ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ຄາດວ່າຈະຖືກໄຂຂຶ້ນໃນວັນທີ 20/1/2016. ກ່ອນທີ່ດຳເນີນ ກອງປະຊຸມໃຫຍ່, ພະນັກງານ, ສະມາຊິກພັກ ແລະ ປະຊາຊົນໃນທົ່ວປະເທດໄດ້ຝາກຄວາມເຊື່ອໝັ້ນຕໍ່ ພັກກອມມູນິດຫວຽດນາມ ຈະສືບຕໍ່ເພີ່ມທະວີການກໍ່ສ້າງພັກໃຫ້ໂປ່ງໃສ, ໝັ້ນຄົງເຂັ້ມແຂງ, ເສີມຂະຫຍາຍກຳລັງແຮງຂອງທົ່ວປວງຊົນທັງຊາດ ແລະ ປະຊາທິປະໄຕສັງຄົມນິຍົມ; ຍູ້ແຮງກິດຈະການປ່ຽນແປງໃໝ່ຢ່າງຮອບດ້ານ ແລະ ຄົບຊຸດ; ກໍ່ສ້າງ ແລະ ປົກປັກຮັກສາປະເທດຊາດໃຫ້ໝັ້ນຄົງໜັກແໜ້ນ.
(ພາບປະກອບ) |
ຢູ່ທີ່ບັນດາກອງປະຊຸມ, ເວທີປາໄສ, ການປຶກສາຫາລືທຸກໆຄັ້ງກ່ຽວກັບເຫດການທີ່ສຳຄັນນີ້, ປະຊາຊົນໃນທົ່ວປະເທດລ້ວນແຕ່ສະແດງຄວາມຫວັງຢາກໃຫ້ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມປະສົບຜົນສຳເລັດຢ່າງຈົບງາມ ຊຶ່ງວາງອອກບັນດາລັດຖະນະໂຍບາຍຍຸດທະສາດເພື່ອນຳປະເທດຊາດພັດທະນາ.
ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ
ນັກທະນາຍຄວາມ ເລດຶກຕ໋ຽດ ຮອງຫົວໜ້າສະພາໃຫ້ຄຳປຶກສາກ່ຽວກັບກົດໝາຍ-ປະຊາທິປະໄຕ, ຄະນະກຳມະການສູນກາງແນວໂຮມປະເທດຊາດຫວຽດນາມ ຖືວ່າ : ປີ 2015, ປະເທດຫວຽດນາມບັນລຸໄດ້ຜົນງານຫຼາຍຢ່າງ. ເພື່ອເສີມຂະຫຍາຍບັນດາໄຊຊະນະຂອງປີ 2015 ແລະ ຜ່ານຜ່າຄວາມທົດສອບຂອງປີ 2016, ປະຊາຊົນຫວັງວ່າ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ຈະວາງອອກຫຼາຍລັດຖະນະໂຍບາຍເພື່ອສືບຕໍ່ກິດຈະການປ່ຽນແປງໃໝ່. ສິ່ວສຳຄັນກວ່າໝູ່, ນັ້ນແມ່ນກອງປະຊຸມໃຫຍ່ຕ້ອງເລືອກເຟັ້ນບັນດາຜູ້ທີ່ມີຄວາມເກັ່ງກ້າສາມາດ, ມີຄຸນສົມບັດສິນທຳປະຕິວັດ, ມີຄຸນນະທາດຕັດສິນບັນຫາເພື່ອນຳປະເທດຊາດຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍ, ເຊື່ອມໂຍງເຂົ້າກັບສາກົນ ແລະ ພັດທະນາ. ນັກທະນາຍຄວາມ ເລດຶກຕ໋ຽດ ເວົ້າວ່າ :
“ ໃນກອງປະຊຸມໃຫຍ່ຄັ້ງນີ້ ສາມາດເລືອກເຟັ້ນໄດ້ຜູ້ທີ່ມີຄວາມເກັ່ງກ້າສາມາດ, ບັນດາຜູ້ທີ່ມີຄວາມເກັ່ງກ້າສາມາດນັ້ນ ແມ່ນໄດ້ຮັບຄວາມນິຍົມນັບຖືຈາກປະຊາຊົນ ແລະ ກໍແມ່ນຜູ້ທີ່ໃນໄລຍະທີ່ຜ່ານມາໄດ້ຂໍ້ຄິດລິເລີ່ມນຳປະເທດຊາດພັດທະນາ. ຜູ້ທີ່ມີຄວາມເກັ່ງກ້າສາມາດ ແມ່ນບໍ່ຂຶ້ນກັບເກັ່ນອາຍຸ, ບໍ່ຂຶ້ນກັບຖານະຕຳແໜ່ງເກົ່າຄືແນວໃດ”
