ກົກເຄົ້າທີ່ສຳຄັນເພື່ອນຳການປະຕິວັດເດືອນສິງຫາປີ 1945 ປະສົບຜົນສຳເລັດນັ້ນ ກໍແມ່ນຍ້ອນມີການເຕົ້າໂຮມປະຊາຊົນທຸກຊັ້ນວັນນະເຂົ້າຮ່ວມ, ສ້າງເປັນກຸ່ມກ້ອນມະຫາສາມັກຄີທົ່ວປວງຊົນທັງຊາດ ພາຍໃຕ້ການນຳພາຂອງພັກກອມມູນິດຫວຽດນາມ. ບົນຮຽນນີ້ຍັງມີຄຸນຄ່າເໝືອນເດີມໃນສະພາວະປະເທດຊາດພວມເຊືອ່ມໂຍງເລິກເຂົ້າກັບສາກົນ.
ວັນທີ 10/ 5/1941, ປະທານໂຮ່ຈິມິນໄດ້ຮຽກໂຮມ ແລະ ເປັນປະທານກອງປະຊຸມສູນກາງພັກຄັ້ງທີ 8 ຢູ່ປັກປໍ້ ແຂວງກາວບັງ |
ຕໍ່ໜ້າການປ່ຽນແປງຢ່າງວ່ອງໄວຂອງສະພາບການໂລກ, ເດືອນ 5/1941, ປະທານໂຮ່ຈິມິນໄດ້ຮຽກໂຮມ ແລະ ເປັນປະທານກອງປະຊຸມສູນກາງພັກຄັ້ງທີ 8 ຢູ່ປັກປໍ້ ແຂວງກາວບັງ. ທີ່ກອງປະຊຸມຄັ້ງນີ້, ປະທານໂຮ່ຈິມິນ ແລະ ສູນກາງພັກໄດ້ມີການຫັນທິດຊີ້ນຳຍຸດທະສາດ, ຢືນຢັນການປົດປ່ອຍຊາດແມ່ນໜ້າທີ່ແຖວໜ້າຂອງ ການປະຕິວັດຫວຽດນາມໃນຄາວນັ້ນ. ກອງປະຊຸມໄດ້ກຳນົດວ່າ : ໃນຈຸດເວລານີ້, ສິດຜົນປະໂຫຍດຂອງພາກສ່ວນ, ຂອງຊົນຊັ້ນຕ້ອງຢູ່ໃຕ້ຄວາມເປັນຕາຍ ແລະ ການຄົງຕົວຂອງປະເທດຊາດ.
ເສີມຂະຫຍາຍກຳລັງແຮງຂອງທັງຊາດ ລຸກຮື້ຂຶ້ນຍາດເອົາອຳນາດການປົກຄອງ
ຈາກການກຳນົດທິດຍຸດທະສາດນັ້ນ, ພັກກອມມູນິດຫວຽດນາມ ແລະ ປະທານໂຮ່ຈິມິນໄດ້ຫັນທິດສ້າງກຳລັງ, ຊີ້ນຳແບບວິທີ ແລະ ສິລະປະການລຸກຮື້ຂຶ້ນ, ນຳການປະຕິວັດກາຍເປັນການລຸກຮື້ຂຶ້ນທົ່ວປວງຊົນ, ເສີມຂະຫຍາຍກຳລັງແຮງຂອງທັງຊາດ, ດຳເນີນການເຄື່ອນໄຫວພ້ອມກັບບັນດາອົງການຈັດຕັ້ງມະຫາຊົນກູ້ຊາດ, ສ້າງຂະບວນການຕໍ່ສູ້ຢ່າງແຂງແຮງ, ກະກຽມໃຫ້ແກ່ການ ລຸກຮື້ຂຶ້ນຍາດເອົາອຳນາດການປົກຄອງ. ທ່ານຮອງສາດສະດາຈານ, ປອ ຫງວຽນຈ້ອງຟຸກ ອະດີດຫົວໜ້າສະຖາບັນປະຫວັດສາດພັກ, ສະຖາບັນການເມືອງແຫ່ງຊາດໂຮ່ຈິມິນ ວິເຄາະວ່າ :
“ ໃນຄຳຮຽກຮ້ອງໃຫ້ທຳການ ລຸກຮື້ຂຶ້ນຂະໜາດໃຫຍ່ເພື່ອຍາດເອົາອຳນາດການປົກຄອງ, ປະທານໂຮ່ຈິມິນໄດ້ເວົ້າວ່າ : ພໍ່ແມ່ພີ້ນ້ອງຮ່ວມຊາດທຸກໆຄົນ ຈົ່ງລຸກຂຶ້ນ, ສຸມກຳລັງແຮງເພື່ອປົດປ່ອຍຕົນເອງ. ປົດປ່ອຍຕົນເອງໄດ້ ກໍຍ້ອນມີແນວທາງຊີ້ນຳຂອງພັກ, ພ້ອມກັນນັ້ນ ກໍຍ້ອນການເຕົ້າໂຮມກຳລັງຂອງແນວໂຮມຫວຽດມິນ ”
