(vovworld) - ໃນພາລະກິດກໍ່ສ້າງສັງຄົມນິຍົມ ແລະ ປົກປັກຮັກສາປະເທດຊາດ, ພິເສດແມ່ນຜ່ານເກືອບ 30 ປີແຫ່ງການປ່ຽນໃໝ່, ຫວຽດນາມ ໄດ້ມີບັນດາບາດກ້າວພັດທະນາທີ່ສຳຄັນ ແລະ ມີຄວາມໝາຍປະຫວັດສາດ. ບັນດາຜົນງານຂອງພາລະກິດປ່ຽນໃໝ່ ແລະ ບັນດາບາດກ້າວຕໍ່ໄປບົນເສັ້ນທາງນີ້ ໄດ້ຮັບການເຕື້ອງເຖິງທີ່ກອງປະຊຸມຄັ້ງທີ 10, ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 11, ເຊິ່ງດຳເນີນເມື່ອຕົ້ນເດືອນ 1/2015.
ກອງປະຊຸມຄັ້ງທີ 10, ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11
ປະເທດຫວຽດນາມ ພວມສືບຕໍ່ກ້າວຂຶ້ນຢ່າງໝັ້ນຄົງບົນເສັ້ນທາງປ່ຽນໃໝ່ ເຊິ່ງພັກກອມມູນນິດຫວຽດນາມໄດ້ເລືອກເຟັ້ນ, ນັບແຕ່ພາຍຫຼັງກອງປະຊຸມໃຫຍ່ທົ່ວປະເທດຄັ້ງທີ 6 ຂອງພັກກອມມູນິດຫວຽດນາມ, ເມື່ອປີ 1986. ເລື່ອງສະຫຼຸບ 30 ປີ ແຫ່ງການປ່ຽນໃໝ່ຂອງປະເທດ, ຄືດັ່ງຄຳເວົ້າຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ ໄດ້ຢັ້ງຢືນ, ນັ້ນແມ່ນຕີລາຄາສະພາບສາກົນ, ພາຍໃນປະເທດ ແລະ ວິວັດການພັດະນາແນວທາງປ່ຽນໃໝ່ຂອງພັກກອມມູນິດຫວຽດນາມ. ບັນດາຜົນງານ, ສິ່ງຈຳກັດ, ສາຍເຫດ, ບົດຮຽນຂອງ 30 ປີ ແຫ່ງການປ່ຽນໃໝ່ ແລະ ທິດທາງສືບຕໍ່ຍູ້ແຮງພາລະກິດປ່ຽນໃໝ່ຢ່າງຮອບດ້ານ ແລະ ຄົບຊຸດ, ສ້າງຄວາມເຫັນດີເຫັນພ້ອມສູງໃນພັກ ແລະ ໃນສັງຄົມ.
ຜົນງານມີຄວາມໝາຍປະຫວັດສາດທີ່ສຳຄັນ
ຜົນງານໃນເກືອບ 30 ປີ ແຫ່ງການປ່ຽນໃໝ່ຢູ່ຫວຽດນາມ ແມ່ນມີຄວາມໝາຍສຳຄັນ. ຫາງສຽງສາກົນໄດ້ຮັບຮູ້ຫຼາຍເທື່ອແລ້ວວ່າ, ໄຊຊະນະແຫ່ງການປ່ຽນໃໝ່ຢູ່ຫວຽດນາມ ໄດ້ປະກອບສ່ວນຕັດສິນອະນາຄົດຂອງລັດທິສັງຄົມນິຍົມໃນຂອບເຂດທົ່ວໂລກ, ເປີດແງ່ຫວັງແກ້ໄຂວິກິດການ, ຊຸກຍູ້ການສ້າງຄວາມເປັນລະບຽບຮຽບຮ້ອຍໂລກໃໝ່ທີ່ມີຄວາມຍຸຕິທຳກວ່າ. ໃນຂະນະນັ້ນ, ທີ່ກອງປະຊຸມຄັ້ງທີ 10, ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ຕີລາຄາວ່າ, 30 ປີແຫ່ງການປ່ຽນໃໝ່, ແມ່ນໄລຍະປະຫວັດສາດສຳຄັນໃນວິວັດແຫ່ງການພັດທະນາຂອງປະເທດຊາດ, ເປັນຂີດໝາຍແຫ່ງການເຕີບໃຫຍ່ທຸກດ້ານຂອງພັກກອມມູນິດຫວຽດນາມ, ລັດ ແລະ ປະຊາຊົນຫວຽດນາມ. ທ່ານເລຂາທິການໃຫຍ່ ຫງວຽນຟູ໋ຈ້ອງ, ຊີ້ແຈ້ງວ່າ:
“ການປ່ຽນໃໝ່ມີຂອບຂະໜາດປະຫວັດສາດ ແລະ ມີຄວາມໝາຍປະຕິວັດຢ່າງໃຫຍ່ຫຼວງ, ແມ່ນວິວັດແຫ່ງການຫັນປ່ຽນຢ່າງເລິກເຊິ່ງ, ຮອບດ້ານ, ເຖິງຖອງ, ແມ່ນພາລະກະກິດປະຕິວັດຂອງທົ່ວພັກ, ທົ່ວປວງຊົນຫວຽດນາມ. ເບິ່ງລວມແລ້ວ, ພາຍຫຼັງ 30 ປີ ແຫ່ງການປ່ຽນໃໝ່, ປະເທດຫວຽດນາມ ບັນລຸໄດ້ບັນດາຜົນງານໃຫຍ່ຫຼວງ, ມີຄວາມໝາຍປະຫວັດສາດ, ສ້າງປະຖົມປັດໃຈທີ່ສຳຄັນເພື່ອນຳຫວຽດນາມ ສືບຕໍ່ປ່ຽນໃໝ່ ແລະ ພັດທະນາຢ່າງແຮງກວ່າໃນໄລຍະຈະມາເຖິງ“.
