ທີ່ກອງປະຊຸມສະໄໝສາມັນເທື່ອທີ 9 ສະພາແຫ່ງຊາດຫວຽດນາມຊຸດທີ 13 ນັ້ນ, ເປັນຄັ້ງທຳອິດທີ່ຮ່າງປະມວນກົດໝາຍວ່າດ້ວຍການດຳເນີນຄະດີແພ່ງ(ສະບັບປັບປຸງ) ໄດ້ຖືກນຳມາປຶກສາຫາລື. ນີ້ແມ່ນປະມວນກົດໝາຍທີ່ສຳຄັນໃນລະບົບເອກະສານນິຕິກຳ, ກ່ຽວຂ້ອງຢ່າງສະໜິດແໜ້ນກັບຊີວິດປະຈຳວັນຂອງປະຊາຊົນ.
ບັນດາ ສ.ສ.ຊ ປຶກສາຫາລືກ່ຽວກັບຮ່າງປະມວນກົດໝາຍວ່າດ້ວຍການດຳເນີນຄະດີແພ່ງ(ສະບັບປັບປຸງ) |
ໃນເທື່ອນີ້,ສະພາແຫ່ງຊາດຫວຽດນາມໄດ້ມອບໝາຍໃຫ້ສານປະຊາຊົນສູງສຸດເປັນຜູ້ຮັບຜິດຊອບ, ຮຽບຮຽງຮ່າງປະມວນກົດໝາຍວ່າດ້ວຍການດຳເນີນຄະດີແພ່ງ(ສະບັບປັບປຸງ). ຮ່າງປະມວນກົດໝາຍວ່າດ້ວຍການດຳເນີນຄະດີແພ່ງສະບັບປັບປຸງນີ້ ແມ່ນເພື່ອແນໃສ່ສືບຕໍ່ຫັນແຜນນະໂຍບາຍ, ແນວທາງຂອງລັດຫວຽດນາມກ່ຽວກັບການປະຕິຮູບດ້ານຕຸລາການເປັນລະບອບກົດໝາຍ, ໃນນັ້ນ ຮຽກຮ້ອງໃຫ້ປ່ຽນແປງໃໝ່ການຈັດຕັ້ງການປະຊຸມສານ, ກຳນົດແຈ້ງກວ່າກ່ຽວກັບທີ່ຕັ້ງ, ສິດອຳນາດ , ຄວາມຮັບຜິດຊອບຂອງຜູ້ປະຕິບັດວຽກງານດຳເນີນຄະດີ ແລະ ຜູ້ເຂົ້າຮ່ວມການ ດຳເນີນຄະດີ.
ປະມວນກົດໝາຍວ່າດ້ວຍການດຳເນີນຄະດີແພ່ງ(ສະບັບປັບປຸງ) ຮັບປະກັນສິດຜົນປະໂຫຍດຂອງພົນລະເມືອງ
ເມື່ອປຶກສາຫາລືກ່ຽວກັບ ຮ່າງປະມວນກົດໝາຍວ່າດ້ວຍການດຳເນີນຄະດີແພ່ງ(ສະບັບປັບປຸງ), ບັນດາ ສ.ສ.ຊ ໄດ້ເຫັນດີເປັນເອກະສັນຢ່າງສູງກ່ຽວກັບການປັບປຸງປະມວນກົດໝາຍວ່າດ້ວຍການດຳເນີນຄະດີແພ່ງ ແມ່ນຈຳເປັນໃນສະພາບການປະຈຸບັນ, ຕອບສະໜອງຄວາມຮຽກຮ້ອງຕ້ອງການໃນການຮັບຮູ້, ເຄົາລົບ, ຮັບປະກັນສິດທິມະນຸດ, ສິດຂອງພົນລະເມືອງ. ສານປະຊາຊົນສູງສຸດໄດ້ສະຫງວນບຸລິມະສິດ, ເງື່ອນໄຂສະດວກໃຫ້ປະຊາຊົນປົກປ້ອງຄວາມຍຸດຕິທຳ, ຮັບປະກັນສິດຜົນປະໂຫຍດຢ່າງຖືກຕ້ອງຂອງພົນລະເມືອງ. ຈຸດໃໝ່ໃນ ຮ່າງປະມວນກົດໝາຍວ່າດ້ວຍການດຳເນີນຄະດີແພ່ງ(ສະບັບປັບປຸງ) ຊຶ່ງໄດ້ຮັບຄວາມສົນໃຈທີ່ສຸດຈາກ ສ.