(vovworld) - ໃນ 45 ປີທີ່ຜ່ານມາ, ປະຊາຊົນຫວຽດນາມ ໄດ້ຜັນຂະຫຍາຍການປະຕິບັດພິໄນກຳຂອງປະທານ ໂຮ່ຈີມິນ, ໃນນັ້ນມີເນື້ອໃນກ່ຽວກັບຄວາມສາມັກຄີສາກົນ. ໂດຍປະຕິບັດຕາມຄຳຕັກເຕືອນຂອງເພິ່ນແລ້ວ, ຊາວຫວຽດນາມ ໄດ້ມານະພະຍາຍາມປະກອບສ່ວນເຂົ້າໃນການຟື້ນຟູກຸ່ມກ້ອນມະຫາສາມັກຄີໃນຂະບວນການກອມມູນນິດສາກົນ.
ໃນພິໄນກຳ, ປະທານ ໂຮ່ຈີມິນ ໄດ້ກຳນົດຄວາມຮັບຜິດຊອບຂອງພັກກອມມູນິດຫວຽດນາມ ທີ່ມີຕໍ່ຂະບວນການກອມມູນິດໂລກ. ເພິ່ນຂຽນວ່າ: “ຂ້າພະເຈົ້າຫວັງວ່າ, ພັກເຮົາຈະອອກແຮງເຄື່ອນໄຫວ, ປະກອບສ່ວນເຂົ້າໃນການຟື້ນຟູກຸ່ມກ້ອນມະຫາສາມັກຄີລະຫວ່າງບັນດາພັກອ້າຍນ້ອງບົນພື້ນຖານລັດທິມາກ - ເລນິນ ແລະ ລັດທິກອມມູນິດສາກົນຢ່າງສົມເຫດສົມຜົນ“. ເພິ່ນໄດ້ສະແດງຄວາມເຊື່ອໝັ້ນວ່າ “ບັນດາພັກອ້າຍນ້ອງ ແລະ ບັນດາປະເທດອ້າຍນ້ອງຕ້ອງສາມັກຄີກັນຢ່າງແນ່ນອນ“.
ຊາຕາກຳຂອງຊາດຕ້ອງຕິດພັນຢ່າງແໜ້ນແຟ້ນກັບມະນຸດ
ໂດຍປະຕິບັດຕາມແນວຄິດຂອງປະທານ ໂຮ່ຈີມິນ, ພັກກອມມູນິດຫວຽດນາມ ໄດ້ອອກແຮງປັບປຸງ, ຟື້ນຟູຄວາມສາມັກຄີໃນຂະບວນການກອມມູນິດຂອງໂລກ. ດຣ. ຈູດຶກຕິ໋ງ, ອະດີດຜູ້ອຳນວຍການຫໍພິພິດທະພັນ ໂຮ່ຈີມິນ, ເນັ້ນໜັກວ່າ:
“ພັກເຮົາໄດ້ເຮັດຈົນສຸດຄວາມສາມາດຂອງຕົນ, ມີຄວາມຮັບຜິດຊອບກັບຂະບວນການກອມມູນິດໂລກກັບອ້າຍນ້ອງ, ເພື່ອນມິດ. ສະເພາະເລື່ອງພັກເຮົາຍືດໝັ້ນລັດທິມາກ - ເລນິນ, ແນວຄິດ ໂຮ່ຈີມິນ, ທຳການປ່ຽນໃໝ່ຢູ່ຫວຽດນາມສຳເລັດຜົນຄືແນວນັ້ນ, ໄດ້ເປັນການກະທຳທີ່ແທດຈິງເພື່ອປົກປັກຮັກສາຂະບວນການກອມມູນິດສາກົນ“.
