(vovworld)- ດ້ວຍບັດສະຫນັບສະຫນູນ 360 ບັດໃນຍອດຈຳນວນ 652 ບັດ, ທ່ານ Htin Kyaw ຫາກໍໄດ້ຮັບເລືອກຕັ້ງເປັນປະທານາທິບໍດີຂອງລັດຖະບານພົນລະເຮືອນທຳອິດຢູ່ ມຽນມາ. ພາຍຫລັງກວ່າເຄິ່ງສັດຕະວັດ ທີ່ກອງທັບກຳອຳນາດ, ອຳນາດການປົກຄອງພົນລະເຮືອນໂດຍໄດ້ຮັບການເລືອກເຟັ້ນຈາກປະຊາຊົນ ຈະເຮັດໃຫ້ເສັ້ນທາງການປະຕິຮູບຢູ່ມຽນມາ ມີຄວາມສະດວກຫລາຍກວ່າ.
ທ່ານ Htin Kyaw, ປະທານາທິບໍດີ ມຽນມາ ຄົນໃຫມ່
ພາບ: AFP
|
ທ່ານ Htin Kyaw ຂຶ້ນກັບພັກສະຫະພັນແຫ່ງຊາດ ເພື່ອປະຊາທິປະໄຕ (NLD) ໂດຍ ສະພາແຫ່ງຊາດ ມຽນມາ ເລືອກຕັ້ງເປັນປະທານາທິບໍດີ ໃນວັນທີ 15/3 ແລະ ຄາດວ່າ ປະທານາທິບໍດີ ມຽນມາ ຄົນໃຫມ່ ຈະສາບານຕົວຮັບດຳລົງຕຳແຫນ່ງໃນວັນທີ 1 / 4 ຈະມາເຖິງ. ດ້ວຍເລື່ອງ ທ່ານ Htin Kyaw ໄດ້ຮັບເລືອກຕັ້ງເປັນປະທານາທິບໍດີຄົນໃຫມ່ຂອງ ມຽນມາ, ລະບົບການເມືອງໃຫມ່ຂອງປະເທດນີ້ ໄດ້ຮັບການ ປັບປຸງໂດຍພື້ນຖານ. ພັກ NLD ຈະກຳອຳນາດບໍລິຫານລັດຖະບານ ແລະ ບັນດາຕຳແຫນ່ງ ປະທານາທິບໍດີ, ຮອງປະທານາທິບໍດີ, ລັດຖະມົນຕີ ກໍໄດ້ຮັບການແຕ່ງຕັ້ງສຳເລັດແລ້ວ. ເປັນອັນວ່າ, ເປັນຄັ້ງທຳອິດ ມຽນມາ ມີປະທານາທິບໍດີພົນລະເຮືອນ ນັບແຕ່ປີ 1960. ນີ້ໄດ້ຮັບຖືວ່າແມ່ນບາດກ້າວເດີນສຳເລັດຜົນທີ່ສຸດໃນກວ່າເຄິ່ງສັດຕະວັດຜ່ານມາຂອງມຽນມາ ເພື່ອເຮັດໃຫ້ດ້ານການເມືອງ ແລະ ເສດຖະກິດຂອງປະເທດຊາດມີສະຖຽນລະພາບ.
ນຳມາເຊິ່ງຄວາມມຸ່ງຫວັງໃຫມ່ໃຫ້ແກ່ປະຊາຊົນ
ກ່ອນທີ່ຍາດໄດ້ໄຊຊະນະໃນການປ່ອນບັດຢູ່ສະພາແຫ່ງຊາດ ມຽນມາ ເມື່ອວັນທີ 15/3, ທ່ານ Htin Kyaw ໄດ້ຮັບຊະນະຕໍ່ຜູ້ສະໝັກຮັບເລືອກຕັ້ງ Sai Mauk Kham ຂອງພັກພັນທະມິດສາມັກຄີ ແລະ ພັດທະນາ (USDP), ໃນການຊ່ວງເສັງຄັດ ເລືອກຜູ້ສະໝັກຮັບເລືອກຕັ້ງປະທານາທິບໍດີຫນຶ່ງດຽວຂອງສະພາຕ່ຳ ເມື່ອວັນທີ 11/3. ໂດຍແມ່ນຜູ້ໃຫ້ຄຳປຶກສາທີ່ໃກ້ຊິດຂອງທ່ານນາງ Suu Kyi, ຊື່ງແມ່ນຜູ້ທີ່ມີຜົນສະທ້ອນໃຫຍ່ສຸດໃນຊີວິດດ້ານການເມືອງຢູ່ ມຽນມາ ປະຈຸບັນ, ຕາມການຕີລາຄາແລ້ວ, ເລື່ອງທ່ານ Htin Kyaw ກາຍເປັນປະທານາທິບໍດີ ຈະສືບຕໍ່ເສັ້ນທາງປະຕິຮູບປະເທດຊາດຢ່າງແຮງ ຕາມທິດຊຸກຍູ້ການປະຕິຮູບສ້າງບັນດາຂົງເຂດພື້ນຖານໂຄງລ່າງ, ຕັດສິນໃຈໃນການຕ້ານການສໍ້ລາດບັງຫລວງ, ສ້າງລັດຖະບານໃຫ້ໂປ່ງໃສ, ກະຈ່າງແຈ້ງ ແລະ ສ້າງສຳພັນທະມິດສະຫະລັດ. ພາຍຫລັງທ່ານ Htin Kyaw ຍາດໄຊຊະນະ, ມີປະຊາຊົນ ມຽນມາ ຫລາຍຄົນ ໄດ້ແບ່ງປັນບັນດາຄວາມຮູ້ສຶກພ້ອມກັບບັນດາຂໍ້ຄວາມທາງເຄືອຂ່າຍສັງຄົມອອນໄລຄື: “Welcome Mr. President” (ຍີນດີຕ້ອນຮັບປະທານາທິບໍດີ) ແລະ We love our President Htin Kyaw (ພວກຂ້າພະເຈົ້າຮັກປະທານາທິບໍດີ Htin Kyaw). ມີພົນລະເມືອງ ມຽນມາຫລາຍຄົນ ສະແດງຄວາມຫວັງວ່າ: ປະທານາທິບໍດີ ຄົນໃຫມ່ ຈະນຳມາເຊິ່ງສັນຕິພາບໃຫ້ແກ່ເຂດທີ່ຍັງເກີດການປະທະກັນເຜົ່າພັນ, ສ້າງຄວາມປອງດອງ ແລະ ປັບປຸງມາດຖານການດຳລົງຊີວິດຂອງປະຊາຊົນ.
ສິ່ງທ້າທາຍບໍ່ແມ່ນຫນ້ອຍ
ເຖິງວ່າໄດ້ຮັບການສະຫນັບສະຫນູນ ແລະ ຄວາມເຊື່ອໝັ້ນອັນໃຫຍ່ຫລວງຈາກປະຊາຊົນກໍຕາມ ແຕ່ວົງການນັກໄຈ້ແຍກຖືວ່າ: ລັດຖະບານໃຫມ່ຂອງ ມຽນມາ ຕ້ອງປະເຊີນຫນ້າກັບສິ່ງທ້າທາຍຫລາຍຢ່າງ. ກ່ອນອື່ນໝົດ, ນັ້ນແມ່ນ ເຮັດແນວໃດແກ້ໄຂບັນດາຄວາມຂັດແຍ້ງກ່ຽວກັບເຜົ່າພັນ ແລະ ສ້າງຄວາມສາມັກຄີລະຫວ່າງບັນດາພັກການເມືອງ ແລະ ກຳລັງປະກອບອາວຸດ ຢູ່ ມຽນມາ. ນີ້ແມ່ນບັນຫາທີ່ແກ້ໄຂຍາກ. ຕາມລັດຖະທຳມະນູນ ມຽນມາ, ວົງການການທະຫານສືບຕໍ່ສວມບົດບາດສຳຄັນເມື່ອມີສິດແຕ່ງຕັ້ງ 3 ຕຳແຫນ່ງລັດຖະມົນຕີ ສຳຄັນນັ້ນແມ່ນ: ລັດຖະມົນຕີວ່າການກະຊວງປ້ອງກັນປະເທດ, ລັດຖະມົນຕີວ່າການກະຊວງພາຍໃນ ແລະ ລັດຖະມົນຕີວ່າການກະຊວງປ້ອງກັນຄວາມສະຫງົບເຂດຊາຍແດນ. ສະນັ້ນ ການພົວພັນກັບບັນດານາຍພົນທະຫານ ແລະ ຕຳຫລວດ ແນ່ນອນວ່າຈະເປັນການບຸລິມະສິດໃຫຍ່ສຳລັບປະທານາທິບໍດີ Htin Kyaw. ຍ້ອນການພົວພັນນີ້ ຈະຕັດສິນຜົນສຳເລັດຂອງທຸກຄວາມມານະພະຍາຍາມປະຊາທິປະໄຕ, ຄວາມໄກ່ເກ່ຍປອງດອງ ແລະ ສະຖຽນລະພາບຢູ່ ມຽນມາ.
ການບຸລິມະສິດໃຫຍ່ທີສອງຂອງອຳນາດການປົກຄອງພົນລະເຮືອນຂອງປະທານາທິບໍດີ Htin Kyaw ນັ້ນແມ່ນເຮັດແນວໃດເພື່ອປົວແປງຊີວິດການເປັນຢູ່ໃຫ້ແກ່ປະຊາຊົນ, ນຳພື້ນຖານເສດຖະກິດ ມຽນມາ ພັດທະນາ. ໃນຖະແຫລງການທຳອິດພາຍຫລັງໄດ້ຮັບເລືອກຕັ້ງເປັນປະທານາທິບໍດີ, ທ່ານ Htin Kyaw ໃຫ້ຮູ້ວ່າ: ທ່ານຈະສ້າງຕັ້ງກົງຈັກມີສິດອຳນາດຢ່າງແທ້ຈິງເພື່ອຮັບໃຊ້ຜົນປະໂຫຍດຂອງປະຊາຊົນ. ນີ້ກໍແມ່ນຄວາມປາດຖະຫນາຂອງປະຊາຊົນ ມຽນມາ ເມື່ອພື້ນຖານເສດຖະກິດ ແລະ ລະດັບຄອງຊີບຂອງຊາວມຽນມາ ສ່ວນຫລາຍຍັງບໍ່ທັນໄດ້ຮັບການປົວແປງເທື່ອ. ປະຈຸບັນ, ມຽນມາ ແມ່ນຫນຶ່ງໃນບັນດາປະເທດທຸກຍາກກວ່າໝູ່ຢູ່ ອາຊີ ດ້ວຍເກືອບ 1/3 ຍອດຈຳນວນພົນລະເມືອງ 60 ລ້ານຄົນພວມດຳລົງຊີວິດໃນສະພາບອຶດຫິວທຸກຍາກ.