“ເສີມຂະຫຍາຍກຳລັງແຮງຂອງທົ່ວປວງຊົນທັງຊາດ ແລະ ປະຊາທິປະໄຕສັງຄົມນິຍົມ” ກໍແມ່ນສິ່ງທີ່ມີປະຊາຊົນມີຄວາມສົນໃຈເປັນພິເສດ ແລະ ຝາກຄວາມຫວັງຕໍ່ກອງປະຊຸມໃຫຍ່ຄັ້ງນີ້. ທ່ານ ໂດ້ຢີເທື່ອງ ຮອງຫົວໜ້າສະພາໃຫ້ຄຳປຶກສາກ່ຽວກັບກົດໝາຍ-ປະຊາທິປະໄຕ, ຄະນະກຳມະການສູນກາງແນວໂຮມປະເທດຊາດຫວຽດນາມຖືວ່າ ຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ໄດ້ເປີດກ້ວາງກວ່າເນື້ອໃນ “ປະຊາທິປະໄຕສັງຄົມນິຍົມ. ປະຊາທິປະໄຕ ກ່ອນອື່ນໝົດແມ່ນນຳສິດມາສູ່ປະຊາຊົນ, ເສີມຂະຫຍາຍສິດເປັນເຈົ້າຂອງປະຊາຊົນ, ນຳຄວາມຜາສຸກມາສູ່ປະຊາຊົນ. ປະຊາຊົນມີຄວາມຫວັງຢາກເປີດກ້ວາງປະຊາທິປະໄຕກວ່າອີກໃນພັກ ແລະ ລັດ. ທ່ານ ໂດ້ຢີເທື່ອງ ຮອງຫົວໜ້າສະພາໃຫ້ຄຳປຶກສາກ່ຽວກັບກົດໝາຍ-ປະຊາທິປະໄຕ, ຄະນະກຳມະການສູນກາງແນວໂຮມປະເທດຊາດຫວຽດນາມ ເວົ້າວ່າ :
“ ປະຊາຊົນຫວັງໃຫ້ລັດສືບຕໍ່ເປີດກ້ວາງປະຊາທິປະໄຕ. ຢາກປະຕິບັດປະຊາທິປະໄຕໂດຍຕ້ອງມີກົດໝາຍ. ຂ້າພະເຈົ້າສະເໜີລັດຈົ່ງປະກາດໃຊ້ບັນດາກົດໝາຍທີ່ກ່ຽວຂ້ອງເຖິງສິດປະຊາທິປະໄຕຂອງປະຊາຊົນ, ສິດເປັນເຈົ້າຂອງປະຊາຊົນຊຶ່ງລັດຖະທຳມະນູນໄດ້ກຳນົດໄວ້, ສິດຕິດຕາມກວດກາການເຄື່ອນໄຫວຂອງອົງການສຳນັກງານແຫ່ງລັດ, ຜູ້ແທນລາຊະດອນ, ພະນັກງານລັດຖະກອນ ແມ່ນສະແດງໃຫ້ເຫັນສິດປະຊາທິປະໄຕຂອງປະຊາຊົນເຂົ້າຮ່ວມກໍ່ສ້າງພັກ, ກໍ່ສ້າງກົງຈັກແຫ່ງລັດ ”
ເພີ່ມທະວີຄວາມສາມັກຄີແຫ່ງຊາດ
ຈາກແງ່ມຸມຂອງຜູ້ທີ່ມີຄວາມຜູກພັນກັບວຽກງານຊົນເຜົ່າໃນຫຼາຍປີມານີ້, ທ່ານລູ່ວັນແກ, ອະດີດຮອງຫົວໜ້າຄະນະກຳມະການຊົນເຜົ່າຂອງລັດຖະບານ ຖືວ່າ : ຢາກສາມັກຄີ, ປອງດອງລະຫວ່າງບັນດາຊົນເຜົ່າ ແລະ ບັນດາສາດສະໜາ ແມ່ນຕ້ອງກຳແໜ້ນ ແລະ ປະຕິບັດບັນດາຫຼັກການ, ວິທີສາມັກຄີຂອງພັກກອມມູນິດຫວຽດນາມ ແລະ ປະທານໂຮ່ຈິມິນໃຫ້ເປັນຢ່າງດີ, ສ້າງແນວຄິດມະຫາສາມັກຄີຂອງປະທານໂຮ່ຈິມິນໃນຈິດໃຈຂອງປະຊາຊົນ, ຫັນມັນເປັນສະຕິຄວາມສະໝັກໃຈສາມັກຄີ. ທ່ານລູ່ວັນແກ, ອະດີດຮອງຫົວໜ້າຄະນະກຳມະການຊົນເຜົ່າຂອງລັດຖະບານ ຢືນຢັນວ່າ :
