(vovworld)- ວັນທີ 4/12 ຜ່ານມາ, ມີພົນທະຫານ ຕວກກີ ຫລາຍຄົນ ໄດ້ແຊກຊືມເຂົ້າເຂດດິນແດນ ອີຣັກ ຢ່າງຜິດກົດໝາຍ ດ້ວຍເຫດຜົນເພື່ອອົບຮົບບັນດາມືປືນ ຊາວ ເຄີດສ(Kurd) ຕ້ານກຳລັງລັດອິດສະລາມ ອ້າງຊື່ເອງ (IS). ເຫດການດັ່ງກ່າວບໍ່ພຽງແຕ່ເຮັດໃຫ້ ອີຣັກ ຂາດສະຖຽນລະພາບຕື່ມອີກ, ສົ່ງຜົນສະທ້ອນເຖິງການພົວພັນສອງຝ່າຍ ເທົ່ານັ້ນ ຫາກຍັງເຮັດໃຫ້ຄວາມສະຫງົບປອດໄພຂອງເຂດຕາເວັນອອກກາງຕົກເຂົ້າສູ່ສະພາບອັນຕະລາຍໃຫມ່.
ຕວກກີ ສົ່ງກຳລັງທະຫານເຖິງ ອີຣັກ
ພາບ:DHA
|
ຕາມສື່ສານສາກົນແລ້ວ, ມີພົນທະຫານ ຕວກກີ ປະມານ 130-150 ຄົນດ້ວຍການຄຸ້ມຊຸຂອງລົດຫຸ້ມເກາະໄດ້ບຸກເຂົ້າບໍລິເວນທີ່ມໍ່ກັບ ນະຄອນ Mosul ຂອງອີຣັກ ເມື່ອວັນທີ 4/12 ໂດຍບໍ່ຂໍອະນຸຍາດຈາກ ແບກແດດ. ໃນຂະນະນັ້ນ, ຫນັງສືພິມ Sabah ຂອງຕວກກີ ໃຫ້ຮູ້ວ່າ: ປະຈຸບັນ ປະເທດນີ້ມີພົນທະຫານບົກປະມານ 1.200 ຄົນ ແລະ ທະຫານບົກປະກອບຍານຍົນ 500 ຄົນ ພ້ອມກັບລົດຖັງ, ລົດຫຸ້ມເກາະຫລາຍຄັນ ແລະ ປືນໃຫຍ່ຫລາຍກະບອກທີ່ຕັ້ງຢູ່ເຂດມໍ່ກັບນະຄອນ Mosul ຂອງອີຣັກ. ແຕ່ປີ 2014, ຕວກກີ ໄດ້ສ້າງຄ້າຍອົບຮົມຢູ່ Bashiqa ຊານນະຄອນ Mosul ໃຫ້ແກ່ປະຊາຊົນ ແລະ ທະຫານຊາວ ເຄີດສ ພ້ອມທັງສ້າງຕັ້ງຖານທີ່ໝັ້ນຕື່ມອີກ 2 ແຫ່ງ ຢູ່ Soran ແລະ Qalacholan ຂຶ້ນກັບເຂດປົກຄອງດ້ວຍຕົນເອງຂອງຊາວເຄີດສຢູ່ ພາກເຫນືອ ອີຣັກ.
ຄວາມເຄັ່ງຕຶງໃນການພົວພັນສອງຝ່າຍ
ວົງການເຈົ້າຫນ້າທີ່ ຕວກກີ ໄດ້ແກ້ຄວາມໃຫ້ແກ່ການຜັນຂະຫຍາຍພົນທະຫານ ຢູ່ ອີຣັກ ເມື່ອວັນທີ 4/12 ວ່ານີ້ພຽງແຕ່ແມ່ນການເຄື່ອນໄຫວທຳມະດາ, ແມ່ນການເພີ່ມທະວີກຳລັງທະຫານ ເພື່ອປະເຊີນຫນ້າກັບບັນດາຄວາມສ່ຽງດ້ານຄວາມສະຫງົບປອດໄພ. ໃນປີຜ່ານມາ, ມີ ມືປືນອາສາສະໝັກປະມານ 2000 ຄົນ ຈາກ Mosul ໄດ້ຮັບການອົບຮົມ ຢູ່ ຄ້າຍທະຫານຕວກກີ ໃນເຂດດິນແດນ ອີຣັກ ເພື່ອຕ້ານ IS. ໃນລາຍການອົບຮົມນີ້ໄດ້ຮັບການຜັນຂະຫຍາຍຕາມຄຳສະເຫນີຂອງອຳນາດການປົກຄອງ ເຂດ Mosul ແລະ ມີການສົມທົບຂອງກະຊວງປ້ອງກັນປະເທດ ອີຣັກ. ເຖິງຢ່າງໃດກໍຕາມ ຜູ້ຕາງຫນ້າພັກພັນທະມິດຮັກຊາດ Kurdistan (PUK) Saadi Ahmed Pira Kurdistan, ໃຫ້ຮູ້ວ່າ: ບໍ່ມີຂໍ້ຕົກລົງໃດກັບ ຕວກກີ ກ່ຽວກັບການສ້າງຕັ້ງຖານທີ່ໝັ້ນການທະຫານຢູ່ເຂດປົກຄອງດ້ວຍຕົນເອງ Kurdistan ຢູ່ ອີຣັກ. ມີພຽງສົນທິສັນຍາສະບັບຫນຶ່ງດຽວໄດ້ຮັບການລົງນາມກັບພັນທະມິດສາກົນ ຊື່ງລວມມີ 62 ປະເທດ, ໃນນັ້ນມີຕວກກີ. ເຖິງຢ່າງໃດກໍຕາມ, ຂໍ້ຕົກລົງນີ້ ບໍ່ອະນຸຍາດໃຫ້ບັນດາຖານທີ່ໝັ້ນການທະຫານມີຫນ້າຢູ່ ອີຣັກ ຫາກພຽງແຕ່ມີການຫນູນຊ່ວຍທາງອາກາດ ແລະ ອົບຮົມກຳລັງຊາວເຄີດສ ຕ້ານກໍ່ການຮ້າຍເທົ່ານັ້ນ.”
