(vovworld)-- ວັນທີ 5/9, ທ່ານປະທານສະພາແຫ່ງຊາດ ມຽນມາ Thura U Shwe Mann ເລີ່ມຕົ້ນການຢ້ຽມຢາມຫວຽດນາມຢ່າງເປັນທາງການ ຕາມຄຳເຊີນຂອງປະທານສະພາແຫ່ງຊາດ ຫວຽດນາມ ຫງວຽນຊີງຮຸ່ງ. ຕໍ່ຈາກການເຄື່ອນໄຫວແລກປ່ຽນຄະນະຜູ້ແທນສອງຝ່າຍຕ່າງໆ ກໍຄືໃນຂອບເຂດ ອາຊຽນ ໃນໄລຍະຜ່ານມາ, ການຢ້ຽມຢາມ ຫວຽດນາມ ຄັ້ງນີ້ ຂອງປະທານສະພາແຫ່ງຊາດ ມຽນມາ Thura U Shwe Mann ເປັນຂີດໝາຍສຳຄັນ ເພື່ອສ້າງກົນໄກສົມທົບກັນລະຫວ່າງສະພາແຫ່ງຊາດສອງປະເທດ, ສ້າງເງື່ອນໄຂສະດວກນຳການພົວພັນລະຫວ່າງສອງປະເທດນັບມື້ນັບພັດທະນາຢ່າງມີປະສິດທິຜົນ.
ປະທານສະພາແຫ່ງຊາດ ມຽນມາ Thura U Shwe Mann
|
ຫວຽດນາມ ແລະ ມຽນມາ ໄດ້ສ້າງຕັ້ງສາຍພົວພັນທາງການທູດ ແຕ່ເດືອນ 5/1975, ແລະ ປີ 2015 ສອງປະເທດຈະສະເຫລີມສະຫລອງ 4 ທົດສະວັດແຫ່ງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດ. ໃນຊຸມປີຜ່ານມາ, ສອງປະເທດ ຕັ້ງຫນ້າປັບປຸງ ແລະ ຊຸກຍູ້ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫລາຍດ້ານ. ການຢ້ຽມຢາມຂອງຄະນະຜູ້ແທນຂັ້ນສູງກໍ່ໄດ້ຮັບການປະຕິບັດ ຫລາຍຄັ້ງ ຄື: ການຢ້ຽມຢາມ ມຽນມາ ຂອງທ່ານນາຍົກລັດຖະມົນຕີ ຫງວຽນເຕີນຢູງ (4/2010), ການຢ້ຽມຢາມ ຫວຽດນາມ ຂອງປະທານາທິບໍດີ ມຽນມາ Thein Sein ເດືອນ 3/2012 ແລະ ການຢ້ຽມຢາມ ຫວຽດນາມ ຂອງປະທານສະພາແຫ່ງຊາດ ມຽນມາ Khin Aung Myint ເມ່ືອເດືອນ 6/2012, ການຢ້ຽມຢາມ ມຽນມາ ຂອງທ່ານປະທານສະພາແຫ່ງຊາດຫວຽດນາມຫງວຽນຊີງຮຸ່ງ ເມື່ອເດືອນ 7/2013. ສອງຝ່າຍ ກໍໄດ້ດຳເນີນກອງປະຊຸມທາບທາມຄຳເຫັນດ້ານການເມືອງ 2 ຄັ້ງເປັນປະຈຳລະຫວ່າງ 2 ກະຊວງ ການຕ່າງປະເທດ.
ບັນດາເງື່ອນໄຂສະດວກເພື່ອເພີ່ມທະວີການຮ່ວມມືສອງຝ່າຍ
ເລື່ອງສະພາແຫ່ງຊາດ ມຽນມາ ຫາກໍ່ໄດ້ຮັບການເລືອກຕັ້ງຄືນໃຫມ່ ພາຍຫລັງ 20 ປີ ແລະ ພິເສດ, ລັດຖະບານ ມຽນມາ ໂດຍປະທານາທິບໍດີ Thein Sein ນຳຫນ້າ ພວມມີບາດກ້າວຕັ້ງຫນ້າໃນນະໂຍບາຍພາຍໃນ ແລະ ຕ່າງປະເທດ, ຍູ້ແຮງວິວັດການປະຊາທິປະໄຕ ແລະ ເຊື່ອມໂຍງ, ແມ່ນບັນດາເງ່ືອນໄຂສະດວກທີ່ສຸດ ເພື່ອໃຫ້ຫວຽດນາມ ແລະ ມຽນມາ ເພີ່ມທະວີການຮ່ວມມື.
