(vovworld)-ໄດ້ເຮັດວຽກໃນສະພາບແວດລ້ອມຍຸຕິທຳ, ປອດໄພ, ໄດ້ຮັບເງິນເດືອນ ແລະ ລະບອບພັກຜ່ອນ, ບໍ່ຖືກຈຳແນກການປະພຶດ, ບໍຖືກຂູດຮີດແຮງງານ ….. ແມ່ນບັນດາສິດພື້ນຖານຊື່ງໄດ້ຮັບການກຳນົດໃນສົນທິສັນຍາສາກົນກ່ຽວກັບບັນດາສິດພົນລະເຮືອນ ແລະ ການເມືອງ, ໃນກົດໝາຍສິດທິມະນຸດສາກົນ ຊື່ງຫວຽດນາມ ແມ່ນປະເທດສະມາຊິກ. ນີ້ກໍແມ່ນເນື້ອໃນປຶກສາຫາລືໃນຂອບເຂດກອງປະຊຸມບໍ່ເປັນທາງການຄັ້ງທີ 14 ຂອງເວທີປາໄສ ອາຊີ -ເອີລົບ(ASEM) ກ່ຽວກັບສິດທິມະນຸດ ແລະ ວິສາຫະກິດ ພາຍໃຕ້ຫົວຂໍ້ວ່າ: ວິສາຫະກິດ ແລະ ສິດທິມະນຸດ”ທີ່ພວມດຳເນີນໄປຢູ່ ຮ່າໂນ້ຍ.
ພາບປະກອບ:vov.vn
|
ໃນສະພາວະໂລກາພິວັດ ແລະ ເຊື່ອມໂຍງເຂົ້າກັບສາກົນປະຈຸບັນ, ບັນຫາສິດທິມະນຸດ, ໃນນັ້ນ ສິດຂອງຄົນງານໄດ້ຮັບຄວາມສົນໃຈຫລາຍ ແລະ ແຕ່ລະປະເທດລ້ວນແຕ່ເອົາໃຈໃສ່ເປັນພິເສດເຖິງການປົກປ້ອງສິດທິມະນຸດ.
ລັດສວມບົດບາດສຳຄັນເພື່ອຮັບປະກັນສິດທິມະນຸດໄດ້ຮັບການປະຕິບັດ
ຢູ່ຫວຽດນາມ, ຮັບປະກັນສິດຂອງປະຊາຊົນເວົ້າລວມ, ຄົນງານເວົ້າສະເພາະແມ່ນແຜນນະໂຍບາຍ, ນະໂຍບາຍໃຫຍ່, ໄດ້ຮັບການລະບຸໄວ້ໃນເອກະສານດ້ານກົດໝາຍສຳຄັນຫລາຍສະບັບຂອງລັດ. ທ່ານ ດັ້ງຢູງຈີ, ຫົວຫນ້າສະຖາບັນຄົ້ນຄ້ວາສິດທິມະນຸດ ຢືນຢັນວ່າ:
“ຢູ່ຫວຽດນາມ, ສິ່ງດັ່ງກ່າວໄດ້ຮັບຄວາມເອົາໃຈໃສ່ນັບແຕ່ດົນນານແລ້ວ. ນັບແຕ່ເມື່ອສ້າງຕັ້ງລັດແຫ່ງສາທາລະນະລັດປະຊາທິປະໄຕຫວຽດນາມ, ບັນດາລັດຖະທຳມະນູນຂອງຫວຽດນາມ ລ້ວນແຕ່ກຳນົດຢ່າງຈະແຈ້ງບັນດາສິດນີ້. ພິເສດ ລັດຖະທຳມະນູນສະບັບປັບປຸງປີ 2013 ມີບັນດາຂໍ້ກຳນົດລະອຽດທີ່ສຸດ, ນັ້ນແມ່ນ ພົນລະເມືອງມີສິດເຮັດວຽກ, ເລືອກເຟັ້ນອາຊີບ, ວຽກເຮັດງານທຳ ແລະ ບ່ອນເຮັດວຽກ. ຜູ້ເຮັດວຽກຮັບເງິນເດືອນ ໄດ້ຮັບປະກັນບັນດາສິດ ໄດ້ເຮັດວຽກຢ່າງຍຸຕິທຳ, ປອດໄພ, ໄດ້ຮັບເງິນເດືອນ ແລະ ລະບອບນະໂຍບາຍໃນການພັກຜ່ອນ ແລະ ຫ້າມຖືກຈຳແນກການປະພຶດ, ການຂູດຮີດແຮງງານ. ບັນດາຂໍ້ກຳນົດນີ້ຂອງຫວຽດນາມ ສ່ວນຫລາຍແມ່ນເໝາະສົມກັບບັນດາຂໍ້ກຳນົດຂອງສົນທິສັນຍາສາກົນກ່ຽວກັບສິດທິມະນຸດໃນຂົງເຂດປົກປ້ອງສິດຂອງຄົນງານ.”
