ກອງປະຊຸມສຳມະນາ “ ກຳມາທິການກ່ຽວກັບບັນດາບັນຫາສັງຄົມຂອງສະພາແຫ່ງຊາດດ້ວຍນະໂຍບາຍ, ກົດໝາຍຊຸກຍູ້ຄວາມກ້າວໜ້າ ແລະ ຍຸດຕິທຳທາງສັງຄົມ ” ໄດ້ຖືກຈັກຂຶ້ນໃນວັນທີ 26 ແລະ 27/6 ຢູ່ຮ່າໂນ້ຍ ເນື່ອງໃນໂອກາດສະເຫຼີມສະຫຼອງ 40 ປີແຫ່ງວັນສ້າງຕັ້ງ ກຳມາທິການກ່ຽວກັບບັນດາບັນຫາສັງຄົມ(2/7/1976-2/7/2016). ກອງປະຊຸມສຳມະນາຄັ້ງນີ້ໄດ້ສະແດງໃຫ້ເຫັນວ່າ ໃນກ່ວາ 40 ປີທີ່ຜ່ານມາ, ກຳມາທິການກ່ຽວກັບບັນດາບັນຫາສັງຄົມຂອງສະພາແຫ່ງຊາດໄດ້ຢືນຢັນບົດບາດເປັນເສນາທິການ ແລະ ປະກອບສ່ວນຢ່າງແທດຈິງເຂົ້າໃນບັນດາຜົນງານທີ່ສຳຄັນຂອງການພັດທະນາລະບອບນະໂຍບາຍສັງຄົມຢູ່ຫວຽດນາມ.
ທ່ານນາງຫງວຽນທິກິມເງິນ ປະທານສະພາແຫ່ງຊາດຫວຽດນາມ |
ທີ່ກອງປະຊຸມສະໄໝສາມັນຄັ້ງປະຖົມມະເລີກສະພາແຫ່ງຊາດຫວຽດນາມຊຸດທີ 6, ສະພາແຫ່ງຊາດໄດ້ຮັບຮອງເອົາມະຕິກ່ຽວກດັບການສ້າງຕັ້ງບັນດາກຳມາທິການຂອງສະພາແຫ່ງຊາດ, ໃນນັ້ນມີກຳມາທິການສາທາລະນະສຸກ ແລະ ສັງຄົມຊຶ່ງແມ່ນຕົ້ນກຳເນີດຂອງກຳມາທິການກ່ຽວກັບບັນດາບັນຫາສັງຄົມ. ກຳມາທິການນີ້ໄດ້ປະກອບສ່ວນຫຼາຍພໍສົມຄວນເຂົ້າໃນການສ້າງລະບົບນະໂຍບາຍ, ກົດໝາຍສັງຄົມຊຶ່ງລວມທັງບັນດາຂົງເຂດແຮງງານ, ວຽກເຮັດງານທຳ, ການໜູນຊ່ວຍຊີວິດສັງຄົມ, ສຸຂາພິບານ, ປະຊາກອນ, ນະໂຍບາຍບຸລິມະສິດໃຫ້ແກ່ບັນດາຜູ້ທີ່ມີຄຸນງາມຄວາມດີ ແລະ ນະໂຍບາຍຊຸກຍູ້ຄວາມສະເໝີພາບລະຫວ່າງຍິງ-ຊາຍ… ຍົກສູງປະສິດທິຜົນແຫ່ງການປະຕິບັດ, ມຸ່ງໄປສູ່ຈຸດໝາຍຮັບການຊີວິດສັງຄົມຢູ່ຫວຽດນາມ.