ສືບທອດວິວັດການປະຕິຮູບ
ນັບແຕ່ເມື່ອຍາດເອົາເອກະລາດໃນປີ 1948, ສະພາບການການເມືອງ ແລະ ການປະທະກັນກ່ຽວກັບເຜົ່າພັນຢູ່ ມຽນ ຖືກຕົກເຂົ້າສູ່ສະພາບຂາດສະຖຽນລະພາບຢ່າງລຽນຕິດ. ປີ 2011 ແມ່ນປີທີ່ເກີດການຫັນປ່ຽນຫລາຍຢ່າງໃນຊີວິດດ້ານການເມືອງ ແລະ ເສດຖະກິດຂອງ ມຽນມາ ເມື່ອປະທານາທິບໍດີ U Thein Sein ຂຶ້ນກຳອຳນາດ. ໄລຍະ 4 ປີ ພາຍໃຕ້ການບໍລິຫານຂອງລັດຖະບານເຄິ່ງພົນລະເຮືອນ, ໄດ້ມີຫລາຍມາດຕະການປະຕິຮູບເປີດປະຕູໄດ້ຮັບການຜັນຂະຫຍາຍ ຊ່ວຍໃຫ້ປະເທດມຽນມາ ດ້ວຍພົນລະເມືອງກວ່າ 52 ລ້ານຄົນ ມີບາດກ້າວຫັນປ່ຽນຢ່າງແຮງ. ຄຽງຄູ່ບັນດາຜົນງານທາງດ້ານເສດຖະກິດນັ້ນ, ອຳນາດການປົກຄອງເຄິ່ງພົນລະເຮືອນຢູ່ ມຽນມາ ຍັງສ້າງບາດລ້ຽວປະຫວັດສາດໃນວິວັດການສ້າງສັນຕິພາບແຫ່ງຊາດ. ເປັນຄັ້ງທຳອິດ ນັບແຕ່ເມື່ອຖະແຫລງປະກາດເອກະລາດໃນປີ 1948, ລັດຖະບານ ມຽນມາ ແລະ 8 ໃນຈຳນວນ 15 ກຸ່ມຊົນເຜົ່າສ່ວນຫນ້ອຍ ປະກອບອາວຸດ ໄດ້ລົງນາມໃນຂໍ້ຕົກລົງຢຸດຍິງທົ່ວປະເທດເມື່ອເດືອນ 10/2015, ມຸ້ງໄປເຖິງການສິ້ນສຸດການປະທະກັນພົນເຮືອນໃນເວລາ 60 ກວ່າປີ, ເປີດຊ່ອງທາງສ້າງສັນຕິພາບ, ປະກອບສ່ວນເພີ່ມທະວີສະຖຽນລະພາບ ແລະ ການພັດທະນາຢູ່ ມຽນມາ.
ເລື່ອງ ທ່ານ Htin Kyaw ໄດ້ຮັບເລືອກຕັ້ງເປັນປະທານາທິບໍດີ, ປະຊາຊົນ ມຽນມາ ກໍຄືປະຊາຄົມ ສາກົນ ມີຫລາຍເຫດຜົນເພື່ອເຊື່ອໝັ້ນວ່າ: ວິວັດການປະຕິຮູບຈະສືບຕໍ່ໄດ້ຮັບການຜັນຂະຫຍາຍຢ່າງແຮງ. ເພາະ ຄືດັ່ງປະທານາທິບໍດີ U Thein Sein ໄດ້ຖະແຫລງວ່າ ວິວັດການປະຕິຮູບຍັງຄົງແມ່ນທ່າອ່ຽງຕົ້ນຕໍ ບໍ່ວ່າພັກໃດຂຶ້ນກຳອຳນາດ ເພາະວ່າ ນີ້ແມ່ນເສັ້ນທາງຫນຶ່ງດຽວເພື່ອໃຫ້ປະເທດນີ້ສາມາດເພີ່ມລະດັບຄອງຊີບ ແລະ ປົວແປງສະຫວັດດີການຂອງປະຊາຊົນຢ່າງໝັ້ນຄົງ, ພ້ອມທັງຟື້ນຟູຄືນ, ຍົກສູງບົດບາດສາກົນຂອງຕົນໃນບັນດາທົດສະວັດຈະມາເຖິງ.