ໂດຍຖັດຈາກມະຕິເລກທີ 19 ຂອງລັດຖະບານຊຶ່ງປະກາດໃຊ້ເມື່ອເດືອນ 3/2014 ກ່ຽວກັບບັນດາໜ້າທີ່, ວິທີການແກ້ໄຂຕົ້ນຕໍເພື່ອປົວແປງສະພາບແວດລ້ອມດຳເນີນທຸລະກິດ, ຕົ້ນເດືອນ 8 ທີ່ຜ່ານມາ, ນາຍົກລັດຖະມົນຕີ ຫວຽດນາມ ໄດ້ອອກຄຳສ່ັງເລກທີ 24 ກ່ຽວກັບການເພີ່ມທະວີການຄຸ້ມຄອງ ແລະ ປະຕິຮູບລະບຽບການບໍລິຫານໃນຂົງເຂດພາສີ, ສ່ວນສາອາກອນ. ວຽກງານນີ້ໄດ້ສະແດງໃຫ້ເຫັນຄວາມຕັດສິນໃຈຂອງລັດຖະບານໃນການສ້າງສະພາບແວດລ້ອມດຳເນີນທຸລະກິດທີ່ສະເໝີພາບ, ອຳນວຍຄວາມສະດວກເພື່ອແນໃສ່ຫຼຸກຜ່ອນວັນເວລາ ແລະ ເງິນໃຊ້ຈາຍຂອງບັນດາວິສາຫະກິດ.
(ພາບປະກອບ) |
ຕາມຕົວເລກສະຖີຕິເມື່ອບໍ່ດົນມານີ້ ໃນບົດລາຍງານກ່ຽວກັບ ສະພາບແວດລ້ອມດຳເນີນທຸລະກິດຂອງທະນາຄານໂລກກ່ຽວກັບຈຳນວນເທື່ອເສຍພາສີ ອາກອນ, ສຳເນົາເອກະສານຕ້ອງຍືນ, ຈຳນວນຊົ່ວໂມງຕ້ອງເສຍພາສີອາກອນ, ຫວຽດນາມຢືນອັນດັບທີ 149/190 ປະເທດ ແລະ ເຂດແຄ້ວນ. ໃນຂົງເຂດພາສີ, ຫວຽດນາມຢືນອັນທີ 65 ດ້ວຍການປະຕິບັດລະບຽບການສົ່ງອອກ, ນຳເຂົ້າສິນຄ້າປະມານ 21 ວັນ. ເມື່ອທຽບໃສ່ລະດັບສະເລ່ຍຂອງບັນດາປະເທດອາຊຽນ, ຄວາມຈິງນີ້ ຮຽກຮ້ອງໃຫ້ຫວຽດນາມຕ້ອງປະຕິຮູບ, ໂດຍສະເພາະແມ່ນ 2 ດັດຊະນີນີ້ ແມ່ນກ່ຽວຂ້ອງເຖິງຄ່າໃຊ້ຈາຍ, ຄວາມສ່ຽງໃນການດຳເນີນທຸລະກິດຂອງວິສາຫະກິດ.
