ຕາມແຜນການແລ້ວ, ປະຊາຄົມອາຊຽນຈະຖະແຫຼງປະກາດການສ້າງຕັ້ງໃນທ້າຍປີນີ້. ປະຊາຄົມລວມ, ກຸ່ມເສດຖະກິດເປັນເອກະພາບ, ຕະຫຼາດເປີດກ້ວາງ, ສີສັນວັດທະນະທຳເປັນເອກະລັກສະເພາະອາຊຽນ, ກໍແມ່ນຈຸດໝາຍທີ່ອາຊຽນມຸ່ງໄປເຖິງ. ແຕ່ປະຊາຄົມອາຊຽນພຽງແຕ່ປະສົບຜົນສຳເລັດຢ່າງແທ້ຈິງ ຂະນະທີ່ມີຄວາມເຫັນດີເຫັນພ້ອມຈາກປະຊາຊົນ. ດັ່ງນັ້ນ, ຍົກສູງສະຕິຄວາມຮັບຮູ້ຂອງປະຊາຊົນໃນທົ່ວກຸ່ມອາຊຽນກ່ຽວກັບ ປະຊາຄົມ, ກ່ຽວກັບກາລະໂອກາດ ແລະ ສິ່ງທ້າທາຍຊຶ່ງ ປະຊາຄົມນຳມາໃຫ້ນັ້ນ ກໍແມ່ນໜ້າທີ່ຈຸດສຸມຂອງອາຊຽນໃນປີ 2015 ນີ້.
(ພາບປະກອບ) |
ດ້ວຍມາດຖານ “ອາຊຽນກຸ່ມໜຶ່ງຖືມະນຸດເປັນໃຈກາງ”. ປະຊາຄົມອາຊຽນໄດ້ຮັບການສ້າງຕັ້ງຂຶ້ນເມື່ອວັນທີ 31/12/2015 ຈະກາຍເປັນເຄື່ອງມືທີ່ແຂງແຮງກວ່າເພື່ອປະຕິບັດຄວາມມຸ່ງຫວັງຂອງປະຊາຊົນ. ນັ້ນແມ່ນພື້ນຖານການປົກຄອງ, ບໍລິຫານທີ່ດີ, ບັນລຸມາດຖານການດຳລົງຊີວິດສູງກວ່າ, ພັດທະນາແບບຍືນຍົງ, ອັນໄດ້ສ້າງກາລະໂອກາດໃຫຍ່ກວ່າໃຫ້ແກ່ໝົດທຸກຄົນ. ມາຮອດປະຈຸບັນ, ທຸກໆປະເທດສະມາຊິກອາຊຽນ ໄດ້ສຳເລັດວຽກງານກະກຽມໃຫ້ແກ່ ການສ້າງຕັ້ງປະຊາຄົມອາຊຽນ, ໃນນັ້ນເອົາໃຈໃສ່ເຖິງ ສະຕິຄວາມຮັບຮູ້ກ່ຽວກັບປະຊາຄົມອາຊຽນໂດຍຜ່ານບັນດາຮູບການໂຄສະນາທີ່ອຸດົມສົມບູນ, ຫຼາຍຮູບຫຼາຍແບບ, ສອດຄ່ອງກັບສະພາບການ, ເງື່ອນໄຂຂອງແຕ່ລະປະເທດ.
ບັ້ນໂຄສະນາດ້ວຍຫຼາຍຮູບຫຼາຍແບບ.
