ກໍລະນີສັງຫານຕົວປະກັນ 2 ຄົນ ໄດ້ເຮັດໃຫ້ອຳນາດການປົກຄອງໂຕກຽວຢືນຢູ່ຕໍ່ໜ້າການເລືອກເຟັ້ນທີ່ເຕັມໄປດ້ວຍຄວາມຫຍຸ້ງຍາກ. ຈະຖອນອອກຈາກການສູ້ຮົບຕ້ານ IS ເພື່ອຮັບປະກັນຄວາມປອດໄພໃຫ້ແກ່ພົນລະເມືອງຫຼືສືບຕໍ່ດຳເນີນບັນດາບາດກ້າວເດີນ, ແນໃສ່ຢືນຢັນການບໍ່ຜ່ອນສັ້ນຜ່ອນຍາວຕໍ່ລັດທິກໍ່ການຮ້າຍແມ່ນສິ່ງທ້າທາຍດ້ານການເມືອງຢ່າງໃຫຍ່ຫຼວງທີ່ມີຕໍ່ອຳນາດການປົກຄອງຂອງທ່ານນາຍົກລັດຖະມົນຕີຍີປຸ່ນ SinZo Abe . ແນ່ນອນວ່າ ຈະບໍ່ມີການປ່ຽນແປງໃດໆໃນນະໂຍບາຍປ້ອງກັນຄວາມສະຫງົບຂອງຍີປຸ່ນໃນໄລຍະທີ່ຈະມາເຖິງ ແລະ ປະເທດນີ້ຈະບໍ່ປະລະບັນດາຄຳໝັ້ນສັນຍາຂຶອງຕົນໃນການສູ້ຮົບຕ້ານກໍ່ການຮ້າຍ.
ຍີປຸນລົດທຸງລົງເຄິ່ງເສົາເພື່ອອາໄລຫາພົນລະເມືອງ 2 ຄົນຂອງປະເທດນີ້ຖືກພວກມຸດສະລິມຫົວຮຸນແຮງຢູ່ຊີຣີສັງຫານ.
(ພາບ:Reuters) |
ຍີປຸ່ນ ຊຶ່ງແມ່ນປະເທດໄດ້ຮັບຖືວ່າ ແມ່ນປະເທດທີ່ມີຄວາມປອດໄພນັບແຕ່ສົງຄາມໂລກຄັ້ງທີ 2 ເປັນຕົ້ນມາ ຫາກໍໄດ້ຮັບເຫດຮ້າຍ, ຂະນະທີ່ພົນລະເມືອງ 2 ຄົນຂອງປະເທດນີ້ຖືກພວກມຸດສະລິມຫົວຮຸນແຮງຢູ່ຊີຣີສັງຫານ. ພາຍຫຼັງທີ່ກໍລະນີນີ້ເກີດຂຶ້ນ, ໄດ້ມີຄວາມວິຕົກກັງວົນຕໍ່ຄວາມປອດໄພຂອງພົນລະເມຶືອງຍີປຸ່ນທັງຢູ່ພາຍໃນ ແລະ ຕ່າງປະເທດໃນອະນາຄົດ ກໍຄືການສະໜັບສະໜູນຂອງມະຫາຊົນທີ່ມີຕໍ່ນະໂຍບາຍການຕ່າງປະເທດ, ໂດຍສະເພາະແມ່ນການຮັບຮອງເອົາລັດຖະທຳມະນູນ, ໃນນັ້ນອະນຸຍາດໃຫ້ກຳລັງປ້ອງກັນຕົວຂອງຍີປຸ່ນ ສວມບົດບາດເປັນເຈົ້າການ ແລະ ຕັ້ງໜ້າກ່ວາຢູ່ຕ່າງປະເທດ.
