(vovworld) -
ວັນທີ 10/4, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນນິດ ຫວຽດນາມ ຫງວຽນຟຸຈ້ອງ ດຳເນີນບັນດາການເຄື່ອນໄຫວສຸດທ້າຍໃນການຢ້ຽມຢາມປະເທດ ສປ. ຈີນ ຢ່າງເປັນທາງການໃນລະຫວ່າງວັນທີ 7-10/4/2015, ຕາມຄຳເຊີນຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ, ປະທານປະເທດຈີນ ສີຈິ້ນຜິງ. ໝາກຜົນການຢ້ຽມຢາມຄັ້ງນີ້ປະກອບສ່ວນສຳຄັນຊຸກຍູ້ການພົວພັນລະຫວ່າງ 2 ປະເທດພັດທະນາຢ່າງປອດໄສ ແລະ ໝັ້ນຄົງ. ບັນນາທິການ ທູຮວາ ມີບົດຂຽນທີ່ພາດຫົວຂໍ້ວ່າ: “ຊຸກຍູ້ການພົວພັນ ຫວຽດນາມ-ຈີນ ພັດທະນາ”.
 |
ໃນຂອບເຂດການຢ້ຽມຢາມສປ.ຈີນ ຢ່າງເປັນທາງການ, ທ່ານເລຂາທິການໃຫຍ່ ຫງວຽນຟຸຈ້ອງ ໄດ້ມີການເຈລະຈາກັບທ່ານເລຂາທິການໃຫຍ່, ປະທານປະເທດຈີນ ສີຈິ້ນຜິງ, ພົບປະເຈລະຈາກັບທ່ານ ຫລີເຄີຊຽງ, ກຳມະການກົມການເມືອງສູນກາງພັກກອມມູນິດຈີນ, ນາຍົກລັດຖະມົນຕີຈີນ ແລະ ທ່ານ ຈຽງຕີຈາງ, ຫົວຫນ້າກຳມະການ ຄະນະກຳມະການປະຈຳສະພາຜູ້ແທນປະຊາຊົນແຫ່ງຊາດຈີນ ອີເຈິ້ງເຊີງ, ປະທານສະພາປຶກສາການເມືອງປະຊາຊົນແຫ່ງຊາດຈີນ . ສອງຝ່າຍແລກປ່ຽນຄຳເຫັນ ແລະ ບັນລຸ້ຄວາມຮັບຮູ້ລວມຢ່າງກ້ວາງຂວາງ ກ່ຽວກັບການເພີ່ມທະວີການພົວພັນ ລະຫວ່າງ 2 ພັກ, 2 ລັດ ແລະ ເຫັນດີນຳກັນໂດຍຖືວ່າ ການຢ້ຽມຢາມປະສົບຜົນສຳເລັດຢ່າງຈົບງາມ, ປະກອບສ່ວນສຳຄັນໃນການຊຸກຍູ້ການພົວພັນລະຫວ່າງ ຫວຽດນາມ ແລະ ຈີນ ພັດທະນາເປັນປົກກະຕິ ແລະ ປອດໄສ.
