(vovworld)-ນັບແຕ່ເມື່ອສ້າງການພົວພັນຄູ່ຮ່ວມມືຍຸດທະສາດທຳອິດກັບລັດເຊຍເມື່ອປີ 2001 ມາຮອດປະຈຸບັນ, ຫວຽດນາມ ໄດ້ສ້າງການພົວພັນຄູ່ຮ່ວມມືຍຸດທະສາດກັບ 14 ປະເທດ, ໃນນັ້ນ ມີ 2 ປະເທດແມ່ນຄູ່ຮ່ວມມືຍຸດທະສາດຮອບດ້ານ. ບັນດາຂອບເຂດການພົວພັນນີ້ໄດ້ປະກອບສ່ວນຕັ້ງຫນ້າເຂົ້າໃນການຜັນຂະຫຍາຍປະສິດທິຜົນການພົວພັນຮ່ວມມືທຸກດ້ານຂອງຫວຽດນາມ ກັບບັນດາປະເທດໃນໂລກ, ບໍ່ພຽງແຕ່ນຳມາເຊິ່ງບັນດາຜົນປະໂຫຍດຢ່າງແທດຈິງກ່ຽວກັບເສດຖະກິດ, ຜ່ານການສ້າງຂອບເຂດຄູ່ຮ່ວມມືຍຸດທະສາດ ແລະ ຄູ່ຮ່ວມມືຮອບດ້ານ, ທີ່ຕັ້ງບົດບາດຫວຽດນາມນັບມື້ນັບໄດ້ຮັບການຢັ້ງຢືນໃນເວທີສາກົນ.
ທ່ານນາຍົກລັດຖະມົນຕີ ຫງວຽນເຕີນຢູງ ແລະ ທ່ານນາຍົກ
ລັດຖະມົນຕີ ລັດເຊຍ D. Medvedev
ພາບ: VGP
|
ການພົວພັນລະຫວ່າງສອງປະເທດໄດ້ຮັບການຢັ້ງຢືນຕາມບັນດາລະດັບ, ຈາກຄູ່ຮ່ວມມືສອງຝ່າຍ, ຄູ່ຮ່ວມມືພາກພື້ນຕະຫລອດຮອດຄູ່ຮ່ວມມືຮອບດ້ານ, ຄູ່ຮ່ວມມືຍຸດທະສາດ, ຄູ່ຮ່ວມມືຍຸດທະສາດຮອບດ້ານ. ຕາມນັ້ນແລ້ວ, ສອງຝ່າຍກຳນົດການຜູກມັດດ້ານຜົນປະໂຫຍດຍາວນານ, ຫນູນຊ່ວຍເຊິ່ງກັນ ແລະກັນ ແລະ ຊຸກຍູ້ການຮ່ວມມືຢ່າງເລິກເຊິ່ງກວ້າງຂວາງ ແລະ ຮອບດ້ານ ໃນບັນດາຂົງເຂດ ຊື່ງບັນດາຝ່າຍຕ່າງມີຜົນປະໂຫຍດ, ພ້ອມທັງສ້າງຄວາມໄວ້ເນື້ອເຊື່ອໃຈເຊິ່ງກັນ ແລະກັນ ໃນຂັ້ນຍຸດທະສາດ.
ມາຮອດປະຈຸບັນ, ຫວຽດນາມ ໄດ້ສ້າງຂອບເຂດຄູ່ຮ່ວມມືຍຸດທະສາດຮອບດ້ານກັບ 2 ປະເທດ ນັ້ນແມ່ນ ສະຫະພັນລັດເຊຍ ແລະຈີນ, ການພົວພັນຄູ່ຮ່ວມມືຍຸດທະສາດກັບ 11 ປະເທດ ນັ້ນແມ່ນ ຍີ່ປຸ່ນ, ອິນເດຍ, ສເກົາຫລີ, ແອດສະປາຍ, ອັງກິດ, ເຢຍລະມັນ, ອິຕາລີ, ອິນໂດເນເຊຍ, ໄທ, ສິງກະໂປ ແລະ ຝລັ່ງ. ຫວຽດນາມ ມີການພົວພັນກັບຕະຫລາດຂອງ 13 ປະເທດຄູ່ຮ່ວມມືຍຸດທະສາດ ທີ່ມີພົນລະເມືອງ 3,5 ຕຶ້ື້ຄົນ, ດ້ວຍ GDP ບັນລຸເກືອບ 34.000 ຕື້ USD(ສູງທົບກວ່າ 200 ເທົ່າເມື່ອທຽບໃສ່ GDP ຂອງຫວຽດນາມ). ບັນດາຄູ່ຮ່ວມມືຍຸດທະສາດຂອງຫວຽດນາມ ຢູ່ລະດັບແຕກຕ່າງກັນ ລ້ວນແຕ່ມີບັນດາການປະກອບສ່ວນຢ່າງຕັ້ງຫນ້າໃຫ້ແກ່ການພົວພັນສອງຝ່າຍກັບຄູ່ຮ່ວມມືກໍຄືດຳເນີນການເຈລະຈາລວມຂອງຫວຽດນາມ.
