(vovworld) - ເຖິງວ່າຕີລາຄາພື້ນຖານເສດຖະກິດພວມປະສົບກັບຄວາມຫຍຸ້ງຍາກຫຼາຍຢ່າງກໍຕາມ, ແຕ່ທ່ານນາຍົກລັດຖະມົນຕີ ຫງວຽນຊວນຟຸກ ຍັງຢືນຢັນວ່າ, ໃນຊຸມເດືອນທ້າຍປີ, ລັດຖະບານຈະບໍລິຫານຊີນຳຢ່າງຂ້ຽວຂາດເພື່ອບັນລຸຄາດໝາຍຍອດຜະລິດຕະພັນພາຍໃນ (GDP) ເພີ່ມຂຶ້ນ 6,7% ໃນປີ 2016. ບົດຂຽນຂອງ ຫວູຢຸງ - ທູຮວາ ດ້ວຍຫົວຂໍ້ວ່າ “ມານະພະຍາຍາມສູ້ຊົນເພື່ອບັນລຸຄາດໝາຍເຕີນໂຕໃຫ້ໄດ້”.
(ກອງປະຊຸມສະໄໝສາມັນປະຈຳເດືອນ 06 ຂອງລັດຖະບານ)
ທີ່ວາລະອັດກອງປະຊຸມສະໄໝສາມັນປະຈຳເດືອນ 06 ຂອງລັດຖະບານເມື່ອຕອນບ່າຍວັນທີ 01/07, ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ ຈິດໃຈລວມຂອງພັກ, ລັດ, ລັດຖະບານ, ນາຍົກລັດຖະມົນຕີ ແມ່ນເສີມຂະຫຍາຍກຳລັງແຮງສັງລວມຂອງທັງລະບົບການເມືອງ, ທົ່ວກອງທັບ, ທົ່ວປວງຊົນ, ບັນດາຂະແໜງການ, ທຸກຂັ້ນ ແລະ ປະຊາຄົມວິສາຫະກິດ, ມີຄວາມຂະຫຍັນຂັນເຄື່ອນ, ມີຫົວຄິດປະດິດສ້າງ, ມີການປ່ຽນໃໝ່, ກ້າເຮັດກ້າທຳ, ກ້າຮັບຜິດຊອບ, ເພີ່ມຂໍ້ກຳນົດກົດລະບຽບ, ມານະພະຍາຍາມສູ້ຊົນເພື່ອບັນລຸຄາດໝາຍທີ່ໄດ້ວາງອອກໃນລະດັບສູງສຸດ.
ບໍ່ປັບປຸ່ງຄາດໝາຍເພີ່ມ GDP
ເຖິງວ່າໃນ 6 ເດືອນຕົ້ນປີຍັງປະສົບກັບຄວາມຫຍຸ້ງຍາກຫຼາຍຢ່າງກໍຕາມ, ແຕ່ບັນດາຄວາມສາມາດເຕີິບໂຕດ້ານເສດຖະກິດຂອງຫວຽດນາມ ໃນຊຸມເດືອນຕົ້ນປີ 2016 ຍັງມີຢູ່. ສຳລັບການຜະລິດກະສິກຳ, ກະຊວງກະສິກຳ ແລະ ພັດທະນາຊົນນະບົດສະເໜີໃຫ້ບັນດາແຂວງເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ເປີດກວ້າງ ເນື້ອທີ່ປູກເຂົ້າ, ຜັກພືດຕື່ມອີກ 25.000 ແຮັກຕາ, ພ້ອມທັງຍົກອອກບັນດາມາດຕະການຫຼຸດຜ່ອນລາຍຈາຍໃນການຜະລິດເພື່ອເພີ່ມປະສິດທິຜົນ. ຄຽງຂ້າງນັ້ນແມ່ນຍູ້ແຮງການລ້ຽງ, ປູກສິນໃນນ້ຳ, ໃນນັ້ນມີການລ້ຽງກຸ້ງໃຫ້ສະມັດຕະພາບເສດຖະກິດສູງ. ກະຊວງອຸດສາຫະກຳການຄ້າກໍໃຫ້ຮູ້ວ່າ, ການສົ່ງອອກໃນ 6 ເດືອນທ້າຍປີ 2016 ມີກາລະໂອກາດເຕີບໂຕ, ພິເສດແມ່ນຜະລິດຕະພັນກະເສດ, ສິນໃນນ້ຳ ແລະ ການສົ່ງອອກທັງປີອາດຈະບັນລຸໄດ້ 