(vovworld)- ກອງປະຊຸມບັນດາເຈົ້າຫນ້າທີ່ຂັ້ນສູງ ອາຊຽນ -ຈີນ ຄັ້ງທີ 12 ກ່ຽວກັບການປະຕິບັດຖະແຫລງການ ການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຈະດຳເນີນໃນວັນທີ 9/6 ຢູ່ ນະຄອນ ຮ້າລອງ ແຂວງ ກວ໋າງນີງ. ນີ້ແມ່ນກົນໄກປະຊຸມເປັນປະຈຳລະຫວ່າງອາຊຽນ ແລະ ຈີນ ເພື່ອປະຕິບັດ DOC ແລະ ມຸ່ງໄປເຖິງການສ້າງປະມວນຂໍ້ກຳນົດກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (COC). ໃນສະພາບການ COC ຍັງບໍ່ທັນໄດ້ຮັບການສ້າງຂຶ້ນນັ້ນ, DOC ຍັງຄົງໄດ້ຮັບຖືວ່າ ແມ່ນພື້ນຖານດ້ານນິຕິກຳສຳຄັນມີລັກສະນະຜູກມັດທີ່ສຸດລະຫວ່າງ ອາຊຽນ ແລະ ຈີນ ເພື່ອແກ້ໄຂບັນດາສິ່ງທ້າທາຍຕໍ່ຄວາມໝັ້ນຄົງຢູ່ທະເລຕາເວັນອອກ.
.jpg)
ບັນດາເຈົ້າຫນ້າທີ່ການທູດຂັ້ນສູງ ອາຊຽນ ຈີນ ທີ່ກອງປະຊຸມ
ຈັດຂຶ້ນຢູ່ ສິງກະໂປ
ພາບ:TTXVN
|
DOC ໄດ້ຮັບການລົງນາມທີ່ກອງປະຊຸມສຸດຍອດ ອາຊຽນ ເມື່ອວັນທີ 4/10/2002 ຢູ່ ນະຄອນຫລວງ ພະນົມເປັນ ປະເທດ ກຳປູເຈຍ. ຕາມເນື້ອໃນຂອງ DOC ແລ້ວ, ບັນດາຝ່າຍເຂົ້າຮ່ວມໃນການລົງນາມລ້ວນແຕ່ມີຄວາມເຫັນດີປະຕິບັດຕາມບັນດາມາດຕະຖານສາກົນກ່ຽວກັບການປະພຶດຄື: ແກ້ໄຂບັນດາການຂັດແຍ້ງໂດຍສັນຕິ, ບໍ່ນຳໃຊ້ຫລືນາບຂູ່ການນຳໃຊ້ອາວຸດ, ເຄົາລົບຄວາມເສລີໃນການເດີນເຮືອ, ຄວນລະງັບໃຈບໍ່ປະໃຫ້ການຂັດແຍ້ງສັບສົນຂຶ້ນຕື່ມຫລືປີນຂັ້ນໄດ, ດຳເນີນການເຈລະຈາ ແລະ ທາບທາມຄຳເຫັນ ແລະ ມານະພະຍາຍາມສ້າງປະມວນຂໍ້ກຳນົດການປະພຶດຂອງບັນດາຝ່າຍຢູ່ທະເລຕາເວັນອອກ (COC).
DOC: ຄວາມມານະພະຍາຍາມລວມຂອງ ອາຊຽນ ແລະ ຈີນ
ອາດຈະຢືນຢັນໄດ້ວ່າ ເລື່ອງລົງນາມໃນຖະແຫລງການ DOC ເມື່ອປີ 2002 ລະຫວ່າງ ອາຊຽນ ແລະ ຈີນ ແມ່ນໝາກຜົນຂອງຄວາມມານະພະຍາຍາມລວມຂອງທັງກຸ່ມ ອາຊຽນ ແລະ ຈີນ. ເພາະວ່າ ນີ້ແມ່ນເອກະສານລວມຄັ້ງທຳອິດລະຫວ່າງ ອາຊຽນ ແລະ ຈີນ ມີສ່ວນກ່ຽວຂ້ອງໂດຍກົງເຖິງບັນຫາທະເລຕາເວັນອອກ. ເລື່ອງລົງນາມໃນເອກະສານສະບັບນີ້ ໄດ້ຮັບຖືວ່າ ແມ່ນບາດກ້າວສຳຄັນກ່ຽວກັບການເຈລະຈາລະຫວ່າງ ຈີນ ແລະ ອາຊຽນ ຕໍ່ບັນດາບັນຫາຢູ່ທະເລ.
