມ່ນສາຍເຫດ ພາໃຫ້ຄະນະກຳມະການສືບສວນສັງກັດລັດຖະສະພາຝລັ່ງ ຫາກໍ່ສະເໜີໂຮມລະບົບສືບລາຊະການລັບຝລັ່ງ ເຂົ້າອົງການໜຶ່ງດຽວ, ສຸດທ້າຍແມ່ນນະໂຍບາຍເຂົ້າເມືອງ ແລະ ນະໂຍບາຍໄປມາຢ່າງເສລີຂອງເອີລົບ (ໃນເຂດ Schenghen) ໄດ້ກໍ່ຄວາມຫຍຸ້ງຍາກໃຫ້ແກ່ການຮັບປະກັນຄວາມສະຫງົບປອດໄພພາຍໃນປະເທດ.
ເປັນທີ່ຈະແຈ້ງແລ້ວວ່າ, ໂດຍບໍ່ຫົວຊາຕໍ່ຄວາມມານະພະຍາຍາມບໍ່ແມ່ນນ້ອຍຂອງກຳລັງປ້ອງກັນຄວາມສະຫງົບຝລັ່ງ, ເຫດບຸກໂຈມຕີດ້ວຍຄວາມຕັ້ງໃຈ ໃນວັນທີ 14/07, ໄດ້ເຮັດໃຫ້ຝລັ່ງ ແລະ ໂລກສະເທືອນໃຈອີກຄັ້ງໜຶ່ງ. ສິ່ງດັ່ງກ່າວຮຽກຮ້ອງໃຫ້ຝລັ່ງ ເວົ້າສະເພາະ ແລະ ຫຼາຍປະເທດອື່ນຕ້ອງຊອກຫາມາດຕະການແກ້ໄຂຢ່າງສິ້ນເຊິງບັນດາສາຍເຫດທີ່ກໍ່ໃຫ້ເກີດບັນດາເຫດບຸກໂຕມຕີ ຖ້າຫາກຢາກສະກັດກັ້ນບັນດາໄພນາບຂູູ່ບຸກໂຈມຕີຄັ້ງຕໍ່ໄປ.