(vovworld)- ໂດຍບໍ່ຫົວຊາຕໍ່ປະຕິກິລິຍາຈາກປະຊາຄົມສາກົນ ກໍຄືຄຳສັ່ງລົງໂທດ ຂອງ ສປຊ, ວັນທີ 9/9 ຜ່ານມາ, ສປປ ເກົາຫລີ ໄດ້ດຳເນີນເຫດທົດລອງນິວເຄຼຍຄັ້ງທີ 5 ແລະ ກໍແມ່ນເຫດທົດລອງຂະຫນາດໃຫຍ່ທີ່ສຸດນັບແຕ່ກ່ອນມາຮອດປະຈຸບັນ. ການຜັນແປຫລ້າສຸດນີ້ ໄດ້ເຮັດໃຫ້ຄວາມເຄັ່ງຕຶງຢູ່ພາກພື້ນເພີ່ມຂຶ້ນໃນກວ່າ 10 ມື້ຜ່ານມາ ພ້ອມທັງໃຫ້ເຫັນວ່າ ບັນດາມາດຕະການເພື່ອແນໃສ່ສະກັດກັ້ນການພັດທະນາອາວຸດນິວເຄຼຍ ໃນແຫລມເກົາຫລີ ບໍ່ໄດ້ຮັບການເສີມຂະຫຍາຍຢ່າງມີປະສິດທິຜົນຄືດັ່ງຄວາມມຸ່ງຫວັງ.
ການຍິງລູກສອນໄຟຂອງ ສປປ ເກົາຫລີ
ພາບ:baogiaothong
|
ເຫດທົດລອງນິວເຄຼຍໄດ້ດຳເນີນໃນຕອນເຊົ້າວັນທີ 9/9 ແມ່ນເຫດທົດລອງນິວເຄຼຍຄັ້ງທີ 5 ນັບແຕ່ກ່ອນມາຮອດປະຈຸບັນ ແລະ ແມ່ນເຫດທົດລອງຄັ້ງທີ 2 ນັບແຕ່ຕົ້ນປີ 2016 ຂອງ ສປປ ເກົາຫລີ. ສຳນັກຂ່າວສານສູນກາງ ສປປ ເກົາຫລີ KCNA ກໍໄດ້ໃຫ້ຂ່າວວ່າ: ການທົດລອງນີ້ກຳນົດໄດ້ວ່າ ຫົວລູກສອນໄຟໃຫມ່ ສາມາດຕິດໃສ່ລູກສອນໄຟໄດ້.
ສປປ ເກົາຫລີ ດຳເນີນການທົດລອງລູກສອນໄຟ ແລະ ນິວເຄຼຍຢ່າງລຽນຕິດ
ທ່ານ Mathieu Duchatel, ຮອງຜູ້ອຳນວຍການໂຄງການອາຊີ ປະຈຳ ສະພາການພົວພັນສາກົນ ເອີລົບ ໃຫ້ຮູ້ວ່າ: ອາເມລິກາ ແລະ ສ ເກົາຫລີ ພວມປຶກສາຫາລືກ່ຽວກັບໂຄງການສ້າງລະບົບປ້ອງກັນສະກັດກັ້ນລູກສອນໄຟ THAAD ໃນດິນແດນຂອງ ສເກົາຫລີ. ເມື່ອນຳເຂົ້າເຄື່ອນໄຫວ, ລະບົບນີ້ຈະຕິດຕາມກວດກາບັນດາຮາກຖານນິວເຄຼຍຂອງ ສປປ ເກົາຫລີ ຢ່າງແຫນ້ນແຟ້ນກວ່າ. ນີ້ແມ່ນຫນຶ່ງໃນບັນດາສາຍເຫດເຮັດໃຫ້ ສປປ ເກົາຫລີ ດຳເນີນເຫດທົດລອງນິວເຄຼຍຄັ້ງທີ 5. ນອກນັ້ນ, ເຫດທົດລອງຍັງແນໃສ່ກໍ່ກຳລັງດັນຕໍ່ວົງການນັກການເມືອງບັນດາປະເທດ, ເປັນຕົ້ນແມ່ນ ອາເມລິກາ, ໃນການປ່ຽນແປງຫລັກໝັ້ນ. ມາຮອດປະຈຸບັນ ວໍຊິງຕັນ ບໍ່ມີການເຈລະຈາໂດຍກົງກັບ ພຽງຢາງ ເວັ້ນເສຍແຕ່ປະເທດນີ້ຍອມປະລະຄວາມມັກໃຫຍ່ໃຝ່ສູງດ້ານນິວເຄຼຍ. ຕາມໂຄສົກກະຊວງການຕ່າງປະເທດ ສປປ ເກົາຫລີ ແລ້ວ, ເຫດທົດລອງນິວເຄຼຍ ແມ່ນ ປະຕິກິລິຍາໂຕ້ຕອບທີ່ຈຳເປັນຕໍ່ສິ່ງອັນທີ່ເອີ້ນວ່າ “ໄພນິວເຄຼຍຈາກ ອາເມລິກາ”. ສປປ ເກົາຫລີ ຈະມານະພະຍາຍາມເພີ່ມທະວີກຳລັງແຮງດ້ານນິວເຄຼຍ ນັບທັງ “ຄຸນນະພາບ ແລະ ຈຳນວນ”. ໂຄງການນິວເຄຼຍຂອງ ພຽງຢາງ ຈະສວມບົດບາດເປັນຕາຍໃນຍຸດທະສາດປ້ອງກັນຄວາມສະຫງົບແຫ່ງຊາດ. ພາຍຫລັງເຫດທົດລອງນິວເຄຼຍ, ວັນທີ 11/9 ພຽງຢາງ ໄດ້ສະເຫນີ ໃຫ້ວໍຊິງຕັນ ຮັບຮອງ ສປປ ເກົາຫລີ ແມ່ນລັດກຳມະສິດອາວຸດດ້ານນິວເຄຼຍ. ເລື່ອງ ສປປ ເກົາຫຼີ ດຳເນີນການທົດລອງນິວຄະເລຍຄັ້ງທີ 5 ຍ້ອນ ພຽງຢາງ ມີສະຕິຮັບຮູ້ໄດ້ວ່າ ຕ້ອງຮັບປະກັນຄວາມປອດໄພ ເມື່ອ ປັກກິງ ບໍ່ເປັນພັນທະມິດທີ່ມີຄວາມຊະນິດຕິດພັນກັບປະເທດນີ້ຄືໃນອະດີດຕະການອີກ. ຢູ່ສະພາຄວາມໝັ້ນຄົງ ສະຫະປະຊາຊາດ, ຈີນ ເຄີຍລົງມະຕິຮັບຮອງເອົາບັນດາມາດຕະການລົງໂທດ ສປປ ເກົາຫຼີ.
ການທົດລອງນິວຄະເລຍຄັ້ງທີ 5 ຂອງ ສປປ ເກົາຫຼີ ເຮັດໃຫ້ບັນດາປະເທດບ້ານໃກ້ເຮືອນຄຽງມີຄວາມວິຕົກກັງວົນທີ່ສຸດ ແລະ ຊອກຫາວິທີເພື່ອເພີ່ມທະວີຄວາມປອດໄພ. ວັນທີ 19/9, ສຳນັກຂ່າວສານ Yonhap ຂອງ ສ ເກົາຫຼີ ໃຫ້ຮູ້ວ່າ, ປະເທດນີ້ ແລະ ອາເມລິກາ ຈະຊອກຫາວິທີສ້າງຍຸດທະສາດນາບຂູ່ດ້ວຍ 3 ໄລຍະ ເພື່ອຮັບມືກັບ ສປປ ເກົາຫຼີ ໃນການເຈລະຈາກ່ຽວກັບການປ້ອງກັນຄວາມສະຫງົບຂັ້ນສູງ, ເຊິ່ງຄາດວ່າຈະດຳເນີນໃນເດືອນ 10 ຈະມາເຖິງ. ຕາມນັ້ນແລ້ວ, ບັນດາການກະທຳດ້ານການທະຫານ ຈະໄດ້ຮັບການນຳໃຊ້ເພື່ອຮັບມືກັບໄພນາຍຂູ່ນຳໃຊ້ອາວຸດນິວຄະເລຍ ທີ່ພວມເພີ່ມຂຶ້ນຂອງ ສປປ ເກົາຫຼີ ໃນ 3 ໄລຍະແມ່ນ: ນາບຂູ່ບຸກໂຈມຕີດ້ວຍອາວຸດນິວຄະເລຍ, ໃກ້ຈະນຳໃຊ້ອາວຸດນິວຄະເລຍ ແລະ ບຸດໂຈມຕີດ້ວຍອາວຸດນິວຄະເລຍຢ່າງແທ້ຈິງ. ນອກນັ້ນ, ກອງທັບ ສເກົາຫຼີ ໄດ້ຕົກລົງດຳເນີນຍຸດທະສາດນາບຂູ່ຢ່າງຕັ້ງໜ້າຂອງຕົນ, ນັບທັງດ້ານການທະຫານ ແລະ ປອດການທະຫານ, ເພື່ອຮັບມືກັບບັນດາການກະທຳເກາະຜິດເຊິ່ງ ສປປ ເກົາຫຼີ ອາດຈະປະຕິບັດດ້ວຍອາວຸດລ້າງຜານ, ບຸກໂຈມຕີຕາມພາກພື້ນ ແລະ ສົງຄາມຢ່າງແທ້ຈິງ.
