(vovworld) – ທ່ານນາຍົກລັດຖະມົນຕີຄົນໃໝ່ຂອງອິນເດຍ Narendra Modi ຫາກໍ່ສິ້ນສຸດການໄປປະຕິບັດງານຢູ່ຕ່າງປະເທດຄັ້ງທຳອິດເຖິງຍີ່ປຸ່ນ. ການຢ້ຽມຢາມນີ້ບໍ່ພຽງແຕ່ນຳການພົວພັນສອງຝ່າຍອິນເດຍ - ຍີ່ປຸ່ນ ຂຶ້ນສູ່ລະດັບສູງໃໝ່ເທົ່ານັ້ນ, ຫາກຍັງແມ່ນບາດກ້າວເພື່ອແນໃສ່ສ້າງຕັ້ງ ແລະ ປັບປຸງພັນທະມິດໃໝ່ຢູ່ພາກພື້ນອີກດ້ວຍ.
ທ່ານນາຍົກລັດຖະມົນຕີຍີ່ປຸ່ນ Shinzo Abe ແລະ ທ່ານນາຍົກລັດຖະມົນຕີອິນເດຍ Narendra Modi
(ພາບອິນເຕີແນດ)
ຄຳເຫັນຂອງທ່ານນາຍົກລັດຖະມົນຕີຍີ່ປຸ່ນ Shinzo Abe ແລະ ທ່ານນາຍົກລັດຖະມົນຕີອິນເດຍ Narendra Modi ທີ່ການປະຊຸມຂ່າວລວມໄດ້ສົ່ງສານສ່ວນໃດສ່ວນໜຶ່ງທີ່ຈະແຈ້ງ ກ່ຽວກັບຄວາມມຸ້ງຫວັງ ກໍ່ຄືຄວາມຕັດສິນໃຈຂອງສອງຝ່າຍໃນການຊອກຫາຄວາມວັດທະນາຖາວອນລວມ. ໃນຂະນະທີ່ ທ່ານນາຍົກລັດຖະມົນຕີອິນເດຍ Narendra Modi ຢືນຢັນວ່າ, ວິທີເຊິ່ງຍີ່ປຸ່ນ ແລະ ອິນເດຍຮ່ວມມືນຳກັນຈະຕັດສິນອະນາຄົດຂອງສະໄໝອາຊີນັ້ນ, ທ່ານນາຍົກລັດຖະມົນຕີຍີ່ປຸ່ນ Shinzo Abe ພັດຢືນຢັນວ່າ, ການພົວພັນກັບອິນເດຍແມ່ນມີຄວາມສາມາດບົ່ມຊ້ອນທີ່ສຸດຢູ່ໂລກ, ແລະ ການພົວພັນນີ້ຕ້ອງໄດ້ຮັບການຍົກລະດັບຢ່າງແນ່ນອນເພື່ອກາຍເປັນຄູ່ຮ່ວມມືຍຸດທະສາດພິເສດ ແລະ ມີລັກສະນະທົ່ວໂລກ.
ຊຸກຍູ້ການຮ່ວມມືທາງດ້ານເສດຖະກິດສອງຝ່າຍ…
ຍີ່ປຸ່ນໃຫ້ຄຳໝັ້ນສັນຍາເພີ່ມເງິນລົງທຶນເຂົ້າອິນເດຍຂຶ້ນທົບສອງເທົ່າໃນ 5 ປີຈະມາເຖິງ ເມື່ອທຽບໃສ່ລະດັບ 2 ຕື້ USD ໃນປີ 2013. ນັ້ນແມ່ນໝາກຜົນທີ່ດີເດ່ັນໃນຂົງເຂດເສດຖະກິດຂອງການໄປປະຕິບັດງານຄັ້ງນີ້. ຍີ່ປຸ່ນ ກໍ່ສະຫງວນໃຫ້ອິນເດຍບ້ວງເງິນກູ້ຢືມປະມານ 480 ລ້ານ USD ເພື່ອພັດທະນາບັນດາໂຄງການພື້ນຖານໂຄງລ່າງ. ຮ່ວມເດີນທາງໄປຍີ່ປຸ່ນພ້ອມກັບ ທ່ານນາຍົກລັດຖະມົນຕີອິນເດຍ Narendra Modi ໃນຄັ້ງນີ້, ມີບັນດານັກທຸລະກິດອິນເດຍ ແລະ ບັນດາສັນຍາທີ່ໄດ້ຮັບການລົງນາມໃນຄັ້ງນີ້ ໄດ້ສະແດງໃຫ້ເຫັນຄວາມຕັດສິນໃຈຢ່າງແຮງໃນການຊຸກຍູ້ການຮ່ວມມືລະຫວ່າງສອງປະເທດບ້ານໃກ້ເຮືອນຄຽງໃນພາກພື້ນອາຊີ.
