(vovworld)- ຫວຽດນາມ ຫາກໍປະກາດກົນໄກປະຕູດຽວແຫ່ງຊາດ ແລະ ເຊື່ອມຕໍ່ເຕັກນິກກົນໄກປະຕູດຽວ ອາຊຽນ. ສຳລັບຫວຽດນາມ, ພ້ອມກັບ 6 ປະເທດສະມາຊິກອື່ນໃນ ອາຊຽນ ໄດ້ສຳເລັດການຜັນຂະຫຍາຍກົນໄກປະຕູດຽວແຫ່ງຊາດ ຕາມຄຳໝັ້ນສັນຍາ, ວິວັດການເຊື່ອມໂຍງເຂົ້າກັບເສດຖະກິດພາກພື້ນຂອງຫວຽດນາມ ບັນລຸຕື່ມອີກຂີດໝາຍຫນຶ່ງສຳຄັນ, ພິເສດ ໃນສະພາບການປະຊາຄົມເສດຖະກິດ ອາຊຽນ ຈະໄດ້ຮັບການສ້າງຕັ້ງຂຶ້ນໃນທ້າຍປີນີ້.
ພິທີປະກາດກົນໄກປະຕູດຽວແຫ່ງຊາດ
ພາບ:customs.gov.vn
|
ກົນໄກປະຕູດຽວແຫ່ງຊາດ ແມ່ນກົນໄກຂອງລະບຽບການພາສີຊື່ງໄດ້ຮັບການປະຕິບັດພາຍໃຕ້ຮູບການບໍລິການທາງເຄືອຂ່າຍອິນເຕີແນັດໄດ້ນຳໃຊ້ໃນທົ່ວປະເທດ ໂດຍອີງໃສ່ລະບົບເຮັດລະບຽບການພາສີອັດຕະໂນມັດ. ຕາມນັ້ນແລ້ວ, ນຳໃຊ້ກົນໄກປະຕູດຽວແຫ່ງຊາດ, ວິສາຫະກິດຈະຫລຸດຜ່ອນປະມານ 4/5 ເວລາເຮັດລະບຽບການ. ສະເພາະ ບັນດາລະບຽບການດ້ານບໍລິຫານ ຈະຫລຸດຜ່ອນຈາກ 15-30% ເວລາປະຕິບັດ. ກົນໄກປະຕູດຽວ ອາຊຽນ ແລະ ກົນໄກປະຕູດຽວແຫ່ງຊາດ ແມ່ນບາດກ້າວເດີນສຳຄັນຂອງບັນດາປະເທດສະມາຊິກ ອາຊຽນ ໃນການປະຕິຮູບ, ເຮັດໃຫ້ລະບຽບການບໍລິຫານກ່ຽວຂ້ອງເຖິງການເຄື່ອນໄຫວນຳເຂົ້າສົ່ງອອກງ່າຍດ່າຍກວ່າ, ຕອບສະຫນອງຄວາມຕ້ອງການເຊື່ອມໂຍງ, ພັດທະນາຂອງແຕ່ລະປະເທດສະມາຊິກ ກໍຄື ເພີ່ມທະວີການເຊື່ອມຕໍ່, ການພົວພັນຮ່ວມມືລະຫວ່າງບັນດາປະເທດໃນພາກພື້ນ.
ຫວຽດນາມ ສຳເລັດຕາມຄຳໝັ້ນສັນຍາ
ນັບແຕ່ເມື່ອ ອາຊຽນ ເຫັນດີ ຍູ້ໄວວິວັດທະນາການສ້າງຕັ້ງປະຊາຄົມເສດຖະກິດ ອາຊຽນ, ບັນດາລັດຖະມົນຕີເສດຖະກິດ ອາຊຽນ ໄດ້ເປັນເອກະພາບຕໍ່ບັນຊີລາຍຊື່ບັນດາມາດຕະການບຸລິມະສິດ ຊື່ງບັນດາປະເທດ ອາຊຽນ ຄວນສຸມໃສ່ສ້າງຂຶ້ນ. ຄຽງຄູ່ກັບບັນດາຄຳໝັ້ນສັນຍາຄື: ບັນດາມາດຕະການຫລຸດຜ່ອນອັດຕາພາສີ, ສ້າງຄວາມສະດວກໃຫ້ການລົງທຶນ, ການຄ້າ, ການປະຕິຮູບເຮັດລະບຽບການພາສີ ແມ່ນຫນຶ່ງໃນບັນດາເນື້ອໃນສຳຄັນ.