ສາກົນສືບຕໍ່ຊອກຫາມາດຕະການສະກັດກັ້ນຄວາມມັກໃຫຍ່ໃຝ່ສູງດ້ານນິວເຄຼຍຂອງສປປ.ເກົາຫຼີ
ກ່ຽວກັບເລື່ອງ, ພຽງຢາງ ທົດລອງນິວເຄຼຍຄັ້ງທີ 5 ໄດ້ເປັນຫົວຂໍ້ທີ່ໄດ້ຮັບການເຕື້ອງເຖິງຫຼາຍ ໃນກອງປະຊຸມຂັ້ນສູງຂອງສະມັດຊາໃຫຍ່ສະຫະປະຊາຊາດ ຄັ້ງທີ 71, ທີີ່ພວມດຳເນີນໃນລະຫວ່າງວັນທີ 19 – 26/09, ຢູ່ນິວຢອກ ກໍຄໃນືບັນດາການພົບປະ 2 ຝ່າຍລະຫວ່າງການນຳຫຼາຍປະເທດຢູ່ນອກກອງປະຊຸມ. ທ່ານປະທານາທິບໍດີອາເມລິກາ Barack Obama ແລະ ທ່ານນາຍົກລັດຖະມົນຕີຈີນ ລິ໋ເຄີຊຽງ ໄດ້ເຫັນດີນຳກັນເພີ່ມທະວີການຮ່ວມມືໃນຫຼາຍຂົງເຂດ ເພື່ອແນໃສ່ບັນລຸໄດ້ຄາດໝາຍປອດນິວເຄຼຍ ໃນແຫຼມເກົາຫຼີ, ລວມທັງເລື່ອງຍູ້ແຮງການຮ່ວມມືໃນຂອບເຂດສະພາຄວາມໝັ້ນຄົງສະຫະປະຊາຊາດ ແລະ ບັນດາຊ່ອງປະຕິບັດກົດໝາຍອື່ນ ທີ່ເລັ່ງໃສ່ສປປ.ເກົາຫຼີ. ອາເມລິກາ ກໍກະຕຸກຊຸກຍູ້ຈີນ ມີການກະທຳຫຼາຍກວ່າອີກ ເພື່ອກີດຂວາງສປປ.ເກົາຫຼີ. ວໍຊິງຕັນ ໃຫ້ຮູ້ວ່າ, ພ້ອມແລ້ວທີ່ຈະເຈລະຈາກັບພຽງຢາງ ຖ້າຫາກປະເທດນີ້ໃຫ້ຄຳໝັ້ນສັນຍາປະລະໂຄງການອາວຸດນິວເຄຼຍ. ນອກນັ້ນ, ອາເມລິກາ ແລະ ຈີນ ກໍດຳເນີນບັນດາການເຈລະຈາກ່ຽວກັບຄວາມສາມາດປະກາດມະຕິລົງໂທດຂອງສະຫະປະຊາຊາດ ເພື່ອແນໃສ່ໂຕ້ຕອບການທົດລອງນິວເຄຼຍດັ່ງກ່າວຂອງສປປ.ເກົາຫຼີ.
ເຖິງຢາງໃດກໍ່ຕາມ, ການລົງໂທດ ຫຼື ປິດລ້ອມສປປ.ເກົາຫຼີ ບໍ່ນຳມາເຊິ່ງປະສິດທິຜົນຄືດັ່ງຄວາມຫວັງ ຍ້ອນຄວາມຈິງບໍ່ສາມາດເຮັດໃຫ້ພຽງຢາງ ປ່ຽນແປງຄວາມມັກໃຫຍ່ໃຝ່ສູງໃນການພັດທະນາລູກສອນໄຟນຳວິທີ ພ້ອມກັບອາວຸດນິວເຄຼຍ ໄດ້. ໂຄສົກກະຊວງການຕ່າງປະເທດສປປ.ເກົາຫຼີ ຖະແຫຼງວ່າ, ເລື່ອງອາເມລິກາ ຊອກຫາວິທີຊຸກຍູ້ບັນດາມາດຕະການລົງໂທດ ພາຍຫຼັງພຽງຢາງ ດຳເນີນການທົດລອງນິວເຄຼຍ ຄັ້ງທີ 5 ແມ່ນເລື່ອງຕະຫຼົກ, ພ້ອມທັງຢືນຢັນວ່າ ຈະສືບຕໍ່ເພີ່ມທະວີກຳລັງແຮງດ້ານນິວເຄຼຍ ຂອງຕົນ.
ຕາມວົງການນັກໄຈ້ແຍກແລ້ວ, ບັນດາມາດຕະການລົງໂທດສປປ.ເກົາຫຼີ ເຖິງວ່າຍັງບໍ່ທັນມີປະສິດທິກໍຕາມ ແຕ່ປະຊາຄົມສາກົນບໍ່ມີການຄັດເລືອກໃດທີ່ດີກວ່າ ນອກເໜືອສືບຕໍ່ການລົງໂທດຢ່າງແຮງກວ່າອີກ. ແຕ່ວ່າ, ໃນໄລຍະຍາວ, ທັງສປປ.ເກົາຫຼີ ແລະ ບັນດາປະເທດກ່ຽວຂ້ອງຕ້ອງມີການປະນິປະນອມເພື່ອກ້າວໄປເຖິງການເຈລະຈາໃນບັນຫານິວເຄຼຍ.