ໃນບັນດາຜົນງານທີ່ປະເທດຊາດບັນລຸມາໄດ້ໃນບັນດາຂົງເຂດເສດຖະກິດ, ສັງຄົມ, ວັດທະນະທຳໃນປີ 2014 ນັ້ນ, ແມ່ນມີການປະກອບສ່ວນບໍ່ໜ້ອຍຂອງຊາວຫວຽດນາມພວມດຳລົງຊີວິດ ແລະ ເຮັດວຽກຢູ່ກວ່າ 100 ປະເທດ ແລະ ເຂດແຄ້ວນໃນໂລກ. ການປະກອບເຫື່ອແຮງຂອງ ຊາວຫວຽດນາມອາໄສຢູ່ຕ່າງປະເທດກໍເປັນການຢັ້ງຢືນນ້ຳໃຈສາມັກຄີທົ່ວທັງຊາດ, ແມ່ນປະສິດທິຜົນຈາກນະໂຍບາຍຖືປະຊາຄົມ ຊາວຫວຽດນາມອາໄສຢູ່ຕ່າງປະເທດແມ່ນພາກສ່ວນທີ່ບໍ່ອາດຕັດແຍກອອກຈາກຊາດຫວຽດນາມໄດ້.
ນັກທຸລະກິດຊາວຫວຽດນາມອາໄສຢູ່ຕ່າງປະເທດມາຮ່ວມກອງປະຊຸມສຳມະນາຢູ່ພາຍໃນປະເທດ |
ປະຈຸບັນ, ຫວຽດນາມມີຊາວຫວຽດນາມປະມານ 4 ລ້ານຄົນພວມດຳລົງຊີວິດ ແລະ ເຮັດວຽກຢູ່ຕ່າງປະເທດ. ເຖິງວ່າຢູ່ຫ່າງໄກຈາກບ້ານເກີດເມືອງນອນກໍຕາມ, ແຕ່ເຂົາເຈົ້າຍາມໃດກໍອວາຍເມືອຫາປະເທດຊາດດ້ວຍຄວາມໄຝ່ຝັນຢ່າງແຮງກ້າຢາກກໍ່ສ້າງຫວຽດນາມໃຫ້ນັບມື້ນັບຮັ່ງມີສວຍງາມ.
ປະກອບເຫືຶ່ອແຮງໃນຫຼາຍຂົງເຂດ
ໃນຂົງເຂດວິທະຍາສາດ, ສັງຄົມ, ແຕ່ລະປີມີຊາວຫວຽດນາມອາໄສຢູ່ຕ່າງປະເທດປະມານ 500.000 ເທື່ອຄົນກັບຄືນເມືອປະເທດ, ໃນນັ້ນ, ມີຜູ້ຊ່ຽວຊານ, ນັກປັນຍາຊົນກວ່າ 300 ຄົນກັບເມືອເຮັດວຽກ. ດ້ວຍຫຼາຍວິທີແຕກຕ່າງກັນ, ການປະກອບເຫື່ອແຮງຊ່ວຍເຫຼືອປະເທດຊາດຂອງຊາວຫວຽດນາມອາໄສຢູ່ຕ່າງປະເທດໄດ້ຮັບໝາກຜົນໃດໜຶ່ງ, ປະກອບສ່ວນນຳປະເທດຊາດນັບມື້ນັບພັດທະນາ.
ທາງດ້ານເສດຖະກິດ, ແຕ່ລະປີມີຊາວຫວຽດນາມອາໄສຢູ່ຕ່າງປະເທດນັບພັນຄົນກັບເມືອຊອກຮູ້ກາລະໂອກາດລົງທຶນ, ດຳເນີນທຸລະກິດ. ໄລຮອດປະຈຸບັນ, ຈຳນວນໂຄງການທີ່ຊາວຫວຽດນາມອາໄສຢູ່ຕ່າງປະເທດຈົດທະບຽນລົງທຶນຢູ່ຫວຽດນາມແມ່ນກ່ວາ 2000 ໂຄງການ, ອັນໄດ້ນຳມາເຊິ່ງແຫຼ່ງປະໂຫຍດຄິດເປັນເງິນປະມານ 20 ຕື້ USD ໃຫ້ແກ່ປະເທດຊາດໃນແຕ່ລະປີ. ສະເພາະປີ 