ນັບແຕ່ພັນປີມານີ້, ພິທີໄຫວ້ບູຊາບັນດາເຈົ້າຊີວິດຮຸ່ງ, ຍາມໃດກໍຖືກ ປະຊາຊົນຫວຽດນາມ ຈັດຕັ້ງຂຶ້ນໃນແຕ່ລະປີຄືໃນວັນທີ 10 ເດືອນ 3 ໄລ່ຕາມ ຈັນທະປະຕິທິນ. ເພາະສະນັ້ນ, ການເຄື່ອນໄຫວ ໄຫວ້ບູຊາບັນດາເຈົ້າຊີວິດຮຸ່ງ ໄດ້ກາຍເປັນສ່ວນໜຶ່ງທີ່ຂາດບໍ່ໄດ້ໃນການດຳເນີນຊີວິດວັດທະນະທຳຂອງຊາດ. ປີນີ້, ພິທີໄຫວ້ບູຊາບັນດາເຈົ້າຊີວິດຮຸ່ງໂດຍຄະນະກຳມະການປະຊາຊົນແຂວງ ຟູ້ເຖາະ ແມ່ນຜູ້ຈັດຕັ້ງ ດ້ວຍການເຂົ້າຮ່ວມຂອງ 4 ແຂວງຄື ບັກນິງ, ກວາງບີງ, ວິ້ງລອງ ແລະ ລອງອານ ຊຶ່ງເປັນການເຊື່ອມຕໍ່ການເຂົ້າຮ່ວມຂອງວົງຄະນະຍາດ, ເພີ່ມພູນຄູນສ້າງມູນເຊື້ອສາມັກຄີທົ່ວປວງຊົນ ທັງຊາດ.
ງານບຸນວິຫານຮຸ່ງໄດ້ກາຍເປັນເຫດການໃຫຍ່ຂອງຊາດ
(ພາບ:baophutho)
|
ພິທີໄຫວ້ບູຊາບັນພະບຸລຸດ ແມ່ນການເຄື່ອນໄຫວຕົ້ນຕໍຂອງງານບຸນວິຫານຮຸ່ງ 2014, ມຸ່ງໄປສູ່ການໂຄສະນາເຜີຍແຜ່ມໍລະດົກ “ ຂັບຊວານຢູ່ຟູ້ເຖາະ” ແລະ “ການເຫຼື້ອມໄສໄຫວ້ບູຊາບັນດາເຈົ້າຊີວິດຮຸ່ງຢູ່ຟູ້ເຖາະ”. ການເຄື່ອນໄຫວເປັນຈຸດໃຈກາງແມ່ນພິທີຖະຫວາຍທູບທຽນບູຊາໃນວັນທີ 9/4 (ກົງກັບວັນທີ 10 ເດືອນ 3 ໄລຕາມຈັນທະປະຕິທິນ) . ກ່ອນໜ້ານັ້ນຄືໃນຕອນເຊົ້າວັນທີ 5/4, (ກົງກັບວັນທີ 6 ເດືອນ 3 ໄລຕາມຈັນທະປະຕິທິນ), ຄະນະຈັດຕັ້ງພິທີໄຫວ້ບູຊາບັນດາເຈົ້າຊີວິດຮຸ່ງ - ງານບຸນວິຫານຮຸ່ງ 2014 ໄດ້ຕາງໜ້າພໍ່ແມ່ປະຊາຊົນໃນທົ່ວປະເທດຈັດພິທີໄຫວ້ບູຊາພະບິດາ ຫຼາກລອງກວນ ແລະ ຖະຫວາຍດອກໄມ້,ໄຕ້ທູບທຽນ ບູຊາພະແມ່ ເອົາເກີ ຊຶ່ງແມ່ນຜູ້ໄດ້ໃຫ້ກຳເນີນຊາວຫວຽດນາມ, ມີຄຸນງາມຄວາມດີໃນການສ້າງສາປະເທດຊາດ ແລະ ຊ່ວຍປະຊາຊົນໃຫ້ມີຊີວິດທີ່ອີ່ມໜຳສຳລານແລະ ຜາສຸກ.
