(ພາບ: THX/TTXVN)

   ທ່ານ Michel Barnier ຖືກບັງຄັບຕ້ອງລາອອກຈາກຕຳແໜ່ງ ໃນຂະນະທີ່ຫາກໍ່ຮັບໜ້າທີ່ເປັນນາຍົກລັດຖະມົນຕີພຽງແຕ່ 3 ເດືອນ, ພາຍຫຼັງທີ່ບັນດາສະມາຊິກລັດຖະສະພາຝ່າຍຂວາ ແລະ ຝ່າຍຊ້າຍ ເອກະພາບກັນ ໃນການບ່ອນບັດບໍ່ໄວ້ວາງໃຈ ຕ້ານຄືນທ່ານ. ນີ້ແມ່ນຄັ້ງທີ 2 ພາຍໃນເວລາບໍ່ຮອດປີໜຶ່ງ, ທ່ານປະທານາທິບໍດີ Macron ຕ້ອງປະເຊີນໜ້າກັບເລື່ອງປ່ຽນນາຍົກລັດຖະມົນຕີ, ພາຍຫຼັງທີ່ທ່ານ Gabriel Attal ລາອອກຈາກຕຳແໜ່ງເມື່ອເດືອນກໍລະກົດ.

ເພີ່ມກຳລັງດັນຕໍ່ທ່ານປະທານາທິບໍດີ Macron

ມີ 331 ໃນຈຳນວນ 577 ສະມາຊິກສະພາແຫ່ງຊາດ ຝະລັ່ງ  ໄດ້ປ່ອນບັດຕ້ານລັດຖະບານຂອງທ່ານນາຍົກລັດຖະມົນຕີ Barnier. ອຳນາດການປົກຄອງຂອງທ່ານ Michel Barnier ແມ່ນລັດຖະບານ ຝະລັ່ງ ທຳອິດທີ່ຖືກປະລາໄຊ ໃນການປ່ອນບັດບໍ່ໄວ້ວາງໃຈນັບແຕ່ປີ 1962 ແລະ ທ່ານ Barnier ກາຍເປັນນາຍົກລັດຖະມົນຕີດຳລົງຕຳແໜ່ງນາຍົກລັດຖະມົນຕີໃນໄລຍະເວລາສັ້ນກ່ວາໝູ່ໃນປະຫວັດສາດ ຝະລັ່ງ.

  ເລື່ອງທ່ານ Michel Barnier ລາອອກຈາກຕຳແໜ່ງນາຍົກລັດຖະມົນຕີ ເຮັດໃຫ້ເພີ່ມກຳລັງດັນໃຫ້ອຳນາດການປົກຄອງປະທານາທິບໍດີ Macron. ທ່ານພວມຕ້ອງປະເຊີນໜ້າກັບຄຳຮຽກຮ້ອງໃຫ້ລາອອກຈາກຕຳແໜ່ງ ແລະ ນັບມື້ນັບໄດ້ຮັບການສະໜັບສະໜູນໜ້ອຍລົງ ພາຍຫຼັງໄດ້ຮຽກຮ້ອງການເລືອກຕັ້ງລັດຖະສະພາ ຝະລັ່ງ ກ່ອນກຳນົດເວລາ. ເຖິງແນວນັ້ນກໍ່ຕາມ, ວັນທີ 5 ທັນວາ, ທ່ານປະທານາທິບໍດີ Macron ກໍ່ຍັ້ງຢືນຢັນວ່າ ທ່ານຈະດຳລົງຕຳແໜ່ງເປັນປະມຸກລັດ ຝະລັ່ງ ຈົນເຖິງເວລາສີ້ນສຸດອາຍຸການໃນປີ 2027:

   ປະຊາຊົນໄດ້ມອບໜ້າທີ່ໃຫ້ແກ່ຂ້າພະເຈົ້າຢ່າງມີປະຊາທິປະໄຕ. ແລະ ຂ້າພະເຈົ້າຈະປະຕິບັດໜ້າທີ່ໃນເວລາ 5 ປີນີ້ຢ່າງຄົບຖ້ວນ, ຈົນເຖິງເວລາສິ້ນສຸດອາຍຸການ. ຄວາມຮັບຜິດຊອບຂອງຂ້າພະເຈົ້າ ແມ່ນຮັບປະກັນການເຄື່ອນໄຫວຢ່າງລຽນຕິດຂອງລັດ, ຄວາມຖືກຕ້ອງຂອງລະບອບລະບຽບການ ແລະ ຄວາມເປັນເອກະລາດຂອງລັດ ແລະ ເພື່ອປົກປ້ອງປະຊາຊົນທຸກຄົນ.

