(vovworld)-ໂດຍໄດ້ຮັບຄຳເຊີນຂອງທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ, ວັນທີ 17/4, ທ່ານນາງນາຍົກລັດຖະມົນ ນອກແວ Erna Solberg ເລີ່ມຕົ້ນບັນດາການເຄື່ອນໄຫວໃນຂອບເຂດການຢ້ຽມຢາມຫວຽດນາມ ຢ່າງເປັນທາງການແຕ່ວັນທີ 16-18/4. ການຢ້ຽມຢາມຂອງທ່ານນາງນາຍົກລັດຖະມົນຕີ ນອກແວ Erna Solberg ເພື່ອສ້າງກຳລັງຫນູນໃຫມ່, ເພີ່ມທະວີການພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດກວ່າອີກ.
ທ່ານນາງນາຍົກລັດຖະມົນ ນອກແວ Erna Solberg
ພາບ:vnmedia.vn
|
ໃນການຢ້ຽມຢາມຫວຽດນາມ ຄັ້ງນີ້, ນາຍົກລັດຖະມົນຕີສອງປະເທດ ຈະແລກປ່ຽນບັນດາວິທີການລະອຽດ ເພື່ອຊຸກຍູ້ການຮ່ວມມືເສດຖະກິດ, ການຄ້າ ແລະ ການລົງທຶນ, ບັນດາຂົງເຂດຮັບມືກັບການປ່ຽນແປງຂອງດິນຟ້າອາກາດ ແລະ ຂົງເຂດສຳຄັນອື່ນຈຳນວນຫນຶ່ງ. ການຢ້ຽມຢາມແມ່ນສວມບົດບາດສຳຄັນໃນການເພີ່ມທະວີການພົວພັນສອງຝ່າຍກໍຄືປະກອບສ່ວນຍົກສູງຄວາມຮັບຮູ້ກ່ຽວຂ້ອງເຖິງໂຄງການດຳເນີນງານພັດທະນາ ປະຕິບັດບັນດາເປົ້າໝາຍສະຫັດສະວັດ ແລະ ເປົ້າໝາຍພັດທະນາແບບຍືນຍົງຂອງ ສປຊ.
ການພົວພັນມິດຕະພາບ ແລະ ການຮ່ວມມືອັນດີງາມ
ຫວຽດນາມ ແລະ ນອກແວ ສ້າງຕັ້ງການພົວພັນທາງການທູດເມື່ອວັນທີ 25/11/1971. ໃນຕະຫລອດກວ່າ 40 ປີ ຜ່ານມາ, ການພົວພັນລະຫວ່າງສອງປະເທດພັດທະນາຢ່າງຕັ້ງຫນ້າ ແລະ ເຂົ້າສູ່ລວງເລິກໃນຫລາຍຂົງເຂດຄື: ການເມືອງ, ເສດຖະກິດ, ວັດທະນະທຳ, ສັງຄົມ. ສອງປະເທດ ໄດ້ແລກປ່ຽນຫລາຍຄະນະຜູ້ແທນທຸກຂັ້ນ. ເປັນຕົ້ນໄລຍະມໍ່ໆມານີ້ແມ່ນການພົບປະລະຫວ່າງ ທ່ານນາຍົກລັດຖະມົນຕີ ຫງວຽນເຕີນຢູງ ແລະ ທ່ານນາງນາຍົກລັດຖະມົນຕີ ນອກແວ Erna Solberg ຢູ່ນອກກອງປະຊຸມສຸດຍອດຄວາມປອດໄພ ນິວເຄຼຍ ຄັ້ງທີ 3 ຢູ່ ໂຮນລັງ (3/2014) ແລະ ຢູ່ນອກກອງປະຊຸມສຸດຍອດ ASEM ຄັ້ງທີ10 ຢູ່ Milan ປະເທດ ອີຕາລີ (10/2014). ສອງຝ່າຍມີບັນດາກົນໄກຮ່ວມມືຢ່າງມີປະສິດທິຜົນຄື: ວາລະທາບທາມດ້ານການເມືອງຂັ້ນຮອງລັດຖະມົນຕີການຕ່າງປະເທດ 7 ຄັ້ງ ແລະ ການເຈລະຈາສິດທິມະນຸດຂັ້ນຫົວຫນ້າກົມ, ສັງກັດກະຊວງການຕ່າງປະເທດ 11 ຄັ້ງ ເພື່ອເພີ່ມທະວີຄວາມເຂົ້າອົກເຂົ້າໃຈ ແລະ ການຮ່ວມມືໃນບັນດາຂົງເຂດລະອຽດ.