ໃນ 30 ປີແຫ່ງການປ່ຽນໃໝ່, ດ້ວຍຮູບແບບເສດຖະກິດສັງລວມແມ່ນ ກໍ່ສ້າງພື້ນຖານເສດຖະກິດການຕະຫຼາດຕາມກຳນົດທິດສັງຄົມນິຍົມ, ຫວຽດນາມ ໄດ້ຫຼຸດພົ້ນອອກຈາກວິກິດການເສດຖະກິດ - ສັງຄົມ, ສ້າງປະຖົມປັດໃຈທີ່ຈຳເປັນ ເພື່ອຫັນໄປສູ່ໄລຍະພັດທະນາໃໝ່ - ໄລຍະຍູ້ແຮງການຫັນເປັນປະເທດອຸດສາຫະກຳ ແລະ ທັນສະໄໝ. ມາຮອດປະຈຸບັນ, ເສດຖະກິດຫວຽດນາມ ບັນລຸລະດັບເຕີບໂຕໄວ, ອົງປະກອບເສດຖະກິດຫັນປ່ຽນຢ່າງຕັ້ງໜ້າຕາມທິດຫັນເປັນອຸດສາຫະກຳ ແລະ ທັນສະໄໝ, ການຜະລິດຕິດພັນກັບຕະຫຼາດ. ຫວຽດນາມ ໄດ້ປະຕິບັດແຜນນະໂຍບາຍພັດທະນາພື້ນຖານເສດຖະກິດຫຼາຍພາກສ່ວນສຳເລັດຜົນ, ເສີມຂະຫຍາຍຄວາມສາມາດບົ່ມຊ້ອນຂອງບັນດາພາກສ່ວນເສດຖະກິດນັບມື້ນັບດີຂຶ້ນ. ລະບອບເສດຖະກິດການຕະຫຼາດຕາມກຳນົດທິດສັງຄົມນິຍົມຄ່ອຍໆປະກົດຜົນເປັນຈິງ, ເສດຖະກິດມະຫາພາກມີສະຖຽນລະພາບໂດຍພື້ນຖານ. ຫວຽດນາມກໍ່ປະຕິບັດຄວາມກ້າວໜ້າ ແລະ ຄວາມຍຸຕິທຳໃນສັງຄົມເປັນຢ່າງດີ. ຊີວິດຂອງປະຊາຊົນສ່ວນຫຼາຍໄດ້ຮັບການປັບປຸງຢ່າງຈະແຈ້ງ. ບັນດາຜົນງານຂອງພາລະກິດປ່ຽນໃໝ່, ນັບມື້ນັບຢືນຢັນໃຫ້ເຫັນການຊີ້ນຳ, ນຳພາຢ່າງຖືກຕ້ອງຂອງພັກ, ແມ່ນປັດໃຈຕັດສິນຜົນສຳເລັດຂອງການປ່ຽນໃໝ່, ສົ່ງເສີມ, ປຸກລະດົມປະຊາຊົນສືບຕໍ່ສະໜັບສະໜູນ, ປະກອບສ່ວນສຳຄັນເຂົ້າໃນການຮັກສາສະຖຽນລະພາບເສດຖະກິດ - ສັງຄົມໄວ້ຢ່າງໝັ້ນຄົງ, ສືບຕໍ່ຊຸກຍູ້ພາລະກິດປ່ຽນໃໝ່ປະເທດຊາດຢ່າງຮອບດ້ານ, ດ້ວຍບາດກ້າວພັດທະນາກວ່າ.