ໂດຍພາຍໃຕ້ການນຳພາຂອງພັກກອມມູນິດຫວຽດນາມ ແລະ ປະທານໂຮ່ຈິມິນ, ຜ່ານແນວໂຮມຫວຽດມິນ, ກຳລັງແຮງສາມັກຄີຂອງຊາວຫວຽດນາມກວ່າ 20 ລ້ານຄົນທີ່ຂຶ້ນກັບທຸກຊົນຊັ້ນ ໄດ້ເສີມຂະຫຍາຍໃນລະດັບສູງສຸດ. ທົ່ວທັງປະເທດທຳການລຸກຮື້ຂຶ້ນ, ທັບມ້າງກົງຈັກຄອບຄອງຂອງລ່າເມືອງຂຶ້ນ, ສັກດີນາ, ຍາດເອົາອຳນາດການປົກຄອງ. ການປະຕິວັດເດືອນສິງຫາໄດ້ດຳເນີນພາຍໃນ 15 ວັນ, ແຕ່ໄດ້ປະສົບຜົນສຳເລັດຢ່າງວ່ອງໄວ ແລະ ສົມບູນ.
ບົດຮຽນກ່ຽວກັບການປັບປຸງ, ເສີມຂະຫຍາຍກຳລັງແຮງກຸ່ມກ້ອນມະຫາສາມັກຄີທົ່ວປວງຊົນທັງຊາດ
71 ປີພາຍຫຼັງຍາດໄດ້ໄຊຊະນະຢ່າງຍິ່ງໃຫຍ່ຂອງການປະຕິວັດເດືອນສິງຫາປີ 1945, ຫວຽດນາມໄດ້ກ້າວເດີນຍາວໄກໃນພາລະກິດສ້າງສາ ແລະ ພັດທະນາປະເທດຊາດ. ຈາກຊາດໜຶ່ງເປັນຂ້າທາດ, ທຸກຍາກຫຼ້າຫຼັງ, ບໍ່ມີຊື່ໃນແຜນທີ່ໂລກ, ມາຮອດປະຈຸບັນ, ຫວຽດນາມໄດ້ບັນລຸຜັນງານທີ່ຍິ່ງໃຫຍ່, ກະໂດດຂັ້ນໃນທຸກດ້ານ, ມີການພົວພັນທາງການທູດຢ່າງກ້ວາງຂວາງກັບບັນດາປະເທດ, ອົງການຈັດຕັ້ງສາກົນ. ແຕ່ພ້ອມກັນນັ້ນ, ຫວຽດນາມກໍຕ້ອງປະເຊີນໜ້າກັບສິ່ງທ້າທາຍບໍ່ໜ້ອຍ ຈາກການມ້າງເພທຳລາຍຂອງບັນດາອິດທິກຳລັງເປັນປໍລະປັກ, ພ້ອມກັບປະກົດການ “ ຜັນແປຕົນເອງ” “ຫັນປ່ຽນເອງ” ຢູ່ພາຍໃນ, ສະພາບການເສືອມທາດຂາດຄຸນທາງດ້ານການເມືອງ, ແນວຄິດ, ຄຸນສົມບັດ, ວິຖີຊີວິດຂອງພະນັກງານສະມາຊິກພັກຈຳນວນໜຶ່ງ… ນີ້ແມ່ນບັນດາສິ່ງທ້າທາຍໃຫຍ່ສຳລັບກຸ່ມກ້ອນສາມັກຄີພາຍໃນພັກ ແລະ ກຸ່ມກ້ອນມະຫາສາມັກຄີທົ່ວປວງຊົນທັງຊາດ. ຄວາມຈິງນັ້ນ ຍິ່ງຕ້ອງຮຽກຮ້ອງໃຫ້ພັກກອມມູນິດຫວຽດນາມສືບຕໍ່ເສີມຂະຫຍາຍໃນລະດັບສູງສຸດ ບັນດາບົດຮຽນອັນລ້ຳຄ່າຂອງການປະຕິວັດເດືອນສິງຫາ, ເປັນຕົ້ນແມ່ນບົດຮຽນກ່ຽວກັບການປັບປຸງ, ເສີມຂະຫຍາຍກຳລັງແຮງຂອງທັງຊາດ. ທ່ານ ຝ້າມເທ້ຢຽດ ອະດີດຄະນະກຳມະການສູນກາງແນວໂຮມປະເທດຊາດຫວຽດນາມ ຖືວ່າ :