“ ຢາກສາມັກຄີນັ້ນ, ກ່ອນອື່ນໝົດ ແມ່ນຕ້ອງປະຕິບັດບັນຫາປະຊາທິປະໄຕໃຫ້ດີ, ເບິ່ງແຍງ, ແກ້ໄຂຜົນປະໂຫຍດຂອງປະຊາຊົນ. ແກ້ໄຂບັນຫາຢ່າງມີປະຊາທິປະໄຕ ຈຶ່ງມີຄວາມສາມັກຄີ. ມີປະຊາທິປະໄຕແລ້ວ, ຈຶ່ງມີຄວາມເຫັນດີເຫັນພ້ອມ, ມີຄວາມເຫັນດີເຫັນພ້ອມແລ້ວ ຈຶ່ງມີຄວາມສາມັກຄີ, ແຕ່ເມື່ອສາມາດແກ້ໄຂດ້ານຜົນປະໂຫຍດໄດ້, ຈຶ່ງມີຄວາມສາມັກຄີ. ບັນຫາແມ່ນຕ້ອງແກ້ໄຂຢ່າງກົມກ່ຽວດ້ານຜົນປະໂຫຍດລະຫວ່າງບັນດາສະມາຊິກໃນສັງຄົມ, ລະຫວ່າງບັນດາຊົນເຜົ່າ. ຂ້າພະເຈົ້າຖືວ່າ ນີ້ແມ່ນຂໍ້ກຸນແຈຂອງບັນຫາ. ດັ່ງນັ້ນ ຕ້ອງປ່ຽນແປງໃໝ່ບັນຫາຊົນເຜົ່າ ”
ສືບຕໍ່ພັດທະນາເສດຖະກິດໃຫ້ໝັ້ນຄົງເຂັ້ມແຂງ
ຄວາມມຸ່ງຫວັງຢ່າງຍິ່ງຂອງປະຊາຊົນຕໍ່ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມນັ້ນ, ແມ່ນພັກຕ້ອງມີບັນດາລັດຖະນະໂຍບາຍປ່ຽນແປງໃໝ່, ສືບຕໍ່ພັດທະນາເສດຖະກິດສັງຄົມ , ຍົກສູງຊີວິດການເປັນຢູ່ໃຫ້ແກ່ປະຊາຊົນ. ທ່ານ ຫງວຽນວັນຮຸ່ງ ຮອງປະທານຄະນະກຳມະການແນວໂຮມປະເທດຊາດແຂວງ ບັກນິງ ຖືວ່າ :
“ ພວກຂ້າພະເຈົ້າຫວັງຢ່າງຍິ່ງວ່າ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກຈະມີຫຼາຍແຜນນະໂຍບາຍ, ມາດຕະການແກ້ໄຂທີ່ກ່ຽວຂ້ອງຊີວິດສັງຄົມເພື່ອ ຍົກສູງຊີວິດການເປັນຢູ່ໃຫ້ແກ່ປະຊາຊົນ. ໃນນັ້ນ, ເອົາໃຈໃສ່ເປັນພິເສດເຖິງຄົນທຸກຍາກ, ຜູ່ຢູ່ປ່ຽວ, ປະສົບກັບຄວາມຫຍຸ້ງຍາກ ”
ພາຍຫຼັງ 30 ປີແຫ່ງການປ່ຽນແປງໃໝ່, ປະເທດຫວຽດນາມໄດ້ບັນລຸບັນດາຜົນງານທີ່ຍິ່ງໃຫຍ່, ມີຄວາມໝາຍປະຫວັດສາດບົນເສັ້ນທາງສ້າງສາລັດທິສັງຄົມນິຍົມ ແລະ ປົກປັກຮັກສາປະເທດຊາດ. ແຕ່ເສັ້ນທາງກໍ່ສ້າງລັດທິສັງຄົມນິຍົມຢູ່ຫວຽດນາມ ຍັງຄົງຍາວນານ ແລະ ເຕັມໄປດ້ວຍຄວາມຫຍຸ້ງຍາກ. ເພາະສະນັ້ນ, ປະຊາຊົນມີຄວາມເຊື່ອໝັ້ນຕໍ່ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ຈະວາງອອກບັນດາລັດຖະນະໂຍບາຍອັນຖືກຕ້ອງໃນການກໍ່ສ້າງພັກ, ເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນທັງຊາດ, ຊັກຈູງປະຊາຊົນສ້າງບາດກ້າວບຸກທະລຸໃນການພັດທະນາເສດຖະກິດສັງຄົມ, ນຳປະເທດພັດທະນາ, ເຊື່ອມໂຍງເຂົ້າກັບສາກົນຢ່າງໝັ້ນຄົງ.