ປ່ຽນໃໝ່ລະຫວ່າງການເມືອງ ແລະ ເສດຖະກິດຢ່າງຄົບຊຸດກວ່າ
ບັນດາການຜັນແປໃໝ່ສຸດໃນສະພາບການພາຍໃນ ແລະ ສາກົນ, ທວງໃຫ້ຫວຽດນາມ ຕ້ອງມີຄວາມມານະພະຍາຍາມສູ້ຊົນປ່ຽນໃໝ່ກວ່າອີກ, ເພື່ອຜ່ານຜ່າຄວາມຫຍຸ້ງຍາກ, ການທ້າທາຍຫຼາຍຢ່າງ, ແນໃສ່ບັນລຸໄດ້ບັນດາຜົນງານສຳຄັນໃນການສ້າງສາ ແລະ ພັດທະນາປະເທດຊາດ. ທີ່ກອງປະຊຸມຄັ້ງທີ 10, ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ຊີ້ອອກບັນດາບັນຫາສຳຄັນເຊິ່ງພັກກອມມູນິດຫວຽດນາມ, ໃນບົດບາດເປັນຜູ້ລິເລີ່ມພາລະກິດປ່ຽນໃໝ່, ຕ້ອງສືບຕໍ່ຊີ້ນຳ, ນຳພາທົ່ວກອງທັບ, ທົ່ວປວງຊົນຫວຽດນາມ ໃຫ້ບັນລຸຜົນສຳເລັດ, ໃນນັ້ນມີເລື່ອງສືບຕໍ່ລົງເລິກໄຈ້ແຍກ, ເຮັດແຈ້ງບັນດາຂໍ້ສະເໜີທີ່ກ່ຽວຂ້ອງເຖິງບັນຫາ “ປ່ຽນໃໝ່ລະຫວ່າງການເມືອງ ແລະ ເສດຖະກິດຢ່າງຄົບຊຸດກວ່າ“.
“ຕ້ອງກຳແໜ້ນ ແລະ ຢືນຢັນວ່າ: ປ່ຽນໃໝ່ດ້ານການເມືອງບໍ່ແມ່ນເຮັດໃຫ້ລະບອບການເມືອງ, ທາດແທ້ຂອງພັກກອມມູນິດຫວຽດນາມ, ລັດຫວຽດນາມ ປ່ຽນແປງ, ຫາກແມ່ນການປ່ຽນໃໝ່ກົນໄກ, ນະໂຍບາຍ, ການຈັດຕັ້ງກົງຈັກ, ປັບປຸງຍົກສູງຄຸນນະພາບຖັນແຖວພະນັກງານ, ປ່ຽນໃໝ່ແບບວິທີປະຕິບັດງານ, ແບບແຜນເຮັດວຽກ, ປະຕິຮູບດ້ານການບໍລິຫານ, ຕ້ານໄພອາດຍາສິດ, ການຟູມເຟືອຍ, ການສໍ້ລາດບັງຫຼວງ, ກໍ່ຄວາມຫຍຸ້ງຍາກໃຫ້ແກ່ປະຊາຊົນ, ຍົກສູງຜົນສັກສິດ, ປະສິດທິຜົນຂອງອົງການຕ່າງໆໃນລະບົບການເມືອງ, ຕອບສະໜອງຄວາມຮຽກຮ້ອງຕ້ອງການພັດທະນາເສດຖະກິດສັງຄົມ, ເພີ່ມທະວີການປ້ອງກັນຊາດ, ປ້ອງກັນຄວາມສະຫງົບ, ຮັກສາເອກະລາດ, ອະທິປະໄຕແຫ່ງຊາດໄວ້ຢ່າງໝັ້ນຄົງ“.
ທ່ານເລຂາທິການໃຫຍ່ ຫງວຽນຟູ່ຈ້ອງ ຖືວ່າ, ພັກກອມມູນິດຫວຽດນາມ ຕ້ອງສືບຕໍ່ໃກ້ຊິດຕິດແທດກັບພຶດຕິກຳຕົວຈິງ, ລົງເລິກເຂົ້າໃນການຄົ້ນຄ້ວາ, ສະຫຼຸບ, ປຶກສາຫາລື, ສ້າງຄວາມເຫັນດີເປັນເອກະພາບສູງສຸດ ສຳລັບບາງບັນຫາໃໝ່ ແລະ ຍາກໃນລະບົບທິດສະດີກ່ຽວກັບການປ່ຽນໃໝ່.
ໜຶ່ງໃນບັນດາສາຍເຫດເພື່ອບັນລຸໄດ້ຜົນງານໃນພາລະກິດປ່ຽນໃໝ່ປະເທດຊາດ, ນັ້ນແມ່ນພັກກອມມູນິດຫວຽດນາມ ສ້າງໄດ້ທິດສະດີປ່ຽນໃໝ່ວິທະຍາສາດ, ການປະຕິວັດເໝາະສົມກັບຄວາມຈິງແຫ່ງການພັດທະນາຂອງຫວຽດນາມ. ຜ່ານເກືອບ 30 ປີແຫ່ງການປ່ຽນໃໝ່, ພັກກອມມູນິດຫວຽດນາມສາມາດຖອດຖອນບັນດາບົດຮຽນອັນລຳ້ຄ່າ ເພື່ອໃຫ້ປະຊາຊົນທັງຊາດມີຄວາມໄວ້ເນື້ອເຊື່ອໃຈສືບຕໍ່ພາລະກິດພັດທະນາປະເທດຊາດ.