ການນຳຂັ້ນສູງ ຂອງ ອາຊຽນ ແລະ ຈີນ ຍາມໃດກໍຕີລາຄາສູງຄວາມໝາຍຂອງ DOC ແລະ ໄດ້ຢັ້ງຢືນເປັນຫລາຍຄັ້ງ ຄວາມຕັດສິນໃຈໃນການປະຕິບັດ DOC ຢ່າງຄົບຖ້ວນ ແລະ ມຸ່ງໄປເຖິງ COC. ຖະແຫລງການຮ່ວມຂອງບັນດາປະມຸກລັດ ແລະ ນາຍົກລັດຖະມົນຕີ ບັນດາປະເທດ ອາຊຽນ ແລະ ຈີນ ກ່ຽວກັບຄູ່ຮ່ວມມືຍຸດທະສາດ ອາຊຽນ -ຈີນ ຊື່ງໄດ້ຮັບການຮັບຮອງເອົາຢູ່ ບາລີ ປະເທດ ອິນໂດເນເຊຍ ເມື່ອວັນທີ 8/10/2003 ໄດ້ຢັ້ງຢືນວ່າ ການປະຕິບັດ DOC ແມ່ນມາດຕະການຫນຶ່ງໃນການຮ່ວມມືດ້ານຄວາມໝັ້ນຄົງລະຫວ່າງ ອາຊຽນ ແລະ ຈີນ. ທີ່ກອງປະຊຸມຂັ້ນສູງ ອາຊຽນ - ຈີນ ຄັ້ງທີ 13, ຊື່ງຈັດຂຶ້ນຢູ່ ຮ່າໂນ້ຍເມື່ອເດືອນ 10/2010, ບັນດາການນຳຂັ້ນສູງ ອາຊຽນ ແລະ ຈີນ ອີກຄັ້ງຫນຶ່ງໄດ້ຢືນຢັນຄືນຄຳໝັ້ນສັນຍາຜັນຂະຫຍາຍ DOC ຢ່າງຄົບຖ້ວນ ແລະ ມີປະສິດທິຜົນ ນັບແຕ່ປີ 2011, ອາຊຽນ ແລະ ຈີນ ໄດ້ຮັບຮອງເອົາ ຂໍ້ກຳນົດກ່ຽວກັບການແນະນຳການຜັນຂະຫຍາຍ DOC. ຕາມນັ້ນແລ້ວ, ສອງຝ່າຍ ເນັ້ນຫນັກຢ່າງແຮງເຖິງການປະຕິບັດ DOC ບໍ່ພຽງແຕ່ແມ່ນການຜັນຂະຫຍາຍບັນດາໂຄງການເທົ່ານັ້ນ ຫາກຕ້ອງແມ່ນການປະຕິບັດບັນດາຂໍ້ກຳນົດອື່ນຕາມລຳດັບຢ່າງຄົບຖ້ວນອີກດ້ວຍ.
ຕ້ອງມີບັນດາຄຳໝັ້ນສັນຍາດ້ານການທູດ ແລະການເມືອງຕື່ມອີກ
ເຖິງວ່າ ອາຊຽນ ແລະ ຈີນ ແບ່ງປັນບັນດາຫລັກການລວມຄືດັ່ງໄດ້ລະບຸໄວ້ໃນ DOC, ແຕ່ຍັງມີຊ່ອງຫວ່າງໃຫຍ່ ລະຫວ່າງ ບັນດາຄຳໝັ້ນສັນຍາ ແລະ ສະພາບຕົວຈິງຢູ່ທະເລຕາເວັນອອກ. ທ່ານເລຂາທິການໃຫຍ່ ອາຊຽນ ເລເລືອງມີງ ຖືວ່າ: ການປະຕິບັດ ແລະ ຜັນຂະຫຍາຍ DOC ຍັງບໍ່ມີຄວາມຄືບຫນ້າ ແລະ ອາຊຽນ ຄວນມີການເຂົ້າຮ່ວມ ແລະ ມີການຮ່ວມມືຈາກຝ່າຍ ຈີນ ຢ່າງແທດຈິງກວ່າ. ເພື່ອໃຫ້ DOC ໄດ້ຮັບການປະຕິບັດຢ່າງມີປະສິດທິຜົນ ແລະ ຄົບຖ້ວນ, ຕ້ອງມີບັນດາຄຳໝັ້ນສັນຍາດ້ານການທູດ ແລະ ການເມືອງຕື່ມອີກລະຫວ່າງສອງຝ່າຍ. ຄຽງຄູ່ກັນນັ້ນ, ບັນດາປະເທດ ອາຊຽນ ຕ້ອງມານະພະຍາຍາມ ແລະ ມີຄວາມສາມັກຄີຫລາຍກວ່າ ເພື່ອພ້ອມກັບຈີນ ຊອກຫາມາດຕະການແກ້ໄຂ. ທີ່ກອງປະຊຸມ Shangri La ຊື່ງຫາກໍຈັດຕັ້ງຢູ່ ສິງກະໂປ, ທ່ານພົນໂທ ຫງວຽນຈີວີ້ງ, ຮອງລັດຖະມົນຕີກະຊວງປ້ອງກັນປະເທດ ຫວຽດນາມ ໄດ້ແບ່ງປັນວ່າ:
“ບົດບາດຂອງອາຊຽນ ແມ່ນມີຄວາມສຳຄັນທີ່ສຸດ ດ້ວຍຖານະແມ່ນປະຊາຄົມດຽວ. ແຕ່ທັດສະນະຂອງກຸ່ມອາຊຽນ ມີຄຸນປະໂຫຍດນຳມາເຊິ່ງຜົນປະໂຫຍດໃຫ້ພາກພື້ນຫລືບໍ່ ນັ້ນແມ່ນອີງໃສ່ຄວາມສາມັກຄີ, ຄວາມເປັນເອກະພາບເປັນຕົ້ນ.”