ເຖິງຢ່າງໃດກໍ່ຕາມ, ສິ່ງທີ່ໜ້າເອົາໃຈໃສ່ໃນການໄປປະຕິບັດງານເຖິງຍີ່ປຸ່ນຂອງ ທ່ານນາຍົກລັດຖະມົນຕີອິນເດຍ Narendra Modi ຄັ້ງນີ້, ນັ້ນແມ່ນການນຳສອງປະເທດໄດ້ຮັບຮອງເອົາຂໍ້ຕົກລົງນຳກັນວ່າ ອິນເດຍຈະຮ່ວມມືຜະລິດດິນທີ່ຫາຍາກເພື່ອສົ່ງອອກຍີ່ປຸ່ນ. ຕາມນັ້ນແລ້ວ, ແຕ່ລະປີ, ຍີ່ປຸ່ນຈະນຳເຂົ້າດິນຫາຍາກແຕ່ 2.000 ເຖິງ 2.300 ໂຕນ ແລະ ການສົ່ງອອກດິນທີ່ຫາຍາກຄັ້ງທຳອິດຄາດວ່າຈະປະຕິບັດໃນເດືອນ 2/2015. ຄຽງຂ້າງຂົງເຂດດິນຫາຍາກ, ການກໍ່ສ້າງພື້ນຖານໂຄງລ່າງຢູ່ອິນເດຍແລ້ວ, ສອງຝ່າຍຍັງເຫັນດີເປັນເອກະພາບສົ່ງເສີມແຜນການເຈລະຈານຳກັນ ເພື່ອໃຫ້ ໂຕກຽວ ຂາຍກຳ່ປັ່ນເຮືອບິນ US-2, 15 ລຳທີ່ມີມູນຄ່າປະມານ 1.65 ຕື້ USD ໃຫ້ແກ່ນິວເດລີອີກ. ເປັນອັນວ່າ, ອິນເດຍໄດ້ກາຍເປັນປະເທດທຳອິດທີ່ຊື້ເຮືອບິນການທະຫານຂອງຍີ່ປຸ່ນນັບແຕ່ສົງຄາມໂລກຄັ້ງທີ 2 ມາຮອດປະຈຸບັນ. ນອກຈາກເລື່ອງຊື້ ກຳ່ປັ່ນເຮືອບິນ US-2 ແລ້ວ, ຍີ່ປຸ່ນກໍ່ຈະອະນຸຍາດໃຫ້ອິນເດຍຮ່ວມມືຜະລິດບັນດາອຸປະກອນຂອງເຮືອບິນປະເພດນີ້ໃນຜືນແຜ່ນດິນຂອງອິນເດຍ.
ພິເສດ, ທ່ານນາຍົກລັດຖະມົນຕີຍີ່ປຸ່ນ Shinzo Abe ແລະ ທ່ານນາຍົກລັດຖະມົນຕີອິນເດຍ Narendra Modi ໄດ້ຕົກລົງ “ຍົກລະດັບ ແລະ ຍູ້ແຮງ“ ການພົວພັນປ້ອງກັນຊາດອີກ ກໍ່ຄືເນັ້ນໜັກເຖິງຄວາມສຳຄັນຂອງການສ້າງແຜນການຊ້ອມຮົບທາງທະເລລະຫວ່າງສອງຝ່າຍ, ແລະ ເລື່ອງຍີ່ປຸ່ນສືບຕໍ່ເຂົ້າຮ່ວມການຊ້ອມຮົບ Malabar ຄັ້ງຕ່າງໆລະຫວ່າງອິນເດຍ ແລະ ອາເມລິກາ.
ການເພີ່ມທະວີການຮ່ວມມືປ້ອງກັນຊາດປ້ອງກັນຄວາມສະຫງົບ
ໃນໄລຍະມໍ່ໆມານີ້, ທັງຍີ່ປຸ່ນ ແລະ ອິນເດຍລ້ວນແຕ່ວິຕົກກັງວົນຕໍ່ຄວາມມັກໃຫຍ່ໄຝ່ສູງຂອງຈີນ. ທັງສອງປະເທດກໍ່ຢາກລະງົບບັນດາການກະທຳຂອງຈີນຢູ່ ທະເລຕາເວັນອອກ, ທະເລຮົວຕຸງ ແລະ ມະຫາສະມຸດອິນເດຍ. ແຕ່ດົນນານມາແລ້ວ, ໂຕກຽວ ແລະ ນີວດີລີ ເຄີຍມີຄວາມຂັດແຍ້ງຜືນແຜ່ນດິນກັບ ປັກກີງ ແລະ ເປັນຫນ້າສົນໃຈ, ຊຸມປີມໍ່ໆມານີ້ ປັກກີງໄດ້ ຍູ້ແຮງບັນດາຖະແຫລງປະກາດອະທິປະໄຕ ເພີ່ມຄວາມວິຕົກກັງວົນໃນພາກພື້ນ. ເຖິງວ່າ ທ່ານນາຍົກລັດຖະມົນຕີ S. Abe ແລະ ທ່ານນາຍົກລັດຖະມົນຕີ N. Modi ລ້ວນແຕ່ບໍ່ເຕື້ອງເຖິງສາຍພົວພັນກັບຈີນໂດຍກົງ ແຕ່ຕາມບັນດານັກສັງເກດການ, ບັນດາເນື້ອໃນປືກສາຫາລື ແລະ ຄຳກ່າວປາໄສໃນການຢ້ຽມຢາມລະຫວ່າງການນຳສອງທ່ານ ແມ່ນບັນດາທັດສະນະ, ນະໂຍບາຍການຕ່າງປະເທດ ກ່ຽວກັບເລື່ອງ ໂຕກຽວ ແລະ ນີວດີລີ ຮ່ວມມືກັນໃນການສູ້ຢັນກັບຈີນ ກ່ຽວກັບບັນຫາຂັດແຍ້ງຜືນແຜ່ນດິນ.