ຄຽງຄູ່ກັບລັດຖະທຳມະນູນປີ 2013 ດ້ວຍຫລາຍເນື້ອໃນທີ່ກ້າວຫນ້າກ່ຽວກັບສິດຂອງຄົນງານ ທີ່ໄດ້ມີຜົນສັກສິດແຕ່ວັນທີ 1/1/2014 ເປັນຕົ້ນໄປ, ກົດໝາຍວ່າດ້ວຍແຮງງານສະບັບປັບປຸງປີ 2013, ກົດໝາຍວ່າດ້ວຍປະກັນສັງຄົມ ກໍໄດ້ມີ ຫລາຍຂໍ້ກຳນົດທີ່ລະອຽດ. ນີ້ແມ່ນບັນດາກອບກົດໝາຍສາກົນສຳຄັນທີ່ສຸດຂອງປະເທດຫນຶ່ງ, ຮັບປະກັນສິດຂອງຄົນງານຢູ່ຫວຽດນາມ, ໃນສະພາບປະເທດຊາດພວມເຊື່ອມໂຍງ ແລະ ພັດທະນາຢ່າງແຮງ. ທ່ານຫວູກວາງທໍ້, ຫົວຫນ້າສະຖາບັນກຳມະກອນ ແລະ ກຳມະບານ, ສັງກັດສະຫະພັນໃຫຍ່ແຮງງານຫວຽດນາມ ຖືວ່າ:
“ຂ້າພະເຈົ້າສາມາດຢືນຢັນໄດ້ວ່າ: ຢູ່ ຫວຽດນາມ ປະມວນກົດໝາຍແຮງງານ, ບັນດາມາດຕາຊື່ງລັດຖະບານໄດ້ກຳນົດ ລ້ວນແຕ່ມຸ່ງໄປເຖິງຄົນງານ, ນັບທັງວຽກເຮັດງານທຳ, ເງິນເດືອນ, ປະກັນໄພ ແລະ ເງື່ອນໄຂເຮັດວຽກ.”
ປົກປ້ອງສິດຜົນປະໂຫຍດຂອງຄົນງານຜ່ານຄວາມຮັບຜິດຊອບສັງຄົມຂອງວິສາຫະກິດ
ໃນຊຸມມື້ມໍ່ໆມານີ້ ພ້ອມກັບແຜນນະໂຍບາຍຮ່ວມມື, ພັດທະນາ ແລະ ເຊື່ອມເຍງເຂົ້າກັບເສດຖະກິດໂລກ, ປະຊາຄົມບັນດາວິສາຫະກິດ ຢູ່ ຫວຽດນາມໄດ້ຕັ້ງຫນ້າ ແລະເປັນເຈົ້າການປະຕິບັດການເຄື່ອນໄຫວສະແດງໃຫ້ເຫັນຄວາມຮັບຜິດຊອບຂອງວິສາຫະກິດຕໍ່ສັງຄົມ. ຄວາມຮັບຮູ້ຂອງບັນດາວິສາຫະກິດຫວຽດນາມ ໄດ້ມີການຫັນປ່ຽນຢ່າງເຫັນໄດ້ຊັດກ່ຽວກັບຄວາມຮັບຜິດຊອບຕໍ່ສັງຄົມ.
ຕາມທ່ານ ຫວູກວາງທໍ້, ຫົວຫນ້າສະຖາບັນກຳມະກອນ ແລະ ກຳມະບານ, ສັງກັດສະຫະພັນໃຫຍ່ແຮງງານຫວຽດນາມແລ້ວ, ດ້ວຍບົດບາດເຊື່ອມຕໍ່ລະຫວ່າງ ວິສາຫະກິດ ແລະ ຄົນງານ, ກຳມະບານຫວຽດນາມ ມີບົດບາດສຳຄັນໃນການຕິດຕາມກວດກາ, ຍົກສູງຄວາມຮັບຜິດຊອບຂອງວິສາຫະກິດ.