2014, ຈຳນວນເງິນຕາຂອງຊາວຫວຽດນາມອາໄສຢູ່ຕ່າງປະເທດຝາກເມືອປະເທດຊາດບັນລຸ 12 ຕື້ USD, ອັນໄດ້ນຳຫວຽດນາມຖືກຈັດເຂົ້າໃນບັນຊີລາຍຊື່ 10 ປະເທດໄດ້ຮັບເງິນຕາຂອງປະຊາຊົນທີ່ອາໄສຢູ່ຕ່າງປະເທດຫຼາຍກ່ວາໝູ່ໃນໂລກ. ຖ້າຫາກວ່າ ກ່ອນນີ້, ຈຳນວນເງິນຕາຂອງຊາວຫວຽດນາມອາໄສຢູ່ຕ່າງປະເທດ ຕົ້ນຕໍແມ່ນສຸມໃສ່ຂົງເຂດລົງທຶນອະສັງຫາລິມະຊັບ, ຫຼັກຊັບ ແລະ ການຝາກເງິນປະຢັດ, ແຕ່ໃນປະຈຸບັນ, ຈຳນວນເງິນຕາຂອງຊາວຫວຽດນາມອາໄສຢູ່ຕ່າງປະເທດໄດ້ຮັບການລົງທຶນເຂົ້າໃນການຜະລິດ, ດຳເນີນທຸລະກິດໄດ້ເພີ່ມທະວີຂຶ້ນ. ທ່ານນາງ ເຮເລເວີນ ຊາວຫວຽດນາມອາໄສຢູ່ຊູແອດ, ຜູ້ໄດ້ລົງທຶນເຂົ້າໃນໂຄງການສ້າງໝູ່ບ້ານທ່ອງທ່ຽວສາກົນ ບັກເອົາ, ກໍ່ສ້າງສູນເບິ່ງແຍງດູແລຜູ້ເຖົ້າຜູ້ແກ່ ແລະ ສູນເດັກກຳພ້າ ໃຫ້ຮູ້ວ່າ :
“ ຂ້າພະເຈົ້າກັບເມືອລົງທຶນຢູ່ປະເທດຊາດ, ວຽກງານທຸກຢ່າງກໍດຳເນີນໄປດ້ວຍດີ. ຂ້າພະເຈົ້າຄິດວ່າ ຖ້າຫາກຕົນເອງມີຄວາມມານະອົດທົນ, ຈຶ່ງສາມາດປະກອບສ່ວນໃຫ້ແກ່ປະເທດຊາດໄດ້. ເພາະປະເທດຊາດແມ່ນກົກເຄົ້າເຫງົ້າກໍ, ເຖິງວ່າເຮົາຮັ່ງມີຄືແນວໃດກໍຕາມ, ຍາມໃດປະເທດຊາດ ກໍເປັນແຫ່ງທີ່ຕົນເອງຕ້ອງກັບຄືນ ແລະ ເຮັດວຽກງານໃດໜຶ່ງໃຫ້ແກ່ປະເທດຊາດ ”
ໃນຂົງເຂດວັດທະນະທຳ, ຊາວຫວຽດນາມແຕ່ລະຄົນທີ່ພວມອາໄສຢູ່ຕ່າງປະເທດຕາ່ງກໍແມ່ນທູດແນະນຳສີສັນວັດທະນະທຳຫວຽດນາມເຖິງເພື່ອນມິດສາກົນ. ດ້ວຍທັດສະນະເຊັ່ນນັ້ນ, ທ່ານເຈີນຫາຍລິງ, ປະທານສະມາຄົມຊາວຫວຽດນາມອາໄສຢູ່ສ.ເກົາຫຼີໃຫ້ຮູ້ວ່າ : ແຕ່ລະປີ, ສະມາຄົມກໍໄດ້ເຂົ້າຮ່ວມການເຄື່ອນໄຫວວັດທະນະທຳສາກົນຫຼາຍຄັ້ງ ແນໃສ່ໂຄສະນາວັດທະນະທຳ, ພາບພົດ, ປະເທດຊາດ ແລະ ຊາວຫວຽດນາມ, ນອກຈາກນັ້ນ ກໍຍັງຈັດງານບຸນວັດທະນະທຳປະເພນີຫວຽດນາມຢູ່ ສ.ເກົາຫຼີໃນແຕ່ລະປີອີກດ້ວຍ.