ຕາມການຕີລາຄາຂອງທະນາຄານໂລກແລ້ວ, ສະເລ່ຍ ມື້ຫນຶ່ງ ສິນຄ້າຖືກຊັກຊ້າໃນຂອດເຮັດລະບຽບການພາສີ ເຮັດໃຫ້ປະລິມານສິນຄ້ານຳເຂົ້າສົ່ງອອກຈະຖືກຫລຸດລົງ 1%. ຢູ່ ອາຊຽນ, ສະເລ່ຍ ການສົ່ງອອກນຳເຂົ້າສິນຄ້າເທື່ອຫນຶ່ງ ຕ້ອງເສຍເວລາ 20 ວັນ. ສິ່ງດັ່ງກ່າວໄດ້ເຮັດໃຫ້ວິສາຫະກິດເພີ່ມລາຍຈ່າຍ ແລະ ກີດຂວາງຕໍ່ການເຕີບໂຕເສດຖະກິດ. ເພາະສະນັ້ນ ກົນໄກປະຕູດຽວອາຊຽນ ແມ່ນເນື້ອໃນບຸລິມະສິດໃນແຜນການຂອງບັນດາປະເທດ ອາຊຽນ ເພື່ອສ້າງປະຊາຄົມເສດຖະກິດ ອາຊຽນ ໃນປີ 2015. ທ່ານນາງ ກາວແທງຢຽບ, ຫົວຫນ້າກົມຮ່ວມມືສາກົນ ຂຶ້ນກັບ ກະຊວງອຸດສາຫະກຳ ແລະ ການຄ້າ ຖືວ່າ:
“ກົນໄກປະຕູດຽວອາຊຽນ ແມ່ນເນື້ອໃນ ຊື່ງໄດ້ຮັບການຍູ້ໄວຈາກບັນດາປະເທດ ອາຊຽນ. ແລະ ປະເທດສະມາຊິກອາຊຽນທັງໝົດ ພວມມານະພະຍາຍາມຜັນຂະຫຍາຍການສ້າງກົນໄກປະຕູດຽວແຫ່ງຊາດ ເພື່ອເຊື່ອມຕໍ່ເຂົ້າ ກົນໄກປະຕູດຽວອາຊຽນ. ກົນໄກປະຕູດຽວອາຊຽນ ປະຈຸບັນພວມໃນໄລຍະທົດລອງ ແລະ ຫວັງວ່າ 1-2 ປີຈະມາເຖິງ ສາມາດເຊື່ອມຕໍ່ເປັນກົນໄກລວມຂອງ ອາຊຽນ. ໃນຈຳນວນບັນດາປະເທດ ອາຊຽນ, ຫວຽດນາມ ແມ່ນປະເທດ ມີອັດຕາສ່ວນປະຕິບັດສູງສຸດ, ໃນບັນດາຂົງເຂດລະອຽດ ລ້ວນແຕ່ມີບັນດາຄວາມຄືບຫນ້າ.”
ມາຮອດປະຈຸບັນ, ຫວຽດນາມ ແມ່ນຫນຶ່ງໃນບັນດາປະເທດສະມາຊິກ ນຳຫນ້າໃນການປະຕິບັດບັນດາຄຳໝັ້ນສັນຍາ, ໃນນັ້ນ ມີເລື່ອງສ້າງ ກົນໄກປະຕູດຽວແຫ່ງຊາດ. ພ້ອມກັບການຜັນຂະຫຍາຍ ກົນໄກປະຕູດຽວແຫ່ງຊາດ, ຫວຽດນາມ ໄດ້ເປັນເຈົ້າການເຂົ້າຮ່ວມບັນດາຫນ່ວຍງານຂອງ ອາຊຽນ ໃນຂອບເຂດຜັນຂະຫຍາຍ ກົນໄກປະຕູດຽວອາຊຽນ ນັບແຕ່ຈຸດເວລາສ້າງແຜນຮ່າງສັນຍາ, ອະນຸສັນຍາ ແລະ ນຳເນື້ອໃນຂອງບັນດາສັນຍານັ້ນເຂົ້າປະຕິບັດເມື່ອບັນດາລັດຖະບານຂອງປະເທດສະມາຊິກ ອາຊຽນ ໃຫ້ສັດຕະຍາບັນ. ມີ 7 ປະເທດສະມາຊິກ ລວມມີ: ບຣູໄນ, ອິນໂດເນເຊຍ, ມາເລເຊຍ, ຟິລີບປີນ, ສິງກະໂປ, ໄທ ແລະ ຫວຽດນາມ ປະກາດໄດ້ຜັນຂະຫຍາຍ ກົນໄກປະຕູດຽວແຫ່ງຊາດ ຕາມຄຳໝັ້ນສັນຍາ, 5 ປະເທດ ສະມາຊິກ ລວມມີ: ອິນໂດເນເຊຍ, ມາເລເຊຍ, ສິງກະໂປ, ໄທ ແລະ ຫວຽດນາມ ປະກາດ ໄດ້ກຽມພ້ອມໃຫ້ການເຊື່ອມຕໍ່ ກົນໄກປະຕູດຽວອາຊຽນ ນັບແຕ່ເດືອນ 12/2015. ຕາມການຕີລາຄາຂອງທ່ານເລຂາທິການໃຫຍ່ ອາຊຽນ ເລເລືອງມີງ ແລ້ວ, ການເຂົ້າຮ່ວມຂອງຫວຽດນາມໃນ ກົນໄກປະຕູດຽວອາຊຽນ ແມ່ນມີຄວາມໝາຍສຳຄັນ.