ບໍ່ປະລະ ການສູ້ຮົບຕ້ານກໍ່ການຮ້າຍ
ຫວນຄືນປະຫວັດສາດ, ນີ້ບໍ່ແມ່ນເທຶ່ອທຳອິດທີ່ຍີປຸ່ນຕ້ອງປະເຊີນໜ້າກັບວິກິດການເຊັ່ນນັ້ນ. ປີ 1992, ສະພາແຫ່ງຊາດຍີປຸ່ນໄດ້ຮັບຮອງເອົາກົດໝາຍອະນຸຍາດໃຫ້ປະເທດນີ້ຈັດສົ່ງພົນທະຫານ ແລະ ບັນດາກຳລັງອື່ນໆເຂົ້າຮ່ວມພາລະກຳປົກປັກຮັກສາສັນຕິພາບຂອງ ສ.ປ.ຊ. ຫຼັງຈາກນັ້ນ 1 ປີ, ຕຳຫຼວດຄົນໜຶ່ງຂອງຍີປຸ່ນໄດ້ຖືກສັງຫານຢູ່ກຳປູເຈຍ. ປີ 2004, ເລື່ອງຕົວປະກັນຊາວຍີປຸ່ນຄົນໜຶ່ງຖືກສັງຫານຢູ່ອີຣັກ ພາຍຫຼັງທີ່ຍີປຸ່ນໄດ້ຈັດສົ່ງພົນທະຫານນັບຮ້ອຍຄົນໄປຍັງອີຣັກ ແນໃສ່ໜູນຊ່ວຍກິດຈະການສ້າງສາຄືນໃໝ່ຂອງອີຣັກ ໄດ້ເຮັດໃຫ້ເພີ່ມທະວີກຳລັງດັນຕໍ່ລັດຖະບານ ທ່ວງໃຫ້ຖອນທະຫານກັບຄືນປະເທດ. ເຖິງຢ່າງໃດກໍຕາມ, ພາລະກຳນີ້ ຍັງຄົງສືບຕໍ່ປະຕິບັດຈົນຮອດປີ 2006.
ພາຍຫຼັງ 1 ທົດສະວັດ, ເມື່ອກັບຄືນກຳອຳນາດໃນປີ 2012, ທ່ານນາຍົກລັດຖະມົນຕີຍີປຸ່ນ SinZo Abeສືບຕໍ່ມານະພະຍາຍາມຊຸກຍູ້ຍີປຸ່ນ ຈົ່ງສວມບົດບາດໃຫຍ່ກ່ວາໃນເວທີ່ສາກົນ. ໃນ 2 ປີທີ່ຜ່ານມາ, ທ່ານນາຍົກລັດຖະມົນຕີຍີປຸ່ນ SinZo Abe ໄດ້ທຳການຢ້ຽມຢາມຕ່າງປະເທດຫຼາຍກ່ວານາຍົກລັດຖະມົນຕີສະໄໝກ່ອນ. ການຢ້ຽມຢາມເມື່ອມໍ່ໆມານີ້ ແມ່ນຢູ່ຕາເວັນອອກກາງ ຊຶ່ງແມ່ນແຫ່ງທີ່ທ່ານໄດ້ໝັ້ນໝາຍສະໜອງເງິນຊ່ວຍເຫຼືອມະນຸດສະທຳ 200 ລ້ານ USDໃຫ້ແກ່ບັນດາປະເທດພວມສູ້ຮົບຕ້ານ IS . ນີ້ກໍແມ່ນຂໍ້ອ້າງອີງເພື່ອໃຫ້ນັກການເມືອງຝ່າຍຄ້ານບາງທ່ານຢູ່ຍີປຸ່ນ ກ່າວປະນາມລັດຖະບານກຳອຳນາດ ແລະ ຖືວ່າ ບ້ວງເງິນ 200 ລ້ານ USD ດັ່ງກ່າວ ແມ່ນສາຍເຫດພາໃຫ້ພົນລະເມືອງ 2 ຄົນຂອງປະເທດນີ້ຖືກສັງຫານ, ອັນໄດ້ເຮັດໃຫ້ຍີປຸ່ນຕົກເຂົ້າສູ່ວິກິດການຕົວປະກັນຢ່າງບໍ່ເຄີຍມີມາກ່ອນ.