ລັດຖະບານ ອີຣັກ ໄດ້ຄັດຄ້ານການແກ້ຄວາມດັ່ງກ່າວຂອງ ຕວກກີ. ວັນທີ 6/12 ອີຣັກ ໄດ້ຖະແຫລງວ່າ ຈະຂໍຄວາມຊ່ວຍເຫລືອຈາກ ສປຊ ຖ້າຫາກຈຳນວນພົນທະຫານ ຕວກກີ ທີ່ສົ່ງເຖິງພາກເຫນືອ ອີຣັກນັ້ນບໍ່ຖອນອອກຈາກປະເທດນີ້ໃນເວລາ 48 ຊົ່ວໂມງ. ໃນຂະນະນັ້ນ ສະມາຊິກສະພາແຫ່ງຊາດ ອີຣັກ ຈຳນວນຫນຶ່ງ ໄດ້ຮຽກຮ້ອງ ສະພາແຫ່ງຊາດຈັດການປະຊຸມດ່ວນ ເພື່ອຮັບຮອງເອົາບັນດາການກະທຳດ້ານການທະຫານທີ່ແຂງກະດ້າງກວ່າກັບປະເທດບ້ານໃກ້ເຮືອນຄຽງ. ປະທານ ກຳມາທິການປ້ອງກັນຄວາມສະຫງົບ ແລະ ປ້ອງກັນຊາດ ຂອງສະພາແຫ່ງຊາດ ອີຣັກ Hakim al Zamili ໄດ້ສະເຫນີລັດຖະບານ ສົ່ງເຮືອບິນບຸກໂຈມຕີທາງອາກາດໃສ່ບັນດາທີ່ຕັ້ງ ຊື່ງທະຫານຕວກກີ ແຊກຊືມ ເພື່ອໂຕ້ຕອບການກະທຳຊື່ງທ່ານຖືວ່າ ແມ່ນ “ການຮຸກຮານຢ່າງເປີດແປນປະເທດມີອະທິປະໄຕ”. ຕໍ່ຫນ້າປະຕິກິລິຍາຢ່າງແຮງຂອງ ອີຣັກ, ທ່ານ ນາຍົກລັດຖະມົນຕີ ຕວກກີ Almet Davutoglu ໄດ້ຖະແຫລງຢຸດຕິການສົ່ງກຳລັງທະຫານເຖິງ ອີຣັກ ແຕ່ບໍ່ເຕື້ອງເຖິງເລື່ອງຖອນພົນທະຫານເທື່ອ. ທ່ານ Ahmet Davutoglu ກໍປະຕິເສດບັນດາຂ່າວຄາວທີ່ຖືວ່າ ນີ້ແມ່ນການກະກຽມໃຫ້ບັ້ນຮົບການທະຫານຢູ່ ອີຣັກ. ຕໍ່ຫນ້າບັນດາການຜັນແປທີ່ເຄັ່ງຕຶງດັ່ງກ່າວ, ວັນທີ 8/12, ສະພາຄວາມໝັ້ນຄົງ ສປຊ ໄດ້ຮຽກໂຮມການປະຊຸມລັບກ່ຽວກັບເຫດການດັ່ງກ່າວ.