ສ.ຊ, ນັ້ນແມ່ນການເພີ່ມເຕີມຂໍ້ກຳນົດທີ່ວ່າ ສານບໍ່ໄດ້ປະຕິເສດຄຳຮຽກຮ້ອງແກ້ໄຂຄະດີຍ້ອນເຫດຜົນຍັງບໍ່ທັນມີມາດຕາກຳນົດໃນກົດໝາຍ. ພື້ນຖານເພື່ອໃຫ້ ສານປະຊາຊົນສູງສຸດຍົກອອກຫຼັກການນີ້ ແມ່ນເພື່ອຮັບປະກັນການຫັນບັນດາຂໍ້ກຳນົດຂອງລັດຖະທຳມະນູນເປັນລະບອບກົດໝາຍ. ທ່ານ ເຈີນຕ້ຽນຢຸງ ສ.ສ.ຊ ແຂວງ ຮ່າຕິ້ງ ຖືວ່າ :
“ ເລື່ອງເພີ່ມເຕີມຂໍ້ກຳນົດ ສານບໍ່ໄດ້ປະຕິເສດຄຳຮຽກຮ້ອງແກ້ໄຂຄະດີແພ່ງຍ້ອນເຫດຜົນຍັງບໍ່ທັນມີມາດຕາກຳນົດໃນກົດໝາຍ ແມ່ນສຳຄັນທີ່ສຸດ, ສອດຄ່ອງກັບທ່າອຽງກ້າວໜ້າ ແລະ ພັດທະນາຂອງສັງຄົມພົນລະເຮືອນ. ຂໍ້ກຳນົດນີ້ ໄດ້ຫັນລັດທະທຳມະນູນປີ 2013 ເປັນລະອຽດ, ປົກປ້ອງສິດຍຸດຕິທຳ, ສິດທິມະນຸດ, ສິດພົນລະເຮືອນ, ສິດ ແລະ ຜົນປະໂຫຍດອັນຊອບທຳຂອງອົງການ, ສຳນັກງານ ແລະ ສ່ວນບຸກຄົນ”
ອະທິບາຍຕື່ມກ່ຽວກັບບັນຫານີ້, ທ່ານຮ່າຮຸ່ງເກືອງ, ລັດຖະມົນຕີວ່າການກະຊວງຍຸດຕິທຳຫວຽດນາມ, ສ.ສ.ຊ ແຂວງ ກວາງບິງ ໃຫ້ຮູ້ວ່າ :
“ ຜ່ານການຢັ່ງຫາງສຽງຈາກປະຊາຊົນກ່ຽວກັບປະມວນກົດໝາຍແພ່ງສະບັບປັບປຸງຊຶ່ງແມ່ນປະມວນກົດໝາຍທີ່ກ່ຽວຂ້ອງເຖິງປະມວນກົດໝາຍວ່າດ້ວຍການດຳເນີນຄະດີແພ່ງ(ສະບັບປັບປຸງ) ໂດຍກົງ, ບັນດາກະຊວງ, ຂະແໜງການ, ອົງການຈັດຕັ້ງມະຫາຊົນຂັ້ນສູນກາງສ່ວນຫຼາຍ ກໍຄືບັນດາແຂວງ, ນະຄອນທີ່ຂຶ້ນກັບສູນກາງ ລ້ວນແຕ່ສະໜັບສະໜູນທັດສະນະກຳນົດສານບໍ່ໄດ້ປະຕິເສດຄຳຮຽກຮ້ອງແກ້ໄຂຄະດີແພ່ງຍ້ອນເຫດຜົນຍັງບໍ່ທັນມີມາດຕາກຳນົດໃນກົດໝາຍ. ຂໍ້ກຳນົດນີ້ ສອດຄ່ອງກັບລັດຖະທຳມະນູນ. ພາລະກຳຂອງສານ ແມ່ນປະຕິບັດສິດຕຸລາການ, ແມ່ນບ່ອນປົກປ້ອງຄວາມຍຸດຕິທຳໃນການພົວພັນພົນລະເຮືອນ ແລະ ການດຳເນີນທຸລະກິດ ”
ລັດຫວຽດນາມແມ່ນລັດແຫ່ງອຳນາດນິຕິບັນຍັດຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ. ລັດປົກປ້ອງທຸກໆສິດຜົນປະໂຫຍດອັນຊອບທຳຂອງປະຊາຊົນ.