ຕອບສະໜອງຕາມທຳນຽມສາກົນ
ທ້າຍໄຕມາດ 1 ປີນີ້, ລັດຖະບານປະກາດໃຊ້ມະຕິ ສະເໜີວ່າໄລຍະເວລາປະຕິບັດລະບຽບການພາສີແມ່ນຕ້ອງຫຼຸດລົງເຫຼືອພຽງ 14 ວັນ ແລະ ລະບຽບການພາສີອາກອນລົງເຫຼືອພຽງ 171 ຊົ່ວໂມງໃນປີ 2015. ນີ້ແມ່ນຄວາມຮຽກຮ້ອງຕ້ອງການໂດຍບັງຄັບເພື່ອ ຕອບສະໜອງຕາມທຳນຽມສາກົນ. ບັນດາຜູ້ຊ່ຽວຊານເສດຖະກິດຖືວ່າ ຖ້າຫາກສິ່ງດັ່ງກ່າວໄດ້ຮັບການປະຕິບັດ ຈະສົ່ງຜົນກະທົບຢ່າງໃຫຍ່ຫຼວງເຖິງ ສະພາບແວດລ້ອມດຳເນີນທຸລະກິດຂອງຫວຽດນາມ, ພິເສດແມ່ນການຫຼຸດຜ່ອນຄວາມສ່ຽງທາງດ້ານການຄ້າ, ກົດໝາຍ, ຫຼຸດຜ່ອນຄ່າໃຊ້ຈາຍຕິດຕໍ່ພົວພັນໃຫ້ແກ່ວິສາຫະກິດ. ເມື່ອສາມາດ ຫຼຸດຜ່ອນຄ່າໃຊ້ຈາຍຕິດຕໍ່ພົວພັນໃຫ້ແກ່ວິສາຫະກິດໄດ້ນັ້ນ, ເປັນທີ່ຈະແຈ້ງວ່າຈະຊຸກຍູ້ການເຕີບໂຕເສດຖະກິດ. ຕາມການຄິດໄລ່ຂອງຜູ້ຊ່ຽວຊານສາກົນ ໄດ້ໃຫ້ເຫັນວ່າ ຖ້າຫາກຫຼຸດຜ່ອນເວລາໄດ້ 1 ວັນກ່ຽວກັບລະບຽບການພາສີສຳລັບສິນຄ້າຜ່ານຊາຍແດນ, ຫວຽດນາມກໍສາມາດຫຼຸດຜ່ອນ 1% ຍອດວົງເງິນກ່ຽວກັບຄ່າໃຊ້ຈາຍດ້ານຂາອອກຂາເຂົ້າໃນ 1 ປີ. ທ່ານລັດຖະມົນຕີກະຊວງການເງິນຫວຽດນາມ ດິງຕ້ຽນຢຸງ ໃຫ້ຮູ້ວ່າ
“ ແນ່ນອນວ່າ ແຕ່ນີ້ຫາຕົ້ນເດືອນ 9/2014, ກະຊວງການເງິນຈະຫຼຸດຜ່ອນບັນດາລະບຽບການ, ສ້າງເງື່ອນໄຂທີ່ດີໃຫ້ແກ່ວິສາຫະກິດ. ພວກຂ້າພະເຈົ້າຈະກວດກາ, ລົບລ້າງບັນດາລະບຽບການທີ່ບໍ່ຈຳເປັນ, ກໍ່ຄວາມຫຍຸ້ງເຫຍືອງໃຫ້ແກ່ຜູ້ເສຍພາສີອາກອນ, ຫຼຸດຜ່ອນເວລາແຈ້ງລະບຽບການ ແລະ ເສຍພາສີອາກອນ ກໍຄືຫຼຸດຜ່ອນເວລາເຮັດລະບຽບການຜ່ານແດນໃຫ້ແກ່ວິສາຫະກິດເຄື່ອນໄຫວຂາອອກຂາເຂົ້າ. ສູ້ຊົນຫຼຸດຜ່ອນເວລາລົງລະອຽດແມ່ນ 201 ຊົ່ວໂມງ. ທີ 2 ແມ່ນແກ້ໄຂຄວາມແຕກຕ່າງກັນລະຫວ່າງລາຍຮັບບັນຊີ ແລະ ລາຍຮັບໂດຍຄິດໄລ່ລາຍໄດ້ຂອງວິສາຫະກິດຈະຫຼຸດລົງປະມານ 35 ຊົ່ວໂມງ. ທີ 3 ແມ່ນແກ້ໄຂຄວາມແຕກຕ່າງກັນກ່ຽວກັບການຮັບຮູ້ລະຫວ່າງຄ່າໃຊ້ຈາຍບັນຊີ ກັບຄ່າໃຊ້ຈາຍຄິດໄລ່ພາສີອາກອນ ຫຼຸດໄດ້ປະມານ 10 ຊົ່ວໂມງ ແລະ ທີ 4 ແມ່ນຍູ້ແຮງການແຈ້ງເອກະສານເສຍພາສີອາກອນທາງເອເລັກໂຕນິກ ຈະຫຼຸດຜ່ອນໄດ້ປະມານ 23 ຊົ່ວໂມງ. ”
ຜັນຂະຫຍາຍຢ່າງຕັ້ງໜ້າ.