ຊຸກຍູ້ບັນດາຄຸນຄ່າຄວາມກ້າວໜ້າ ແລະ ຍຸດຕິທຳທາງສັງຄົມເພື່ອມະນຸດ
ເປົ້າໝາຍປາຍທາງຂອງທຸກໆນະໂຍບາຍສັງຄົມຂອງຫວຽດນາມ ກໍລ້ວນແຕ່ເພື່ອແນໃສ່ສ້າງ, ພັດທະນາ ແລະ ນຳຊີວິດທີ່ອີ່ມໜຳສຳລານ ແລະ ຜາສຸກມາໃຫ້ມະນຸດ. ຈາກບັນດາກົດໝາຍ, ລັດຖະບັນຍັດໃນເບື້ອງຕົ້ນເຊັ່ນ: ກົດໝາຍວ່າດ້ວຍການຮັກສາສຸຂະພາບຂອງປະຊາຊົນ, ລັດຖະບັນຍັດກ່ຽວກັບພັນທະໃນການອອກແຮງງານສາທາລະນະປະໂຫຍດ, ລັດຖະບັນຍັດວ່າດ້ວຍການປ້ອງກັນແຮງງານ….ກຳມາທິການກ່ຽວກັບບັນດາບັນຫາສັງຄົມ ແລະ ສະພາແຫ່ງຊາດຜ່ານໄລຍະຕ່າງໆ ໄດ້ສ້າງລະບົບກົດໝາຍລົງເລິກຂະແໜງເພື່ອດັດປັບບັນດາຂົງເຂດສັງຄົມຢ່າງຮອບດ້ານ. ບົນພື້ນຖານນັ້ນ, ກົດໝາຍວ່າດ້ວຍແຮງງານ, ວຽກເຮັດງານທຳ, ສາທາລະນະສຸກ, ປະຊາກອນ, ຄວາມສະເໝີພາບລະຫວ່າງຍິງ-ຊາຍ, ການປ້ອງກັນ ແລະ ຕ້ານໄພສັງຄົມນັບມື້ນັບໄດ້ຮັບການສ້າງໃຫ້ສົມບູນແບບ, ຂອບເຂດເປົ້າໝາຍຊົມໃຊ້ນະໂຍບາຍກ່ຽວກັບບຸລິມະສິດສຳລັບຜູ້ທີ່ມີຄຸນງາມຄວາມດີຕໍ່ປະເທດຊາດ, ການປະກັນສັງຄົມ, ປະກັນສຸຂະພາບ, ຫຼຸດຜ່ອນຄວາມທຸກຍາກ, ການຊ່ວຍເຫຼືອສັງຄົມ…ນັບມື້ໄດ້ຮັບການເປີດກ້ວາງ, ລະດັບການໜູນຊ່ວຍໄດ້ຍົກສູງຂຶ້ນເທື່ອລະກ້າວໃຫ້ແທດເໝາະກັບສະພາບການເສດຖະກິດ ແລະ ຄວາມສາມາດທາງດ້ານງົບປະມານຂອງປະເທດຊາດໃນແຕ່ລະໄລຍະ. ນັບແຕ່ເລີ່ມປະຕິບັດກິດຈະການປ່ຽນແປງໃໝ່, ຫວຽດນາມໄດ້ມີຄວາມເອົາໃຈໃສ່ທີ່ມີລັກສະນະຍຸດທະສາດເຖິງການແກ້ໄຂບັນດາບັນຫາສັງຄົມ. ເປົ້າໝາຍ ແລະ ເນື້ອໃນຂອງນະໂຍບາຍສັງຄົມຊຶ່ງກຳມາທິການກ່ຽວກັບບັນດາບັນຫາສັງຄົມເປັນເສນາທິການໃນການສ້າງນັ້ນ ໄດ້ມີບັນດາບາດກ້າວຂະຫຍາຍຕົວຢ່າງແຂງແຮງ. ທ່ານນາງຫງວຽນທິກິມເງິນ ປະທານສະພາແຫ່ງຊາດຫວຽດນາມ ຢືນຢັນວ່າ :
“ ທາງກຳມາທິການໄດ້ກວດກາກົດໝາຍນັບສິບສະບັບ, ຍື່ນສະເໜີຕໍ່ສະພາແຫ່ງຊາດ, ຄະນະປະຈຳສະພາແຫ່ງຊາດບົດລາຍງານອະພິປາຍ, ບົດລາຍງານຕິດຕາມກວດກາ ແລະ ບັນດາຂໍ້ສະເໜີແນະທີ່ກ່ຽວຂ້ອງເຖິງການດຳລົງຊີວິດຂອງປະຊາຊົນກ່ຽວກັບນະໂຍບາຍໃຫ້ບຸລິມະສິດແກ່ຜູ້ທີ່ມີຄຸນງາມຄວາມດີຕໍ່ປະເທດຊາດ, ແຮງງານ, ວຽກເຮັດງານທຳ, ປະກັນສັງຄົມ, ປະກັນສຸຂະພາບ, ນະໂຍບາຍສາທາລະນະສຸກ, ປະຊາກອນ, ຫຼຸດຜ່ອນຄວາມທຸກຍາກ, ຄວາມສະເໝີພາບລະຫວ່າງຍິງ-ຊາຍ, ການປ້ອງກັນ ແລະ ຕ້ານໄພສັງຄົມ…ນັ້ນແມ່ນຍັງບໍ່ທັນເວົ້າເຖິງເລື່ອງກຳມາທິການໄດ້ເປັນປະທານກຸ່ມສ.ສ.ຊ ຍິງ, ເມື່ອເຂົ້າສູ່ການເຄື່ອນໄຫວຢ່າງມີປະສິດທິຜົນ ”