ປີ 2015, ມາເລເຊຍໄດ້ຮັບຕຳແໜ່ງເປັນປະທານກຸ່ມອາຊຽນ. ດ້ວຍຫົວເລື່ອງຂອງປີອາຊຽນ 2015 ແມ່ນ “ ປະຊາຊົນຂອງພວກເຮົາ, ປະຊາຄົມຂອງພວກເຮົາ, ວິໄສທັດຂອງພວກເຮົາ ”. ທ່ານເອກອັກຄະລັດຖະທູດມາເລເຊຍປະຈຳຫວຽດນາມ Azmil Mohd Zabidi ໃຫ້ຮູ້ວ່າ ສິ່ງທີ່ຮັບບຸລິມະສິດອັນດັບໜຶ່ງຂອງປະເທດນີ້ເມື່ອ ຮັບຕຳແໜ່ງເປັນປະທານກຸ່ມອາຊຽນປີນີ້ ແມ່ນຊັກຈູງອາຊຽນມຸ່ງໄປສູ່ ການສ້າງຕັ້ງ ປະຊາຄົມອາຊຽນໃນທ້າຍປີນີ້ ດ້ວຍມາດຖານ “ປະຊາຄົມໜຶ່ງຖືມະນຸດເປັນໃຈກາງ” ດັ່ງນັ້ນ, ມາເລເຊຍໄດ້ມີການກະກຽມໂດຍໄວທີ່ສຸດໃຫ້ແກ່ປີອາຊຽນ 2015, ກ່ຽວກັບປະຊາຄົມອາຊຽນ ເພື່ອຊ່ວຍປະຊາຊົນເພີ່ມທະວີ ສະຕິຄວາມຮັບຮູ້ກ່ຽວກັບ ປະຊາຄົມອາຊຽນ. ທ່ານເອກອັກຄະລັດຖະທູດມາເລເຊຍປະຈຳຫວຽດນາມ Azmil Mohd Zabidi ໃຫ້ຮູ້ວ່າ :
“ ມາເລເຊຍໄດ້ມີຄວາມມານະພະຍາຍາມຫຼາຍຢ່າງໃນການສຶກສາ, ໂຄສະນາໃຫ້ປະຊາຊົນເຂົ້າໃຈກ່ຽວກັບອາຊຽນ, ການສ້າງຕັ້ງປະຊາຄົມອາຊຽນໂດຍຜ່ານບັນດາການເຄື່ອນໄຫວທີ່ອຸດົມສົມບູນ. ແຕ່ເດືອນ 1 ຫາ 11/2014, ມີ 44 ລາຍການໂຄສະນາໄດ້ຮັບການຜັນຂະຫຍາຍຢູ່ມາເລເຊຍຄື ຈັດການໂອ້ລົມສົນທະນາ, ພົບປະແລກປ່ຽນປະຊາຊົນ, ກອງປະຊຸມສຳມະນາ, ງານວາງສະແດງ, ການເປີດເວບໄຊ… ລາຍການເຫຼົ່ານີ້ໄດ້ໃຫ້ຂ່າວຢ່າງຄົບຖ້ວນກ່ຽວກັບອາຊຽນ, ການສ້າງຕັ້ງປະຊາຄົມອາຊຽນເຖິງປະຊາຊົນ”
ບັນດາປະເທດສະມາຊິກອື່ນໆກໍລ້ວນແຕ່ມີຫຼາຍຮູບການໂຄສະນາທີ່ອຸດົມສົມບູນ. ສິງກະໂປໄດ້ສ້າງຕັ້ງກອງທຶນອາຊຽນ ແນໃສ່ຊ່ວຍໜູນເງິນໃຊ້ຈາຍໃຫ້ແກ່ວຽກງານໂຄສະນາສື່ສານ, ການເຊື້ອເຊີນນັກຮຽນຮູ້, ນັກຂ່າວບັນດາປະເທດອາຊຽນໄປຍັງສິງກະໂປ. ລາວກໍເພີ່ມທະວີລົງພິມ, ສະເໜີບັນດາບົດໜັງສືພິມຂອງຕ່າງປະເທດກ່ຽວກັບອາຊຽນຜ່ານສື່ມວນຊົນລາວ, ສະໜອງສິ່ງພິມໃຫ້ແກ່ບັນດາຫໍສະໝຸດ, ໂຮງຮຽນ ແລະ ປະຊາຊົນ, ປະສົມປະສານບັນດາເນື້ອໃນກ່ຽວກັບອາຊຽນໃນບັນດາການເຄື່ອນໄຫວກິລາ, ວັດທະນະທຳ, ການສຶກສາ. ໄທໄດ້ກໍ່ສ້າງຫໍສະໝຸດກ່ຽວກັບອາຊຽນຢູ່ບັນດາໂຮງຮຽນໃຫ້ແກ່ນັກສຶກສາ, ລາຍການກະຈາຍສຽງກ່ຽວກັບອາຊຽນ. ບຣູໄນ ກໍໄດ້ຈັດຕັ້ງບັນດາການພົບປະແລກປ່ຽນຊາວໜຸ່ມ, ງານວາງສະແດງກ່ຽວກັບປະຊາຄົມອາຊຽນ. ລັດຖະບານຟີລິບປີນໄດ້ຜະລິດຟິມຮູບເງົາເອກະສານໂທລະພາບກ່ຽວກັບປະຫວັດຄວາມເປັນມາ ແລະ ການຂະຫຍາຍຕົວຂອງອາຊຽນ ແລະ ບັນດາເອກະສານຂອງ 10 ປະເທດອາຊຽນ, ລາຍການກ່ຽວກັບບັນດາຈຸດຄ້າຍຄືກັນຂອງອາຊຽນກ່ຽວກັບດົນຕີ, ວາດຟ້ອນ, ຊຸດອາພອນປະຈຳຊາດ ແລະ ເຄຶື່ອງສິລະປະຫັດຖະກຳ. ອີນໂດເນເຊຍກໍເອົາໃຈໃສ່ຈຸດໝາຍຖະແຫຼງຂ່າວແນໃສ່ເພີ່ມທະວີການຜູກຮັດລະຫວ່າງຊາວອິນໂດເນເຊຍກັບປະຊາຊົນບັນດາປະເທດອາຊຽນ. ທ່ານເອກອັກຄະລັດຖະທູດອິນໂດເນເຊຍປະຈຳຫວຽດນາມ Mayefas ຢືນຢັນວ່າ : ບັນດາລາຍການທີ່ໄດ້ຮັບການຜັນຂະຫຍາຍຢ່າງຂ້ຽວຂາດຢູ່ແຕ່ລະປະເທດເຊັ່ນນັ້ນ ໄດ້ສະແດງໃຫ້ເຫັນຄວາມຕັດສິນໃຈຂອງອາຊຽນໃນບັນຫາກໍ່ສ້າງປະຊາຄົມລວມໂດຍຖືມະນຸດເປັນໃຈກາງ. ທ່ານເອກອັກຄະລັດຖະທູດອິນໂດເນເຊຍປະຈຳຫວຽດນາມ Mayefas ຢືນຢັນວ່າ :
“ບັນດາປະເທດອາຊຽນພວມມານະພະຍາຍາມເພື່ປະກອບສ່ວນໃຫ້ ປະຊາຄົມລວມອາຊຽນ. ພວກຂ້າພະເຈົ້າຫວັງວ່າ ຊາວອິນໂດເນເຊຍເວົ້າສະເພາະ ແລະ ອາຊຽນເວົ້າລວມຈົ່ງມີ ສະຕິຄວາມຮັບຮູ້ວ່າ ເຂົາເຈົ້າແມ່ນສ່ວນໜຶ່ງຂອງອາຊຽນ”
ຕັ້ງໜ້າເຊືອ່ມໂຍງເຂົ້າກັບອາຊຽນ ຍາມໃດກໍແມ່ນນະໂຍບາຍສະເໝີຕົ້ນສະເໝີປາຍຂອງຫວຽດນາມ