ບາດກ້າວໃໝ່, ສອດຄ່ອງກັບກົດໝາຍສາກົນ
ຈຸດໃໝ່ທີ່ສຳຄັນອີກອັນໜຶ່ງທີ່ຖືກເພີ່ມເຕີມເຂົ້າໃນຮ່າງປະມວນກົດໝາຍວ່າດ້ວຍການດຳເນີນຄະດີແພ່ງຄັ້ງນີ້ ແມ່ນຂໍ້ກຳນົດກ່ຽວກັບຫຼັກການພິພາກສາ. ເມື່ອປຶກສາຫາລືກ່ຽວກັບບັນຫານີ້, ບັນດາ ສ.ສ.ຊ ຢືນຢັນວ່າ ຂໍ້ກຳນົດກ່ຽວກັບຫຼັກການພິພາກສາ ທີ່ຖືກເພີ່ມເຕີມເຂົ້າໃນຮ່າງປະມວນກົດໝາຍວ່າດ້ວຍການດຳເນີນຄະດີແພ່ງຄັ້ງນີ້ ແມ່ນ ບາດກ້າວໃໝ່, ສອດຄ່ອງກັບທ່າອຽງສາກົນປະຈຸບັນ. ທ່ານເຈືອງຮ່ວາບິງ ປະທານສານປະຊາຊົນສູງສຸດ, ສ.ສ.ຊ ແຂວງລອງອານ ໃຫ້ຮູ້ວ່າ :
“ຫຼັກການພິພາກສາຄະດີ ແມ່ນກ່ຽວຂ້ອງເຖິງການປົກປ້ອງກົດໝາຍ, ດັ່ງນັ້ນ ຕ້ອງເຮັດໃຫ້ເນື້ອໃນມີຄວາມສອດຄ່ອງ. ພວກຂ້າພະເຈົ້າພວມກວດກາບັນດາຄຳຕັດສິນຂອງສານຂັ້ນຕິດຕາມກວດກາ ທີ່ໄດ້ປະຕິບັດນັບແຕ່ກ່ອນເປັນຕົ້ນມາ, ຄະດີໃດທີ່ໄດ້ມາດຕະຖານ ຈະຖືກນຳໃຊ້ເພື່ອເປັນເອກະພາບໃນການພິພາກສາ ”
ຮ່າງປະມວນກົດໝາຍວ່າດ້ວຍການດຳເນີນຄະດີແພ່ງ(ສະບັບປັບປຸງ) ໄດ້ຖືກຍື່ນສະເໜີຕໍ່ສະພາແຫ່ງຊາດໃຫ້ຄວາມເຫັນເປັນຄັ້ງທຳອິດ ທີ່ກອງປະຊຸມສະໄໝສາມັນເທື່ອທີ 9 ສະພາແຫ່ງຊາດຫວຽດນາມຊຸດທີ 13. ເພາະສະນັ້ນ, ການສັງເກດຕີລາຄາ, ໂຕ້ແຍ້ງກັນ ຍັງມີຫຼາຍຄຳເຫັນທີ່ແຕກຕ່າງກັນ, ຊ້ຳບໍໜຳ ການຮຽກຮ້ອງໃຫ້ຍົກເລີກເນື້ອໃນປະການໃດໜຶ່ງໃນ ຮ່າງປະມວນກົດໝາຍ ກໍແມ່ນເລື່ອງທຳມະດາ. ບັນຫາແມ່ນຢູ່ບ່ອນວ່າ ເຮັດແນວໃດເພື່ອໃຫ້ ຮ່າງປະມວນກົດໝາຍວ່າດ້ວຍການດຳເນີນຄະດີແພ່ງ(ສະບັບປັບປຸງ) ຮັດກຸມ ແລະ ມີລັກສະນະເປັນໄປໄດ້. ຜູ້ມີສິດເລືອກຕັ້ງພວມຄອຍຖ້າຕໍ່ການຮັບເອົາຄຳເຫັນເພື່ອປັບປຸງ ຮ່າງປະມວນກົດໝາຍນີ້ຂອງຄະນະຮຽບຮຽງພາຍຫຼັງ ກອງປະຊຸມສະໄໝເທື່ອນີ້ເພື່ອສືບຕໍ່ຍື່ນສະເໜີຕໍ່ສະພາແຫ່ງຊາດຮັບຮອງເອົາໃນໄວໆນີ້.