ປະຊາຊົນຊຶ່ງເປັນເຈົ້າພາບຈັດການເຄື່ອນໄຫວໄຫວ້ບູຊາບັນດາເຈົ້າຊີວິດຮຸ່ງ
ບັນດາພິທີກຳ ແລະ ການເຄ້ື່ອນໄຫວວັດທະນະທຳໃນວັນໄຫວ້ບູຊາ ບັນພະບຸລຸດເວົ້າສະເພາະ ແລະ ງານບຸນວິຫານຮຸ່ງເວົ້າລວມໄດ້ຖືກຈັດຂຶ້ນໃນບໍລິເວນກ້ວາງຂວາງ. ທ່ານຮ່າເກ້ຊານ ຮອງປະທານຄະນະກຳມະການປະຊາຊົນແຂວງ ຟູ້ເຖາະ , ຫົວໜ້າຄະນະຈັດຕັ້ງພິທີໄຫວ້ບູຊາບັນດາເຈົ້າຊີວິດຮຸ່ງ - ງານບຸນວິຫານຮຸ່ງ 2014ໃຫ້ຮູ້ວ່າ :
“ ຕົ້ນຕໍ່ແມ່ນຖືກຈັດຂຶ້ນຢູ່ເຂດປູຊະນີຍະສະຖານງານບຸນວິຫານຮຸ່ງ ແລະ ນະຄອນຫວຽດຈີ. ສຳລັບການຈັດຕັ້ງງານບຸນວິຫານຮຸ່ງ, ພວກຂ້າພະເຈົ້າເລ່ັງໃສ່ການເຄື່ອນໄຫວເຫຼື້ອມໄສໄຫວ້ບູຊາບັນດາເຈົ້າຊີວິດຮຸ່ງ, ໃນນັ້ນ, ສ້າງເງື່ອນໄຂໃຫ້ແກ່ປະຊາຊົນເຂົ້າຮ່ວມການ ໄຫວ້ບູຊາບັນພະບຸລຸດຫຼາຍຂຶ້ນ, ເປັນຕົ້ນແມ່ນການຈັດພິທີແຫ່ວໍໄປຍັງວິຫານຮຸ່ງເພື່ອຖະຫວາຍເຄື່ອງຂອງບູຊາບັນດາເຈົ້າຊີວິດຮຸ່ງ. ບັນດາການເຄື່ອນໄຫວວັດທະນະທຳສິລະປະຈະຖືກຈັດຕັ້ງຂຶ້ນຈາກນະຄອນຫວຽດຈີຮອດວິຫານຮຸ່ງ ” .
ຕາມທ່ານຮ່າເກ້ຊານ ຮອງປະທານຄະນະກຳມະການປະຊາຊົນແຂວງ ຟູ້ເຖາະ , ຫົວໜ້າຄະນະຈັດຕັ້ງພິທີໄຫວ້ບູຊາບັນດາເຈົ້າຊີວິດຮຸ່ງ - ງານບຸນວິຫານຮຸ່ງ 2014 ແລ້ວ, ງານບຸນວິຫານຮຸ່ງນັບມື້ນັບຖືກຫັນມາເປັນວຽກງານສັງຄົມ, ຕາມນັ້ນແລ້ວ, ລັດແມ່ນຜູ້ສ້າງລາຍການ, ໜູນຊ່ວຍປະຊາຊົນຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍເພື່ອຊ່ວຍປະຊາຊົນຊຶ່ງແມ່ນເຈົ້າພາບຂອງງານບຸນ ປະຕິບັດບັນດາພິທີອາໄລຫາບັນດາເຈົ້າຊີວິດຮຸ່ງ. ງານບຸນວິຫານຮຸ່ງບໍ່ພຽງແຕ່ຖືກຈັດຂຶ້ນຢູ່ເຂດປູຊະນີຍະສະຖານງານບຸນວິຫານຮຸ່ງແຂວງຟູ້ເຖາະເທົ່ານັ້ນ, ຫາກຍັງຖືກຈັດຂຶ້ນຢູ່ແຫ່ງຕ່າງໆທີ່ມີເຂດປູຊະນີຍະສະຖານບູຊາບັນດາເຈົ້າຊີວິດຮຸ່ງໃນທົ່ວປະເທດອີກດ້ວຍ. ພິເສດ, ປະຊາຄົມຊາວຫວຽດນາມອາໄສຢູ່ຕ່າງປະເທດ, ປີໃດກໍສົ່ງຄະນະຜູ້ແທນມາຮ່ວມພິທີໄຫວ້ບູຊາບັນດາເຈົ້າຊີວິດຮຸ່ງ.