ຮັບໃຊ້ການພັດທະນາເສດຖະກິດຂອງປະເທດຊາດ
ຂອບເຂດການພົວພັນຄູ່ຮ່ວມມືຍຸດທະສາດໄດ້ສ້າງຫລາຍກາລະໂອກາດໃຫ້ແກ່ການເພີ່ມທະວີການຮ່ວມມືຮັບໃຊ້ການພັດທະນາ. ກ່ອນອື່ນ ອາດຈະຢືນຢັນວ່າ ການລົງທຶນໂດຍກົງຈາກບັນດາປະເທດຄູ່ຮ່ວມມືຍຸດທະສາດ ແມ່ນແຫລ່ງກຳລັງສຳຄັນ ປະກອບສ່ວນຊຸກຍູ້ການເຕີບໂຕ ແລະ ພັດທະນາແບບຍືນຍົງຂອງຫວຽດນາມ. ໂຄງການຈຸດສຸມແຫ່ງຊາດສ່ວນຫລາຍແມ່ນໂຄງການຮ່ວມມືກັບຫນຶ່ງໃນບັນດາຄູ່ຮ່ວມມືຍຸດທະສາດ, ຕົວຢ່າງຄື: ໂຄງການໂຮງງານໄຟຟ້ານິວເຄຼຍ ເລກ 1 ກັບລັດເຊຍ, ເລກ 2 ກັບຍີ່ປຸ່ນ; ສະຖາບັນວິທະຍາສາດເຕັກໂນໂລຊີ ຫວຽດນາມ - ສເກົາຫລີ; ການຮ່ວມມືນ້ຳມັນອາຍແກສກັບສະຫະພັນ ລັດເຊຍ; ຈີນ ແມ່ນຜູ້ຮັບເໝົາກິດຈະກຳພື້ນຖານໂຄງລ່າງໃຫຍ່ຂອງຫວຽດນາມ.
ວົງເງິນການຄ້າລະຫວ່າງ ຫວຽດນາມ ກັບບັນດາຄູ່ຮ່ວມມືຍຸດທະສາດ ກວມອັດຕາສ່ວນໃຫຍ່ໃນຍອດວົງເງິນການຄ້າຂອງຫວຽດນາມ ໃນທ່າອ່ຽງເພີ່ມຂຶ້ນ. ວົງເງິນການຄ້າຂອງຫວຽດນາມ ກັບ 14 ຄູ່ຮ່ວມມືຍຸດທະສາດ ຄາດວ່າ ກວມ 70-80% ຍອດວົງເງິນນຳເຂົ້າສົ່ງອອກສິນຄ້າຂອງຫວຽດນາມ. ເປັນຫນ້າສົນໃຈ, ວົງເງິນການຄ້າຂອງຫວຽດນາມ ກັບບັນດາຄູ່ຮ່ວມມືຍຸດທະສາດ ລ້ວນແຕ່ເພີ່ມຂຶ້ນ 1,3-6 ເທົ່າ ເມື່ອທຽບໃສ່ຈຸດເວລາກອ່ນທີ່ສ້າງການພົວພັນຄູ່ຮ່ວມມືຍຸດທະສາດ.
ຂອບເຂດການພົວພັນຄູ່ຮ່ວມມືຍຸດທະສາດ ກໍສ້າງເງື່ອນໄຂເພື່ອໃຫ້ຫວຽດນາມ ເຂົ້າຮ່ວມການເຈລະຈາບາງ ສັນຍາການຄ້າເສລີສອງຝ່າຍ ແລະ ພາກພື້ນໃຫຍ່. ຄຽງຄູ່ກັບບັນດາສັນຍາ FTA ພວມມີຜົນສັກສິດ, ມາຮອດປະຈຸບັນ ຫວຽດນາມ ໄດ້ສ້າງເຄືອຂ່າຍກັບຄູ່ຮ່ວມມື FTA ເພື່ອສ້າງພື້ນຖານການພົວພັນກັບທຸກສູນເສດຖະກິດຊັ້ນນຳຂອງໂລກ.