8,5%. ເພື່ອສ້າງເງື່ອນໄຂສະດວກໃຫ້ບັນດາວິສາຫະກິດສຳພັດກັບບ້ວງສິນເຊື່ອ, ທະນາຄານແຫ່ງລັດຈະຄວບຄຸມໄພເງິນເຟີ້, ຮັບປະກັນເສດຖະກິດມະຫາພາກເປັນປົກກະຕິ, ຮຽກຮ້ອງບັນດາທະນາຄານຫຼຸດຜ່ອນລາຍຈາຍ ເພື່ອຫຼຸດຜ່ອນດອກເບ້ຍໃຫ້ກູ້ຢື່ມ. ແນວໂນມປະເທດຊາດຫວຽດນາມ ສະເໜີສ້າງຕັ້ງຄະນະຊີ້ນຳສູນກາງກ່ຽວກັບສະຫະກອນ, ເພື່ອຊຸກຍູ້ສະຫະກອນພັດທະນາ, ພ້ອມເສີມຂະຫຍາຍບົດບາດຂອງສະຫະກອນຕິດພັນກັບການກໍ່ສ້າງຊົນນະບົດໃໝ່. ທ່ານນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ, ດ້ວຍຄວາມມານະພະຍາຍາມຂອງລັດຖະບານ, ບັນດາກະຊວງ, ຂະແໜງການ, ທ້ອງຖິ່ນ, ວິສາຫະກິດ ແລະ ປະຊາຊົນ, ຫວຽດນາມ ອາດຈະບັນລຸໄດ້ຄາດໝາຍເຕີບໂຕ 6,7% ໃນປີ 2016.
ກໍ່ສ້າງລັດຖະບານແຫ່ງການກໍ່ສ້າງເພື່ອຄາດໝາຍເຕີບໂຕ
ເພື່ອບັນລຸໄດ້ຄາດໝາຍເຕີບໂຕ GDP, ລັດຖະບານຕັດສິນໃຈກໍ່ສ້າງລັດຖະບານແຫ່ງການກໍ່ສ້າງພັດທະນາ, ສັດຊື່ບໍລິສຸດ, ຕ້ານການສໍ້ລາດບັງຫຼວງ, ມີລະບຽບວິໄນ, ເຄື່ອນໄຫວດ້ວຍຈິດໃຈຮັບໃຊ້ປະຊາຊົນ ແລະ ວິສາຫະກິດ; ສ້າງສະພາບແວດລ້ອມແຫ່ງການລົງທຶນ, ດຳເນີນທຸລະກິດໃຫ້ເປັນຢ່າງດີກວ່າ ເພື່ອໃຫ້ປະຊາຊົນ ແລະ ວິສາຫະກິດສ້າງການເຕີບໂຕທາງດ້ານເສດຖະກິດ. ທ່ານນາຍົກລັດຖະມົນຕີ ຫງວຽນຊວນຟຸກ ຊີ້ແຈ້ງວ່າ.
“ເພີ່ມທະວີລັກສະນະໂປ່ງໄສ ແລະ ຄວາມຮັບຜິດຊອບໃນການປະຕິບັດ, ສະກັດກັ້ນ ແລະ ກ້າວໄປເຖິງລົບລ້າງກົນໄກຂໍ-ໃຫ້ໃນທຸກຂົງເຂດຢ່າງສຸດຂີດ, ຕ້ານຜົນປະໂຫຍດພາກສ່ວນ ແລະ ຜົນປະໂຫຍດກຸ່ມ. ຍູ້ແຮງການຫັນເປັນສັງຄົມ, ສິ່ງໃດຕະຫຼາດເຮັດໄດ້ດີກໍໃຫ້ຕະຫຼາດເຮັດ, ແທນທີ່ລັດຕ້ອງເຮັດ. ຂົງເຂດລັດວິສາຫະກິດຕ້ອງເຮັດແນວໃດໃຫ້ນັບມື້ນັບນ້ອຍລົງ ແລະ ມີປະສິດທິຜົນສູງກວ່າ. ຖືພາກສ່ວນເສດຖະກິດພາກເອກະຊົນແມ່ນກຳລັງໜູນສຳຄັນຂອງການເຕີບໂຕ, ສ້າງວຽກເຮັດງານທຳໃໝ່. ບັນດາຂະແໜງສາທາລະນະສຸກ, ການສຶກສາ, ວັດທະນະທຳ, ວິທະຍາສາດເຕັກໂນໂລຊີ, ທ້ອງຖິ່ນຕ່າງໆຕ້ອງມີແຜນຮ່າງຫັນເປັນສັງຄົມ, ຊອກຫາແຫຼ່ງທຶນຈາກປະຊາຊົນ ແລະ ວິສາຫະກິດ”.