45 ປີຜ່ານມາ, ໃນນະໂຍບາຍແລະວຽກງານທັງໝົດ, ພັກກອມມູນິດຫວຽດນາມ ຍາມໃດກໍ່ເອົາໃຈໃສ່ເປັນພິເສດເຖິງການເພີ່ມທະວີກຸ່ມກ້ອນສາມັກຄີສາກົນ, ສາມັກຄີກັບປະເທດຕ່າງໆ. ຈາກປະເທດໜຶ່ງທີ່ຖືກປິດລ້ອມ, ຄວ້ຳບາດ, ຫວຽດນາມ ນັບມື້ນັບເຊື່ອມໂຍງທຸກດ້ານໃນຊີວິດການເມືອງ, ເສດຖະກິດ, ວັດທະນະທຳສັງຄົມໂລກຢ່າງເລິກເຊິ່ງ, ກວ້າງຂວາງກວ່າ, ມາຮອດປະຈຸບັນ, ຫວຽດນາມ ໄດ້ມີການພົວພັນຕ່າງປະເທດກັບ 180 ກວ່າປະເທດຢູ່ໃນໂລກ, ມີການພົວພັນດ້ານການຄ້າກັບ 200 ກວ່າປະເທດ, ເຂດແຄວ້ນ. ຫວຽດນາມ ຍັງເຂົ້າຮ່ວມບັນດາເວທີປາໄສ, ບັນດາອົງການຈັດຕັ້ງສາກົນ, ພິເສດແມ່ນມີການປະກອບສ່ວນຢ່າງໃຫຍ່ຫຼວງໃນການເຄື່ອນໄຫວຂອງສະຫະປະຊາຊາດ, ຂອງອາຊຽນ. ດ້ວຍບັນດາຄວາມມານະພະຍາຍາມພັດທະນາເສດຖະກິດ, ສັງຄົມ, ວັດທະນະທຳ, ຮັກສາສະຖຽນລະພາບດ້ານການເມືອງ, ຫວຽດນາມ ໄດ້ ແລະ ພວມປະກອບ ສ່ວນເຂົ້າໃນການກໍ່ສ້າງໂລກນີ້ໃຫ້ນັບມື້ນັບໝັ້ນຄົງ, ຈະເລີນຮຸ່ງເຮືອງ ແລະ ພັດທະນາ.
ເພີ່ມທະວີສັນຕິພາບ, ການຮ່ວມມື ແລະ ພັດທະນາ
ປະຈຸບັນ, ສະພາບການໂລກພວມຜັນແປໄປຢ່າງສັບສົນ, ຂະບວນການກອມມູນິດ ແລະ ກຳມະກອນສາກົນມີທ່າອ່ຽງໃໝ່ຫຼາຍຢ່າງ, ແຕ່ພັກກອມມູກິດຫວຽດນາມ ຍັງຄົງມີແຜນນະໂຍບາຍສະເໝີຕົ້ນສະເໝີປາຍໃນແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ສັນຕິພາບ, ຮ່ວມມື ແລະ ພັດທະນາ; ຫັນການພົວພັນເປັນຫຼາຍຮູບຫຼາຍແບບ, ເປັນເຈົ້າການ ແລະ ຕັ້ງໜ້າເຊື່ອມໂຍງກັບສາກົນ; ເປັນເພື່ອນມິດ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ ແລະ ເປັນສະມາຊິກມີຄວາມຮັບຜິດຊອບໃນປະຊາຄົມໂລກ… ນີ້ແມ່ນການໝູນໃຊ້ແຜນນະໂຍບາຍສາມັກຄີກັບສາກົນໃນພິໄນກຳຂອງປະທານ ໂຮ່ຈີມິນ ຢ່າງມີຫົວຄິດປະດິດສ້າງ. ຮອງສາດສະດາຈານ, ດຣ. ຟ້າມງອກແອງ, ຮອງຫົວໜ້າວິທະຍາຄານ ໂຮ່ຈີມິນ ແລະ ບັນດາການນຳຂອງພັກ, ສັງກັດສະຖາບັນການເມືອງແຫ່ງຊາດ ໂຮ່ຈີ໋ມິນ, ຊີ້ແຈ້ງວ່າ:
“ພວກເຮົາຫວັງວ່າ, ດ້ວຍຄວາມມານະພະຍາຍາມຢ່າງມີໄຫວພິກ, ຄ່ອງແຄ້ວ ຂອງພັກກອມມູນນິດຫວຽດນາມ ບົນພື້ນຖານຄວາມເປັນທຳຂອງຊາດ, ພວກເຮົາຕ້ອງເຮັດແນວໃດເພື່ອໃຫ້ໂລກເຂົ້າໃຈພວກເຮົາກວ່າ. ບົນພື້ນຖານຜົນປະໂຫຍດທີ່ສົມເຫດສົມຜົນ, ປອງດອງກັນລະຫວ່າງຊາດຕ່າງໆ, ພວກເຮົາຕ້ອງພະຍາຍາມເພື່ອເຮັດໃຫ້ບັນດາຄວາມບໍ່ລົງລອຍກັນໃຫຍ່ກາຍເປັນຄວາມບໍ່ລົງລອຍກັນນ້ອຍ ແລະ ຄວາມບໍ່ລົງລອຍກັນນ້ອຍກາຍເປັນບໍ່ມີຄວາມບໍ່ລົງລອຍກັນ. ແລະ ການສູ້ຢັນນັ້ນ ກາຍເປັນການພົວພັນສັນຕິພາບ, ມິດຕະພາບ, ການຮ່ວມມືຢ່າງໝັ້ນຄົງ.”