“ ຍິ່ງກວ່າເວລາໃດໝົດ, ໃນຈຸດເວລານີ້, ຢາກເສີມຂະຫຍາຍໄດ້ກຳລັງແຮງມະຫາສາມັກຄີທົ່ວປວງຊົນທັງຊາດນັ້ນ, ພັກຕ້ອງສາມັກຄີ, ຕ້ອງເປັນແບບຢ່າງໃຫ້ແກ່ປະຊາຊົນ. ປະຊາຊົນໄດ້ຮຽກຮ້ອງພັກປະຕິບັດແນວທາງ, ມະຕິທີ່ໄດ້ວາງອອກໃຫ້ໄດ້. ເຮັດໄດ້ສິ່ງນັ້ນເປັນຢ່າງດີ, ພວກເຮົາຈຶ່ງສືບຕໍ່ເສີມຂະຫຍາຍໄດ້ກຳລັງແຮງມະຫາສາມັກຄີເພື່ອປະຕິບັດພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ ”
ສ່ວນ ທ່ານຮອງສາດສະດາຈານ, ປອ ຝ້າມຊວນຮັ່ງ ສັງກັດມະຫາວິທະຍາໄລວິທະຍາສາດສັງຄົມ ແລະ ມະນຸດສາດ ຖືວ່າ :
“ ປຸກລະດົມກຳລັງແຮງທັງຊາດໃນໄລຍະປະຈຸບັນ, ພັກຕ້ອງເຊື່ອມຕົວເຂົ້າສູ່ແນວໂຮມຄືບັນດາໄລຍະຕໍ່ສູ້ອັນດຸເດືອດນັ້ນ ເພື່ອເປັນແກ່ນສານກຸ່ມກ້ອນ ມະຫາສາມັກຄີທົ່ວປວງຊົນທັງຊາດ ແລະ ກຳລັງແຮງກຸ່ມກ້ອນ ມະຫາສາມັກຄີທົ່ວປວງຊົນທັງຊາດ ຈະຕັດສິນບັນຫາກໍ່ສ້າງກຳລັງພາຍໃນຂອງຊາດ. ຈຸດເວລານີ້, ພັກຄວນສະແດງໃຫ້ເຫັນບົດບາດຂອງຕົນ, ຕ້ອງສາມັກຄີ, ກ່ອນອື່ນໝົດຕ້ອງເປັນ ແກ່ນສານກຸ່ມກ້ອນ ມະຫາສາມັກຄີທົ່ວປວງຊົນທັງຊາດ, ໃນນັ້ນ ພັກແມ່ນອົງການພາຄີພິເສດ”
ໃນຕົວຈິງ, ປະຫວັດສາດຂອງຊາດ ໄດ້ພິສູດໃຫ້ເຫັນວ່າ ເຖິງວ່າ ໃນບໍ່ວ່າສະພາບການໃດ, ປະສົບກັບຄວາມຫຍຸ້ງຍາກ, ສິ່ງທ້າທາຍອັນໃຫຍ່ຫຼວງຄືແນວໃດກໍຕາມ, ຄວາມສາມັກຄີ ເປັນຈິດໜຶ່ງໃຈດຽວຂອງທົ່ວປວງຊົນ ພາຍໃຕ້ການນຳພາຂອງພັກ ແມ່ນກຳລັງແຮງອັນໃຫຍ່ຫຼວງເພື່ອໃຫ້ປະເທດຊາດຜ່ານຜ່າທຸກຄວາມຫຍຸ້ງຍາກ, ສິ່ງທ້າທາຍ. ພາຍໃຕ້ການນຳພາຂອງພັກ, ກຸ່ມກ້ອນມະຫາສາມັກຄີຂອງຊາວຫວຽດນາມກວ່າ 93 ລ້ານຄົນຢູ່ພາຍໃນ ແລະ ແລະ ຊາວຫວຽດນາມກວ່າ 4,5 ລ້ານຄົນອາໄສຢູ່ຕ່າງປະເທດໃນຈຸດເວລານີ້ ຈະແມ່ນແຫຼ່ງກຳລັງແຮງອັນໃຫຍ່ຫຼວງທີ່ສຸດເພື່ອໃຫ້ຫວຽດນາມກ້າວເດີນຢ່າງໜັກແໜ້ນບົນເສັ້ນທາງແຫ່ງການສ້າງສາ ແລະ ພັດທະນາປະເທດຊາດ.