“ກຳມະບານໄດ້ຊີ້ນຳຢ່າງຂ້ຽວຂາດເພື່ອປະຕິບັດການເຊື່ອມຕໍ່ລະຫວ່າງຜູ້ນຳໃຊ້ຄົນງານ ແລະ ຄົນງານ ເພື່ອກ້າວໄປເຖິງຄວາມເປັນເອກະພາບໃນທຸກການເຈລະຈາ ແລະ ປຶກສາຫາລື. ພິເສດ ເມືື່ອລົງນາມໃນສັນຍາແຮງງານລວມໝູ່, ສິດໃດຂອງຄົນງານທີ່ໄດ້ຮັບການກຳນົດແມ່ນຕ້ອງປະຕິບັດ.”
ຊື່ງແມ່ນສະມາຊິກຂອງອົງການແຮງງານສາກົນ (ILO, ຫວຽດນາມ ໄດ້ຕັ້ງຫນ້າຊຸກຍູ້ເລື່ອງໃຫ້ສັດຕະຍາບັນບາງສົນທິສັນຍາຂອງ ILO. ໄລ່ມາຮອດປີ 2014, ຍອດຈຳນວນບັນດາສົນທິສັນຍາສາກົນຂອງ ILO ຊື່ງຫວຽດນາມ ໄດ້ໃຫ້ສັດຕະຍາບັນ ແມ່ນ 21 ສະບັບ. ບັນດາຫລັກການພື້ນຖານຂອງ ILO ກ່ຽວກັບຄວາມຮັບຜິດຊອບສັງຄົມຂອງບັນດາວິສາຫະກິດ ແລະ ບັນດາການກຳນົດໃນ ສົນທິສັນຍາຕ່າງໆໂດຍ ຫວຽດນາມໃຫ້ສັດຕະຍາບັນ ລ້ວນແຕ່ສະແດງໃຫ້ເຫັນໃນກົດໝາຍຊອງຊາດ ແລະ ໄດ້ຮັບການປະຕິບັດຢ່າງເຂັ້ມງວດຈາກປະຊາຄົມວິສາຫະກິດຢູ່ຫວຽດນາມ.
ໃນສະພາວະນີ້, ເລື່ອງຫວຽດນາມເປັນເຈົ້າການຈັດຕັ້ງກອງປະຊຸມບໍ່ເປັນທາງການຄັ້ງທີ 14ຂອງເວທີ ປາໃສ ອາຊີ - ເອີລົບ ກ່ຽວກັບສິດທິມະນຸດ ແລະ ວິສາຫະກິດ ສະແດງໃຫ້ເຫັນຄວາມຮັບຜິດຊອບຂອງຫວຽດນາມ ຕໍ່ກັບເວທີປາໄສ ASEM ຊື່ງຫວຽດນາມ ແມ່ນສະມາຊິກ. ພິເສດ ໃນຖານະເປັນສະມາຊິກຂອງອົງການສິດທິມະນຸດ ສປຊ, ຫວຽດນາມ ປາດຖະຫນາດຢາກສົ່ງສານທີ່ວ່າ ຍາມໃດຫວຽດນາມກໍເຄົາລົບບັນດາຄຸນຄ່າກ່ຽວກັບສິດທິມະນຸດ ແລະ ພ້ອມແລ້ວທີ່ຈະເຈລະຈາເພື່ອຮັດແຄບບັນດາຄວາມແຕກຕ່າງກັນ. ປົກປ້ອງສິດຂອງຄົນງານ ກໍແມ່ນການບຸລິມະສິດໃນປະຈຸບັນຂອງຫວຽດນາມໃນຂະບວນວິວັດການສ້າງໂຄງປະກອບເສດຖະກິດຄືນໃຫມ່, ຍົກສູງກຳລັງແກ້ງແຍ້ງຂອງພື້ນຖານເສດຖະກິດ ແລະ ຮັບປະກັນການພັດທະນາແບບຍືນຍົງ.