ໂດຍປະຕິບັດຄວາມຫວັງໃນພິໄນກຳຂອງປະທານໂຮ່ຈິມີນ, ທົ່ວພັກ, ທົ່ວກອງທັບ ແລະ ທົ່ວປວງຊົນຫວຽດນາມ ຕັດສິນໃຈ ຮັກສາສັນຕິພາບ, ຍູ້ແຮງການຫັນເປັນອຸດສາຫະກຳ ແລະ ທັນສະໄຫມ, ປົກປັກຮັກສາເອກະລາດ, ອະທິປະໄຕ, ເອກະພາບ, ຜືນແຜນດິນອັນຄົບຖ້ວນຢ່າງໝັ້ນຄົງ; ຍົກສູງທີ່ຕັ້ງບົດບາດຂອງປະເທດຊາດ. ທ່ານຮອງສາດສະດາຈານ, ດຣ ຟ້າມຊວນໝີ, ພະແນກປະຫວັດສາດພັກ, ສະຖາບັນສື່ມວນຊົນ ແລະ ໂຄສະນາ ຖືວ່າ:
“ສິ່ງສຳຄັນສຳລັບພວກເຮົາ ປະຈຸບັນ ແມ່ນເຮັດແນວໃດເພື່ອຮັກສາເສດຖະກິດໃຫ້ໝັ້ນທ່ຽງ ເພື່ອສັນຕິພາບແລະ ການພັດທະນາ. ຢາກເຮັດໄດ້ຄືແນວນັ້ນ ພັກຕ້ອງກໍ່ສ້າງໃຫ້ໝັ້ນຄົງເຂັ້ມແຂງ, ປະຊາຊົນຕ້ອງສາມັກຄີ, ຕັ້ງຫນ້າຜ່ານຜ່າໄລຍະຫຍຸ້ງຍາກ ເພື່ອພັດທະນາເສດຖະກິດ. ປະທານໂຮ່ຈິມີນ ເຄີຍເວົ້າວ່າ ຖ້າພວກເຮົາເຂັ້ມແຂງ ພວກເຮົາຈຶ່ງສາມາດປົກປັກຮັກສາປະເທດຊາດ, ຖ້າຫາກພວກເຮົາບໍ່ເຂັ້ມແຂງ ພວກເຮົາພຽງແຕ່ເປັນເຄື່ອງມືຂອງຜູ້ອື່ນ.”
ເປັນທີ່ຈະແຈ້ງແລ້ວວ່າ, ໂດຍພັກກອມມູນິດໄດ້ສືບທອດ ແລະ ພັດທະນາ ແນວຄິດໃຫຍ່ຂອງປະທານໂຮ່ຈິມີນ ກ່ຽວກັບຄວາມສາມັກຄີສາກົນຢ່າງປອດໃສ ບົນພື້ນຖານລັດທິ ມາກເລນີນ ແລະ ລັດທິກຳມະຊີບ ໃນຕະຫລອດ 45 ປີຜ່ານມາ. ແນວຄິດສາມັກຄີສາກົນຂອງ ເພີ່ນ ຍັງຄົງແມ່ນເຂັມຊີ້ທິດ ເພື່ອໃຫ້ຫວຽດນາມ ນັບມື້ນັບເຊື່ອມໂຍງ, ພັດທະນາ ກາຍເປັນຄູ່ຮ່ວມມືທີ່ໄວ້ເນື້ອເຊື່ອໃຈຂອງບັນດາປະເທດໃນໂລກ./.