ທັດສະນະຂອງຫວຽດນາມກໍສະເໝີຕົ້ນສະເໝີປາຍກ່ຽວກັບວຽກງານໂຄສະນາ ແມ່ນບໍ່ພຽງແຕ່ເພີ່ມທະວີວຽກງານຖະແຫຼງຂ່າວ, ຄວາມເຂົ້າອົກເຂົ້າໃຈໃຫ້່ແກ່ປະຊາຊົນບັນດາປະເທດອາຊຽນກ່ຽວກັບອາຊຽນ, ການສ້າງຕັ້ງປະຊາຄົມອາຊຽນ ເທົ່ານັ້ນ, ຫາກຍັງຊ່ວຍປະຊາຄົມອາຊຽນມີຄວາມໝັ້ນຄົງເຂັ້ມແຂງພາຍຫຼັງທີ່ໄດ້ຮັບການສ້າງຕັ້ງຂຶ້ນອີກດ້ວຍ. ທ່ານຫງວຽນວູ້ຕູ້ ເອກອັກຄະລັດຖະທູດ, ຫົວໜ້າຜູ້ຕາງໜ້າອາຊຽນປະຈຳຫວຽດນາມ ຖືວ່າ :
“ ເຮັດແນວໃດເພື່ອສົ່ງຂ່າວກ່ຽວກັບ ປະຊາຄົມອາຊຽນເຖິງປະຊາຊົນ. ເພື່ອໃຫ້ຊາວຫວຽດນາມແຕ່ລະຄົນສາມາດເຂົ້າໃຈຄືແນວໃດແມ່ນ ປະຊາຄົມ ແລະ ປະຊາຄົມຈະນຳມາເຊິ່ງຜົນປະໂຫຍດຫຍັງແດ່ໃຫ້ແກ່ປະຊາຊົນ. ກ່ຽວກັບບັນຫານີ້, ພວກຂ້າພະເຈົ້າໄດ້ເຊື້ອເຊີນຜູ້ຕາງໜ້າ 9 ປະເທດອາຊຽນອື່ນມາເພື່ອແລກປ່ຽນບົດຮຽນກ່ຽວກັບວຽກງານກະກຽມສ້າງຕັ້ງ ປະຊາຄົມອາຊຽນ ແລະ ບົດຮຽນໃນການໂຄສະນາສື່ສານເພື່ອຍົກສູງລະດັບຄວາມຮັບຮູ້, ເພື່ອໃຫ້ປະຊາຊົນຂອງແຕ່ລະປະເທດເຂົ້າໃຈຢ່າງເລິກເຊິ່ງວ່າ ປະຊາຄົມອາຊຽນ ແມ່ນຫຍັງ ”
ໃນໄລຍະພັດທະນາໃໝ່ນີ້, ອາຊຽນໜຶ່ງທີ່ມາມັກຄີ, ຜູກພັນກັນໃນ “ວິໄສທັດດຽວ, ສີສັນດຽວ, ປະຊາຄົມດຽວ” ກໍແມ່ນສານຂອງ ບັນດາປະເທດອາຊຽນສົ່ງເຖິງປະຊາຄົມໂລກ. ການເຊື່ອມໂຍງບໍ່ພຽງແຕ່ແມ່ນເພື່ອບັນຫາເສດຖະກິດເທົ່ານັ້ນ, ແລະ ພົນລະເມືອງແຕ່ລະຄົນໃນ ປະຊາຄົມອາຊຽນຕາງກໍຕ້ອງມີ ສະຕິຄວາມຮັບຮູ້ລວມກ່ຽວກັບບັນດາຄຸນຄ່າຂອງຕົນເອງເມື່ອກາຍເປັນພົນລະເມືອງອາຊຽນ. ບັນດາຄຸນຄ່າທີ່ມີລັກສະນະຄ້າຍຄືກັນກ່ຽວກັບດ້ານວັດທະນະທຳ, ປະຫວັດສາດ ແມ່ນບັນດາຈຸດລວມເພື່ອຮ່ວມສຳພັນລະຫວ່າງບັນດາປະຊາຊາດໃນຊາຍຄາອາຊຽນ