ໃນສະພາວະ ອາຊຽນ ໄດ້ສ້າງຕັ້ງປະຊາຄົມລວມ, ຍິ່ງກວ່າເວລາໃດໝົດ ອາຊຽນ ຕ້ອງຍົກສູງຈິດໃຈສາມັກຄີ, ເປັນເອກະພາບ ແລະ ສະຫນິດຕິດພັນນຳກັນເພື່ອຮັບປະກັນສືບຕໍ່ມີຄວາມໄວ້ເນື້ອເຊື່ອໃຈ ແລະ ສອດຄ່ອງກັບບົດບາດໃຈກາງຂອງພາກພື້ນໃນສະພາບພູມສາດການເມືອງຂອງພາກພື້ນ ມີບັນດາການປ່ຽນແປງນັບທັງເຄືອຄ່າຍອິນເຕີແນັດ, ຢູ່ທາງບົກ, ທາງທະເລ, ແລະ ທາງອາກາດ. ພັນເອກ ຫວູຕຽນຈ້ອງ, ຫົວຫນ້າວິທະຍາຄານການຮ່ວມມືສາກົນ, ສັງກັດກະຊວງປ້ອງກັນປະເທດ ຖືວ່າ:
“ປະຈຸບັນ ອາຊຽນ ມີວິໄສທັດ, ມີການກະທຳ ແລະ ມີຫລັກໝັ້ນມີຄວາມເຫັນດີເຫັນພ້ອມພໍສົມຄວນ. ເຖິງວ່າ ບັນດາບັນຫາຜົນປະໂຫຍດຂອງຊາດຍັງມີຄວາມແຕກຕ່າງກັນ ແຕ່ນັ້ນບໍ່ແມ່ນສິ່ງທ້າທາຍສຳລັບ ອາຊຽນ ຫລື ຄວາມສາມັກຄີຂອງ ອາຊຽນເທົ່ານັ້ນ. ຂ້າພະເຈົ້າຖືວ່າ ທ່າອ່ຽງການຮ່ວມມືຂອງ ອາຊຽນ ທີ່ມີຕໍ່ບັນດາປະເທດຄູ່ຮ່ວມມື, ໃນນັ້ນ ນັບທັງອາເມລິກາ ແລະ ຈີນ, ມຸ່ງໄປເຖິງປະມວນຂໍ້ກຳນົດການປະພຶດ (COC) ແມ່ນຄວາມປາດຖະຫນາຂອງທຸກຝ່າຍທີ່ກ່ຽວຂ້ອງໂດຍກົງ ນັ້ນແມ່ນ ອາຊຽນ ແລະ ຈີນ ແລະ ບັນດາປະເທດທີ່ກ່ຽວຂ້ອງ.”
ຕໍ່ຫນ້າບັນດາສິ່ງທ້າທາຍ, ພິເສດ ແມ່ນການຜັນແປຢູ່ທະເລຕາເວັນອອກປະຈຸບັນ, ອາຊຽນ ຄວນສິ້ນສຸດການເຈລະຈາຢ່າງວ່ອງໄວ ແລະ ພ້ອມກັບ ຈີນ ລົງນາມໃນປະມວນຂໍ້ກຳນົດການປະພຶດຢູ່ ທະເລຕາເວັນອອກ (COC). ແລະ ໃນໄລຍະລໍຖ້າ, DOC ຍັງຕ້ອງແມ່ນເຄື່ອງມືເພື່ອສືບຕໍ່ແກ້ໄຂບັນດາການຂັດແຍ້ງໂດຍສັນຕິ. ບັນດາຝ່າຍຄວນເຄົາລົບປະຕິບັດ ແລະ ຜັນຂະຫຍາຍ DOC ຢ່າງຄົບຖ້ວນ, ເພື່ອຮັກສາສະພາບແວດລ້ອມສັນຕິພາບ, ສະຖຽນລະພາບລວມເພື່ອພັດທະນາ.