ສະເພາະໃນອາຍຸການຂອງສະພາແຫ່ງຊາດຊຸດທີ 13, ກຳມາທິການກ່ຽວກັບບັນດາບັນຫາສັງຄົມໄດ້ມານະພະຍາຍາມປະຕິບັດບັນດາວຽກງານໃຫຍ່ໃນທຸກຂົງເຂດ, ເຮັດສຳເລັດພາລະບົດບາດ ແລະ ໜ້າທີ່ຕາມລະບຽບກົດໝາຍ, ປະກອບສ່ວນເຂົ້າໃນການປ່ຽນແປງໃໝ່, ຍົກສູງຄຸນນະພາບປະສິດທິຜົນການເຄື່ອນໄຫວຂອງ ກຳມາທິການ, ສະພາແຫ່ງຊາດ. ຈາກໝາກຜົນແຫ່ງການເຄື່ອນໄຫວສ້າງກົດໝາຍ ແລະ ຕິດຕາມກວດກາ, ໃນອາຍຸການທີ່ຜ່ານມາ, ກຳມາທິການໄດ້ປະກອບສ່ວນສ້າງບັນດານະໂຍບາຍທີ່ສຳຄັນຄື: ນະໂຍບາຍສິນເຊື່ອບຸລິມະສິດ ສ້າງວຽກເຮັດງານທຳ, ນະໂຍບາຍສົ່ງແຮງງານໄປເຮັດວຽກຢູ່ຕ່າງປະເທດຕາມສັນຍາ; ບັນດານະໂຍບາຍປະກັນສັງຄົມ, ປະກັນການວ່າງງານ, ປະກັນສຸຂະພາບ ແນໃສ່ຮັບປະກັນແຫຼ່ງການເງິນເພື່ອທົດແທນສ່ວນໜຶ່ງລາຍຮັບຂອງຜູ້ອອກແຮງງານເມື່ອຖືກຫຼຸດຫຼືສູນເສຍລາຍຮັບ.
ນຳໃຊ້ທຸກແຫຼ່ງກຳລັງເພື່ອນຳນະໂຍບາຍເຂົ້າສູ່ພຶດຕິກຳຕົວຈິງ
ດ້ວຍຄວາມຂະຫຍັ່ນຂັ່ນເຄື່ອນ, ມີຫົວຄິດປະດິດສ້າງ, ເສີມຂະຫຍາຍສະຕິປັນຍາລວມໝູ່ ແລະ ປ່ຽນແປງໃໝ່ຢ່າງບໍ່ຢຸດຢັ້ງ, ກຳມາທິການກ່ຽວກັບບັນດາບັນຫາສັງຄົມໄດ້ປະກອບສ່ວນຢ່າງຕັ້ງໜ້າເຂົ້າໃນວິວັດການປ່ຽນແປງໃໝ່, ເປີດກ້ວາງປະຊາທິປະໄຕ, ການເຄື່ອນໄຫວຂອງສະພາແຫ່ງຊາດ ແລະ ສ້າງບັນດາຂີດໝາຍສຳຄັນໃນການເຄື່ອນໄຫວຂອງສະພາແຫ່ງຊາດຫວຽດນາມ. ທ່ານນາງ ຫງວຽນທິຮວ່າຍທູ ອະດີດປະທານ ກຳມາທິການກ່ຽວກັບບັນດາບັນຫາສັງຄົມຂອງສະພາແຫ່ງຊາດຊຸດທີ 11 ຖືວ່າ :
“ ບົດຮຽນທີ່ພວກຂ້າພະເຈົ້າຖອດຖອນມາໄດ້ນັ້ນ, ແມ່ນຕ້ອງເດັດດ່ຽວປົກປັກຮັກສາແນວຄວາມຄິດທີ່ເປັນແກ່ນສານບົນພື້ນຖານພຶດຕິກຳຂອງການດຳລົງຊີວິດ, ພ້ອມກັນນັ້ນ ກໍຮັບເອົາບັນດາຄຳຄິດຄຳເຫັນປະກອບ. ພວກຂ້າພະເຈົ້າຖືວ່າ ຕ້ອງເຮັດໃຫ້ໜັກແໜ້ນ, ບໍ່ຄວນຖອນແນວຄວາມຄິດນັ້ນອອກ ”
ຊຸກຍູ້ຄວາມກ້າວໜ້າ ແລະ ຍຸດຕິທຳທາງສັງຄົມໂດຍຜ່ານການສ້າງນະໂຍບາຍ ໄດ້ປະກອບສ່ວນຍົກສູງບົດບາດຂອງກຳມາທິການກ່ຽວກັບບັນດາບັນຫາສັງຄົມຂອງສະພາແຫ່ງຊາດຫວຽດນາມໃນຕະຫຼອດ 40 ປີທີ່ຜ່ານມາ. ສິ່ງດັ່ງກ່າວ ໄດ້ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ບັນດາຄຸນຄ່າຍຸດຕິທຳ ແລະ ຄວາມກ້າວໜ້າສັງຄົມໃນໄລຍະຫວຽດນາມຍູ້ແຮງການຫັນປະເທດຊາດເປັນປະເທດອຸດສາຫະກຳ ທັນສະໄໝ ແລະ ເຊື່ອມໂຍງເຂົ້າກັບສາກົນ.