ທ່ານນາຍົກລັດຖະມົນຕີ ຫງວຽນຊວນຟຸກ ໃຫ້ຮູ້ວ່າ, ລັດຖະບານໄດ້ຍົກອອກບາງແຜນນະໂຍບາຍໃໝ່ ເພື່ອຊຸກຍູ້ການເຕີບໂຕດ້ານເສດຖະກິດຄື: ປະກາດໃຊ້ບັນດາມະຕິ, ດຳລັດຂອງລັດຖະບານເພື່ອແກ້ໄຂສະພາບແວດລ້ອມແຫ່ງການລົງທຶນ, ດຳເນີນທຸລະກິດ, ແນະນຳການປະຕິບັດກົດໝາຍວ່າດ້ວນການລົງທຶນ (ສະບັບປັບປຸງ) ແລະ ກົດໝາຍວ່າດ້ວຍວິສາຫະກິດ (ສະບັບປັບປຸງ) ເພີ່ມທະວີການປະຕິຮູບລະບຽບການບໍລິຫານ. ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ.
“ທີ 1 ແມ່ນຕ້ອງປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ, ບັນດາກະຊວງ, ຂະແໜງການ, ທ້ອງຖິ່ນຕ່າງໆ ຕ້ອງປະຕິບັດບັນດາມະຕິຕົກລົງເລກທີ 01, 19, 35 ຂອງລັດຖະບານເປັນຢ່າງດີ. ທີ 2 ແມ່ນຕ້ອງຍູ້ໄວການປ່ອຍເງິນລົງທຶນ. ເລັ່ງໃສ່ຊ່ວຍເຫຼືອຊາວກະສີກອນຟື້ນຟູການຜະລິດກະສີກຳ, ພິເສດແມ່ນຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ, ເຂດຕອນໃຕ້ພາກກາງ, ເຂດໄຕງວຽນ. ໜູນຊ່ວຍຊາວກະສີກອນພັດທະນາການຜະລິດ ບໍ່ພຽງແຕ່ເພື່ອການເຕີບໂຕເທົ່ານັ້ນ, ຫາກຍັງແມ່ນພື້ນຖານເພື່ອຮັບປະກັນສະຖຽນລະພາບສັງຄົມ ແລະ ຊີວິດສັງຄົມ. ນຳໃຊ້ກາລະໂອກາດ ແລະ ເປີດກວ້າງບັນດາຕະຫຼາດສົ່ງອອກ ແລະ ໃຊ້ສອຍພາຍໃນປະເທດອີກດ້ວຍ”.
ມີໜ້າທີ່ສຳຄັນໜຶ່ງອີກເຊິ່ງນາຍົກລັດຖະມົນຕີໄດ້ເນັ້ນໜັກເຖິງນັ້ນແມ່ນ ຕ້ອງແກ້ໄຂວຽກງານຍົກສູງສະມັດຕະພາບ, ປະສິດທິຜົນ, ຍົກສູງກຳລັງແກ່ງແຍ້ງ. ຕາມນັ້ນແລ້ວ, ແຕ່ລະກະຊວງ, ທ້ອງຖິ່ນຕ້ອງມີລາຍການເຄື່ອນໄຫວລະອຽດ, ເໝາະສົມກັບໜ້າທີ່ສ້າງໂຄງປະກອບຄືນໃໝ່. ພ້ອມກັນນັ້ນແມ່ນຊຸກຍູ້ການດຳເນີນອາຊີບ. ການດຳເນີນອາຊີບຕ້ອງແມ່ນໜ້າທີ່ຈຸດສຸມຂອງຮ່າໂນ້ຍ ແລະ ນະຄອນໂຮ່ຈິມິນ ແລະ ບັນດາແຂວງ, ນະຄອນອື່ນໆເພື່ອແນໃສ່ບັນລຸຄາດໝາຍເຕີບໂຕທັງປີໃຫ້ໄດ້.