ໃນການຢ້ຽມຢາມ ມຽນມາ ເມື່ອເດືອນ 7/2013, ທ່ານປະທານສະພາແຫ່ງຊາດຫວຽດນາມ ຫງວຽນຊີງຮຸ່ງ ແລະ ອະດີດປະທານສະພາແຫ່ງຊາດ ມຽນມາ Khin Aung Myint ໄດ້ລົງນາມໃນຂໍ້ຕົກລົງຮ່ວມມືຄັ້ງທຳອິດ ລະຫວ່າງສະພາແຫ່ງຊາດສອງປະເທດ, ສ້າງກອບກົດໝາຍສຳຄັນເພື່ອຜັນຂະຫຍາຍບັນດາການເຄື່ອນໄຫວຮ່ວມມືສອງຝ່າຍລະຫວ່າງ 2 ຝ່າຍ. ຕາມນັ້ນແລ້ວ, ສອງຝ່າຍເຫັນດີເພີ່ມທະວີການແລກປ່ຽນບົດຮຽນນິຕິບັນຍັດ, ຕິດຕາມກວດກາ ແລະ ບັນດາບັນຫາກ່ຽວຂ້ອງເຖິງການເຄື່ອນໄຫວຂອງສະພາແຫ່ງຊາດ, ຊຸກຍູ້ ແລະ ຕິດຕາມກວດກາການປະຕິບັດບັນດາສັນຍາ,ຂໍ້ຕົກລົງລະຫວ່າງລັດຖະບານສອງປະເທດ. ກຸ່ມສະມາຊິກສະພາແຫ່ງຊາດມິດຕະພາບ ຫວຽດນາມ -ມຽນມາ ແລະ ມຽນມາ -ຫວຽດນາມ ຫາກໍ່ໄດ້ຮັບການສ້າງຕັ້ງຂຶ້ນ ແມ່ນຂົວເຊື່ອມຕໍ່ໃຫ້ແກ່ສາຍພົວພັນຮ່ວມມືອັນດີງາມນີ.
ສູ້ຊົນຍົກວົງເງິນແລກປ່ຽນການຄ້າສອງສົ້ນ
ຄວາມຈິງແລ້ວ, ການພົວພັນທາງດ້ານເສດຖະກິດ, ການຄ້າ, ການລົງທຶນລະຫວ່າງຫວຽດນາມ ແລະ ມຽນມາ ພັດທະນາບໍ່ທັນສົມກັບຄວາມສາມາດບົ່ມຊ້ອນຂອງ 2 ປະເທດ. ສະນັ້ນ ຫນ້າທີ່ຈຸດສຸມໃນໄລຍະປະຈຸບັນ ຊື່ງການນຳສອງປະເທດໄດ້ວາງອອກ ແມ່ນເຮັດແນວໃດຍົກວົງເງິນການຄ້າສອງສົ້ນ ຫວຽດນາມ - ມຽນມາ ຂຶ້ນເຖິງ 1 ຕື້ USD ໃນປີ 2015 ແລະ 2,5 ຕື້ USD ໃນປີ 2020. ຫວຽດນາມ ແລະ ມຽນມາ ມີຫລາຍມາດຕະການເພື່ອຊຸກຍູ້ການຮ່ວມມືໃນບັນດາຂົງເຂດກະສິກຳ ປ່າໄມ້, ລ້ຽງປູກສິນໃນນ້ຳ, ຄົມມະນາຄົມຂົນສົ່ງ ແລະ ພະລັງງານ ເພື່ອເບິ່ງແຍງສຸຂະພາບ ແລະ ວັດທະນະທຳ. ໂດຍລະອຽດ ແມ່ນຫວຽດນາມ ແລະ ມຽນມາ ພວມຊຸກຍູ້ການຮ່ວມມືແຮກສ່ຽວລະຫວ່າງບັນດາແຂວງ, ນະຄອນສອງປະເທດ ເພື່ອຍູ້ແຮງການຮ່ວມມືດ້ານເສດຖະກິດ ລະຫວ່າງບັນດາທ້ອງຖິ່ນໃນບັນດາຂົງເຂດຊື່ງແຕ່ລະຝ່າຍມີທ່າໄດ້ປຽບ. ພົ້ນເດັ່ນຄື: ແຂວງ ບ່າເຣ້ຍ ຫວູງເຕົາ ພວມຊຸກຍູ້ການຮ່ວມມືແຮກສ່ຽວກັບລັດ Tauiathayi ກ່ຽວກັນການຫາສິນທະເລ, ລ້ຽງ, ປູກ ແລະ ປຸງແຕ່ງສິນທະເລ. ແຂວງ ອານຢາງ ພວມຊຸກຍູ້ການຮ່ວມມືແຮກສ່ຽວກັບລັດ Ayeyarwaddy ກ່ຽວກັບການ ປູກເຂົ້ານາທາມ, ລ້ຽງ ແລະ ປຸງແຕ່ງສິນໃນນ້ຳ. ນອກນັ້ນ, ນະຄອນ ໂຮ່ຈິມີນ ແລະ Yangoon ໄດ້ລົງນາມໃນບົດບັນທຶກຊ່ວຍຈຳ ກ່ຽວກັບການສ້າງຕັ້ງສາຍພົວພັນມິດຕະພາບ ການຮ່ວມມືລະຫວ່າງ 2 ນະຄອນ. ຄຽງຄູ່ກັນນັ້ນ ສອງຝ່າຍ ກໍໄດ້ຈັດຕັ້ງງານຕະຫລາດນັດການຄ້າປະຈຳປີ ເພື່ອແນະນຳຜະລິດຕະພັນ ແລະ ດຶງດູດບັນດາວິສາຫະກິດລົງທຶນ. ທ່ານ ຟ້າມກວາງວີງ, ລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ໄດ້ໃຫ້ຂໍ້ສັງເກດວ່າ:
“ໃນຊຸມປີຜ່ານມາ, ເຖິງວ່າ ຫວຽດນາມ ແລະ ມຽນມາ ໄດ້ສ້າງບັນດາຂອບເຂດການຮ່ວມມື ແລະ ພື້ນຖານການຮ່ວມມືໃນທຸກຂົງເຂດເສດຖະກິດ, ການຄ້າຕະຫລອດຮອດການເມືອງ, ການຕ່າງປະເທດ, ການປ້ອງກັນຊາດປ້ອງກັນຄວາມສະຫງົບ. ພວກເຮົາພວມຕັ້ງຫນ້າເສີມຂະຫຍາຍບັນດາຂອບເຂດຮ່ວມມືດັ່ງກ່າວກວ່າອີກ.”