ພັດທະນາການພົວພັນຄູ່ຮ່ວມມືຍຸດທະສາດຮອບດ້ານຢ່າງບໍ່ຢຸດຢັ້ງ
ທີ່ການເຈລະຈາ, ພົບປະຄັ້ງຕ່າງໆ, ທ່ານເລຂາທິການໃຫຍ່ ຫງວຽນຟູຈ້ອງ ແລະ ບັນດາການນຳຈີນ ພ້ອມກັນເນັ້ນຫນັກວ່າ: ຫວຽດນາມ ແລະ ຈີນ ຈະສືບຕໍ່ຢືດໝັ້ນຄວາມມານະພະຍາຍາມປະຕິບັດທິດນຳ “ບ້ານໃກ້ເຮືອນຄຽງມິດຕະພາບ, ການຮ່ວມມືຮອບດ້ານ, ສະຖຽນລະພາບຍາວນານ, ມຸ່ງໄປເຖິງອະນາຄົດ” ແລະ ນ້ຳໃຈ “ບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ເພື່ອນສະຫາຍທີ່ດີ, ຄູ່ຮ່ວມມືທີ່ດີ”, ກຳແຫນ້ນທິດທາງພັດທະນາຂອງການພົວພັນ ຫວຽດນາມ - ຈີນ, ຊຸກຍູ້ການພົວພັນຄູ່ຮ່ວມມື ການຮ່ວມມືຍຸດທະສາດຮອບດ້ານ ຫວຽດນາມ - ຈີນ ພັດທະນາຢ່າງບໍ່ຢຸດຢັ້ງໃນອະນາຄົດ. ສອງຝ່າຍ ເຫັນດີ ສືບຕໍ່ຮັກສາມູນເຊື້ອອັນດີງາມຂອງການພົບປະຂັ້ນສູງລະຫວ່າງສອງພັກ, ສອງລັດ ດ້ວຍຫລາຍຮູບການ, ແລກປ່ຽນຄຳເຫັນກ່ຽວກັບສະພາບການສາກົນ, ພາກພື້ນ ແລະ ບັນດາບັນຫາສຳຄັນໃນການພົວພັນສອງຝ່າຍຢ່າງທັນການ, ແລກປ່ຽນບັນຫາຍຸດທະສາດຢ່າງເລິກເຊິ່ງ, ປັບປຸງຄວາມໄວ້ເນື້ອເຊື່ອໃຈດ້ານການເມືອງ, ເພີ່ມທະວີການຊີ້ນຳນຳພາ ສຳລັບການພັດທະນາການພົວພັນ ຫວຽດນາມ - ຈີນ. ປະຕິບັດ “ໂຄງການດຳເນີນງານຜັນຂະຫຍາຍການພົວພັນຄູ່ຮ່ວມມື ການຮ່ວມມືຍຸດທະສາດຮອບດ້ານ ຫວຽດນາມ - ຈີນ, ສອງຝ່າຍພ້ອມກັນຊຸກຍູ້ການຮ່ວມມືຢ່າງແທດຈິງໃນທຸກຂົງເຂດລະຫວ່າງສອງປະເທດ. ສອງຝ່າຍຕັ້ງຫນ້າຊຸກຍູ້ການພົບປະແລກປ່ຽນການຮ່ວມມືມິດຕະພາບລະຫວ່າງສະພາແຫ່ງຊາດຫວຽດນາມ ກັບສະພາຜູ້ແທນປະຊາຊົນແຫ່ງຊາດຈີນ, ລະຫວ່າງແນວໂຮມປະເທດຊາດຫວຽດນາມ ກັບສະພາປຶກສາການເມືອງປະຊາຊົນແຫ່ງຊາດຈີນ.
ຊຸກຍູ້ການຮ່ວມມືດ້ານເສດຖະກິດສອງຝ່າຍ
ທ່ານເລຂາທິການໃຫຍ່ ຫງວຽນຟູຈ້ອງ ແລະ ບັນດາການນຳຈີນ ໄດ້ມີຄຳໝັ້ນສັນຍາຊຸກຍູ້ການປະຕິບັດ “ແຜນກຳນົດພັດທະນາໄລຍະ 5 ປີ ແຫ່ງການຮ່ວມມືທາງດ້ານເສດຖະກິດ ການຄ້າ ຫວຽດນາມ - ຈີນ ໄລຍະ 2012-2016” ເປັນຢ່າງດີ, ຊຸກຍູ້ການປະຕິບັດບັນຊີລາຍຊື່ ບັນດາໂຄງການຮ່ວມມືຈຸດສຸມ ແລະ ບັນດາຂໍ້ຕົກລົງການຮ່ວມມືທາງດ້ານເສດຖະກິດການຄ້າ ຊື່ງສອງຝ່າຍໄດ້ລົງນາມ. ກ່ຽວກັບການຊຸກຍູ້ດ້ານການຄ້າສອງຝ່າຍໃຫ້ເຕີບໂຕເປັນປົກກະຕິ, ດຸ່ນດ່ຽງ, ໝັ້ນຄົງ, ສອງຝ່າຍ ຕັ້ງຫນ້າຄົ້ນຄ້ວາການເຈລະຈາ, ລົງນາມໃນສັນຍາປັບປຸງກ່ຽວກັບການຄ້າຊາຍແດນ ຫວຽດນາມ - ຈີນ, ປຶກສາຫາລື ແລະ ກຳນົດທິດທາງສັງລວມກ່ຽວກັບການກໍ່ສ້າງເຂດຮ່ວມມືເສດຖະກິດຜ່ານຊາຍແດນໂດຍໄວ, ຊຸກຍູ້ບັນດາໂຄງການເຊື່ອມຕໍ່ພື້ນຖານໂຄງລ່າງ. ກ່ຽວກັບການຊຸກຍູ້ການຮ່ວມມືໃນບັນດາຂະແຫນງກະສິກຳ, ປະດິດສ້າງ, ບໍລິການ ແລະຂົງເຂດເຕັກໂນໂລຊີ, ສາທາລະນະສຸກ, ກວດກາໂລກລະບາດ, ຝ່າຍຈີນ ສະຫນັບສະຫນູນ ວິສາຫະກິດຈີນ ເຂົ້າມາລົງທຶນພັດທະນາຢູ່ຫວຽດນາມ ແລະ ພ້ອມແລ້ວທີ່ຈະສ້າງເງື່ອນໄຂກວ່າອີກໃຫ້ແກ່ບັນດາວິສາຫະກິດ ຫວຽດນາມ ເຂົ້າມາຂຸດຄົ້ນເປີດກວ້າງຕະຫລາດຢູ່ຈີນ, ຝ່າຍ ຫວຽດນາມ ຈະສ້າງເງື່ອນໄຂສະດວກໃຫ້ແກ່ວິສາຫະກິດຈີນ ມາລົງທຶນດຳເນີນທຸກລະກິດຢູ່ຫວຽດນາມ. ສອງຝ່າຍອອກຖະແຫລງການສ້າງຕັ້ງຫນ່ວຍປະຕິບັດງານຮ່ວມມືກ່ຽວກັບພື້ນຖານໂຄງລ່າງ ແລະ ຫນ່ວຍປະຕິບັດງານກ່ຽວກັບການຮ່ວມມືເງິນຕາຢ່າງເປັນທາງການ, ເຫັນດີເພີ່ມທະວີການບໍລິຫານ, ການປະສານສົມທົບລະຫວ່າງບັນດາຫນ່ວຍດັ່ງກ່າວ ແລະ ຫນ່ວຍປະຕິບັດງານປຶກສາຫາລືກ່ຽວກັບການຮ່ວມມືພ້ອມກັນພັດທະນາບົນທະເລ, ພ້ອມກັນຊຸກຍູ້ການຮ່ວມມືໃນບັນດາຂົງເຂດພັດທະນາຮອບດ້ານ.
ເພີ່ມທະວີການພົວພັນແລກປ່ຽນ,ຮ່ວມມືໃນບັນດາຂົງເຂດອື່ນໆ
ໃນການຢ້ຽມຢາມ ສປ. ຈີນ ຢ່າງເປັນທາງການ, ທ່ານເລຂາທິການໃຫຍ່ ຫງວຽນຟູ໋ຈ້ອງ ແລະ ບັນດາການນຳ ຈີນ ໄດ້ເຫັນດີເປັນເອກະສັນນຳກັນສືບຕໍ່ຈັດຕັ້ງການທາບທາມຄວາມເຫັນທາງດ້ານການທູດປະຈຳປີເປັນຢ່າງດີ, ເປີດກ້ວາງການພົວພັນຮ່ວມມືລະຫວ່າງກະຊວງການຕ່າງປະເທດ ຫວຽດນາມ ແລະ ຈີນ. 2 ຝ່າຍກໍ່ຮັກສາການພົບປະຂັ້ນສູງລະຫວ່າງກອງທັບ 2 ປະເທດ ແລະ ເຈລະຈາທາງດ້ານການປ້ອງກັນຊາດ, ປ້ອງກັນຄວາມສະຫງົບ, ເປີດກ້ວາງການຮ່ວມມືມິດຕະພາບລະຫວ່າງ 2 ຝ່າຍໃນຂົງເຂດສື່ມວນຊົນ, ວັດທະນະທຳ, ການສຶກສາ, ການທ່ອງທ່ຽວ, ສືບຕໍ່ຈັດຕັ້ງບັນດາການເຄື່ອນໄຫວພົວພັນແລກປ່ຽນປະຊາຊົນເປັນຢ່າງດີ, ຕັ້ງໜ້າຊຸກຍູ້ວຽກງານສ້າງຕັ້ງສູນວັດທະນະທຳຢູ່ແຕ່ລະປະເທດ. 