“ການເຂົ້າຮ່ວມຂອງຫວຽດນາມ ແມ່ນການລະດົມກຳລັງໃຈອັນໃຫຍ່ຫລວງໃຫ້ບັນດາປະເທດສະມາຊີກ ອາຊຽນ ອື່ນເຂົ້າຮ່ວມການເຊື່ອມຕໍ່ໂດຍກົງເຂົ້າ ກົນໄກປະຕູດຽວອາຊຽນ. ຜ່ານນັ້ນ ແມ່ນຢັ້ງຢືນຄວາມສາມາດຂອງປະເທດສະມາຊິກ ອາຊຽນ ໃນການປະຕິບັດບັນດາຄຳຮຽກຮ້ອງຕ້ອງການລະດັບຊາດໃນໄລຍະສັ້ນ ເພື່ອຕອບສະຫນອງບັນດາຄຳໝັ້ນສັນຍາພາກພື້ນ, ປະກອບສ່ວນເຂົ້າໃນການປະຕິບັດໂຄງການທົດລອງ ກົນໄກປະຕູດຽວອາຊຽນ ສຳເລັດ, ເພີ່ມທະວີປະສິດທິຜົນດ້ານການຄ້າ ແລະ ລັກສະນະແກ້ງແຍ້ງໃນພາກພື້ນ ເວົ້າລວມ ແລະ ຫວຽດນາມເວົ້າສະເພາະ.”
ເຊື່ອມໂຍງເຂົ້າກັບເສດຖະກິດພາກພື້ນ ຢ່າງແຮງ
ນັບແຕ່ນີ້ຮອດທ້າຍປີ, ຫວຽດນາມ ພ້ອມກັບບັນດາປະເທດສະມາຊິກ ອື່ນ ສຳເລັດການເຊື່ອມຕໍ່ດ້ານເຕັກນິກ ເພື່ອພ້ອມແລ້ວເຊື່ອມຕໍ່ ກົນໄກປະຕູດຽວອາຊຽນ ໃນເດືອນ 12/2015.
ພາຍຫລັງ 20 ປີນັບແຕ່ເມື່ອຫວຽດນາມ ເຂົ້າເປັນສະມາຊິກ ອາຊຽນ, ປະຈຸບັນ ອາຊຽນ ໄດ້ກາຍເປັນຫນຶ່ງໃນບັນດາຄູ່ຮ່ວມມືດ້ານການຄ້າສຳຄັນຕົ້ນຕໍຂອງຫວຽດນາມ, ກວມກວ່າ ¼ ຍອດມູນຄ່າການຄ້າຂອງຫວຽດນາມ. ການປະຕິບັດສຳເລັດ ກົນໄກປະຕູດຽວແຫ່ງຊາດຄືດັ່ງເຄື່ອງມືຕົ້ນຕໍຂອງບັນດາອົງການລັດຖະບານໃນການສ້າງຄວາມສະດວກດ້ານການຄ້າ ແລະ ການຂົນສົ່ງສາກົນກໍຄື ເຊື່ອມຕໍ່ ກົນໄກປະຕູດຽວອາຊຽນ ໂດຍໄວ ແມ່ນບາດກ້າວເຊື່ອມໂຍງສຳຄັນຂອງຫວຽດນາມ. ບໍ່ພຽງແຕ່ສ້າງຄວາມສະດວກໃຫ້ສະພາບແວດລ້ອມການລົງທຶນ ແລະ ດຳເນີນທຸລະກິດ, ເຊື່ອມຕໍ່ກ ກົນໄກປະຕູດຽວອາຊຽນ ເທົ່ານັ້ນ ຫາກຍັງຮັບປະກັນບົດບາດທີ່ຕັ້ງຂອງຫວຽດນາມໃນການເຊື່ອມໂຍງເຂົ້າກັບເສດຖະກິດສາກົນ ແລະ ຍົກສູງກຳລັງຄວາມສາມາດແກ້ງແຍ້ງແຫ່ງຊາດ. ການປະຕິຮູບບໍລິຫານ, ປັບປຸງສະພາບແວດລ້ອມແຫ່ງການດຳເນີນທຸລະກິດ, ຍົກສູງກຳລັງແກ້ງແຍ້ງແຫ່ງຊາດ ແມ່ນຫນຶ່ງໃນບັນດາບາດກ້າວບຸກທະລຸຍຸດທະສາດ, ແມ່ນມາດຕະການສຳຄັນເພື່ອໃຫ້ຫວຽດນາມ ເຊື່ອມໂຍງເຂົ້າກັບພາກພື້ນ ແລະ ສາກົນ ສຳເລັດຜົນ.