ສ້າງຄວາມດຸ່ນດຽ່ງເກີງຢູ່ພາກພື້ນ, ປັບປຸງການພົວພັນຕ່າງຝ່າຍຕ່າງ ມີຜົນປະໂຫຍດ
ຄວາມຈິງ,ນັບແຕ່ເມື່ອຂຶ້ນກຳອຳນາດ, ລັດຖະບານຂອງທ່ານ N. Modi ໄດ້ປະກາດແຜນການເພີ່ມທະວີການປ້ອງກັນຢູ່ເຂດຊາຍແດນກັບຈີນ ເວົ້າສະເພາະ ແລະ ປັບປຸງກຳລັງແຮງດ້ານການທະຫານເວົ້າລວມ. ບໍ່ພຽງແຕ່ເທົ່ານັ້ນ, ຫວ່າງແລ້ວນີ້ ນີວດີລີ ແລະ ໂຕກຽວ ຍັງເພີ່ມທະວີການຮ່ວມມືປ້ອງກັນຊາດຜ່ານບັນດາການຊ້ອມຮົບຮ່ວມຂອງທະຫານເຮືອ. ໃນຂອບຂະຫນາດກ້ວາງຂວາງ,ກຳປັ່ນຮົບຂອງ ອິນເດຍ, ຍີ່ປຸ່ນ ແລະ ອາເມລິກາ ຫາກໍດຳເນີນການຊ້ອມຮົບຕ້ານກຳປັ່ນດຳນ້ຳ ຢູ່ ປາຊີຟີກ.
ເປັນທີ່ຈະແຈ້ງແລ້ວວ່າ, ເລື່ອງ ຍີ່ປຸ່ນ ແລະ ອິນເດຍ ເລືອກເຟັ້ນກັນເປັນຄູ່ຮ່ວມມືເພື່ອຮ່ວມມືໃນບັນດາຂົງເຂດ ເປັນຕົ້ນແມ່ນປ້ອງກັນຊາດປ້ອງກັນຄວາມສະຫງົບ ໄດ້ສະແດງໃຫ້ເຫັນ ອຳນາດການປົກຄອງສອງປະເທດ ພວມປະຕິບັດບັນດາບາດກ້າວ ເພື່ອສ້າງພັນທະມິດໃຫມ່. ສຳລັບ ຍີ່ປຸ່ນ, ຮ່ວມສຳພັນກັບ ອິນເດຍ ຈະຊ່ວຍໂຕກຽວ ມີກາລະໂອກາດເພີ່ມທະວີການສົ່ງອອກໄປຍັງປະເທດມີພົນລະເມືອງຫລາຍທີ່ສຸດ, ການຮ່ວມມືກ່ຽວກັບການປ້ອງກັນຄວາມສະຫງົບ ເພື່ອຮັບມືກັບຄວາມສ່ຽງພວມນັບມື້ນັບເພີ່ມຂຶ້ນ ຍ້ອນຈີນພວມພັດທະນາກຳລັງແຮງການທະຫານ. ສຳລັບ ອິນເດຍ, ການຮ່ວມສຳພັນກັບຍີ່ປຸ່ນ ຈະຊ່ວຍທ່ານນາຍົກລັດຖະມົນຕີ ອິນເດຍ N.Modi ປະຕິບັດຄຳໝັ້ນສັນຍາຫາສຽງເລືອກຕັ້ງ ນັ້ນແມ່ນ ສ້າງກຳລັງແຮງ, ຜົນສະທ້ອນຂອງ ນີວດີລີ ໃນເວທີສາກົນ ແລະ ພາກພື້ນ.
ໃນຖານະເປັນນາຍົກລັດຖະມົນຕີ ອິນເດຍ ທ່ານ N. Modi ໄດ້ສ້າງວິໄສທັດໃຫ້ແກ່ນະໂຍບາຍການທູດຂອງຕົນ ດ້ວຍການຢ້ຽມຢາມ ຍີ່ປຸ່ນ ທີ່ແກ່ຍາວ ໃນເວລາ 5 ວັນ. ສະນັ້ນ ໃນໄລຍະຈະມາເຖິງ, ການຮ່ວມມືລະຫວ່າງ ໂຕກຽວ ແລະ ນີວດີລີ ແນ່ນອນວ່າ ຈະນຳມາເຊິ່ງບັນດາຜົນສະທ້ອນອັນໃຫຍ່ຫລວງກ່ຽວກັບທີ່ຕັ້ງການເມືອງຢູ່ພາກພື້ນ ເຊິ່ງເຄີຍມີການຜັນແປຫລາຍຢ່າງ.