ຄວາມຈິງໄດ້ສະແດງໃຫ້ເຫັນວ່າໄລຍະທີ່ຜ່ານມາ, ຫວຽດນາມໄດ້ປະຕິບັດ ການປະຕິຮູບລະບຽບການບໍລິຫານກ່ຽວກັບພາສີອາກອນ ແນໃສ່ຫຼຸດຜ່ອນເວລາແຈ້ງເສຍພາສີອາກອນໃຫ້ແກ່ວິສາຫະກິດ.ເຖິງຢ່າງໃດກໍຕາມ, ເມື່ອທຽບໃສ່ບັນດາປະເທດໃນພາກພື້ນນັ້ນ, ເວລາແຈ້ງເສຍພາສີອາກອນໃຫ້ແກ່ວິສາຫະກິດຍັງສູງຢູ່. ທ່ານລັດຖະມົນຕີກະຊວງການເງິນຫວຽດນາມ ດິງຕ້ຽນຢຸງ ໃຫ້ຮູ້ວ່າ ເພື່ອປະຕິບັດມະຕິຂອງລັດຖະບານ ແລະ ການຊີ້ນຳຂອງນາຍົກລັດຖະມົນຕີ, ກະຊວງການເງິນຫວຽດນາມ ສົມທົບກັບຫ້ອງການການຄ້າ ແລະ ອຸດສາຫະກຳຫວຽດນາມ, ກັບສະຫະສະມາຄົມວິສາຫະກິດ, ສະຫະສະມາຄົມທີ່ປຶກສາດ້ານ ພາສີອາກອນເພື່ອກວດກາບັນດາໂຄງການດຳເນີນງານລະອຽດ ແນໃສ່ຫຼຸດຜ່ອນຈຳນວນເທື່ອ ແຈ້ງລະບຽບການ ແລະ ຫຼຸດຜ່ອນເວລາແຈ້ງເສຍພາສີອາກອນ, ພ້ອມຊີ້ນຳຢ່າງຂ້ຽວຂາດກ່ຽວກັບປະຕິຮູບລະບຽບການພາສີ ແລະ ພາສີອາກອນ. ທ່ານລັດຖະມົນຕີກະຊວງການເງິນຫວຽດນາມ ດິງຕ້ຽນຢຸງ ໃຫ້ຮູ້ວ່າອີກວ່າ
“ກະຊວງການເງິນຫວຽດນາມໄດ້ຍືນສະເໜີລັດຖະບານ ມະຕິກ່ຽວກັບການແກ້ໄຂຄວາມຫຍຸ້ງຍາກ, ສິ່ງທີ່ຄ້າງຄ່າ, ຍູ້ແຮງການພັດທະນາຂອງວິສາຫະກິດ, ໃນນັ້ນເລັ່ງໃສ່ເນື້ອໃນການປະຕິຮູບລະບຽບການບໍລິຫານດ້ານພາສີ ແລະ ພາສີອາກອນ, ສູ້ຊົນຫຼຸດຜ່ອນເວລາແຈ້ງເສຍພາສີອາກອນ 290 ຊົ່ວໂມງໃນຍອດຈຳນວນ 537 ຊົ່ວໂມງຕາມການຄະດໄລ່ຂອງທະນາຄານໂລກໃນປີ 2012. ພວກຂ້າພະເຈົ້າເລັ່ງໃສ່ 3 ໝວດມາດຕະການຕົ້ນຕໍ: ທີ 1 ແມ່ນຫຼຸດຜ່ອນຈຳນວນເທື່ອແຈ້ງເສຍພາສີອາກອນ; ທີ 2 ກວດກາ, ລົບລ້າງບັນດາລະບຽບການບໍ່ຈຳເປັນເມື່ອວິສາຫະກິດຕ້ອງແຈ້ງເສຍພາສີອາກອນ ແລະ ທີ 3 ແມ່ນບັນດາມາດຕະການກວດກາດ້ານກົດໝາຍ”
ດ້ວຍຄວາມຕັດສິນໃຈປະຕິຮູບລະບຽບການບໍລິຫານ, ຍົກສູງຄວາມສາມາດ ແກ່ງແຍ້ງແຫ່ງຊາດຂອງລັດຖະບານ ແລະ ບັນດາກະຊວງ, ຂະແໜງການຕ່າງໆ, ຫວຽດນາມມີຄວາມປາດຖະໜາປົວແປງທີ່ຕັ້ງບົດບາດແກ່ງແຍ້ງໃນກຸ່ມບັນດາປະເທດອາຊຽນ ພ້ອມທັງປົວແປງ ສະພາບແວດລ້ອມດຳເນີນທຸລະກິດຢ່າງຕັ້ງໜ້າ.