ໄພອັນຕະລາຍສຳລັບຄວາມສະຫງົບປອດໄພຢູ່ຕາເວັນອອກກາງ
ໂດຍແມ່ນປະເທດຕາເວັນອອກກາງ ດ້ວຍປະຊາຊົນສ່ວນຫລາຍແມ່ນຂຶ້ນກັບນິກາຍຊັນນີ, ຕວກກີ ມີການພົວພັນຢ່າງສະຫນິດແຫນ້ນກັບກຳລັງຊາວ ເຄີດສ ໂດຍນັກການເມືອງ Massoud Barzani ນຳພາ ຢູ່ອີຣັກ ກວ່າເມື່ອທຽບໃສ່ການພົວພັນກັບອຳນາດການປົກຄອງສູນກາງ ໂດຍ ຊາວນີກາຍຊີອາ ກຳສິດຄວບຄຸມຢູ່ ແບກແດດ.
ຕາມບັນດານັກໄຈ້ແຍກແລ້ວ, ເລື່ອງຜັນຂະຫຍາຍກຳລັງທະຫານຂອງ ຕວກກີ ຄັ້ງນີ້ ແມ່ນຍຸດທະສາດການທູດໃຫມ່ຂອງຕວກກີ. ການກະທຳແຂງກະດ້າງຂອງ Ankara ໃນໄລຍະຜ່ານມາ ໄດ້ພິສູດໃຫ້ເຫັນວ່າປະເທດນີ້ຢາກຄວບຄຸມເຂດຕາເວັນອອກກາງ. ສະນັ້ນ ຕວກກີ ໄດ້ສວຍໃຊ້ບັນດາກຸ່ມກໍ່ການຮ້າຍ ຫລື ຍາດແຍ່ງທຸກກາລະໂອກາດອື່ນ ເພື່ອໂຄ່ນລົ້ມອຳນາດການປົກຄອງທ້ອງຖິ່ນ. ຕາມບັນດານັກໄຈ້ແຍກ ດັ່ງກ່າວແລ້ວ, ໃນຂະນະສະພາບການຢູ່ຕາເວັນອອກກາງສັບສົນໃນຊຸມປີມໍ່ໆນີ້, Ankara ໄດ້ເຂົ້າຮ່ວມກຳລັງຝ່າຍຕາເວັນຕົກບຸກໂຈມຕີ ລີບີ ພ້ອມທັງ ສົ່ງກຳລັງທະຫານ ເຖິງ ອີຣັກ ແລະ ຊີຣີ. ທ່ານ Mehmet Kaya ຜູ້ອຳນວຍການສູນຄົ້ນຄ້ວາ Tigris ຢູ່ຕວກກີ ຖືວ່າ: ເລື່ອງປະເທດນີ້ ສົ່ງກຳລັງທະຫານເຖິງ Bashiqa ມໍ່ກັບນະຄອນ Mousul ແມ່ນຄວາມມານະພະຍາຍາມ ແນໃສ່ເຮັດໃຫ້ການພົວພັນລະຫວ່າງປະຊາຄົມ ຊາວເຄີດສ ປົກຄອງດ້ວຍຕົນເອງ ຢູ່ ອີຣັກ ກັບອຳນາດການປົກຄອງສູນກາງຂອງປະເທດນີ້ ຊົ່ວຮ້າຍລົງ, ເພີ່ມທະວີທີ່ຕັ້ງບົດບາດຂອງ ຕວກກີ ໃນພາກພື້ນ. ທ່ານ Aaron Stein, ຜູ້ຊ່ຽວຊານ ສະພາມະຫາສະມຸດອັດລັງຕິກ ຢູ່ ວໍຊິງຕັນ ໄດ້ໃຫ້ຂໍ້ສັງເກດວ່າ: ນີ້ແນ່ນອນວ່າແມ່ນສ່ວນຫນຶ່ງໃນຄວາມໄຝ່ຝັນໂຮມດິນແດນໂດຍ ຊາວເຄີດສ ຄວບຄຸມ ຢູ່ ອີຣັກ ເຂົ້າຕວກກີ.
ເລື່ອງ ຕວກກີ ສົ່ງທະຫານເຂົ້າ ອີຣັກ ຕາມລຳພັງຝ່າຍດຽວ ແມ່ນບາດກ້າວພະຈົນໄພ ເມື່ອບັນດາຄວາມເຄັ່ງຕຶງທີ່ກ່ຽວຂ້ອງເຖິງກໍລະນີທະຫານ ຕວກກີ ຍິງເຮືອບິນສູ້ຮົບ Su 24 ຂອງລັດເຊຍ ຕົກທີ່ບໍ່ທັນໄດ້ຮັບການແກ້ໄຂຢ່າງເຖິງຖອງ. ການກະທຳນີ້ ເຮັດໃຫ້ສະພາບຄວາມສະຫງົບປອດໄພຢູ່ ເຂດຕາເວັນອອກກາງສັບສົນຂຶ້ນຕື່ມ.