ໃນຂົງເຂດເສດຖະກິດ, ການແລກປ່ຽນດ້ານການຄ້າສອງສົ້ນລະຫວ່າງຫວຽດນາມ ແລະ ນອກແວ ປີ 2014 ບັນລຸກວ່າ 307 ລ້ານ USD. ບັນດາປະເພດສິນຄ້າສົ່ງອອກຕົ້ນຕໍຂອງຫວຽດນາມ ໄປຍັງ ນອກແວ ລວມມີ: ເຄື່ອງຕ່ຳແຜ່ນຕັດຫຍິບ, ເກີບ, ເຄື່ອງເຟີນີເຈີ ແລະ ບັນດາຜະລິດຕະພັນໄມ້, ໝາກມ່ວງຫິມະພານ. ຫວຽດນາມ ນຳເຂົ້າສິນຄ້າຈາກນອກແວແມ່ນ: ສິນໃນນ້ຳ, ເຄື່ອງຈັກ, ອຸປະກອນ. ເດືອນ 5/2012, ຫວຽດນາມ ແລະ ກຸ່ມເຂດການຄ້າເສລີ ເອີລົບ (EFTA) ຊື່ງລວມມີ ນອກແວ, ສະວິດ, ໄອແລນ ແລະ ເລກເຕນສະເຕນ … ເລີ່ມຕົ້ນການເຈລະຈາສັນຍາການຄ້າເສລີ FTA. ບັນດາຝ່າຍຫາກໍ່ສິ້ນສຸດການເຈລະຈາຄັ້ງທີ 11 ຢູ່ ນະຄອນ ເມື່ອເດືອນ 1/2015. ໄລ່ມາຮອດເດືອນ 2/2015, ນອກແວ ມີ 30 ໂຄງການລົງທຶນຍັງມີຜົນສັກສິດ ດ້ວຍຍອດຈຳນວນທຶນຈົດທະບຽນແມ່ນກວ່າ 120 ລ້ານ USD, ຢືນອັນດັບທີ 37/101 ປະເທດ ແລະ ເຂດແຄ້ວນລົງທຶນຢູ່ຫວຽດນາມ. ປະຈຸບັນ ນອກແວ ມີ 40 ວິສາຫະກິດ ພວມເຄື່ອນໄຫວຢູ່ ຫວຽດນາມ, ສຸມໃສ່ຢູ່ນະຄອນ ໂຮ່ຈິມີນ, ຫວຸງເຕົາ, ຮ່າໂນ້ຍ, ແຄງຮວ່າ, ບີງເຢືອງ, ຫາຍຟ່ອງ. ບັນດາໂຄງການຂອງນອກແວ ສ່ວນຫລາຍສຸມໃສ່ໃນຂົງເຂດປຸງແຕ່ງໄມ້, ວັດສະດຸກໍ່ສ້າງ …..ເງິນລົງທຶນຂອງ ນອກແວ ຕາມຮູບການ 100% ທຶນຕ່າງປະເທດ ແລະ ປະຈຸບັນພວມເຄື່ອນໄຫວຢູ່ 7 ທ້ອງຖິ່ນ.
ກ່ຽວກັບການພົວພັນທາງດ້ານການທູດ ລະຫວ່າງຫວຽດນາມ ແລະ ນອກແວ ໃນກວ່າ 40 ປີຜ່ານມາ, ທ່ານນາງ Siren Gjerme Eriksen, ເອກອັກຄະລັດຖະທູດ ນອກແວ ປະຈຳຫວຽດນາມ ຖືວ່າ:
“ນອກແວ ແລະ ຫວຽດນາມ ມີການພົວພັນທາງການທູດຢ່າງເລິກເຊິ່ງ ແລະ ພັດທະນາຕາມຫລາຍທິດມາເປັນເວລາກວ່າ 44 ປີ ແລ້ວ. ຫວຽດນາມ ບັນລຸໄດ້ບັນດາຄວາມຄືບຫນ້າດີສົມຄວນໃນການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ພັດທະນາ ແລະ ເຊື່ອມໂຍງເຂົ້າກັບພາກພື້ນ ແລະ ໃນເວທີສາກົນ. ໃນຊຸມປີມໍ່ໆມານີ້, ນອກແວ ເອົາໃຈໃສ່ເຖິງການສ້າງກຳລັງຄວາມສາມາດດ້ານເຕັກນິກ. ພວກຂ້າພະເຈົ້າໄດ້ເຮັດວຽກກັບຫວຽດນາມ ກ່ຽວກັບການປ່ຽນແປງຂອງດິນຟ້າອາກາດ ກໍຄືການຮ່ວມມືກັບບັນດາສະຖາບັນຄົ້ນຄ້ວາ, ມະຫາວິທະຍາໄລຂອງຫວຽດນາມ.”