   ລັດຖະທຳມະນູນ ຝະລັ່ງ ບໍ່ຮຽກຮ້ອງປະທານາທິບໍດີ ລາອອກຈາກຕຳແໜ່ງ ພາຍຫຼັງທີ່ລັດຖະບານໂດຍທ່ານແຕ່ງຕັ້ງຖືກລົ້ມລະລາຍ. ໃນຂະນະນັ້ນ, ຝະລັ່ງ ກໍ່ບໍ່ສາມາດດຳເນີນການເລືອກຕັ້ງກ່ອນກຳນົດເວລາໃນທັນທີ ຍ້ອນລັດຖະສະພາປະຈຸບັນຂອງປະເທດນີ້ ຕ້ອງຄົງຕົວຈົນຮອດເດືອນມິຖຸນາປີ 2025.

ບັນດາຜົນຕາມມາຈາກຄວາມຂາດສະຖຽນລະພາບດ້ານການເມືອງຢູ່ ຝະລັ່ງ

ເລື່ອງລັດຖະບານ ຝະລັ່ງ ຖືກລົ້ມລະລາຍ ຈະກໍ່ໃຫ້ເກີດຫຼາຍຜົນຕາມມາ ແລະ ສົ່ງຜົນສະທ້ອນຢ່າງແຮງຕໍ່ສະພາບການເມືອງ ແລະ ເສດຖະກິດພາກພື້ນ ເອີລົບ, ຍ້ອນບົດບາດທີ່ຕັ້ງຂອງປະເທດມະຫາອຳນາດ ຝະລັ່ງ ໃນ ອີຢູ, ໂດຍສະເພາະແມ່ນໃນການແກ້ໄຂບັນດາບັນຫາສາກົນສຳຄັນຂອງກຸ່ມຄື: ດິນຟ້າອາກາດ, ຄວາມໝັ້ນຄົງ, ເສດຖະກິດ ແລະ ການແກ່ງແຍ້ງດ້ານການຄ້າ…

   ກ່ຽວກັບດ້ານເສດຖະກິດ, ສະພາບຂາດສະຖຽນລະພາບຢູ່ ຝະລັ່ງ ຈະແຜ່ຂະຫຍາຍອອກສູ່ບັນດາປະເທດອື່ນໆຂຶ້ນກັບພາກພື້ນໃຊ້ສະກຸນເງິນ euro. ເງິນ euro ໄດ້ເສຍ 0,5% ມູນຄ່າ ເມື່ອທຽບກັບເງິນໂດລາສະຫະລັດ ພາຍຫຼັງລັດຖະບານຂອງທ່ານນາຍົກລັດຖະມົນຕີ Barnier ຖືກລົ້ມລະລາຍ ແລະ ສືບຕໍ່ຮັບກຳລັງກົດດັນຫລຸດລາຄາ, ບໍ່ພຽງແຕ່ຍ້ອນສະພາບການຢູ່ ຝະລັ່ງ ເທົ່ານັ້ນ, ຫາກຍັງແມ່ນຍ້ອນສະພາບຂາດສະຖຽນລະພາບດ້ານການເມືອງຢູ່ ເຢຍລະມັນ ອີກດ້ວຍ. ຕະຫຼາດການເງິນໃນພາກພື້ນໃຊ້ສະກຸນເງິນ euro ພວມຕ້ອງປະເຊີນໜ້າກັບຄວາມສ່ຽງຫຼາຍກ່ວາອີກ, ພິເສດ ແມ່ນເມື່ອບັນດານັກລົງທຶນສາກົນ ພວມ ແລະ ຈະຫັນທິດໄປບັນດາຕະຫຼາດມີຄວາມປອດໄພກ່ວາຄື ອາເມລິກາ ໂດຍປະທານາບໍດີຫາກໍ່ໄດ້ຮັບການເລືອກຕັ້ງຄືນໃໝ່ ທ່ານ Donald Trump ພ້ອມດ້ວຍນະໂຍບາຍທີ່ມີລັກສະນະອາລັກຂາ “ປະເທດ ອາເມລິກາ ເໜືອກ່ວາສິ່ງໃດໝົດ”./.