ສົມທົບກັນຢ່າງຕັ້ງຫນ້າໃນກົນໄກຮ່ວມມືອາຊຽນ ແລະ ບັນດາເວທີປາໄສພາກພື້ນ, ສາກົນ
ໂດຍເປັນສະມາຊິກຂອງ ອາຊຽນ, ມຽນມາ ແລະ ຫວຽດນາມ ລ້ວນແຕ່ພວມຕັ້ງຫນ້າສົມທົບກັນຢ່າງແຫນ້ນແຟ້ນ ຢູ່ ບັນດາເວທີປາໄສພາກພື້ນ, ກໍຄື ບັນດາກົນໄກອື່ນຄື: ອະນຸພາກພື້ນແມ່ນ້ຳຂອງ (GMS) ແລະ ກົນໄກຮ່ວມມືລະຫວ່າງ ກຳປູເຈຍ, ລາວ, ມຽນມາ - ຫວຽດນາມ (CLMV). ປີ 2014, ມຽນມາ ພວມດຳລົງຕຳແຫນ່ງເປັນປະທານ ອາຊຽນ, ຫວຽດນາມ ພ້ອມກັບບັນດາປະເທດສະມາຊິກອື່ນ ຕັ້ງຫນ້າພ້ອມກັບ ມຽນມາ ສຳເລັດບົດບາດຂອງຕົນ, ນຳອາຊຽນ ຫັນໄປສູ່ໄລຍະພັດທະນາໃຫມ່. ທ່ານ ຟ້າມບີງມີງ, ຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດຫວຽດນາມ ໃຫ້ຮູ້ວ່າ:
“ພວກເຮົາຢືນຢັນການສະຫນັບສະຫນູນ ແລະ ຕັ້ງຫນ້າສົມທົບຢ່າງແຫນ້ນແຟ້ນກັບ ມຽນມາ ເພື່ອສຳເລັດພາລະບົດບາດເປັນປະທານ ອາຊຽນ ໃນປີ 2014. ນັ້ນແມ່ນເພີ່ມທະວີຄວາມສາມັກຄີພາຍໃນກຸ່ມອາຊຽນ, ກໍຄື ເພີ່ມທະວີບົດບາດເປັນໃຈກາງຂອງອາຊຽນ ໃນບັນດາໂຄງປະກອບຂອງພາກພື້ນ. ແລະ ພິເສດ ແມ່ນເພື່ອໃຫ້ ອາຊຽນ ສາມາດກ້າວໄປເຖິງການສ້າງປະຊາຄົມໃນປີ 2015.”
ໃນບັນດາບັນຫາພົ້ນເດັ່ນຂອງພາກພື້ນໃນໄລຍະຜ່ານມາຄື: ບັນຫາທະເລຕາເວັນອອກ, ມຽນມາ ຍາມໃດກໍເຫັນດີເຫັນພ້ອມກັບຫລັກໝັ້ນຂອງອາຊຽນ,ນັ້ນແມ່ນ ແກ້ໄຂຄວາມຂັດແຍ້ງກັນຢູ່ ທະເລຕາເວັນອອກໂດຍສັນຕິວິທີ, ເຄົາລົບກົດໝາຍສາກົນ ແລະ ສົນທິສັນຍາກົດໝາຍວ່າດ້ວຍທະເລ ຂອງ ສປຊ ປີ 1982 ແລະ ກ່ອນອື່ນຕ້ອງຮັກສາຄວາມສາມັກຄີໃນກຸ່ມຢ່າງໝັ້ນຄົງ. ໃນສະພາບການ, ທີ່ຫວຽດນາມ ເປັນເຈົ້າພາບກອງປະຊຸມໃຫຍ່ ລັດຖະສະພາລະຫວ່າງຊາດໂລກ (IPU) ຄັ້ງທີ 132 ໃນປີ 2015, ການພົວພັນລະຫວ່າງ ຫວຽດນາມ ແລະ ມຽນມາ ເວົ້າລວມ, ສະພາແຫ່ງຊາດສອງປະເທດ ເວົ້າສະເພາະ ຈະສ້າງຂີດໝາຍໃຫມ່ຢ່າງແນ່ນອນ.