ປົກປັກຮັກສາອະທິດປະໄຕແລະຜືນແຜນດິນອັນຄົບຖ້ວນ,ຍົກສູງທີ່ຕັ້ງບົດບາດຂອງຊາດ
ບັນຫາອະທິປະໄຕ, ຊາຍແດນຜືນແຜນດິນ ຍາມໃດກໍແມ່ນບັນຫາໄດ້ຮັບຄວາມສົນໃຈໃນການພົວພັນລະຫວ່າງບັນດາປະເທດບ້ານໃກ້ເຮືອນຄຽງ, ແມ່ນບັນຫາສັບສົນຍາກທີ່ແກ້ໄຂລະຫວ່າງບັນດາຝ່າຍມີຄວາມຂັດແຍ້ງ, ແຕ່ພັດແມ່ນຫົວເລື່ອງສະດຸ້ງໄວສຳລັບບັນດາຝ່າຍບໍ່ກ່ຽວຂ້ອງໂດຍກົງ. ໃນຂອບເຂດຄູ່ຮ່ວມມືຍຸດທະສາດ, ຫວຽດນາມ ໄດ້ພ້ອມກັບບັນດາຝ່າຍກ່ຽວຂ້ອງໂດຍກົງ ກໍຄືບັນດາຄູ່ຮ່ວມມືທີ່ມີຄວາມສົນໃຈເຖິງສັນຕິພາບສະຖຽນລະພາບໃນພາກພື້ນ ຊອກຫາບັນດາມາດຕະການແກ້ໄຂເປັນປົກກະຕິແລະຍາວນານ, ບົນພື້ນຖານດ້ານກົດໝາຍສາກົນ. ຫລັກໝັ້ນແນວຄິດສະເຫມີຕົ້ນສະເຫມີປາຍຂອງຫວຽດນາມ ໃນການແກ້ໄຂບັນດາຄວາມຂັດແຍ້ງໄດ້ຮັບການສະຫນັບສະຫນູນ ແລະ ເຫັນດີເຫັນພ້ອມຈາກທຸກປະເທດ, ເປັນຕົ້ນແມ່ນບັນດາປະເທດຄູ່ຮ່ວມມືຍຸດທະສາດ. ຍ້ອນເຫດນັ້ນ ຫວຽດນາມ ຍາດແຍ່ງໄດ້ການສະຫນັບສະຫນູນຈາກປະຊາຄົມໂລກໃນການປົກປັກຮັກສາອະທິປະໄຕປະເທດຊາດ, ຮັກສາສັນຕິພາບສະຖຽນລະພາບເພື່ອພັດທະນາ.
ຜ່ານບັນດາຂອບເຂດການພົວພັນຄູ່ຮ່ວມມືຍຸດທະສາດ, ຫວຽດນາມ ໄດ້ຍົກທີ່ຕັ້ງບົດບາດຂອງຕົນ ໃນການພົວພັນກັບບັນດາຄູ່ຮ່ວມມືຢ່າງສະເຫມີພາບ. ບັນດາປະເທດຄູ່ຮ່ວມມືຍຸດທະສາດ ສະຫນັບສະຫນູນ ແລະ ຕີລາຄາສູງສຽງເວົ້າ ແລະ ການປະກອບສ່ວນຂອງຫວຽດນາມ ໃນການແກ້ໄຂບັນດາບັນຫາລວມຂອງປະຊາຄົມໂລກ. ມີປະມຸກລັດຫລາຍທ່ານຂອງບັນດາປະເທດຄູ່ຮ່ວມມືຍຸດທະສາດ ໄດ້ເລືອກເຟັ້ນຫວຽດນາມ ແມ່ນຫນຶ່ງໃນບັນດາປະເທດທຳອິດມາຢ້ຽມຢາມພາຍຫລັງຮັບດຳລົງຕຳແຫນ່ງ. ໃນຂອບເຂດນະໂຍບາຍການຕ່າງປະເທດຂອງບັນດາປະເທດຄູ່ຮ່ວມມືຍຸດທະສາດ, ຫວຽດນາມ ໄດ້ຮັບຖືວ່າ ແມ່ນປະເທດມີທີ່ຕັ້ງສຳຄັນໃນນະໂຍບາຍຂອງບັນດາປະເທດສຳລັບພາກພື້ນ ອາຊີ - ປາຊີຟີກ, ສປຊ ແລະ ບັນດາອົງການບໍ່ຂຶ້ນກັບລັດຖະບານ. ພິທີການຊື່ງທ່ານປະທານາທິບໍດີ ລັດເຊຍ V. Putin ຕ້ອນຮັບທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມຫງວຽນຟູຈ້ອງ ໃນການຢ້ຽມຢາມສະຫະພັນລັດເຊຍ ຢ່າງເປັນທາງການຫວ່າງແລ້ວນີ້ ໄດ້ຢືນຢັນເຖິງສິ່ງດັ່ງກ່າວ. 13 ປີພາຍຫລັງຫວຽດນາມ ສ້າງການພົວພັນຄູ່ຮ່ວມມືຍຸດທະສາດທຳອິດຢ່າງເປັນທາງການ, ຫວຽດນາມໄດ້ ແລະ ພວມກາຍເປັນເພື່ອນມິດ, ແມ່ນຄູ່ຮ່ວມມືໄວ້ເນື້ອເຊື່ອໃຈຂອງຫລາຍປະເທດໃນໂລກ