ໂດຍບໍ່ຫົວຊາຕໍ່ຄຳກ່າວຫາ, ທ່ານນາຍົກລັດຖະມົນຕີຍີປຸ່ນ SinZo Abe ຍັງຄົງຍຶດໝັ້ນກັບແຜນນະໂຍບາຍຕ້ານກໍ່ການຮ້າຍ. ທີ່ການປະຊຸມກັບສະພາປ້ອງກັນຄວາມສະຫງົບແຫ່ງຊາດບີປຸ່ນ ພາຍຫຼັງຕົວປະກັນຄົນທີ່ 2 ຂອງຍີປຸ່ນຖືກສັງຫານ. ທ່ານນາຍົກລັດຖະມົນຕີຍີປຸ່ນ SinZo Abe ຢືນຢັນວ່າ ຍີປຸ່ນບໍ່ຜ່ອນສັ້ນຜ່ອນຍາວຕໍ່ລັດທິກໍ່ການຮ້າຍ ແລະ ໃນບາງກໍລະນີລະອຽດ ແມ່ນອາດຈະຍົກອອກບັນດານະໂຍບາຍທີ່ສອດຄ່ອງກັບນະໂຍບາຍການຕ່າງປະເທດ, ສອດຄ່ອງກັບຜົນປະໂຫຍດແຫ່ງຊາດ.
ສ້າງທ່າສະໜາມປ້ອງກັນຄວາມສະຫງົບໃໝ່
ກໍລະນີ IS ສັງຫານຕົວປະກັນຊາວຍີປຸ່ນ 2 ຄົນ, ບໍ່ເຮັດໃຫ້ປະເທດນີ້ທໍ້ຖອຍໃຈ, ແຕ່ກົງກັນຂ້າມ, ຍິ່ງກະຕຸກຊຸກຍູ້ ທ່ານນາຍົກລັດຖະມົນຕີຍີປຸ່ນ SinZo Abe ແລະ ສະພາແຫ່ງຊາດ ເດັດດຽວກ່ວາໃນການປັບປຸງລັດຖະທຳມະນູນເພື່ອອະນຸຍາດໃຫ້ກອງທັບສາມາດດຳເນີນບັ້ນກອບກູ້ຊີວິດຕົວປະກັນຢູ່ຕ່າງປະເທດ.
ສະພາບຄວາມທ້າທາຍຕໍ່ຄວາມສະຫງົບປອດໄພທີ່ມີຕໍ່ຍີປຸ່ນ ແລະ ພາກພື້ນພວມຮ້ອນເຮັ່ງຂຶ້ນ ແລະ ດູນສິດອຳນາດໃນພາກພື້ນພວມມີການປ່ຽນແປງຕ່າງໆ ອັນໄດ້ທວງໃຫ້ຍີປຸ່ນຕ້ອງເດີນຕາມນະໂຍບາຍປ້ອງກັນຄວາມສະຫງົບຢ່າງມີໄຫວພີກກວ່າ. ວິກິດການຕົວປະກັນໄດ້ພາໄປເຖິງຄວາມຈິງທີ່ວ່າ ຍີປຸ່ນຕ້ອງມີທ່າສະໜາມປ້ອງກັນຄວາມສະຫງົບຢ່າງມີໄຫວພີກ ແລະ ເປັນເຈົ້າການກ່ວາເກົ່າ. ລັດຖະບານຄວນຄວບຄຸມວິກິດການຢ່າງມີປະສີດທິຜົນກ່ວາ. ເລື່ອງປະສານງານກຳລັງປ້ອງກັນຕົວ ແລະ ປ້ອງກັນຄວາມສະຫງົບຄືນໃໝ່ເພື່ອແກ້ໄຂໄພອັນຕະລາຍໃໝ່ ກໍຄວນໄດ້ຮັບບຸລິມະສິດ. ຜ່ານເຫດການນີ້, ລັດຖະບານຍີປຸ່ນຍິ່ງໄດ້ຮັບການສະໜັບສະໜູນຈາກປະຊາຊົນໃນການສູ້ຮົບຕ້ານລັດທິກໍ່ການຮ້າຍ.
ວິກິດການຕົວປະກັນຄັ້ງນີ້ ແມ່ນກຳລັງຊຸກຍູ້ຊ່ວຍເພີ່ມທະວີຄວາມຕັດສິນໃຈຂອງທ່ານນາຍົກລັດຖະມົນຕີຍີປຸ່ນ SinZo Abe ທີ່ແນໃສ່ຫັນຍຸດທະສາດ “ສັນຕິພາບໂດຍເປັນເຈົ້າການ ” ໃຫ້ປະກົດຜົນເປັນຈິງ ເພື່ອນຳຍີປຸ່ນກາຍເປັນປະເທດທີ່ມີລະດັບສົ່ງຜົນສະທ້ອນໄປຍັງທົ່ວໂລກ.