ປັບປຸງການພົວພັນຮ່ວມມືພັດທະນາຫວຽດນາມ ແລະ ນອກແວ
ການພົວພັນຮ່ວມມືລະຫວ່າງຫວຽດນາມ ແລະ ນອກແວ ເຊື່ອມຕໍ່ຄືນໃຫມ່ນັບແຕ່ເມື່ອສອງຝ່າຍລົງນາມໃນສັນຍາແມ່ກ່ຽວກັບການຮ່ວມມືພັດທະນາໃນເດືອນ 10/1996. ການຊ່ວຍເຫລືອຂອງນອກແວ ສະຫງວນໃຫ້ແກ່ຫວຽດນາມ ບັນລຸກວ່າ 320 ລ້ານ USD. ນອກນັ້ນ ນອກແວ ຍັງມີບັນດາໂຄງການສິນເຊື່ອບຸລິມະສິດໃຫ້ແກ່ບັນດາໂຄງການນ້ຳປະປາ, ບຳບັດນ້ຳເສຍ ແລະ ສິ່ງເສດເຫລືອຢູ່ບັນດາແຂວງຂອງຫວຽດນາມ. ໃນຊຸມປີຜ່ານມາ, ນອກແວ ຍາມໃດກໍຕັ້ງຫນ້າສະຫນັບສະຫນູນ, ຫນູນຊ່ວຍຫວຽດນາມ ໃນກິດຈະການປ່ຽນແປງໃຫມ່, ລົບລ້າງຄວາມອຶດຫິວຫລຸດຜ່ອນຄວາມທຸກຍາກ ແລະ ເຊື່ອມໂຍງເຂົ້າກັບສາກົນ. ສິ່ງດັ່ງ່ກາວສະແດງໃຫ້ເຫັນຜ່ານເລື່ອງ ນອກແວແມ່ນຫນຶ່ງໃນບັນດາປະເທດສຳເລັດການເຈລະຈາເຂົ້າຮ່ວມ WTO ກັບຫວຽດນາມ ໂດຍໄວ ແລະ ສອງຝ່າຍ ຍາມໃດກໍສົມທົບຢ່າງມີປະສິດທິຜົນທີ່ບັນດາເວທີ ແລະ ອົງການສາກົນຄື: ສປຊ, WTO.
ປີ 2015 ແມ່ນປີສຸດທ້າຍຂອງວິວັດການປະຕິບັດບັນດາເປົ້າໝາຍສະຫັດສະວັດ ຂອງ ສປຊ ແລະ ກໍແມ່ນຈຸດເວລາບັນດາປະເທດສະມາຊິກ ສປຊ ດຳເນີນການເຈລະຈາເພື່ອສ້າງໂຄງການດຳເນີນງານພັດທະນາຫລັງປີ 2015, ສ້າງບັນດາເປົ້າໝາຍພັດທະນາແບບຍືນຍົງ. ນີ້ກໍແມ່ນເນື້ອໃນສຳຄັນໂດຍທ່ານນາງນາຍົກລັດຖະມົນຕີ ນອກແວ Erna Solberg ເຕື້ອງເຖິງໃນການຢ້ຽມຢາມຫວຽດນາມ ຄັ້ງນີ້. ທ່ານນາງ ເອກອັກຄະລັດຖະທູດ ນອກແວ ປະຈຳຫວຽດນາມ Siren Gjerme Eriksen ໃຫ້ຮູ້້ວ່າ:
“ທ່ານນາງນາຍົກລັດຖະມົນຕີ Erna Solberg ມາຢ້ຽມຢາມຫວຽດນາມ ໃນຖານະເປັນປະທານຮ່ວມກຸ່ມໃຫ້ຄຳປືກສາກ່ຽວກັບບັນດາເປົ້າໝາຍສະຫັດສະວັດ ຂອງເລຂາທິການໃຫຍ່ ສປຊ. ທ່ານນາງນາຍົກລັດຖະມົນຕີ ໄດ້ເລືອກເຟັ້ນຫວຽດນາມ ແມ່ນປະເທດທ່ານນາງມາຢ້ຽມຢາມ ເພາະວ່າ ຫວຽດນາມ ບັນລຸໄດ້ບັນດາຜົນງານສຳຄັນໃນການປະຕິບັດບັນດາເປົ້າໝາຍສະຫັດສະວັດ. ທ່ານນາງນາຍົກລັດຖະມົນຕີ ນອກແວ ຈະສົ່ງເສີມຫວຽດນາມ ສືບຕໍ່ວຽກງານຂອງຕົນເພື່ອແກ້ໄຂບັນດາສິ່ງທ້າທາຍ.”
ໃນໄລຍະຜ່ານມາ, ນອກແວ ແມ່ນຫນຶ່ງໃນບັນດາປະເທດ ຍາມໃດກໍສະຫນັບສະຫນູນ ແລະ ຫນູນຊ່ວຍຫວຽດນາມ ຜັນຂະຫຍາຍ, ປະຕິບັດແຜນການພັດທະນາເສດຖະກິດ ສັງຄົມຂອງຫວຽດນາມ, ສະຫນັບສະຫນູນຫວຽດນາມ ປະຕິບັດຂໍ້ລິເລິ່ມ “ເອກະພາບເພື່ອກະທຳ”ກັບ ສປຊ . ເນື່ອງໃນໂອກາດການຢ້ຽມຢາມຫວຽດນາມຂອງທ່ານນາງນາຍົກລັດຖະມົນຕີ ນອກແວ Erna Solberg, ສະຖານທູດ ນອກແວ ແລະ ຜູ້ປະສານງານຂອງ ສປຊ ປະຈຳ ຮ່າໂນ້ຍ ຈະລົງນາມໃນຂໍ້ຕົກລົງອຸປະຖຳຈຳນວນເງິນ 1,3 ລ້ານ USD ໃຫ້ແກ່ໂຄງການ ສປຊ ຢູ່ຫວຽດນາມ.