ເພີ່ມພູນຄູນສ້າງ ມູນເຊື້ອສາມັກຄີທົ່ວປວງຊົນທັງຊາດ
ເລື່ອງຈັດຕັ້ງພິທີໄຫວ້ບູຊາບັນດາເຈົ້າຊີວິດຮຸ່ງ ນັບແຕ່ໄລຍະຂັ້ນຕົ້ນຂອງປະຫວັດສາດແຫ່ງການສ້າງສາ ແລະ ປົກປັກຮັກສາປະເທດໃນປະຈຸບັນ ໄດ້ພິສູດໃຫ້ເຫັນວ່າ ຊາດຫວຽດນາມໄດ້ມີສະຕິຈິດໃຈຕໍ່ກົກເຄົ້າເຫງົ້າກໍໂດຍໄວ, ພ້ອມທັງເພີ່ມພູນຄູນສ້າງ, ສືບທອດບັນດາຄຸນຄ່າວັດທະນະທຳ, ຈິດໃຈຂອງຊາດ. ແຕ່ລະປີ, ຊາວຫວຽດນາມນັບລ້ານຄົນໄດ້ຫຼັ່ງໄຫລມາເຕົ້າໂຮມຢູ່ແຫ່ງນີ້ເພື່ອອາໄລຫາບັນພະບຸລຸດ ດ້ວຍການເຂົ້າຮ່ວມ ພິທີໄຫວ້ບູຊາບັນດາເຈົ້າຊີວິດຮຸ່ງຊຶ່ງຖືກດຳເນີນໃນເວລາປະມານອາທິດໜຶ່ງ, ນັບແຕ່ຕົ້ນເດືອນ 3 ຫາວັນທີ 10 ເດືອນ 3 ໄລ່ຕາມຈັນທະປະຕິທິນ, ທັງນີ້ກໍເປັນການປັບປຸງກຸ່ມກ້ອນມະຫາສາມັກຄີທົ່ວປວງຊົນທັງຊາດ. ປ້າ ໂຕທິຕົນ ແຂກທ່ອງທ່ຽວມາຮ່ວມພິທີໄຫວ້ບູຊາບັນດາເຈົ້າຊີວິດຮຸ່ງປີນີ້ ໃຫ້ຮູ້ວ່າ :
“ ປີນີ້ ຂ້າພະເຈົ້າມີອາຍຸ 70 ປີແລ້ວ, ແຕ່ປີໃດກໍເຊັ່ນດຽວກັນ, ຂ້າພະເຈົ້າກໍລ້ວນແຕ່ເຂົ້າຮ່ວມພິທີໄຫວ້ບູຊາບັນດາເຈົ້າຊີວິດຮຸ່ງ ເພື່ອໄຕ້ທູບທຽນອາໄລຫາບັນພະບຸລຸດ, ກົກເຄົ້າເຫງົ້າກໍ. ຂ້າພະເຈົ້າຫວັງວ່າ ຄົນລຸ່ນຫຼັງຍາມໃດກໍອາໄລຫາເຖິງບັນພະບຸລຸດ, ບັນດາເຈົ້າຊີວິດຮຸ່ງ, ເພາະມີ ບັນດາເຈົ້າຊີວິດຮຸ່ງຈຶ່ງມີພວກເຮົາໃນປະຈຸບັນ ”
ພິທີໄຫວ້ບູຊາບັນດາເຈົ້າຊີວິດຮຸ່ງ ແລະ ການເຫຼື້ອມໄສບູຊາເຈົ້າຊີວິດຮຸ່ງ ຖືກຈັດຂຶ້ນໃນວັນທີ 10 ເດືອນ 3 ແຕ່ລະປີໂດຍໄລຕາມຈັນທະປະຕິທິນ, ເຫດການນີ້ໄດ້ເລີ່ມມາຈາກຄວາມມຸ່ງຫວັງຂອງຊາວຫວຽດນາມຢູ່ພາຍໃນປະເທດ ເກືອບ 90 ລ້ານຄົນ ແລະ ຊາວຫວຽດນາມອາໄສຢູ່ຕ່າງປະເທດ 4,5 ລ້ານຄົນ . ນີ້ແມ່ນຄວາມເອກອ້າງທະນົງໃຈກ່ຽວກັບບັນດາຄຸນຄ່າພິເສດສະເພາະ ຊຶ່ງໄດ້ສ້າງເປັນກຳລັງແຮງຂອງຊາດຫວຽດນາມຜ່ານຫຼາຍຍຸກສະໄໝ. ດ້ວຍການຈັດພິທີໄຫວ້ບູຊາບັນພະບຸລຸດນີ້, ການເຫຼື້ອມໄສບູຊາເຈົ້າຊີວິດຮຸ່ງ ພັດສືບຕໍ່ໄດ້ຮັບການສືບທອດ, ເພີ່ມພູນຄູນສ້າງ ມູນເຊື້ອສາມັກຄີ ແລະ ບັນດາຄຸນຄ່າຫວຽດນາມໃນຍຸກສະໄໝໃໝ່