ຕີລາຄາກ່ຽວກັບການປະກອບສ່ວນສ້າງສາບ້ານເກີດເມືອງນອນຂອງຊາວຫວຽດນາມອາໄສຢູ່ຕ່າງປະເທດ, ທ່ານ ຫງວຽນຟູ້ບີງ ປະທານສະມາຄົມຕິດຕໍ່ສື່ສານກັບຊາວຫວຽດນາມອາໄສຢູ່ຕ່າງປະເທດຢືນຢັນວ່າ :
“ ປະຊາຄົມຊາວຫວຽດນາມອາໄສຢູ່ຕ່າງປະເທດພັດທະນາຢ່າງແຂງແຮງກ່ຽວກັບຈຳນວນ ແລະ ກໍມີຫຼາຍຮູບຫຼາຍສີ ແລະ ສັບສົນ. ເພາະວ່າ ພໍແມ່ພນ້ອງອອກໄປຕ່າງປະເທດໃນສະພາບການທີ່ແຕກຕ່າງກັນ ແລະ ດ້ວຍຈຸດປະສົງແຕກຕ່າງກັນ. ແຕ່ຈຸດລວມຂອງປະຊາຄົມຊາວຫວຽດນາມອາໄສຢູ່ຕ່າງປະເທດ ແມ່ນທຸກໆຄົນຕ່າງກໍຜູກພັນກັບບ້ານເກີດເມືອງນອນ, ປະເທດຊາດ ”
ສ້າງກາລະໂອກາດເພື່ອໃຫ້ຊາວຫວຽດນາມອາໄສຢູ່ຕ່າງປະເທດຮ່ວມແຮງຮ່ວງໃຈສ້າງສາປະເທດຊາດ
ກ່ວາເຄິ່ງສະຕະວັດທີ່ຜ່ານມາ, ນັບແຕ່ວັນປະທານໂຮ່ຈິມິນຕ້ອນຮັບກຳປັ່ນຖ້ຽວທຳອິດທີ່ສົ່ງຊາວຫວຽດນາມເກືອບ 1000 ຄົນທີ່ອາໄສຢູ່ໄທກັບເມືອປະເທດ ເປັນຕົ້ນມາ, ຍາມໃດພັກ ແລະ ລັດກໍເອົາໃຈໃສ່ເຖິງຊາວຫວຽດນາມອາໄສຢູ່ຕ່າງປະເທດ. ມີນະໂຍບາຍ, ມະຕິຫຼາຍສະບັບໄດ້ຮັບການປະກາດໃຊ້ ແລະ ນັບມື້ນັບສອດຄ່ອງກັບກັບສະພາບຕົວຈິງ ແລະ ແນວຄິດຈິດໃຈຂອງເຂົາເຈົ້າ. ນາງ ວັນເຢືອງແທ່ງ ຊາວຫວຽດນາມອາໄສຢູ່ຊູແອດຖືວ່າ :
“ ຂ້າພະເຈົ້າວ່າ ໄດ້ມີຫຼາຍນະໂຍບາຍເປີດກ້ວາງໃຫ້ແກ່ນັກທຸລະກິດ, ໃນຂະນະນັ້ນ, ປັດໄຈວັດທະນະທຳ, ຈິດໃຈ, ວັດທະນະທຳຫວຽດນາມແມ່ນສຳຄັນທີ່ສຸດ. ເພາະສະນັ້ນ, ບັນດາຜູ້ເຮັດວຽກງານວັດທະນະທຳມີຄວາມຫວັງຢາກປະກອບເຫື່ອແຮງ, ລະດັບຄວາມຮູ້ທີ່ສະສົມມາໄດ້ຢູ່ຕ່າງປະເທດໃນຫຼາຍປີທີ່ຜ່ານມາເຂົ້າໃນການພັດທະນາປະເທດຊາດ ”
ໃນໄລຍະທີ່ຈະມາເຖິງ, ພັກ, ລັດ, ແນວໂຮມປະເທດຊາດຫວຽດນາມຈະເຮັດວຽກງານຫຼາຍກ່ວາອີກເພື່ອຕອບສະໜອງຄວາມຄອງຄ່ອຍຂອງພໍ່ແມ່ພີນ້ອງຊາວຫວຽດນາມອາໄສຢູ່ຕ່າງປະເທດ. ທ່ານ ຫງວຽນທ້ຽນເຍີນ ປະທານຄະນະກຳມະ ການສູນກາງແນວໂຮມປະເທດຊາດຫວຽດນາມຢືນຢັນວ່າ :
“ ການເບິ່ງແຍງຊີວິດວັດທະນະທຳ, ວັດທະນະທຳຂອງຊາດ, ການຮ່ວມສຳພັນລະຫວ່າງພາຍໃນປະເທດກັບພາຍນອກແມ່ນໄດ້ຮັບຄວາມເອົາໃຈໃສ່ທີ່ສຸດ. ພວກຂ້າພະເຈົ້າສ້າງແຜນຮ່າງກ່ຽວກັບການເບິ່ງແຍງເສີມຂະຫຍາຍວັດທະນະທຳແຫ່ງຊາດໃນປະຊາຄົມຊາວຫວຽດນາມອາໄສຢູ່ຕ່າງປະເທດ. ພວກຂ້າພະເຈົ້າຍັງສ້າງເວທີ່ປາໄສເພື່ອເສີມຂະຫຍາຍຖັນແຖວນັກປັນຍາຊົນ ”
ໃນພາລະກິດສ້າງສາ ແລະ ປົກປັກຮັກສາປະເທດຊາດໃນປະຈຸບັນ, ການປະກອບສ່ວນຂອງຊາວຫວຽດນາມອາໄສຢູ່ຕ່າງປະເທດແມ່ນບໍ່ອາດປະຕິເສດໄດ້. ການເສີມຂະຫຍາຍບົດບາດຂອງປະຊາຄົມຊາວຫວຽດນາມອາໄສຢູ່ຕ່າງປະເທດ ກໍແມ່ນໜ້າທີ່ສຳຄັນ, ແມ່ນສິ່ງຜູກຮັດພໍ່ແມ່ພີ່ນ້ອງກັບບ້ານເກີດເມືອງນອນ, ປະເທດຊາດ.