2ຝ່າຍຢັ້ງຢືນສືບຕໍ່ເສີມຂະຫຍາຍບົດບາດຂອງຄະນະກຳມະການລະຫວ່າງຊາຍແດນທາງບົກ ຫວຽດນາມ - ຈີນ ເປັນຢ່າງດີ, ປະຕິບັດບັນດາເອກະສານກ່ຽວກັບຊາຍແດນທາງບົກລະຫວ່າງ 2 ປະເທດເປັນຢ່າງດີ; ເຊັນ “ສັນຍາຮ່ວມມືປົກປັກຮັກສາ ແລະ ຂຸດຄົ້ນແຫຼ່ງຊັບພະຍາກອນທ່ອງທ່ຽວຢູ່ທາດບບ້ານຢົກ” ແລະ “ສັນຍາກ່ຽວກັບກົດລະບຽບເຮືອ ແລະ ກ່ຳປັນໄປມາຢ່າງເສລີຢູ່ເຂດປາກແມ່ນ້ຳ ໄຜຫຼວນ” ໂດຍໄວ, ພ້ອມກັນຮັກສາສະຖຽນລະພາບ ແລະ ການພັດທະນາຂອງເຂດຊາຍແດນ. 2 ຝ່າຍເນັ້ນໜັກການປະຕິບັດ “ຂໍ້ຕົກລົງກ່ຽວກັບບັນດາຫຼັກການພື້ນຖານຊີ້ນຳແກ້ໄຂບັນຫາບົນທະເລ ຫວຽດນາມ - ຈີນ” ຢ່າງເຂັ້ມງວດ, ນຳໃຊ້ກົນໄກປຶກສາຫາລືຂັ້ນລັດຖະບານກ່ຽວກັບເຂດຊາຍແດນ ຫວຽດນາມ - ຈີນ ເປັນຢ່າງດີ, ເດັດດຽວຜ່ານການເຈລະຈາມິດຕະພາບເພື່ອຊອກຫາມາດຕະການພື້ນຖານ ແລະ ຍາວນານເຊິ່ງ 2 ຝ່າຍລ້ວນແຕ່ສາມາດຮັບຮູ້ໄດ້. 2 ຝ່າຍເຫັນດີເປັນເອກະສັນພ້ອມກັນຄວບຄຸມຄວາມບໍ່ລົງລອຍກັນຢູ່ທະເລເປັນຢ່າງດີ, ປະຕິບັດຖະແຫຼງການກ່ຽວກັບການປະພຶດຕໍ່ຂອງຝ່າຍຕ່າງໆຢູ່ທະເລຕາເວັນອອກ (DOC) ເປັນຢ່າງດີ ແລະ ບັນລຸໄດ້ປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC) ບົນພື້ນຖານປຶກສາຫາລືເປັນເອກະພາບ, ບໍ່ມີການກະທຳເຮັດໃຫ້ສະພາບການສັບສົນຂຶ້ນຕື່ມ, ເປີດກ້ວາງການຂັດແຍ້ງ, ແກ້ໄຂຢ່າງທັນການ, ສົມເຫດສົມຜົນບັນຫາເກີດຂຶ້ນ, ຮັກສາການພົວພັນ ຫວຽດນາມ - ຈີນ ແລະ ສັນຕິພາບ, ສະຖຽນລະພາບຢູ່ທະເລຕາເວັນອອກ.
ໃນການຢ້ຽມຢາມຄັ້ງນີ້, ຫວຽດນາມ ແລະ ຈີນ ໄດ້ລົງນາມໃນເອກະສານຮ່ວມມືຫຼາຍສະບັບໃນບັນດາຂົງເຂດເພື່ອເປັນພື້ນຖານໃຫ້ແກ່ການຊຸກຍູ້ການພົວພັນຖານບ້ານໃກ້ເຮືອນຄຽງໃຫ້ພັດທະນາຢ່າງປອດໄສ ແລະ ມີສະຖຽນລະພາບໃນອະນາຄົດ.